Gaꞌhuiꞌ Ma̱ꞌan Jesús Ya ùnꞌùnꞌ mîn nej síi
6
Neꞌ rùkù nej nânj,
ni̱ gaꞌanj Ma̱ꞌan Jesús neꞌ ané duꞌhua nne ña̱ꞌa̱nj gùꞌnàj Tiberia huin doꞌó Galilea.
2 Ni̱ nìkòꞌ ûta gàꞌì nej guiì rìgìi gaꞌnaꞌ ninj rukû Ma̱ꞌan,
dadinꞌ giniꞌin ninj si ûta ganahuin nej guiì aꞌnanꞌan giꞌhiaj Ma̱ꞌan.
Jesús alimenta una multitud (Juan 6.1-15)
3 Ni̱ gahui Ma̱ꞌan gaꞌan raa̱ ꞌngo̱ kïj ï,
ni̱ gaꞌanj ga̱ne ngà nej sí ꞌna̱ꞌ ga̱huin chru̱n riñan hiuj dânj.
4 Ni̱ gàꞌ doj huaj gùyùmàn giꞌñanj pascua,
si-gi̱ꞌña̱nj nej sí judío.
5 Ni̱ ganachi nikaj ñan Ma̱ꞌan Jesús,
ni̱ giniꞌin si ꞌna̱ꞌ ûta gàꞌì nej guiì riñanj,
ni̱ gata gu̱nïn Felipe:
—Dànèꞌ ga̱ꞌa̱nj gi̱ru̱nꞌ rachrúun ya̱ daranꞌ nej guiì nânj ràꞌaj.
6 Sani̱ man si gata dànanj gu̱nïn sôꞌ guendâ ruhuaj ga̱ya̱ka daꞌngaꞌa ngà sôꞌ;
dadinꞌ gàꞌ niꞌin sàꞌaj dàj gi̱ꞌhia gìrìꞌ nej guiì ya̱ ninj.
7 Nanikàj Felipe ni̱ gataj sôꞌ:
—Si gi̱ru̱nꞌ huìj sientu denario rachrúun ni̱ dàdòꞌ sînj gi̱si ya̱ nej guiì na̱nj ánj.
8 Ni̱ gataj:
Andrés sôꞌ huin dinḯn Pedro sí gaꞌnaꞌ ga̱huin chru̱n riñanj.
9 —Hiuj nânj nikïnꞌ ꞌngo̱ sí hua̱ lij,
ni̱ ni̱ka̱j sôꞌ ùnꞌùnꞌ rachrún sebada ni̱ ni̱ka̱j sôꞌ huìj yukuaj a;
sani̱ àmàn gìsìj nânj ya̱ nej guiì rigìi ràꞌaj.
10 Hiôꞌ ni̱ gataj Ma̱ꞌan Jesús:
—Ga̱ta̱j nej suj gu̱nïn nej guiì si ga̱ꞌa̱nj ga̱ne ninj.
Ni̱ ûta mân koj o riñan hioꞌó dânj,
ni̱ gaꞌanj ga̱ne daran nej guiì ni̱ gisîj ꞌngo̱ si ùnꞌùnꞌ mîn nej síi mân hiu dânj.
11 Ni̱ gidaꞌa Ma̱ꞌan Jesús nej rachrúun,
ni̱ nga gisîj gaꞌhuij si guruhuâ Ma̱ꞌan Ñaꞌanj an,
ni̱ guchraꞌ da̱ꞌa ni̱ gaꞌhuij raꞌa nej sí gaꞌnaꞌ ga̱huin chru̱n riñanj,
ni̱ huê danj giꞌhia ngà nej yukuaj a,
ni̱ si hua̱ sí ruhuâ ya̱ doj ni̱ hua̱ doj ya̱ nej sôꞌ.
12 Ni̱ nga gisîj ya daranꞌ nej guiì ni̱ gunumân riki ninj,
ni̱ gataj Ma̱ꞌan Jesús gu̱nïn nej sí gaꞌnaꞌ ga̱huin chru̱n riñanj:
—Ga̱na̱ranꞌ nej suj nej dasû gunâj dânj,
ni̱ si̱ girëꞌ gàꞌ si ꞌngo̱ dasû lij mánj.
13 Ni̱ ganaranꞌ nej sôꞌ nej dasû lij gunâj dânj,
ni̱ mân ùnꞌùnꞌ gè rachrúun huin sani̱ gisi yâ daranꞌ nej guiì ni̱ dànanj gunâj yùhuìj yugûti nej dasû lij nej rachrún dânj ganaranꞌ nej sij.
