Nitaj si guyumân ruhuâ nej dinḯn Ma̱ꞌan Jesús niꞌin nej sôꞌ Ma̱ꞌan
7
Neꞌ rùkù nga gisîj gahuin nej nânj,
ni̱ gaché Ma̱ꞌan Jesús riñan hioꞌó Galilea;
dadinꞌ naꞌhuej ruhuaj ga̱che riñan hioꞌó Judea,
dadinꞌ ûta huin ruhuâ nej sí judío da̱gahuiꞌ nej sôꞌ Ma̱ꞌan.
2 Ni̱ gàꞌ gahuin nichrunꞌ si-gi̱ꞌña̱nj nej sí judío,
ni̱ giꞌñanj dânj huin sa gùꞌnàj tabernákulo;
Los líderes judíos quieren matar a Jesús (Juan 7.1-24)
—Ga̱hui̱ sòꞌ ni̱ ga̱ꞌa̱njꞌ riñan hioꞌó Judea,
daꞌnga ni̱ giniꞌin nej sí ꞌna̱ꞌ ga̱huin chru̱n riñanꞌ nej sa sàꞌ giꞌhiâꞌ râj.
4 Dadinꞌ daranꞌ nej sí ruhuâ si gi̱ni̱ꞌin nej guiì sa giꞌhiaj nej sôꞌ,
ni̱ nitaj si giꞌhiaj huì nej sôꞌ riñan nej guiì mánj,
dadinꞌ duyingaꞌ nej sôꞌ sa giꞌhiaj nej sôꞌ.
Si giꞌhiâꞌ nej nânj ni̱ gi̱di̱gân sòꞌ nej sa giꞌhiâꞌ dan gi̱ni̱ꞌin aꞌngô nej guiì na̱nj ánj.
5 Dadinꞌ gàꞌ nitaj si yumân ruhuâ nej dinḯn Ma̱ꞌan Jesús niꞌin nej sôꞌ Ma̱ꞌan.
6 Hiôꞌ ni̱ gataj Ma̱ꞌan Jesús:
—Hua̱ nun gùyùmàn si-guí,
sani̱ guendâ nej suj ni̱ ahuin na̱nj gui huin gui sàꞌa riñan nej suj.
7 Si̱ gaꞌhue ga̱ta̱ rùhuà nej guiì màn ruhuâ yumiguìi niꞌin ninj nej suj;
sani̱ ñùnj ni̱ gata rùhuà ni̱nj,
guendâ gununâj rayiꞌî nej si-ga̱kïnꞌ ninj.
8 Ga̱ꞌa̱nj nej suj giꞌñanj dânj;
dadinꞌ si̱ gaꞌan giꞌñanj danj mánj,
dadinꞌ hua̱ nï̀nꞌ gàchin gùyùmàn si-guí.
9 Huê dànanj gaꞌmin Ma̱ꞌan Jesús,
ni̱ guna Galilea.
Gàꞌ gahuin da̱ꞌa̱j giꞌñanj tabernákulo nga guchiꞌ Ma̱ꞌan Jesús
10 Sani̱ nga gaꞌanj nej dinḯn Ma̱ꞌan Jesús giꞌñanj dânj,
ni̱ neꞌ rùkù ni̱ gaꞌanj Ma̱ꞌan giꞌñanj dânj,
sani̱ nun ga̱ꞌa̱nj ra̱ꞌngaj,
dadinꞌ si ni̱kï̱nꞌ hu̱ij.
11 Huê danj ni̱ nanaꞌhuiꞌ nej sí judío Ma̱ꞌan Jesús siganï̂nj nej guiì màn giꞌñanj dânj,
ni̱ gataj nej sôꞌ:
—Dànèꞌ nikïnꞌ sí dânj ràꞌaj.
12 Ni̱ ûta aꞌmin nej guiì rìgì màn hiuj dânj rayiꞌî Ma̱ꞌan Jesús,
ni̱ da̱ꞌa̱j ninj gataj:
“ꞌNgo̱ sí sàꞌa huin sij”;
sani̱ aꞌngô da̱ꞌa̱j gataj:
“Sê sí sàꞌa huin sí dan mánj,
sí gidigañuꞌunj nej guiì yùmànꞌan huin sij na̱nj ánj.”
