8
Huê danj ni̱ gaꞌanj Ma̱ꞌan Jesús kïj ñan màn chrun olibo.
2 Ni̱ neꞌ nìganꞌ aꞌngô gui dânj nanikàj Ma̱ꞌan Jesús gaꞌnaj ñan nne nûhui nìko,
ni̱ daꞌ hua̱ gè yumanꞌan gahui gaꞌnaꞌ riñanj;
ni̱ nne gidiganj.
Jesús perdona a mujer condenada (Juan 8.2-11)
3 Hiôꞌ ni̱ ni̱ka̱j nej sí fariseo ngà nej sí chru̱n ley ngo̱ siyànà gininj riñan gakï̱nꞌ ni̱ka̱j nika duguiꞌ gaꞌnaꞌ nej sôꞌ riñanj;
ni̱ ganï̂n nej sôꞌ da̱nï̱n nuhuî nìko,
4 ni̱ gataj nej sôꞌ:
—Maestrûj,
giriꞌ nej ñûnj raꞌa nej ñûnj si gininj siyànà nânj riñan gakï̱nꞌ ni̱ka̱j nika duguiꞌ.
5 Ni̱ giyiꞌnïnꞌ suun riñan si-ley Moisés si ga̱rru̱nꞌ hiëj nej guiì giꞌhiaj dànanj.
Ni̱ dàj taj sòꞌ ràꞌaj.
6 Sani̱ man si gataj nej sôꞌ dànanj guendâ ga̱ya̱ka̱j nej sôꞌ daꞌngaꞌa ngà Ma̱ꞌan Jesús,
daꞌnga ni̱ gaꞌhue ga̱ra̱n ruhuâ nej sôꞌ rayiꞌî Ma̱ꞌan.
Sani̱ guduguaꞌ Jesús Ma̱ꞌan riñan hioꞌó,
ni̱ gachrunj riñan hioꞌóo ngà dë̂j raꞌa.
7 Sani̱ ñan ûta nìchràj ruhuâ nej sij gachín naꞌanj nej sij,
ni̱ nanikïnꞌ ga̱hia Ma̱ꞌan Jesús ni̱ gata:
—Ahuin na̱nj goꞌngo̱ nej suj nitaj gakï̱nꞌïn ata ni̱ huê nej suj huin sí ga̱ꞌhue ga̱rru̱n si̱nï̱n hiëj siyànà nânj.
8 Huê danj ni̱ guduguaꞌ ñûn Jesús Ma̱ꞌan riñan hioꞌóo,
ni̱ gachrunj do̱j riñan hioꞌóo.
9 Sani̱ nga gunïn nej sôꞌ,
nej nuguanꞌ nânj ni̱ huê danj na̱nj gaꞌmin gakï̱nꞌ daꞌngaꞌ nu̱n ruhuâ nimân nej sôꞌ riñan nej sôꞌ,
ni̱ gahui daꞌ goꞌngo̱ nej sôꞌ ni̱ gaꞌanj nej sôꞌ,
huê danj ni̱ gaꞌanj gàꞌ si̱nï̱n nej sí achij doj dadinꞌ hio garânj daꞌngaꞌ ruhuâ nej sôꞌ ni̱ neꞌ rùkù doj ni̱ gaꞌanj nej sí hua̱ lij doj;
ni̱ gunâj siyànà dânj nikïnꞌ ꞌngo̱ rïn da̱nï̱n hiuj dânj ni̱ huê danj na̱nj ni̱kï̱nꞌ Ma̱ꞌan Jesús hiuj dânj.
10 Nanikïnꞌ ga̱hia Ma̱ꞌan Jesús,
ni̱ gata gu̱nïn siyànà dânj:
—Dànèꞌ gaꞌanj nej sí garânj ruhuâ rayiꞌîꞌ ràꞌaj.
Gàꞌ si ꞌngo̱ nej sij nun ri̱ki̱ kastîgu riñanꞌ gàꞌ ûnꞌ.
11 Ni̱ gataj siyànà dânj:
—Gàꞌ si ꞌngo̱ ninj,
nun ri̱ki̱ kastîgu riñânj man Señor.
