Girïsnaꞌanj Ma̱ꞌan Jesús ngà siyànàa ꞌnaꞌ yumanꞌ Samaria
4
Ni̱ nga garânj daꞌngaꞌ ruhuâ Ma̱ꞌan Jesús,
si gataj nej sí fariseo:
Si dànanj gàꞌì nej guiì gaꞌnaꞌ ga̱huin chru̱n riñanj,
ni̱ dànanj ûta duguataꞌ nne Ma̱ꞌan gàꞌ daꞌ Juan.
2 Sani̱ sê Ma̱ꞌan Jesús huin sa duguataꞌ nne nej guiì,
dadinꞌ nej sí duguataꞌ nne nej guiì huin nej sí nìkòꞌ rukû Ma̱ꞌan Jesús,
Jesús habla con una mujer samaritana (Juan 4.1-42)
4 Ni̱ daꞌhui ni̱ña̱n Ma̱ꞌan Jesús ga̱chinj ga̱ꞌan riñan hioꞌó Samaria.
5 Ni̱ gaꞌnaj,
ñan nngaj ꞌngo̱ yumanꞌ snàꞌànj gùꞌnàj Sicar huin doꞌó Samaria,
nìchrùnꞌ hiuj nânj nngaj hioꞌó nagaꞌhuiꞌ Jacob riñan daꞌní sôꞌ José.
6 Ni̱ hiuj dânj nun hiuꞌuj dane sachij Jacob,
hiôꞌ ni̱ gaꞌanj ga̱ne Ma̱ꞌan Jesús nìchrùnꞌ yiꞌnï̂n hiuꞌuj nne dânj,
dadinꞌ gininaj Ma̱ꞌan guendâ gache.
Ni̱ gàꞌ gisîj ꞌngo̱ si agaꞌ yùhuìj i neꞌ gui.
7 Ni̱ gaꞌnaꞌ gi̱digï̂j ꞌngo̱ siyànàa nne riñan hioꞌó Samaria nnee;
ni̱ gataj Ma̱ꞌan Jesús gu̱nïn siyànà dânj:
—Ri̱ki̱ sòꞌ nnee gòꞌòj.
8 Dadinꞌ gaꞌanj gi̱ra̱n nej sí gaꞌnaꞌ ga̱huin chru̱un sa ya̱ nej sij ruhuâ yumanꞌ snàꞌànj nânj.
9 Ni̱ gataj siyànà ꞌna̱ꞌ Samaria gu̱nïn Ma̱ꞌan Jesús:
—Nùnj huin saj ni̱ gachín rèꞌ nnee riñânj go̱ꞌo rèꞌ ni̱ ñunj judío huîn rèꞌ ràꞌaj,
ni̱ ñùnj huin siyànà ꞌna̱ꞌ Samaria.
(Dadinꞌ nitaj si ni̱ka̱j duguiꞌ nej guiì ꞌna̱ꞌ riñan hioꞌó Judea ngà nej guiì ꞌna̱ꞌ riñan hioꞌó Samaria ràꞌaj.)
10 Nanikàj Ma̱ꞌan Jesús ni̱ gata:
—Si gi̱ni̱ꞌînꞌ ahuin sa sàꞌ ga̱ꞌhue ri̱ki̱ Ma̱ꞌan Ñaꞌanj an riñanꞌ,
ni̱ si ga̱ꞌhue gi̱ni̱ꞌînꞌ ahuin sa gataj gu̱nï̂nꞌ:
Ri̱ki̱ nnee gòꞌòj;
ni̱ ga̱ꞌhue gàchìnjꞌ nnee riñânj go̱ꞌo̱ꞌ,
ni̱ ga̱ꞌhue rìkìj nne nìꞌnàꞌa go̱ꞌo̱ꞌ saj áj.
11 Ni̱ gataj siyànà dânj gu̱nïn Ma̱ꞌan Jesús:
—Señor,
sani̱ nitaj nùnj nikaj rèꞌ gi̱ri̱ rèꞌ nnee mánj,
dadinꞌ ûta gùnùn hua ruhuâ hiuꞌuj nânj.
Ni̱ dànèꞌ gìrìꞌ rèꞌ,
nne nìꞌnàꞌa ri̱ki̱ rèꞌ ràꞌaj.