13 Sani̱ nitaj si gaꞌmin ràꞌngàꞌ nej sôꞌ,
rayiꞌî Ma̱ꞌan Jesús,
dadinꞌ yuꞌhuiꞌ nej sôꞌ niꞌin nej sôꞌ nej sí judío.
14 Sani̱ gàꞌ ꞌna̱ꞌ gahuin da̱ꞌa̱j giꞌñanj dânj ni̱ gatûj Ma̱ꞌan Jesús ruhuâ nûhui ni̱ gayi̱ꞌij ni̱ gidiganj si-nùguànꞌ Ma̱ꞌan Ñaꞌanj an riñan nej guiì.
15 Ni̱ gahuin ña̱ꞌanj ruhuâ nej judío,
ni̱ gataj nej sôꞌ:
—Nùnj huin saj ni̱ chru̱n sí nânj ga̱hia̱ sôꞌ,
ni̱ nitaj skuela gaꞌanj sôꞌ ràꞌaj.
16 Nanikàj Ma̱ꞌan Jesús ni̱ gata:
—Nej yìꞌnï̀nꞌ nej nuguanꞌ gidigán ni̱ sê nej sa giri ràj huin mánj,
si-nùguànꞌ Ma̱ꞌan sa gaꞌnḯn gaꞌná huin sa gaꞌmînj.
17 Si hua̱ ꞌngo̱ guiì garanꞌ ruhuâ da̱gahuin riñan Ma̱ꞌan Ñaꞌanj an,
ni̱ ga̱ꞌhue gi̱ni̱ꞌin ninj dadinꞌ nej yìꞌnï̀nꞌ nej nuguanꞌ gaꞌmînj ni̱ si-nùguànꞌ Ma̱ꞌan Ñaꞌanj an huin,
dadinꞌ sê si̱ gaꞌmînj guendâ Maꞌán mánj.
18 Sí gananï̂n rayiꞌî ma̱ꞌan ni̱ gananï̂n sôꞌ rayiꞌî sôꞌ dadinꞌ ruhuâ sôꞌ si ga̱ꞌmi̱n hueꞌê nej guiì rayiꞌî sôꞌ;
sani̱ sí garanꞌ ruhuâ si ga̱ꞌmi̱n hueꞌê nej guiì rayiꞌî Ma̱ꞌan Ñaꞌanj an,
sí nânj huin sí yàngàꞌa,
ni̱ nitaj gakï̱nꞌïn hua ruhuâ nimân sôꞌ.
19 ’Sê Moisés rikî si-ley Ma̱ꞌan Ñaꞌanj an riñan nej suj,
ni̱ gàꞌ si ꞌngo̱ nej suj nitaj si dagahuin ley dan ràꞌ saj ûnꞌ.
Nùnj huin saj ni̱ ûta ganahuij ruhuâ nej suj da̱gahuiꞌ nej suj ñùnj ràꞌaj.
20 Nanikàj nej sí rìgì dânj ni̱ gataj nej sôꞌ:
—Aya̱ꞌ sòꞌ sani̱ sa kï̱j ï nun ruhuâ nimânꞌ,
dadinꞌ ahuin nej sí huin ruhuâ da̱gahuiꞌ sòꞌ ràꞌaj.
21 Nanikàj Ma̱ꞌan Jesús ni̱ gata:
—Giꞌhia ꞌngo̱ daꞌngaꞌa gui ganarânj ruhuâ ni̱ ûta gahuin ña̱ꞌanj ruhuâ nej suj na̱nj nîꞌ.
22 Rayiꞌî dan ni̱ gataj Moisés si ga̱ꞌne̱ꞌ ga̱chrin nej suj nnïnj arán raa̱ nneè nàꞌàj nej síi,
sani̱ sê Moisés huin sa giri ra̱ si danj gaj mánj,
dadinꞌ gàꞌ danj giꞌhiaj nej sachij gimân diû ri̱ki;
sani̱ nej suj ni̱ gui ganarânj ruhuâ ni̱ gaꞌneꞌ ga̱chri̱n nej suj nnïnj arán raa̱ nneè nàꞌàj nej síi.
23 Ni̱ si gui ganarânj ruhuâ gaꞌneꞌ ga̱chrin nej suj raa̱ nneè nàꞌàj nej síi,
ni̱ gataj nej suj si dagahuin nej suj si-ley Moisés.