Hiôꞌ ni̱ gataj Ma̱ꞌan Jesús:
—Huê danj na̱nj ñùnj ni̱ si̱ rikîj kastîgu riñanꞌ mánj;
ga̱ꞌa̱njꞌ sani̱,
si̱ giꞌhiâꞌ gakï̱nꞌïn gàꞌ mánj.
Ma̱ꞌan Jesús huin sa giꞌhiaj giyigï̀n riñan nej guiì màn ruhuâ yumiguìi
12 Gaꞌmin ñûn Ma̱ꞌan Jesús,
ni̱ gata:
—Ñùnj huin sa giꞌhiaj giyigï̀n riñan nej guiì màn ruhuâ yumiguìi ni̱ guiì ginikòꞌ rukú,
ni̱ si̱ gaché ninj ñan ru̱mi̱nꞌin mánj,
dadinꞌ hua̱ sa giyigï̀n dânj ruhuâ nimân ninj ni̱ huej gi̱ꞌhiaj ga̱ nìꞌnàꞌ ninj.
Jesús es la luz del mundo (Juan 8.12-30)
13 Hiôꞌ ni̱ gataj nej sí fariseo gu̱nïn Ma̱ꞌan Jesús:
—Gaꞌminꞌ rayiꞌî Ma̱ꞌânꞌ;
ni̱ sê sa yàngàꞌa huin nuguanꞌ gaꞌminꞌ dânj mánj.
14 Nanikàj Ma̱ꞌan Jesús ni̱ gata:
—Nùnj huin si ñùnj gaꞌmin rayiꞌî Ma̱ꞌán,
sani̱ sa yàngàꞌa huin sa gaꞌmînj,
dadinꞌ niꞌin sàꞌàj dànèꞌ gaꞌná,
ni̱ niꞌin sàꞌàj dànèꞌ gàꞌàn;
sani̱ nun niꞌin nej suj dànèꞌ gaꞌná ni̱ dànèꞌ gàꞌàn mánj.
15 Ni̱ dàj rûnꞌ gutaꞌ chre nej guiì gakï̱nꞌïn yichrá duguiꞌ ninj huê danj gi̱ꞌhiaj nej suj,
sani̱ ñùnj ni̱ nitaj si gutaꞌ chré gakï̱nꞌïn yichrá nej guiì mánj.
16 Ni̱ si gayakaj guendâj ni̱ sa gayakaj guendâj dânj huin sa yàngàꞌa;
dadinꞌ sê ꞌngo̱ rḯn huin sa gayakaj guendâ mánj,
dadinꞌ huê danj na̱nj gayakaj guendâ Ma̱ꞌan sa gaꞌnḯn gaꞌná.
17 Sa taj riñan ley ni̱ka̱j nej suj huin,
ni̱ si huìj síi gu̱ña̱n ganataꞌ ni̱ sa yàngàꞌa huin nuguanꞌ gataj nguèj sôꞌ.
18 Ñùnj huin sa ganataꞌ rayiꞌî Maꞌán,
ni̱ huê danj na̱nj ganataꞌ Ma̱ꞌan Rê rayiꞌí dadinꞌ Ma̱ꞌan huin sa gaꞌnḯn gaꞌná.
19 Ni̱ gataj nej sí dânj:
—Dànèꞌ nne reꞌ ràꞌaj.
Nanikàj Ma̱ꞌan Jesús ni̱ gata:
—Ni̱ si nun niꞌin nej suj ñùnj,
ni̱ huê danj na̱nj nun niꞌin nej suj Ma̱ꞌan Rê mánj;
ni̱ si gi̱ni̱ꞌin nej suj ñùnj,
hiôꞌ ni̱ gi̱ni̱ꞌin nej suj Ma̱ꞌan Rê.
20 Nej nuguanꞌ nânj gaꞌmin Ma̱ꞌan Jesús nga nikïnj ñan tàj chrún nu̱n saꞌanj ofrenda,
ni̱ gidiganj ruhuâ nuhuî nìko;
sani̱ nun gi̱daꞌa gàꞌ si ꞌngo̱ nej sí dânj Ma̱ꞌan,
dadinꞌ hua̱ nï̀nꞌ gàchin gùyùmàn si-gui na̱nj ánj.