14 Hiôꞌ ni̱ nga giniꞌin nej sí nânj nej daꞌnga giꞌhiaj Ma̱ꞌan Jesús,
ni̱ gataj nej sôꞌ:
—Yàngàꞌ hia nï̀nꞌ ni̱ sí nânj huin sôꞌ gataj dàj ga̱huin ni̱ gaꞌnaꞌ sôꞌ ruhuâ yumiguìi.
15 Sani̱ garânj daꞌngaꞌ ruhuâ Ma̱ꞌan Jesús si ruhuâ nej sij ga̱ꞌna̱ꞌ gi̱daꞌa nej sij Ma̱ꞌan ni̱ ga̱na̱chru̱n su̱n nej sij ga̱huin Rey ni̱ gi̱nikaj sunj riñan nej sij,
huê danj ni̱ guxunj Ma̱ꞌan ni̱ gaꞌanj ꞌngo̱ rïn riki kïj ï.
Aché Ma̱ꞌan Jesús riñan nne ña̱ꞌa̱nj
16 Ni̱ nga ginìn gui dânj,
ni̱ gananinj nej sí gaꞌnaꞌ ga̱huin chru̱n riñanj ni̱ gaꞌanj nej sôꞌ duꞌhua nne ña̱ꞌa̱nj,
Jesús camina sobre el agua (Juan 6.16-22)
17 ni̱ nga gatûj nej sôꞌ ruhuâ barku ni̱ gachîn nej sôꞌ gaꞌanj nej sôꞌ yumanꞌ Kapernaúm.
Sani̱ gàꞌ ꞌna̱ꞌ ga̱huin ru̱mi̱nꞌ,
ni̱ hua̱ na̱nj nun ga̱ꞌna̱ꞌ Ma̱ꞌan Jesús riñan nej sôꞌ.
18 Ni̱ ûta ganayumàn nne ña̱ꞌa̱nj dadinꞌ ûta nùkuaj gaꞌhuij nanèe.
19 Ni̱ gàꞌ gisîj gaché barkû daꞌngaꞌ ꞌngo̱ si ùnꞌùnꞌ nej si huàtànꞌ mîn metru riñan nne ña̱ꞌa̱nj,
ni̱ giniꞌin nej sij gaché Ma̱ꞌan Jesús ꞌnaj riñan nne ña̱ꞌa̱nj,
ni̱ ꞌna̱ꞌ nichi̱j riñan barkû nu̱n nej sij;
ni̱ ûta guyuꞌhuiꞌ nej sij giꞌhia.
20 Sani̱ gataj Ma̱ꞌan Jesús gu̱nïn nej sij:
—Ñùnj huin;
ni̱ si̱ guyuꞌhui nej suj mánj.
21 Hiôꞌ ni̱ ûta ganahuin nìhiàꞌ ruhuâ nej sij ni̱ ganahuin ra̱ꞌa nej sij Ma̱ꞌan Jesús ni̱ gatu ruhuâ barkû nu̱n nej sij huaj nej sij,
ni̱ nda nanè chre guchiꞌ barkû dânj riñan hioꞌó hua̱j nej sij.
Nanaꞌhuiꞌ nej guiì Ma̱ꞌan Jesús
22 Gui dânj ni̱ giniꞌin nej guiì gimân duꞌhua nne ña̱ꞌa̱nj ngà Ma̱ꞌan Jesús si ꞌngo̱ rïn barku nikïnꞌ,
ni̱ man ꞌngo̱ rïn nej sí gaꞌnaꞌ ga̱huin chru̱n riñan Ma̱ꞌan gatûj ruhuâ barku ni̱ gaꞌanj nej sôꞌ ni̱ nun gi̱ni̱ꞌin nej guiì ga̱tu̱ Ma̱ꞌan Jesús gaꞌan ruhuâ barku dânj gaꞌan ngà nej sôꞌ.
El pan de vida (Juan 6.22-71)
23 Huê danj ni̱ guyumân aꞌngô nej barku ꞌna̱ꞌ riñan hioꞌó Tiberia duꞌhua nne ña̱ꞌa̱nj ñan yâ nej sij rachrúun nga gaꞌhuiꞌ Ma̱ꞌan Jesús si guruhuâ Ma̱ꞌan Ñaꞌanj an.