Ni̱ nùnj huin saj ni̱ ginaꞌan ruhuâ nej suj guendâ giꞌhiâ si ganahuin daꞌ hua̱ gè nneè kú ꞌngo̱ sí aꞌnanꞌan gui ganarânj ruhuâ ràꞌaj.
24 Si̱ gutaꞌ chre nej suj gakï̱nꞌïn nej guiì mánj,
ni̱ si yàngàꞌ hia giniꞌin nej suj giꞌhiaj ninj gakï̱nꞌïn hiôꞌ ni̱ ga̱ꞌhue gàtàꞌ gakï̱nꞌ dan yichrá ninj gi̱ꞌhiaj nej suj.
Ganataꞌ Ma̱ꞌan Jesús dànèꞌ gaꞌnaj
25 Ni̱ gataj da̱ꞌa̱j nej guiì ꞌna̱ꞌ yumanꞌ snàꞌànj Jerusalén:
—Sê sí nânj huin nanaꞌhuiꞌ nej sij da̱gahuiꞌ nej sij ràꞌ saj ûnꞌ.
Los líderes tratan de arrestar a Jesús (Juan 7.25-53)
26 Gi̱ni̱ꞌhiaj nej suj,
dadinꞌ ni̱ña̱n sij gaꞌmin sij ñan màn nìchra nej guiì,
ni̱ nitaj nùnj gataj nej rej ni̱ka̱j su̱un riñan sij mánj.
Gananiꞌin yàngàꞌ nej sôꞌ si huin sij Ma̱ꞌan Cristo na̱nj nîꞌ.
27 Sani̱ niꞌînꞌ dànèꞌ huin yiñán sí nânj;
sani̱ nga ga̱ꞌna̱ꞌ Ma̱ꞌan Cristo,
ni̱ gàꞌ si ꞌngo̱ nej guiì si̱ giniꞌin dànèꞌ ga̱ꞌna̱ꞌ sôꞌ mánj.
28 Nga gidigân Ma̱ꞌan Jesús riñan nej guiì ruhuâ nûhui,
ni gaꞌmin nùkuaj staꞌu Ma̱ꞌan,
ni̱ gata:
—Niꞌin nej suj ñùnj,
ni̱ niꞌin nej suj dànèꞌ gaꞌná;
sani̱ sê si̱ gaꞌná guendâ Ma̱ꞌan mánj,
sani̱ Ma̱ꞌan sa gaꞌnḯn gaꞌná huin ꞌngo̱ sa yàngàꞌa,
sani̱ nun niꞌin nej suj Ma̱ꞌan mánj.
29 Sani̱ ñùnj ni̱ niꞌín Ma̱ꞌan,
dadinꞌ huê riñan Ma̱ꞌan gahui gaꞌná,
ni̱ huej huin sa gaꞌnḯn gaꞌná.
30 Hiôꞌ ni̱ ûta huin ruhuâ nej sij gi̱daꞌa nej sij Ma̱ꞌan;
sani̱ gàꞌ si ꞌngo̱ nej sij nun gìsìj ruhuâ gi̱da̱ꞌa Ma̱ꞌan,
dadinꞌ hua̱ nï̀nꞌ ga̱chin gùyùmàn gui gi̱daꞌa nej sij Ma̱ꞌan.
31 Ni̱ ûta gàꞌì nej guiì rìgì màn hiuj dânj guyumân ruhuâ niꞌin Ma̱ꞌan Jesús,
ni̱ gataj ninj:
—Nga ga̱ꞌna̱ꞌ Ma̱ꞌan Cristo,
ni̱ dànanj nìko doj ga̱ nej daꞌnga gi̱ꞌhia gàꞌ daꞌ nej sa giꞌhiaj sí nânj na̱nj nîꞌ.
Gaꞌnḯn nej fariseo nej sí ni̱kï̱nꞌ dugumîn riñan nûhui guendâ gi̱da̱ꞌa nej sôꞌ Ma̱ꞌan Jesús
32 Ni̱ gunïn nej sí fariseo ngà nej rej huin ña̱an,
si dànanj gaꞌmin nej guiì rayiꞌî Ma̱ꞌan Jesús;
ni̱ gaꞌnḯn nej sôꞌ gaꞌanj gi̱daꞌa nej sí ni̱kï̱nꞌ dugumîn riñan nûhui nìko Ma̱ꞌan Jesús.