12 Ni̱ dànanj aꞌnï̂nꞌ rèꞌ doj gàꞌ daꞌ rej nej ñûnj Jacob nga na̱nj nîꞌ,
dadinꞌ huej girikî hiuꞌuj nne nânj,
ni̱ nne nnùn ruhuâ hiuꞌuj nânj goꞌoj ngà nej daꞌnin,
ni̱ huê nne nânj goꞌo nej danj yuku na̱nj ánj.
13 Nanikàj Ma̱ꞌan Jesús ni̱ gata:
—Daranꞌ nej guiì go̱ꞌo̱ nne nu̱n ruhuâ hiuꞌuj nânj,
ni̱ gànàkò ñûn ninj nnee;
14 sani̱ nej guiì go̱ꞌo̱ nne rìkìj,
ni̱ nitaj àmàn huaj gànàkò ninj nnee mánj;
dadinꞌ nne gàꞌhuìj go̱ꞌo̱ ninj ni̱ ga̱hui ruhuâ nimân ninj ni̱ na̱gi̱ꞌhiaj nìꞌnàj ninj nìgànj chre ni̱ ga̱ne ninj ngà Ma̱ꞌan Ñaꞌanj an na̱nj ánj.
15 Ni̱ gataj siyànà dânj gu̱nïn Ma̱ꞌan Jesús:
—Señor,
ri̱ki̱ rèꞌ nne dânj gòꞌòj,
ni̱ si̱ ganakó nnee gàꞌ mánj,
hiôꞌ ni̱ si̱ gaꞌnaꞌ gìrìj nnee ruhuâ hiuꞌuj nânj gàꞌ mánj.
16 Hiôꞌ ni̱ gataj Ma̱ꞌan Jesús gu̱nïn siyànà dânj:
—Gui̱j gàkï̀nj sòꞌ nikat,
ni̱ nànìkàj ñûnꞌ ga̱ꞌna̱ꞌ râj.
17 Nanikàj siyànà dânj ni̱ gata:
—Nitaj nikâj hua mánj.
Ni̱ gataj Ma̱ꞌan Jesús:
—Dùgùnàj gatajꞌ:
Si nitaj nikât hua;
18 dadinꞌ gàꞌ gisîj ùnꞌùnꞌ nikat ga,
ni̱ sí nne ngàꞌ hia̱j;
ni̱ sê nikât huin sôꞌ mánj;
ni̱ yàngàꞌ huin sa gatajꞌ na̱nj ánj.
19 Ni̱ gataj siyànà dânj:
—Señor,
garânj daꞌngaꞌ ruhuâj si ꞌngo̱ sinaꞌu gataj dàj ga̱huin huin Ma̱ꞌân rèꞌ.
20 Rej nej ñûnj ginûn ña̱ꞌa̱nj ra̱ kïj nânj riñan Ma̱ꞌan Ñaꞌanj an,
sani̱ nej suj huin judío gataj si yumanꞌ snàꞌànj Jerusalén huin ñan ginùn ña̱ꞌa̱nj nêꞌ Ma̱ꞌan Ñaꞌanj an.
21 Ni̱ gataj Ma̱ꞌan Jesús:
—Gatâ riñanꞌ,
si gùyùmàn ruhuâꞌ,
dadinꞌ gùyùmàn gui ni̱ sê man kïj nânj ni̱ sê man yumanꞌ snàꞌànj Jerusalén huin ñan ga̱ꞌhue ginùn ña̱ꞌa̱nj nej suj riñan Ma̱ꞌan Reꞌ Ñaꞌanj an mánj.
22 Ni̱ nnùn ña̱ꞌa̱nj nej suj riñan sa nun niꞌin nej suj;
ni̱ nnùn ña̱ꞌa̱nj nej ñûnj riñan sa niꞌin nej ñûnj;
dadinꞌ sa gi̱ꞌhiaj ga̱na̱ni̱n nej guiì gahui siganï̂nj nej judío.
23 Sani̱ gùyùmàn gui,
ni̱ hia̱j huin,
si ga̱ nej guiì ginùn ña̱ꞌa̱nj yàngàꞌ Ma̱ꞌan Rê Ñaꞌanj an ngà ruhuâ nimân ninj;
ni̱ huê nej guiì dânj huin sa nanaꞌhuiꞌ Ma̱ꞌan Rê guendâ ginùn ña̱ꞌa̱nj ninj Ma̱ꞌan na̱nj ánj.
