Duꞌhua tankî Betesda nngaj ꞌngo̱ sí naꞌhue gìsìkìꞌ nneè kú
5
Neꞌ rùkù nga gahuin nej nânj ni̱ hua̱ ꞌngo̱ si-gi̱ꞌña̱nj nej judío,
ni̱ gahui Ma̱ꞌan Jesús gaꞌan Jerusalén.
2 Ni̱ ruhuâ yumanꞌ snàꞌànj Jerusalén nun ꞌngo̱ tankî nnee ni̱ gùꞌnàj tankî dânj nânj hebreo betesda,
rahueꞌ gùꞌnàj ñan gatûj nej matsïj ï,
ni̱ hiuj dânj nikïnꞌ ùnꞌùnꞌ chran arku.
Jesús cura en Sábado (Juan 5.1-15)
3 Ni̱ riki nej chran arku nânj màn ûta gàꞌì nej guiì aꞌnanꞌan,
ni̱ màn nej guiì go̱ꞌoj,
nej guiì go̱chro̱j o,
nej guiì naꞌhue gìsìkìꞌ nneè kú.
4 Dadinꞌ daꞌ gachin ꞌngo̱ diû lij ni̱ gininj ꞌngo̱ ángel gaꞌnaj ñan nu̱n nne dânj,
ni̱ gisikiꞌ nne dânj giꞌhia;
ni̱ sí gahuin hio si̱nï̱n gatûj ruhuâ nne dânj nga gisikij,
ni̱ giyîꞌnej ahuin na̱nj yiꞌì araꞌhue̱ꞌ sôꞌ.
5 Ni̱ hiuj dânj nngaj ꞌngo̱ sí dânj ni̱ gàꞌ gisîj hioꞌ ko̱ yi̱nu̱nꞌ huàꞌnï̀nj ïn aꞌnanꞌ sôꞌ.
6 Ni̱ giniꞌin Ma̱ꞌan Jesús nngaj sí nânj,
ni̱ gayakaj guendaj si gàꞌ gisîj ûta gàꞌì hioꞌo aꞌnanꞌ sôꞌ,
ni̱ gachín naꞌan Ma̱ꞌan sí dânj ni̱ gata gu̱nïn sôꞌ:
—Hua̱ ruhuâꞌ ga̱na̱huînꞌ nîꞌ.
7 Gataj sí aꞌnanꞌ dânj,
—Señor,
hua̱ ruhuâj sani̱ nitaj gàꞌ ꞌngo̱ sí du̱guatûj ñùnj ruhuâ tankî man nga gisikiꞌ nnee;
ni̱ nga nï̀nꞌ gahuin ràn huâ ni̱ gàꞌ gatûj si̱nï̱n aꞌngô síi na̱nj ánj.
8 Ni̱ gataj Ma̱ꞌan Jesús gu̱nïn sí dânj:
—Ga̱na̱chi sòꞌ ni̱ ga̱tâꞌ du̱huêt ni̱ na̱nꞌ dukuâ na̱nj ánj.
9 Ni̱ orâ chre ni̱ ganahuin sí nânj,
ni̱ ganakaj sôꞌ duhuê sôꞌ ni̱ gayiꞌì sôꞌ ni̱ gaché sôꞌ.
Ni̱ gui dânj huin gui ganarânj rûhua.
10 Hiôꞌ ni̱ gayiꞌì nej sí judío ni̱ gataj nej sôꞌ gu̱nïn si ganahuin sàꞌ nneè kú dânj:
—Gui nan huin gui ganarânj ruhuâ;
ni̱ si̱ gaꞌhue ga̱tâꞌ duhuêt ga̱ꞌa̱nj mánj.
11 Ni̱ gataj sí dânj:
—Ma̱ꞌan sí giꞌhiaj ga̱na̱huín,
ni̱ huê sôꞌ huin sí gataj:
“Ga̱ta duhuêt ni̱ ga̱ꞌa̱nj na̱nj ánj.”
12 Hiôꞌ ni̱ gachín naꞌanj nej sí dânj ni̱ gataj nej sôꞌ:
—Ahuin sí gataj:
“Ga̱tâ duhuêt ni̱ ga̱che̱ꞌ ni̱ ga̱ꞌa̱nj ràꞌaj.”
13 Sani̱ nun niꞌin sí dânj ahuin sí giꞌhiaj ganahuin sàꞌ nneè kú sôꞌ,
dadinꞌ guxun Jesús Ma̱ꞌan hiuj dânj.