24 Ni̱ nga giniꞌin nej guiì,
si nitaj Ma̱ꞌan Jesús nikïnꞌ hiuj dânj,
ni̱ nitaj nej sí gaꞌnaꞌ ga̱huin chru̱n riñan Ma̱ꞌan nikïnꞌ hiuj dânj,
ni̱ gatûj ninj ruhuâ nej barkû màn hiuj dânj ni̱ gaꞌanj ninj Kapernaúm,
dadinꞌ nanaꞌhuiꞌ ninj Ma̱ꞌan Jesús.
Jesús huin rachrún gi̱ꞌhiaj ga̱ nìꞌnòꞌ
25 Ni̱ nga ganariꞌ ninj Ma̱ꞌan Jesús ané duꞌhua nne ña̱ꞌa̱nj,
ni̱ gataj ninj gu̱nïn:
—Maestrûj àmàn àsìj guyumân Ma̱ꞌân rèꞌ hiuj nânj ràꞌaj.
26 Nanikàj Ma̱ꞌan Jesús ni̱ gata:
—Yàngàꞌ ni̱ yàngàꞌ hia nï̀nꞌ ga̱ta̱ gunïn nej suj ni̱ nanaꞌhuiꞌ nej suj ñùnj dadinꞌ ruhuâ nej suj giriꞌ nej suj rachrúun yâ nej suj ni̱ gunumân riki nej suj,
sani̱ sê si̱ nanaꞌhuiꞌ nej suj ñùnj guendâ giniꞌin nej suj daꞌngaꞌ giꞌhiâ mánj.
27 Gi̱ꞌhiaj sun nej suj,
sani̱ sê rayiꞌî nihia ga̱ꞌhue gi̱rë̱ꞌ mánj,
gi̱ꞌhiaj sun nej suj rayiꞌî nihia ga̱ nìgànj sa si̱ girëꞌ,
ni̱ huê nihia dânj huin sa rìkìj;
dadinꞌ huê rayiꞌî nihia dânj huin sa gaꞌmin Ma̱ꞌan Rê.
28 Hiôꞌ ni̱ gataj nej sí dânj:
—Nùnj huin si gi̱ꞌhiaj nej ñûnj ni̱ ga̱ꞌhue da̱gahuin hueꞌê nej ñûnj riñan Ma̱ꞌan Ñaꞌanj an ràꞌaj.
29 Nanikàj Ma̱ꞌan Jesús ni̱ gata:
—Huê nej nânj huin sa garanꞌ ruhuâ Ma̱ꞌan Ñaꞌanj an gi̱ꞌhiaj nej suj,
gùyùmàn ruhuâ nej suj niꞌin nej suj Ma̱ꞌan sa gaꞌnḯn gaꞌná riñan nej suj.
30 Hiôꞌ ni̱ gataj nej sij:
—Ahuin daꞌngaꞌ ga̱ꞌhue gi̱ꞌhiâꞌ,
ni̱ gi̱ni̱ꞌin nej ñûn ni̱ gùyùmàn ruhuâ nej ñûnj niꞌin nej ñûnj sòꞌ ràꞌaj.
31 Dadinꞌ rej nej ñûnj ni̱ yâ nej sôꞌ rachrún maná riñan hioꞌó nàkòo,
dàj rûnꞌ taj riñan si-nùguànꞌ Ma̱ꞌan Ñaꞌanj an:
“Rachrún gaꞌnaꞌ yàtàꞌa gaꞌhuiꞌ Ma̱ꞌan Ñaꞌanj an yâ nej sij.”
32 Ni̱ gataj Ma̱ꞌan Jesús:
—Yàngàꞌ,
ni̱ yàngàꞌ hia nï̂nꞌ tâ:
Si sê rachrún gaꞌnaꞌ yàtàꞌa huin sa rikî Moisés yâ nej suj mánj.
Sani̱ Ma̱ꞌan Rê huin sa ri̱ki̱ rachrún yàꞌngàꞌ hia ni̱ rachrún dânj huin sa gaꞌnaꞌ yàtàꞌa.
33 Dadinꞌ si-ràchrùnj Ma̱ꞌan Ñaꞌanj an huín dadinꞌ ginîn gaꞌná neꞌ yàtàꞌa ni̱ gi̱ꞌhia si ga̱na̱huin nìꞌnàꞌ Ma̱ꞌan nimân nej guiì màn ruhuâ yumiguìi.