24 Ma̱ꞌan Ñaꞌanj an huin Espíritu;
ni̱ nej guiì nnùn ña̱ꞌa̱nj Ma̱ꞌan Ñaꞌanj an,
ni̱ si yàngàꞌ nnûn ña̱ꞌa̱nj ninj Ma̱ꞌan Ñaꞌanj an,
ni̱ ña̱ꞌa̱n huaj si huê dànanj ginùn ña̱ꞌa̱nj ninj Ma̱ꞌan.
25 Ni̱ gataj siyànà nânj:
—Niꞌín si ga̱ꞌna̱ꞌ Mesías —ni̱ huej huin sa gùꞌnàj Cristo —;
ni̱ nga ga̱ꞌnaj ni̱ nda niꞌnï̱nj chre ga̱na̱taj ni̱ ga̱na̱di̱ganj nej nuguanꞌ hua̱ huìi.
26 Ni̱ gataj Ma̱ꞌan Jesús:
—Ñùnj huin Mesías,
ni̱ hué huin sa gaꞌmin ngàꞌ na̱nj ánj.
27 Huê nej nuguanꞌ nânj gaꞌmin Ma̱ꞌan Jesús nikïnj nga gunumân nej sí gaꞌnaꞌ ga̱huin chru̱n riñanj,
ni̱ gahuin ña̱ꞌanj ruhuâ nej sôꞌ guendâ giniꞌin nej sôꞌ nikïnj ganarïsnaꞌan ngà ꞌngo̱ siyànàa;
sani̱ gàꞌ si ꞌngo̱ nej sôꞌ nun gi̱ri̱ñu̱n ruhuâ gataj:
Nùnj huin si gachín naꞌanjꞌ ràꞌaj.
Ni̱ nùnj huin si gaꞌminꞌ ngà siyànà dânj ràꞌaj.
28 Hiôꞌ ni̱ gudunâj siyànà nânj hiaꞌa̱j nu̱n nnee,
ni̱ gaꞌanj yumanꞌ huin yiñan,
ni̱ gata gu̱nïn nej sí màn ruhuâ yumanꞌ dânj:
29 —Ga̱ꞌna̱ꞌ nej suj ni̱ gi̱ni̱ꞌin nej suj ꞌngo̱ sinaꞌu dan dadinꞌ gata daranꞌ nej sa giꞌhiâ.
Ni̱ sê sinaꞌu nan huin Cristo ruhuâ nej suj mínj.
30 Ni̱ gahui nej guiì màn ruhuâ yumanꞌ snàꞌànj dânj,
ni̱ gaꞌnaꞌ ninj ñan ni̱kï̱nꞌ Ma̱ꞌan Jesús.
31 Nga nï̀nꞌ huin ràn doj gùyùmàn nej guiì,
ni̱ duguaneꞌ nej sí ꞌna̱ꞌ ga̱huin chru̱un ya̱ Ma̱ꞌan Jesús,
ni̱ gataj nej sôꞌ:
—Maestrûj,
ya̱ rèꞌ na̱nj ánj.
32 Ni̱ gataj Ma̱ꞌan Jesús:
—Gàꞌ yâj ꞌngo̱ nihia,
sani̱ nun niꞌin nej suj ahuin nihia huin mánj.
33 Hiôꞌ ni̱ gataj nej sí gaꞌnaꞌ ga̱huin chru̱un riñan ꞌngo̱ ni̱ aꞌngô nej sôꞌ:
—Hua̱ ꞌngo̱ guiì gaꞌnaꞌ rë̱ꞌë̱j yâ Ma̱ꞌan Señor na̱nj nîꞌ.
34 Gataj Ma̱ꞌan Jesús:
—Si-nìhiàj huin guendâ gi̱ꞌhia sa garanꞌ ruhuâ Ma̱ꞌan sa gaꞌnḯn gaꞌná,
nda ga̱na̱hui si-sùnj.
35 Sê gataj nej suj:
“Si hua̱ na̱nj ga̱chin nguaꞌanj ahuii gùyùmàn diû gi̱yi̱ꞌne̱ꞌ chrinꞌ trigu.”