“Ñan ga̱ꞌa̱n ni̱ si̱ gaꞌhue ga̱ꞌna̱ꞌ nej suj mánj”
21 Gaꞌmin ñûn Ma̱ꞌan Jesús:
—Gàꞌàn,
ni̱ nànàꞌhuìꞌ nej suj ñùnj,
sani̱ gàhuìꞌ nej suj ngà si-ga̱kïnꞌ nej suj;
dadinꞌ ñan gàꞌàn,
ni̱ si̱ gaꞌhue ga̱ꞌna̱ꞌ nej suj mánj.
22 Hiôꞌ ni̱ gataj nej sí judío:
—Da̱gahuiꞌ sí dan ma̱ꞌan sij na̱nj nîꞌ,
dadinꞌ gataj sij:
Ñan gàꞌàn,
ni̱ si̱ gaꞌhue ga̱ꞌna̱ꞌ nej suj.
23 Ni̱ gataj Ma̱ꞌan Jesús:
—Nej guiì màn riñan hioꞌóo huin nej suj,
sani̱ ñùnj ni̱ huín Ma̱ꞌan sa gaꞌnaꞌ neꞌ yàtàꞌa;
nej suj huin nej guiì màn ruhuâ yumiguìi nânj,
sani̱ sê nej guiì màn ruhuâ yumiguìi nânj huín mánj.
24 Rayiꞌî dan ni̱ gatâ si gàhuìꞌ nej suj rayiꞌî si-ga̱kïnꞌ nej suj;
dadinꞌ sisi̱ si̱ guyumân ruhuâ nej suj niꞌin nej suj si ñùnj huin Ma̱ꞌan Cristo,
ni̱ gàhuìꞌ nej suj ngà si-ga̱kïnꞌ nej suj na̱nj ánj.
25 Hiôꞌ ni̱ gachín naꞌanj nej sí dânj Ma̱ꞌan Jesús ni̱ gataj nej sôꞌ:
—Ahuin sí huîn sòꞌ ràꞌaj.
Hiôꞌ ni̱ nanikàj Ma̱ꞌan Jesús ni̱ gata:
—Gàꞌ gatâ àsìj sinï̱ïn ahuin sa huín.
26 Ûta hua sa gàtà ni̱ hua̱ sa ga̱ya̱ka̱j guendâj rayiꞌî nej suj;
sani̱ Ma̱ꞌan sa gaꞌnḯn gaꞌná gaꞌmin nuguanꞌ yàngàꞌa;
ni̱ nej nuguanꞌ gunḯn gaꞌminj,
huê nej nuguanꞌ dânj gaꞌmînj riñan nej guiì màn ruhuâ yumiguìi.
27 Sani̱ nun ga̱ra̱n daꞌngaꞌ ruhuâ nej sij si rayiꞌî Rej Ma̱ꞌan Jesús Ñaꞌanj an gaꞌminj mánj.
28 Ni̱ gataj Ma̱ꞌan Jesús:
—Nda go̱dokoꞌ nej suj ñùnj riñan rugutsìi,
ni̱ nda hiuj dânj ni̱ ga̱na̱ni̱ꞌin nej suj si ñùnj huin Ma̱ꞌan Cristo,
dadinꞌ nitaj nùnj ga̱ꞌhue gi̱ꞌhia guendâ Maꞌán,
dadinꞌ dàj rûnꞌ gidigân Ma̱ꞌan Rê ni̱ huê danj gaꞌmînj.
29 Ma̱ꞌan sa gaꞌnḯn gaꞌná,
ni̱ nne ngàj;
ni̱ nun gu̱du̱na ñùnj,
dadinꞌ dagahuín daranꞌ nej sa garanꞌ ruhuaj na̱nj ánj.
30 Gaꞌmin Ma̱ꞌan Jesús nej nuguanꞌ nânj,
ni̱ ûta gàꞌì nej guiì guyumân ruhuâ niꞌin Ma̱ꞌan.