34 Ni̱ gataj nej sí dânj:
—Señor,
ri̱ki̱ sòꞌ daranꞌ nej gui rachrún dânj ya̱ nej ñûnj.
35 Ni̱ gataj Ma̱ꞌan Jesús:
—Ñùnj huin rachrún gi̱ꞌhiaj ga̱ nìꞌnàꞌ Ma̱ꞌan nimân nej suj;
nej guiì ꞌna̱ꞌ riñânj,
ni̱ nitaj àmàn gànàchinj yiꞌnaa riki ninj mánj;
ni̱ nej guiì gùyùmàn ruhuâ niꞌin ñùnj,
ni̱ nitaj àmàn gànàkò ninj nnee mánj.
36 Sani̱ ñùnj taj gu̱nïn nej suj,
ni̱ nùnj huin si gi̱ni̱ꞌin nej suj ñùnj,
sani̱ gàꞌ danj ni̱ si̱ guyumân ruhuâ nej suj niꞌin nej suj ñùnj mánj.
37 Daranꞌ nej guiì rikî Ma̱ꞌan Rê raꞌá,
ni̱ ga̱ꞌna̱ꞌ ninj riñânj;
ni̱ nej guiì ga̱ꞌna̱ꞌ riñânj,
ni̱ si̱ girîj ga̱ꞌa̱nj ninj neꞌ ye̱ꞌe mánj.
38 Dadinꞌ ginîn gaꞌná yàtàꞌa,
sani̱ si̱ gaꞌhue gi̱ꞌhia sa garanꞌ ruhuâj mánj,
gaꞌná guendâ gi̱ꞌhia sa garanꞌ ruhuâ Ma̱ꞌan sa gaꞌnḯn gaꞌná.
39 Ni̱ huê nânj huin sa garanꞌ ruhuâ Ma̱ꞌan Rê,
Ma̱ꞌan sa gaꞌnḯn gaꞌná:
Daranꞌ nej guiì rikij riñânj,
ni̱ gàꞌ si ꞌngo̱ ninj si̱ gaꞌanj ni̱ꞌhia gi̱ꞌhia,
dadinꞌ gi̱ꞌhia si gànàꞌnï̀nj ninj gui ga̱ꞌna̱ꞌ neꞌ ña̱an.
40 Ni̱ giꞌhiâ dànanj dadinꞌ garanꞌ ruhuâ Ma̱ꞌan Rê Ma̱ꞌan sa gaꞌnḯn gaꞌná:
Dadinꞌ daranꞌ nej guiì ginûn ñan ñùnj,
ni̱ guyumân ruhuâ ninj niꞌin ninj ñùnj,
ni̱ ga̱ne nìgànj ninj;
ni̱ ñùnj gi̱ꞌhiaj ni̱ gànàꞌnï̀nj ninj diû ga̱ꞌna̱ꞌ neꞌ ña̱an.
41 Huê danj ni̱ gayiꞌì nej sí judío,
ni̱ gaꞌmin nej sôꞌ rayiꞌî Ma̱ꞌan Jesús,
rayiꞌî guendâ gata:
“Ñùnj huin rachrún gininj gaꞌnaꞌ yàtàꞌa.”
42 Ni̱ gataj nej sôꞌ:
—Sê sí nânj huin Jesús,
daꞌní José,
dadinꞌ niꞌin nêꞌ rej sij ngà nni sij ràꞌ saj ûnꞌ.
Nùnj huin saj ni̱ gataj sij:
Yàtàꞌa ginîn gaꞌná.
43 Nanikàj Ma̱ꞌan Jesús ni̱ gata:
—Si̱ gaꞌmin nej suj rayiꞌî nej duguiꞌ nej suj mánj.
44 Gàꞌ si ngo̱ nej guiì si̱ ga̱ꞌhue ga̱ꞌna̱ꞌ riñânj,
si nitaj si ni̱ka̱j Ma̱ꞌan Rê gaꞌnaꞌ ninj riñânj mánj;
ni̱ ñùnj huin sa gi̱ꞌhiaj gànàꞌnï̀nj ninj nej gui ga̱ꞌna̱ꞌ neꞌ ña̱an.
45 Ni̱ huê danj taj riñan ñanj librû gachrûn nej sôꞌ gataj dàj ga̱huin:
“Huê danj ni̱,
Ma̱ꞌan Rê gi̱di̱gân riñan daranꞌ nej guiì.”