Sani̱ ñùnj taj:
Ni̱ ga̱na̱chi̱ nikaj ñan nej suj ni̱ gi̱ni̱ꞌhiaj nej suj riñan hioꞌó ñan gunun nej sij,
dadinꞌ gàꞌ gaminj trigu ni̱ gàꞌ huaj ga̱ꞌne̱ꞌ.
36 Ni̱ sí giꞌhiaj suun ni̱ hua̱ duꞌhue sôꞌ,
nej guiì na̱gi̱ꞌhiaj chre̱ꞌ sôꞌ ga̱ne nìgànj nï̀nꞌ yiñán Ma̱ꞌan Ñaꞌanj an,
ni̱ ga̱na̱huin nìhiàꞌ ruhuâ sí gaꞌmin si-nùguànꞌ Ma̱ꞌan Ñaꞌanj an ni̱ huê danj na̱nj ga̱na̱huin nìhiàꞌ ruhuâ sí nagiꞌhiaj chre̱ꞌ nej sí gi̱nikòꞌ rukû Ma̱ꞌan Ñaꞌanj an na̱nj ánj.
37 Dadinꞌ huê danj taj yàngàꞌ ꞌngo̱ nuguanꞌan:
“ꞌNgo̱ sij huin sí gunun ni̱ aꞌngô sij huin sí ganaranꞌ.”
38 Ñùnj ni̱ gaꞌnï̂n gaꞌanj ga̱na̱ranꞌ nej suj ñan nun gùnùn nej suj;
aꞌngô nej sôꞌ gunun ni̱ nej suj ganaranꞌ sa gunun nej sôꞌ.
39 Ni̱ ûta gàꞌì nej guiì màn yumanꞌ snàꞌànj riñan ni̱ka̱j ñuꞌunj Samaria guyumân ruhuâ niꞌin Ma̱ꞌan Jesús,
rayiꞌî nuguanꞌ ganataꞌ siyànà dânj:
“Gata daranꞌ nej sa giꞌhiâ na̱nj ánj.”
40 Hiôꞌ ni̱ gaꞌnaꞌ nej guiì màn yumanꞌ nìkòꞌ hioꞌó Samaria ñan ni̱kï̱nꞌ Ma̱ꞌan Jesús ni̱ gachín nìꞌhiaj ninj si gùnàj Ma̱ꞌan Jesús ruhuâ yumanꞌ dânj:
Ni̱ gunâj Ma̱ꞌan Jesús huìj gui ruhuâ yumanꞌ dânj.
41 Ni̱ dànanj ûta gàꞌì nej guiì guyumân ruhuâ niꞌin Ma̱ꞌan Jesús ngà rayiꞌî nej nuguanꞌ gaꞌmin,
42 ni̱ gataj nej guiì dânj gu̱nïn siyànà nânj:
—Hia̱j ni̱ sê man rayiꞌî si-nùguànꞌ guyumân ruhuâ nej ñûnj mánj,
dadinꞌ gunïn nej ñûnj ngà rakï̂j nej ñûnj sa gaꞌmin,
ni̱ niꞌin nej ñûnj si yàngàꞌ hia nï̀nꞌ si huê Ma̱ꞌan huin sa gi̱ꞌhiaj ga̱na̱ni̱n nej guiì màn ruhuâ yumiguìi na̱nj ánj.
Giꞌhiaj Ma̱ꞌan Jesús ganahuin daꞌní ꞌngo̱ sí ni̱ka̱j su̱n riñan gobierno
43 Gachîn huìj gui,
ni̱ gahui Ma̱ꞌan Jesús ruhuâ yumanꞌ dânj ni̱ gaꞌan riñan hioꞌó Galilea.
Jesús sana al hijo de un oficial (Juan 4.43-54)
44 Ni̱ gataj Ma̱ꞌan si nitaj àmàn huaj gi̱ni̱nj hueꞌê ꞌngo̱ sí gataj dàj ga̱huin riñan nej guiì màn ruhuâ yiñán sôꞌ.
45 Ni̱ nga gaꞌnaꞌ Ma̱ꞌan Jesús riñan hioꞌó Galilea,
ni̱ ganahuin ra̱ꞌa nej guiì màn riñan hioꞌó dânj Ma̱ꞌan,
dadinꞌ gàꞌ giniꞌin ninj daranꞌ nej daꞌnga giꞌhia ruhuâ yumanꞌ snàꞌànj Jerusalén,
gui nga ginun giꞌñanj an;
dadinꞌ gaꞌanj ninj gui nga ginun giꞌñanj yumanꞌ snàꞌànj dânj.