14 Neꞌ rùkù ni̱ ganariꞌ Ma̱ꞌan Jesús sí nânj nga nikïnꞌ sôꞌ ruhuâ hueꞌ nûhui ni̱ gata gu̱nïn sôꞌ:
—Ni̱ꞌhiajꞌ dadinꞌ gàꞌ ganahuin sàꞌ nneè kúꞌ;
ni̱ si̱ gi̱ꞌhiáꞌ gakï̱nꞌïn gàꞌ mánj,
dadinꞌ ga̱ꞌhue ni̱ gùyùmàn aꞌngô sañun nìko riñanꞌ na̱nj ánj.
15 Huê danj ni̱ gaꞌanj sí nânj,
ni̱ ganata sôꞌ gu̱nïn nej sí judío si Jesús huin sa giꞌhiaj ganahuin sôꞌ.
16 Ni̱ rayiꞌî nânj ni̱ gata rùhuà nej sí judío Ma̱ꞌan Jesús,
guendâ giꞌhia ganahuin nej guiì nej gui ganarânj rûhua.
Jesús defiende su autoridad (Juan 5.16-47)
—Nda gui hia̱j ni̱ giꞌhiaj sun Ma̱ꞌan Rê,
ni̱ huê danj na̱nj ñùnj ni̱ giꞌhiaj sûnj nej na̱nj ánj.
18 Rayiꞌî nej nuguanꞌ gaꞌmin Ma̱ꞌan Jesús ni̱ ûta gahuin ruhuâ nej sí judío da̱gahuiꞌ nej sôꞌ Ma̱ꞌan,
dadinꞌ sê man ꞌngo̱ rïn guendâ nun gi̱nikaj chre gui ganarânj ruhuâ huin,
dadinꞌ rayiꞌî guendâ gata si Rê huin Ma̱ꞌan Ñaꞌanj an,
hiôꞌ ni̱ giꞌhia si gu̱ña̱n chre huin ngà Ma̱ꞌan Ñaꞌanj an.
Ûta nìko ginikaj su̱n Ma̱ꞌan Jesús
19 Hiôꞌ ni̱ nanikàj Ma̱ꞌan Jesús,
ni̱ gata:
—Yàngàꞌ ni̱ yàngàꞌ hiaꞌ nï̀nꞌ gàtà:
Ni̱ nitaj nùnj chrùnj gi̱ꞌhia,
man nej sa giniꞌín giꞌhiaj Ma̱ꞌan rê huê nej danj huin sa chrùnj gi̱ꞌhia,
dadinꞌ daranꞌ nej sa chru̱n Ma̱ꞌan rê gi̱ꞌhia ni̱ huê nej danj huin sa chrùnj gi̱ꞌhia na̱nj ánj.
20 Dadinꞌ ꞌì ruhuâ Ma̱ꞌan Rê niꞌin ñùnj,
ni̱ daranꞌ nej sa giꞌhia ni̱ huê nej dânj huin sa gidiganj ñùnj,
ni̱ dànanj nìko doj hua nej sa gi̱di̱ganj riñânj,
ni̱ ûta ga̱huin ña̱ꞌanj ruhuâ nej suj nga gi̱ni̱ꞌin nej suj sa giꞌhia na̱nj ánj.
21 Dadinꞌ dàj rûnꞌ giꞌhiaj Ma̱ꞌan Rê nga ganaꞌnï̂nj nej nîman,
ni̱ huê danj na̱nj rikij suun riñânj ni̱ ga̱ꞌhue gi̱ꞌhia si ga̱na̱huin nìꞌnàꞌ nimân nej guiì garanꞌ ruhuaj.
22 Huê danj na̱nj nitaj si gaꞌmin gakï̱nꞌ Rê sa giꞌhiaj nej guiì mánj.
Daranꞌ nej sun dânj duguachinj riñânj ni̱ ñùnj huin sa ganakaj guendâ dàj giꞌhiaj daꞌ goꞌngo̱ nej guiì.
23 Daꞌnga ni̱ gi̱nikaj chre̱j daranꞌ nej guiì riñânj dàj rûn ginikaj chre̱j ninj riñan Ma̱ꞌan Rê.
Ni̱ guiì nitaj si ni̱ka̱j chre̱j riñânj,
ni̱ nitaj si ni̱ka̱j chre̱j ninj riñan Ma̱ꞌan Rê Ñaꞌanj gaꞌnḯn gaꞌná mánj.