33 Hiôꞌ ni̱ gataj Ma̱ꞌan Jesús:
—Hua̱ na̱nj ga̱né aꞌngô diû lij ngà nej suj,
ni̱ neꞌ rùkù ni̱ na̱ꞌa̱nj ñan nne Ma̱ꞌan sa gaꞌnḯn gaꞌná.
34 Nànàꞌhuìꞌ nej suj ñùnj,
sani̱ si̱ ganariꞌ nej suj ñùnj;
ni̱ ñan ga̱né ni̱ si̱ gaꞌhue ga̱ꞌna̱ꞌ nej suj mánj.
35 Hiôꞌ ni̱ gaꞌmin nej ma̱ꞌan nej síchìj judío siganï̂nj nej ma̱ꞌan nej sôꞌ ni̱ gataj nej sôꞌ:
—Dànèꞌ ga̱ꞌa̱nj dïnꞌïnj sí nânj,
ni̱ si̱ gaꞌhue gànàrìꞌ nêꞌ sôꞌ ràꞌaj.
Ga̱ꞌa̱nj sij riñan aꞌngô nej judío nne riñan hioꞌó Grecia,
ni̱ gi̱digân sij riñan nej sôꞌ ni̱ huê danj na̱nj gi̱digân sij riñan nej griego nej na̱nj nîꞌ.
36 Nùnj huin si ga̱ta̱j sij ruhuâ sij nga gaꞌmin sij:
“Nànàꞌhuìꞌ nej suj ñùnj,
sani̱ si̱ ganariꞌ nej suj ñùnj mánj,
ni̱ ñan ga̱né ni̱ si̱ gaꞌhue ga̱ꞌna̱ꞌ nej suj mánj.”
Gu̱na̱nj kïn hua̱j nne nìꞌnàꞌa ruhuâ nimân nej guiì guyumân ruhuâ
37 Aꞌngô rïn gui ga̱na̱huij giꞌñanj tabernákulo gui ña̱ꞌa̱n doj,
ni̱ ganayumàn Ma̱ꞌan Jesús ni̱ nanikïnꞌ ga̱hia ni̱ gaꞌmin nùkua ni̱ gata:
—Si hua̱ ꞌngo̱ nej suj ganakô nnee,
ni̱ ga̱ꞌna̱ꞌ nej suj riñânj,
ni̱ go̱ꞌo̱ nej suj nne gìrìkìj na̱nj ánj.
38 Ni̱ nej guiì guyumân ruhuâ niꞌin ñùnj,
ni̱ dàj rûnꞌ taj riñan ñanj si-nùguànꞌ Ma̱ꞌan Ñaꞌanj an,
ni̱ ruhuâ nimân ninj gu̱na̱nj kïn hua̱j nne nìꞌnàꞌa.
39 Ni̱ gaꞌmin Ma̱ꞌan Jesús dànanj,
si gùyùmàn ruhuâ nej guiì niꞌin ninj Ma̱ꞌan hiôꞌ ni̱ ga̱ꞌhue ga̱na̱huin ra̱ꞌa ninj Ma̱ꞌan Espíritu Santo,
dadinꞌ hua̱ nï̀nꞌ gàchin gùyùmàn Ma̱ꞌan Espíritu Santo,
dadinꞌ hua̱ nï̀nꞌ gàchin ga̱na̱hui Ma̱ꞌan ga̱ꞌan yàtàꞌa.
Giyichraꞌ da̱ꞌa̱j nej guiì ngà sa garânj daꞌngaꞌ ruhuâ ninj giꞌhiaj Ma̱ꞌan Jesús
40 Hiôꞌ ni̱ nga gunïn,
da̱ꞌa̱j nej sí ni̱kï̱nꞌ siganï̂nj nej guiì rigì màn hiuj dânj ni̱ gataj nej sôꞌ:
—Yàngàꞌ hia nï̀nꞌ ni̱ ꞌngo̱ sí gataj dàj ga̱huin huin sí nânj.
41 Ni̱ gataj aꞌngô da̱ꞌa̱j nej sí dânj:
—Sí nânj huin Ma̱ꞌan Cristo.
Sani̱ gataj aꞌngô da̱ꞌa̱j nej sôꞌ:
—Ga̱ꞌhue ga̱hui̱ ꞌngo̱ sí ga̱ta̱j dàj ga̱huin neꞌ Galilea na̱nj nînj.