46 Ni̱ gaꞌnaꞌ ñûn Ma̱ꞌan Jesús,
yumanꞌ Kaná huin doꞌó Galilea,
ñan giꞌhia si ganahuin nnee nne bino.
Ni̱ ruhuâ yumanꞌ dânj nne ꞌngo̱ sí ꞌhiaj sun riñan ꞌngo̱ rey ni̱ ni̱ka̱j sôꞌ sun yàkàan,
ni̱ nda ruhuâ yumanꞌ Kapernaúm nne daꞌní sôꞌ sani̱ si aꞌnanꞌ sôꞌ.
47 Ni̱ nga gunïn sí nânj si gaꞌna Ma̱ꞌan Jesús neꞌ Judea ni̱ guyumanj riñan hioꞌó Galilea,
ni̱ gaꞌnaꞌ sôꞌ riñan Ma̱ꞌan ni̱ gachín nìꞌhiaj sôꞌ ni̱ gataj sôꞌ gu̱nïn,
gi̱ꞌhiá rèꞌ sunuj u ni̱ ga̱ꞌa̱nj rèꞌ ni̱ gi̱ꞌhiá rèꞌ si ga̱na̱huin daꞌnî,
dadinꞌ do̱j sînj huaj ni̱ gàhuìꞌ sij na̱nj ánj.
48 Hiôꞌ ni̱ gataj Ma̱ꞌan Jesús:
—Ni̱ nùnj huin si gi̱ni̱ꞌin nej suj nej daꞌngaꞌa giꞌhiâ ni̱ nùnj huin si gi̱ni̱ꞌin nej suj gi̱ꞌhiâ ga̱na̱huin nej guiì ni̱ gàꞌ dânj ni̱ si̱ guyumân ruhuâ nej suj mánj.
49 Ni̱ gataj sí ni̱ka̱j sun yàkàn dânj:
—Señor,
ga̱ꞌa̱nj rèꞌ hia̱j nï̀nꞌ ga̱chin gàhuìꞌ daꞌnî ni̱ gi̱ꞌhiâ rèꞌ sunuj u ni̱ ga̱na̱huin sij.
50 Ni̱ gataj Ma̱ꞌan Jesús:
—Ga̱ꞌa̱njꞌ,
dadinꞌ hua̱ nìꞌnàꞌ daꞌnít.
Ni̱ guyumân ruhuâ sí nânj niꞌin sôꞌ nej nuguanꞌ gataj Ma̱ꞌan Jesús,
huê danj ni̱ gaꞌanj sôꞌ.
51 Ni̱ nga huaj gùnùkuìꞌ sí dânj yumanꞌ huin yiñán sôꞌ,
ni̱ gaꞌnaꞌ ga̱na̱huin ra̱ꞌa nej si-musû sôꞌ,
ni̱ ganataꞌ nej musu ni̱ gataj nej sôꞌ:
—Hua̱ nìꞌnàꞌ daꞌnít na̱nj ánj.
52 Hiôꞌ ni̱ gachín naꞌanj sí dânj ni̱ gataj sôꞌ,
dàj orâ ganahuin sij na̱nj únj.
Ni̱ gataj nej sí dânj:
—Gukï ꞌngo̱ si agaꞌ chi̱j i giyichinꞌ si nu̱n gachiꞌi sij na̱nj ánj.
53 Ni̱ garânj daꞌnga ruhuâ rej silíj nânj si huê orâ nânj huin nga gataj Ma̱ꞌan Jesús:
“Hua̱ nìꞌnàꞌ daꞌnít”;
ni̱ guyumân ruhuâ sí nânj ni̱ huê danj na̱nj guyumân ruhuâ daꞌ hua̱ gè dukuâ sôꞌ niꞌin nej sôꞌ Ma̱ꞌan Jesús.
54 Ni̱ huê nânj huin gisîj huìj daꞌngaꞌa giꞌhiaj Ma̱ꞌan Jesús nga gaꞌan riñan hioꞌó Galilea.