Ni̱ guiì gu̱nïn ni̱ ga̱huin chru̱n ninj giꞌhia,
nej guiì dânj huin sa ga̱ꞌna̱ꞌ riñânj.
46 ’Ni̱ sê si̱ gi̱ni̱ꞌin nej guiì dàj hua Ma̱ꞌan Rê mánj,
man ñùnj huin sa niꞌin dàj huaj,
dadinꞌ huê Ma̱ꞌan huin sa gaꞌnḯn gaꞌná.
47 Yàngàꞌ ni̱ yàngàꞌ hia nï̀nꞌ tâ:
Guiì guyumân ruhuâ niꞌin ñùnj ni̱ ga̱ne nìgànj ninj.
48 Ñùnj huin rachrún gi̱ꞌhiaj ga̱ nìꞌnàꞌ ninj.
49 Yâ rej nej suj rachrún maná nga gane nej sôꞌ riñan hioꞌó nàkòo,
sani̱ gahuiꞌ nej sôꞌ.
50 Sani̱ ñùnj gaꞌmin rayiꞌî rachrún gininj gaꞌnaꞌ yàtàꞌa,
ni̱ nej guiì ya̱ rachrún nânj,
ni̱ si̱ gahuiꞌ ninj mánj.
51 Ñùnj huin rachrún nìꞌnàꞌ gininj gaꞌnaꞌ yàtàꞌa;
ni̱ si hua̱ ꞌngo̱ guiì ya̱ rachrún nânj,
ni̱ ga̱ne nìgànj ninj;
ni̱ rachrún rìkìj ya̱ ninj huin nneè kû,
ni̱ ga̱ꞌhue ga̱na̱huin nìꞌnàꞌ ninj gi̱ꞌhia.
52 Hiôꞌ ni̱ gayiꞌì nej judío ni̱ ûta gunïnꞌ nej sôꞌ ni̱ gataj nej sôꞌ:
—Dàj giꞌhiaj sí nânj ga̱ꞌhue ri̱ki̱ sôꞌ nneè kú sôꞌ yo̱ꞌ ràꞌaj.
53 Ni̱ gataj Ma̱ꞌan Jesús:
—Yàngàꞌ ni̱ yàngàꞌ hia nï̀nꞌ gàtà:
Ni̱ si si̱ yâ nej suj nnêj,
ni̱ si̱ goꞌo nej suj tún,
ni̱ si̱ gaꞌhue ga̱ nìꞌnàꞌ nej suj mánj.
54 Guiì yâ nnêj ni̱ goꞌo ninj tún,
ni̱ ga̱ne nìgànj ninj;
ni̱ ñùnj gi̱ꞌhiaj gànàꞌnï̀nj ninj nej guiì ga̱ꞌna̱ꞌ neꞌ ña̱an.
55 Dadinꞌ nneè kû huin nihia yàngàꞌa,
ni̱ tún huin nne yàꞌngàꞌ go̱ꞌo̱ nej suj.
56 Guiì yâ nneè kû ni̱ goꞌo ninj tún,
ni̱ nne ninj ngàj ni̱ nné ngà ninj.
57 Dàj rûnꞌ gaꞌnḯn Ma̱ꞌan Rê hua̱ nìꞌnàꞌa gaꞌná,
ni̱ hua̱ nìꞌnàj giꞌhiaj Ma̱ꞌan,
huê danj ni̱ guiì ya nnêj,
ni̱ ga̱ nìꞌnàꞌ ninj.
58 Nânj huin rachrún gininj gaꞌnaꞌ yàtàꞌa;
ni̱ nitaj si huaj dàj rûnꞌ hua rachrún maná yâ rej nej suj,
dadinꞌ yâ nej sôꞌ sani̱ gahuiꞌ nej sôꞌ;
guiì ya̱ rachrún nânj,
ni̱ ga̱ne nìgànj ninj.
59 Huê nej nuguanꞌ nânj gaꞌmin Ma̱ꞌan Jesús nga nikïnj ruhuâ hueꞌ si-nùhuì nej judío,
ni̱ huê dànanj gidiganj ruhuâ yumanꞌ Kapernaúm.
Nuguanꞌ gi̱ꞌhiaj ga̱ nìꞌnàꞌ nìgùnꞌ
60 Ni̱ nga gunïn,
gàꞌì nej sí ꞌna̱ꞌ ga̱huin chru̱n riñan Ma̱ꞌan Jesús nej nuguanꞌ nânj ni̱ gataj nej sôꞌ:
—Ûta chìꞌ hua nuguanꞌ nânj;
ni̱ ahuin guiì gùnùkuaj gu̱nïn gàꞌ ûnj.