Nuguanꞌ yàngàꞌa gi̱ꞌhiaj ga̱na̱ni̱n nej guiì
31 Hiôꞌ ni̱ gataj Ma̱ꞌan Jesús gu̱nïn nej sí judío guyumân ruhuâ niꞌin si-nùguànꞌanj:
—Si gùyùmàn yìtï̀nj ruhuâ nej suj niꞌin nej suj si-nùguànꞌànj,
hiôꞌ ni̱ yàngàꞌ ni̱ ga̱huin nej suj sí gi̱nikòꞌ rukú;
Jesús se enfrenta a falsos discípulos (Juan 8.31-59)
33 Nanikàj nej sí dânj ni̱ gataj nej sôꞌ gu̱nïn Maꞌan Jesús:
—Daꞌní sachij Abraham huin nej ñûnj,
ni̱ nitaj àmàn giꞌnïnj nej ñûnj giꞌhiaj sun chre nej ñûnj mánj.
Ni̱ nùnj huin saj ni̱ gatajꞌ:
Si gi̱yi̱ꞌnï̱n riñan nej ñûnj ràꞌaj.
34 Gataj Ma̱ꞌan Jesús:
—Yàngàꞌ,
ni̱ yàngàꞌ hia nï̀nꞌ gàtà:
Ni̱ daranꞌ nej guiì giꞌhiaj gakï̱nꞌïn ni̱ ꞌnï̱nj ninj dagahuin ninj riñan gakï̱nꞌïn na̱nj ánj.
35 Guiì ꞌnï̱nj giꞌhiaj sun chre riñan ꞌngo̱ yiruꞌhuee ni̱ sê daranꞌ diû ga̱ne ninj dukuâ yiruꞌhue dânj mánj;
sani̱ daꞌní sí yi̱ruꞌhue dânj ni̱ daranꞌ diû ga̱ne sôꞌ dukuâ rej sôꞌ.
36 Huê danj ni̱ si ga̱na̱ni̱n nej suj gi̱ꞌhiaj Daꞌní Ma̱ꞌan Ñaꞌanj an,
hiôꞌ ni̱ ga̱na̱huin nej suj daꞌní Ma̱ꞌan na̱nj ánj.
37 Ni̱ niꞌín si huin nej suj daꞌní sachij Abraham;
sani̱ ûta huin ruhuâ nej suj da̱gahuiꞌ nej suj ñùnj,
dadinꞌ naꞌhuej ruhuâ nej suj gi̱daꞌa nej suj si-nùguànꞌanj mánj.
38 Ñùnj ni̱ gaꞌmînj rayiꞌî nej nuguanꞌ gunḯn gaꞌmin Ma̱ꞌan Rê Ñaꞌanj an;
sani̱ nej suj ni̱ gaꞌmin nej suj rayiꞌî nej nuguanꞌ gunïn nej suj gaꞌmin rej nej suj.
Daꞌní sichre huin nej suj
39 Nanikàj nej sí dânj ni̱ gataj nej sôꞌ:
—Rej nej ñûnj huin sachij Abraham.
Hiôꞌ ni̱ gataj Ma̱ꞌan Jesús:
—Ni̱ si huin nej suj daꞌní sachij Abraham,
ni̱ dàj rûnꞌ hueꞌê dagahuin sachij Abraham ni̱ huê danj hueꞌê da̱gahuin suj saj áj.
40 Sani̱ ûta huin ruhuâ nej suj da̱gahuiꞌ nej suj ñùnj,
sani̱ nuguanꞌ yàngàꞌa huin sa gaꞌmînj riñan nej suj,
dadinꞌ nej nuguanꞌ gunḯn gaꞌmin Ma̱ꞌan Ñaꞌanj an ni̱ nej nuguanꞌ dânj huin sa gaꞌmînj riñan nej suj;
sani̱ Abraham ni̱ nitaj àmàn giꞌhiaj sôꞌ dàj rûnꞌ giꞌhiaj nej suj mánj.