24 ’Yàngàꞌ,
ni̱ yàngàꞌ hia nï̀nꞌ gatâ:
Ni̱ guiì gunïn si-nùguànꞌànj,
ni̱ guyumân ruhuâ ninj niꞌin ninj Ma̱ꞌan sa gaꞌnḯn gaꞌná,
ni̱ ga̱ne nìgànj ninj ngà Ma̱ꞌan Ñaꞌanj an;
ni̱ si̱ giranꞌ sa̱ñu̱n ninj gàꞌ mánj,
dadinꞌ gahuin ninj guiì gahuiꞌi sani̱ ganahuin nìꞌnàꞌ ninj.
25 Yàngàꞌ ni̱ yàngàꞌ hia nï̀nꞌ gàtà:
Gùyùmàn gui ni̱ hia̱j huin,
nga gu̱nïn nej nîman gàꞌmìn;
ni̱ nej nimân gunïn nuguanꞌ gaꞌmînj ni̱ ga̱ne nìgànj ninj.
26 Dadinꞌ dàj rûnꞌ hua nìꞌnàꞌ Ma̱ꞌan Rê giꞌhiaj Ma̱ꞌan,
ni̱ huê danj giriꞌ ni̱ꞌhiâ si ga̱ꞌhue gi̱ꞌhia ga̱ nìꞌnàꞌ Ma̱ꞌán;
27 Ni̱ huê danj rikî Ma̱ꞌan Rê suun raꞌá guendâ ga̱ꞌhue ga̱ya̱ka̱j guendâj dàj giꞌhiaj nej guiì,
dadinꞌ huê Ma̱ꞌán huin sa ni̱ka̱j su̱n riñan yumiguìi nânj.
28 Si̱ gahuin ña̱ꞌanj ruhuâ nej suj rayiꞌî nej nuguanꞌ ga̱ta mánj:
Dadinꞌ gùyùmàn gui ni̱ daranꞌ nej nimân nngaj riki hioꞌóo ni̱ gu̱nïn ninj gàꞌmìn na̱nj ánj;
29 Ni̱ gànàꞌnï̀nj nej nimân giꞌhiaj sa sàꞌa ni̱ ga̱hui̱ ninj ñan nngaj ninj dânj guendâ ga̱ne nìgànj ninj;
sani̱ nej nimân giꞌhiaj gakï̱nꞌïn ni̱ ga̱hui̱ ninj ñan nngaj ninj dânj guendâ gi̱ranꞌ sa̱ñu̱n nìgànj ninj na̱nj ánj.
Sa giniꞌin Ma̱ꞌan Cristo giꞌhiaj Re ni̱ huê danj giꞌhia
30 ’Nitaj nùnj ga̱ꞌhue gi̱ꞌhia ngà Ma̱ꞌán mánj;
sa gunḯn ni̱ huê dânj huin sa gayakaj guendâj;
ni̱ dàj gayakaj guendâj ni̱ huê dânj huin sa ni̱ka̱ giꞌhia,
dadinꞌ sê si̱ giꞌhia sa garanꞌ ruhuâj mánj,
giꞌhia dàj garanꞌ ruhuâ Ma̱ꞌan sa gaꞌnḯn gaꞌná.
31 Si gànàtàj rayiꞌî Maꞌán,
ni̱ nuguanꞌ gànàtàj ni̱ sê nuguanꞌ yàngàꞌa huin mánj.
32 Aꞌngô sôꞌ huin sa gànàtàꞌ rayiꞌî,
ni̱ niꞌín si nuguanꞌ gànàtàꞌ sôꞌ rayiꞌí ni̱ huin nuguanꞌ yàngàꞌa.
33 Ni̱ nga gaꞌnḯn nej suj nej sí gaꞌanj gàchìnj naꞌanj riñan Juan,
ni̱ nuguanꞌ ganataꞌ sôꞌ huin sa yàngàꞌa rayiꞌí.
34 Sani̱ ñùnj ni̱ nitaj si ànàꞌhuì si gànàtàꞌ ꞌngo̱ síi dàj huaj mánj;
sani̱ gatâ dànanj,
daꞌnga ni̱ gaꞌhue ga̱na̱ni̱n nej suj.
35 Dàj rûnꞌ huin chrun tàj ñaꞌan gudugùun huê danj huin Juan dadinꞌ ganataꞌ sôꞌ si-nùguànꞌ Ma̱ꞌan Ñaꞌanj an riñan nej suj ni̱ garânj daꞌngaꞌ ruhuâ nej suj giꞌhiaj sôꞌ;
ni̱ ga ꞌngo̱ diû ni̱ gahuin nìhiàꞌ ruhuâ nej suj ni̱ gaché nej suj chrej gidigân sôꞌ.