61 Ni̱ garânj daꞌngaꞌ ruhuâ Ma̱ꞌan Jesús si dànanj aꞌmin nej sí ꞌna̱ꞌ ga̱huin chru̱n riñanj rayiꞌî si-nùguànꞌanj,
ni̱ gata gu̱nïn nej sôꞌ:
—Ginaꞌan ruhuâ nej suj rayiꞌî nuguanꞌ nan na̱nj nîꞌ.
62 Dàj gi̱ꞌhiaj nej suj,
si gi̱ni̱ꞌin nej suj gàhuì gàꞌàn yàtàꞌa ñan gane sìnï̀nj ràꞌaj.
63 Ma̱ꞌan Espíritu Santo huin sa gi̱ꞌhiaj ganahuin nìꞌnàꞌ nej guiì;
sani̱ ꞌngo̱ síi ni̱ nitaj nùnj ga̱ꞌhue gi̱ꞌhia sôꞌ mánj;
nej nuguanꞌ gaꞌmînj ni̱ huej huin sa gi̱ꞌhiaj ga̱ꞌhue ga̱na̱huin nìꞌnàꞌ nej guiì.
64 Sani̱ hua̱ da̱ꞌa̱j nej suj nitaj si guyumân ruhuâ niꞌin si-nùguànꞌànj sani̱ ûta gi̱ranꞌ sa̱ñu̱n nej suj.
Dadinꞌ àsìj si̱nï̱ïn ni̱ gàꞌ niꞌin Ma̱ꞌan Jesús ahuin nej guiì nitaj si guyumân ruhuâ niꞌin Ma̱ꞌan,
ni̱ gàꞌ niꞌin ahuin sí nàgàꞌhuìꞌ Ma̱ꞌan riñan nej judío.
65 Ni̱ gata:
—Rayiꞌî dan gatâ ni̱ gàꞌ si ꞌngo̱ guiì si̱ gaꞌhue ga̱ꞌna̱ꞌ riñânj,
si nuhuiꞌ Ma̱ꞌan Rê gaꞌnḯn gaꞌnaꞌ ninj mánj.
66 Àsìj gui dânj ni̱ nanikàj rùkù ûta gàꞌì nej sí gaꞌnaꞌ ga̱huin chru̱n riñan Ma̱ꞌan Jesús,
huê danj ni̱ nitaj si gaché nej sôꞌ ngà Ma̱ꞌan gàꞌ mánj.
67 Hiôꞌ ni̱ gataj Ma̱ꞌan Jesús gu̱nïn nej yùhuìj nej sí gaꞌnaꞌ ga̱huin chru̱n riñanj:
—Ruhuâ nej suj nànìkàj nej suj ni̱ ga̱ꞌa̱nj nej suj nej na̱nj nînꞌ.
68 Nanikàj Simón ni̱ gataj sôꞌ:
—Señor,
ahuin aꞌngô sôꞌ ri̱ña̱n ga̱ꞌa̱nj nej ñûnj ràꞌaj.
Ni̱ si sòꞌ huin sa ni̱ka̱j nuguanꞌ na̱gi̱ꞌhia̱j nìꞌnàꞌ nej ñûnj ni̱ ga̱ne nìgànj nej ñûnj ràꞌaj.
69 Ni̱ guyumân ruhuâ nej ñûnj niꞌin nej ñûnj Ma̱ꞌân rèꞌ ni̱ niꞌin nej ñûnj si huê Ma̱ꞌân rèꞌ huin Ma̱ꞌan Cristo,
Daꞌní Ma̱ꞌan Ñaꞌanj hua̱ nìꞌnàꞌa.
70 Nanikàj Ma̱ꞌan Jesús ni̱ gata:
—Sê yùhuìj ranꞌ nej suj huin ganaguîj,
ni̱ ꞌngo̱ nej suj huin sa nàsàꞌa ràꞌ saj ûnꞌ.
71 Ni̱ gaꞌmin rayiꞌî Judas Iscariote,
daꞌní Simón Iscariote;
dadinꞌ sí nânj huin sí nàgàꞌhuìꞌ Ma̱ꞌan,
ni̱ sôꞌ huin ꞌngo̱ nej yùhuìj sí gaꞌnaꞌ ga̱huin chru̱n riñanj.