41 Ni̱ dàj rûnꞌ giꞌhiaj rej nej suj ni̱ huê danj giꞌhiaj nej suj.
Ni̱ gataj nej sí dânj:
—Sê sikùꞌu huin nej ñûnj mánj;
hua̱ ꞌngo̱ rej nej ñûnj,
ni̱ huej huin Ma̱ꞌan Ñaꞌanj an.
42 Hiôꞌ ni̱ gataj Ma̱ꞌan Jesús:
—Si rej nej suj,
huin Ma̱ꞌan Ñaꞌanj an,
hiôꞌ ni̱ yàngàꞌ ni̱ ga̱ ꞌì ruhuâ nej suj niꞌin nej suj ñùnj;
dadinꞌ ñan nne Ma̱ꞌan Ñaꞌanj an gahuî gaꞌná;
dadinꞌ sê si̱ ganï̂n Ma̱ꞌan ruhuâj gaꞌná,
dadinꞌ Ma̱ꞌan Ñaꞌanj an gaꞌnḯn gaꞌná.
43 Nùnj huin saj ni̱ naꞌhue ga̱ra̱n daꞌnga ruhuâ nej suj nej nuguanꞌ gaꞌmînj ràꞌaj.
Nùnj huin saj ni̱ naꞌhue gu̱nïn nej suj si-nùguànꞌànj ràꞌaj.
44 Rej nej suj huin sa nàsàꞌa,
ni̱ nej sa garanꞌ ruhuâ rej nej suj sa nàsàꞌa huê nej dânj huin sa ruhuâ nej suj da̱gahuin nej suj.
Dadinꞌ àsìj si̱nï̱ïn ni̱ dagahuiꞌ sa nàsàꞌa nej guiì,
ni̱ nitaj àmàn dagahuin sa yàngàꞌa,
dadinꞌ nitaj sa yàngàꞌa hua ruhuâ nimanj mánj,
ni̱ nga digaꞌñuꞌun,
ni̱ nej nuguanꞌ giri rà ma̱ꞌan huin nej nuguanꞌ gaꞌmin;
dadinꞌ huin ꞌngo̱ sa gidigañuꞌunj un.
45 Ni̱ ñùnj ni̱ gaꞌmînj nuguanꞌ yàngàꞌa,
sani̱ nitaj si guyumân ruhuâ nej suj niꞌin nej suj ñùnj mánj.
46 Ahuin goꞌngo̱ nej suj ga̱ꞌhue gi̱digân si yàngàꞌ hia hua gakï̱nꞌïn riñânj ràꞌaj,
ni̱ si gaꞌmînj nuguanꞌ yàngàꞌa ni̱ nùnj huin saj ni̱ naꞌhue gùyùmàn ruhuâ nej suj sa gaꞌmînj ràꞌaj.
47 Nej guiì huin daꞌní Ma̱ꞌan Ñaꞌanj an,
ni̱ gunïn ninj si-nùguànꞌ Ma̱ꞌan Ñaꞌanj an;
sani̱ nej suj ni̱ naꞌhue ga̱ra̱n daꞌngaꞌ ruhuâ nej suj,
dadinꞌ sê daꞌní Ma̱ꞌan Ñaꞌanj an huin nej suj mánj.
Gàꞌ si̱nï̱n Jesús gane gàꞌ daꞌ sachij Abraham
48 Nanikàj nej sí judío,
ni̱ gataj nej sôꞌ:
—Sê dùgùnàj hua sa gaꞌmin nej ñûnj,
dadinꞌ gataj nej ñûnj si sí ꞌna̱ꞌ yumanꞌ Samaria huin rèꞌ ûnꞌ.
Ni̱ nu̱n sa kï̱j ï ruhuâ nimân rèꞌ ûnꞌ.
49 Nanikàj Ma̱ꞌan Jesús ni̱ gata:
—Nitaj sa kï̱j ï nun ruhuâ nimânj mánj,
sa si̱nï̱n giꞌhia huin si ni̱ka̱j chre̱ riñan Ma̱ꞌan Rê Ñaꞌanj an;
sani̱ nej suj ni̱ nitaj si ni̱ka̱j chrej nej suj riñanj mánj.