36 Sani̱ nej nuguanꞌ ganatá ni̱ dànanj du̱ꞌhue̱ man doj gàꞌ daꞌ nej nuguanꞌ ganataꞌ Juan;
dadinꞌ sun rikî Ma̱ꞌan Rê guendâ da̱gahuín,
ni̱ huê nej sun dânj huin sa ganataꞌ rayiꞌí,
ni̱ huê nej sun dânj huin sa ganataꞌ si Ma̱ꞌan Rê gaꞌnḯn gaꞌná.
37 Ni̱ huê Ma̱ꞌan Rê huin sa gaꞌnḯn gaꞌná,
ni̱ Ma̱ꞌan huin sa ganataꞌ rayiꞌí.
Sani̱ nitaj àmàn gunïn nej suj nej nuguanꞌ gaꞌmin ni̱ nun gi̱ni̱ꞌin nej suj dàj hua Ma̱ꞌan mánj,
38 ni̱ huê danj na̱nj nitaj si nu̱n si-nùguànꞌ Ma̱ꞌan ruhuâ nimân nej suj;
dadinꞌ nun gùyùmàn ruhuâ nej suj niꞌin nej suj,
Ma̱ꞌan sa gaꞌnḯn gaꞌná riñan nej suj mánj.
39 Na̱di̱giꞌñun nej suj si-nùguànꞌ Ma̱ꞌan Ñaꞌanj an;
dadinꞌ rûꞌhuaj si huej huin sa gi̱di̱gân ni̱ ga̱ꞌhue gànàrìꞌ nej suj ni̱ ga̱na̱huin nìꞌnàꞌ nej suj ni̱ ga̱ne nìgànj nej suj ngà Ma̱ꞌan Ñaꞌanj an;
40 sani̱ naꞌhuej nej suj ga̱ꞌna̱ꞌ nej suj riñânj huê danj ni̱ si̱ ganahuin nìꞌnàꞌ nej suj mánj.
41 ’Nun naꞌhuí si gi̱ta raꞌa nej síi rayiꞌî nej sa giꞌhia mánj.
42 Sani̱ niꞌín,
si nitaj sa ꞌì ruhuâ Ma̱ꞌan Ñaꞌanj an nun ruhuâ nimân nej suj.
43 Ñùnj ni̱ gaꞌná ngà siyu̱gui Ma̱ꞌan Rê,
ni̱ nun ga̱na̱huin ra̱ꞌa nej suj ñùnj;
ni̱ si hua̱ aꞌngô sí ga̱ꞌna̱ꞌ ngà siyu̱gui ma̱ꞌan sôꞌ,
ni̱ ga̱na̱huin ra̱ꞌa nej suj sôꞌ.
44 Dàj gi̱ꞌhiaj nej suj ga̱ꞌhue gùyùmàn ruhuâ nej suj,
dadinꞌ ûta garanꞌ ruhuâ nej suj si ga̱ꞌmi̱n hueꞌê ꞌngo̱ ni̱ aꞌngô nej duguiꞌ nej suj rayiꞌî nej suj,
ni̱ nitaj si nanaꞌhuiꞌ nej suj si ga̱ꞌmi̱n hueꞌê Ma̱ꞌan Ñaꞌanj an rayiꞌî nej suj ràꞌaj.
45 Ni̱ si̱ ganï̂n ruhuâ nej suj si ga̱ra̱n ruhuâj rayiꞌî nej suj riñan Ma̱ꞌan Rê mánj;
hua̱ ni̱ña̱n sôꞌ ga̱ra̱n ruhuâ rayiꞌî nej suj,
ni̱ sôꞌ dânj huin Moisés,
dadinꞌ ganï̂n ruhuâ nej suj si sa gidigân sôꞌ gi̱ꞌhiaj ga̱na̱ni̱n nej suj.
46 Dadinꞌ si guyumân ruhuâ nej suj niꞌin nej suj Moisés,
hiôꞌ ni̱ gùyùmàn ruhuâ nej suj niꞌin nej suj ñùnj,
dadinꞌ huê rayiꞌí huin sa gachrûn Moisés.
47 Sani̱ si nitaj si guyumân ruhuâ nej suj niꞌin nej suj ñanj gachrûn Moisés,
ni̱ dàj giꞌhiaj nej suj gùyùmàn ruhuâ nej suj niꞌin nej suj si-nùguànꞌanj ràꞌaj.