42 Sê sa taj riñan ñanj si-nùguànꞌ Ma̱ꞌan Ñaꞌanj an huin si Cristo ni̱ ga̱ꞌna̱ꞌ sôꞌ riñan nej da̱ꞌni̱n sìꞌnï̀n rey David ni̱ ga̱hui̱ sôꞌ ruhuâ yumanꞌ Belén ñan gane David ràꞌ saj ûnꞌ.
43 Huê danj ni̱ giyichraꞌ da̱ꞌa̱j nej sij daꞌ yiꞌnïnꞌïn ni̱ gunïnꞌ nej sij rayiꞌî Ma̱ꞌan Jesús.
44 Ni̱ da̱ꞌa̱j nej sij ganï̂n ruhuâ gi̱daꞌa Ma̱ꞌan Jesús guendâ ga̱chri̱ nej sij dukuâ gaꞌa;
sani̱ nun gìsìj ruhuâ gàꞌ si ꞌngo̱ nej sij gi̱daꞌa nej sij Ma̱ꞌan mánj.
Nitaj si guyumân ruhuâ nej sí ni̱ka̱j suun niꞌin nej sôꞌ Ma̱ꞌan Jesús
45 Huê danj ni̱ nanikàj nej sí ni̱kï̱nꞌ dugumîn nûhui nìko gaꞌanj nej sôꞌ riñan nej síchìj rej aꞌnïnꞌïn ngà riñan nej sí fariseo;
ni̱ gataj nej síchìj dânj riñan nej sí ni̱kï̱nꞌ riñan nûhui nìko:
—Nùnj huin saj ni̱ nun gi̱nikaj nej suj ga̱ꞌna̱ꞌ nej suj sí dânj ràꞌaj.
46 Nanikàj nej sí dugumîn nûhui nìko ni̱ gataj nej sôꞌ:
—Nitaj gàꞌ si ꞌngo̱ sí gaꞌmin si gaꞌmin sí dan mánj.
47 Hiôꞌ ni̱ nanikàj nej sí fariseo ni̱ gataj nej sôꞌ:
—Gidigañuꞌunj un sí dan nej suj nej na̱nj nîꞌ.
48 Guyumân ruhuâ goꞌngo̱ nej sí ni̱ka̱j su̱un niꞌin sôꞌ sí dan nîꞌ,
ni̱ guyumân ruhuâ nej sí fariseo niꞌin nej sôꞌ sí dan na̱nj nîꞌ.
49 Sani̱ nej guiì nun niꞌin si-ley Ma̱ꞌan Ñaꞌanj an,
ni̱ huin ninj guiì ga̱ninï̀nꞌ huaa na̱nj ánj.
50 Nicodemo huin goꞌngo̱ nej sí fariseo,
sí gaꞌanj ga̱ꞌmi̱n neꞌ ñànꞌan ngà Ma̱ꞌan Jesús ni̱ gataj sôꞌ gu̱nïn nej sí dânj.
51 —Hiôꞌ ni̱ man si gutaꞌ chre si-ley neꞌ gakï̱nꞌïn yichrá ꞌngo̱ síi nga na̱nj nîꞌ,
sê gàꞌ si̱nï̱n gunïn nej sí ni̱kï̱nꞌ neꞌ ña̱an dàj hua nuguanꞌan rayiꞌî sí dânj,
ni̱ dàj hua sa giꞌhiaj sôꞌ ni̱ nda hiuj dânj ni̱ giniꞌin nej sij dàj hua sa giꞌhiaj sôꞌ ràꞌ saj ûn.
52 Nanikàj nej sí dânj ni̱ gataj nej sôꞌ:
—Sí ꞌna̱ꞌ Galilea huînꞌ na̱nj nîꞌ.
Na̱di̱giꞌñûn sòꞌ riñan ñanj si-nùguànꞌ Ma̱ꞌan Ñaꞌanj an ni̱ gi̱ni̱ꞌînꞌ si nitaj àmàn ganachi nikaj Ma̱ꞌan Ñaꞌanj an ꞌngo̱ sí gataj dàj ga̱huin riñan hioꞌó Galilea mánj.
Siyànà ginika nika duguiꞌ
53 Huê danj ni̱ nanꞌ daꞌ goꞌngo̱ nej sí dânj dukuâ nej sôꞌ.