50 Sani̱ ñùnj ni̱ nitaj si ûta huin ruhuâj si ga̱ꞌmi̱n hueꞌê nej guiì rayiꞌí mánj,
sani̱ hua̱ sí ruhuâ si ga̱ꞌmin hueꞌê nej guiì rayiꞌî nej sôꞌ ni̱ huin sôꞌ guesì.
51 Yàngàꞌ ni̱ yàngàꞌ hia nï̀nꞌ tâ,
ni̱ nej guiì dagahuin si-nùguànꞌànj,
ni̱ si̱ gahuiꞌ ninj dadinꞌ ga̱ne nìgànj ninj ngà Ma̱ꞌan Ñaꞌanj an.
52 Hiôꞌ ni̱ gataj nej síchìj judío:
—Hia̱j ni̱ giniꞌin nej ñûnj si nu̱n sa kï̱j ï ruhuâ nimânt râj.
Dadinꞌ gahuiꞌ sachij Abraham,
ni̱ huê danj na̱nj gahuiꞌ nej sôꞌ gataj dàj ga̱huin;
ni̱ sòꞌ taj:
“Nej guiì dagahuin si-nùguànꞌànj ni̱ nitaj àmàn huaj gàhuìꞌ ninj mánj.”
53 Dànanj achijꞌ doj gàꞌ daꞌ rej nej ñûnj sachij Abraham na̱nj nîꞌ,
dadinꞌ gàꞌ gahuiꞌ sôꞌ.
Ni̱ huê danj gàꞌ gahuiꞌ nej sôꞌ gataj dàj ga̱huin.
Aya̱ꞌ sòꞌ sani̱ huin ma̱ꞌan nï̀nꞌ duꞌhua sòꞌ na̱nj ánj.
54 Nanikàj Ma̱ꞌan Jesús ni̱ gata:
—Si gàtà gu̱nïn nej suj si ûta huín,
ni̱ nitaj si niꞌñanj nuguanꞌ gàtà;
Ma̱ꞌan Rê huin sa gaꞌmin hueꞌê rayiꞌí,
ni̱ gataj nej suj si huej huin Rej nej suj nej na̱nj ánj.
55 Sani̱ nun niꞌin nej suj Ma̱ꞌan mánj;
sani̱ ñùnj ni̱ niꞌín Ma̱ꞌan,
ni̱ si gàtà si nun niꞌín Ma̱ꞌan,
ni̱ gahuín ꞌngo̱ sí digañuꞌunj un dàj rûnꞌ huin nej suj;
sani̱ niꞌín Ma̱ꞌan,
ni̱ dugumîn hueꞌé si-nùguànꞌànj.
56 Ni̱ ganahuin nìhiàꞌ ruhuâ sachij Abraham rej nej suj nga gunïn sôꞌ si gùyùmàn gui gàꞌnàj;
ni̱ giniꞌin sôꞌ,
ni̱ ganahuin nìhiàꞌ ruhuâ sôꞌ.
57 Hiôꞌ ni̱ gataj nej síchìj judío:
—Hua̱ nun gìsìjꞌ hioꞌ huìj xia chi̱ꞌ,
ni̱ tajꞌ si gàꞌ giniꞌin sachij Abraham na̱nj nîꞌ.
58 Ni̱ gataj Ma̱ꞌan Jesús:
—Yàngàꞌ ni̱ yàngàꞌ hia nï̀nꞌ gàtà:
Ni̱ nga nï̀nꞌ gàchin ga̱ꞌnga̱ sachij Abraham,
ni̱ gàꞌ nné àsìj nga dânj na̱nj ánj.
59 Ni̱ gidaꞌa nej sij hiëj guendâ ga̱rru̱n nej sij Ma̱ꞌan Jesús;
sani̱ giyiꞌij huì Ma̱ꞌan riñan nej sij,
ni̱ gahui ruhuâ nuhuî dânj ni̱ gachinj da̱nï̱n ñan màn nej sij,
ni̱ gaꞌan.