Giꞌhiaj Ma̱ꞌan Jesús ganahuin sí hua̱ du̱chri àsìj gaꞌnga
9
Ni̱ nga gachîn Ma̱ꞌan Jesús hua hiuj dânj,
ni̱ giniꞌin ꞌngo̱ sí dânj ni̱ àsìj nga gaꞌnga sôꞌ ni̱ gàꞌ hua̱ du̱chri sôꞌ.
2 Ni̱ gachín naꞌanj nej sí ꞌna̱ꞌ ga̱huin chru̱n riñan Ma̱ꞌan Jesús,
ni̱ gataj nej sôꞌ:
—Maestrûj.
Ahuin goꞌngo̱ nguèj sí nânj nikaj gakï̱nꞌïn ni̱ hua sôꞌ dànanj ràꞌaj,
sí du̱chri nan nikaj gakï̱nꞌïn nîꞌ sij rej sij nikaj gakï̱nꞌïn sàꞌ.
Jesús cura a un ciego (Juan 9.1-41)
3 Nanikàj Ma̱ꞌan Jesús ni̱ gata:
—Sê sí nan nikaj gakï̱nꞌïn mánj,
ni̱ sê rej sij nikaj gakï̱nꞌïn mánj,
hua̱ sij dànanj guendâ ga̱ꞌhue gi̱ꞌhiaj Ma̱ꞌan Ñaꞌanj an si ga̱na̱huin sij na̱nj ánj.
4 Ña̱ꞌa̱n huaj si gi̱ꞌhia si-su̱n Ma̱ꞌan sa gaꞌnḯn gaꞌná,
nga nï̀nꞌ huin neꞌ gui;
dadinꞌ ga̱huin ru̱mi̱nꞌ,
hiôꞌ ni̱ gàꞌ si ngo̱ nej guiì si̱ ga̱ꞌhue gi̱ꞌhiaj sun mánj.
5 Nga nï̀nꞌ nné ruhuâ yumiguìi,
ni̱ huín sa yigï̀ïn ruhuâ yumiguìi.
6 Nga gisîj gataj Ma̱ꞌan Jesús dànanj,
ni̱ gachra stanu riñan hioꞌóo,
ni̱ giꞌhia sigëꞌë ngà nne stanu,
ni̱ gachri sigëꞌ dânj nguèj rune ñan sí du̱chri dânj,
7 Ni̱ gata:
—Ga̱ꞌa̱nj gànàꞌnï̀nꞌ riñanꞌ ruhuâ tankî nu̱n Siloé.
(Ni̱ ruhuaj ga̱ta,
gaꞌnï̂n ga̱ꞌan.)
Hiôꞌ ni̱ gaꞌanj sí nânj ni̱ ganaꞌnïnꞌ sôꞌ rune ñan sôꞌ,
ni̱ nga nanikàj sôꞌ gunumân sôꞌ ni̱ gàꞌ ganayigï̀n giniꞌhiaj sôꞌ.
8 Hiôꞌ ni̱ gataj nej sí nne nìchrùnꞌ ñan nne sôꞌ,
dadinꞌ niꞌin nej sôꞌ si àsìj gàꞌ nâ ni̱ huê danj gàꞌ hua du̱chri sôꞌ,
ni̱ gataj nej sí dânj:
—Sê sí nan huin sí nne gachín karida ràꞌ saj ûnꞌ.
9 Ni̱ gataj da̱ꞌa̱j nej sí dânj:
—Huê sij huin ruꞌmín.
Ni̱ aꞌngô da̱ꞌa̱j nej sôꞌ gataj:
—Sê sij huin mánj,
daꞌngaꞌ dan hua sij.
Sani̱ gataj ma̱ꞌan sí dânj:
—Ñùnj huin ruꞌmín.
10 Ni̱ gataj nej sí dânj:
—Dàj giꞌhiajꞌ ni̱ ganayigï̀nꞌ rune ñanꞌ ràꞌaj.
11 Nanikàj sí dânj ni̱ gataj sôꞌ:
—Sí gùꞌnàj Jesús naduhuiꞌ sigëꞌë,
ni̱ gachrîj sij rune ñânj ni̱ gataj si gu̱nḯn:
“Ga̱ꞌa̱nj nànìꞌhiàꞌ,
nne nu̱n ruhuâ tankî Siloé.”
Huê danj ni̱ gaꞌan,
ni̱ giꞌhiâ dàj rûnꞌ gataj sij hiôꞌ ni̱ ganayigï̀n rune ñanj ni̱ guruguiꞌ giniꞌhia.
12 Hiôꞌ ni̱ gataj nej sí dânj:
—Dànèꞌ nikïnꞌ sôꞌ ràꞌaj.
Ni̱ gataj sí dânj:
—Nun niꞌín dànèꞌ nikïnꞌ sij mánj.
Gachín naꞌanj nej sí fariseo sí du̱chri dânj
13 Ni̱ ni̱ka̱j nej sí dânj gaꞌanj nej sôꞌ sí ganahuin rune ñan dânj riñan nej sí fariseo.
14 Ni̱ gui ganarânj rûhua huin nga ganaduhuiꞌ Ma̱ꞌan Jesús sigëꞌë,
ni̱ giꞌhia si ganayigï̀n rune ñan sí nânj.
15 Ni̱ gachín naꞌanj ñûn nej sí fariseo,
nùnj huin si giꞌhiaj sij ni̱ ganayigï̀n rune ñanꞌ ràꞌaj.
Ni̱ gataj sôꞌ:
—Gachrîj sij sigëꞌë rune ñânj ni̱ gaꞌnḯn sij gaꞌanj gànàꞌnï̀nj rune ñânj,
huê danj ni̱ ganayigï̀n rune ñânj na̱nj ánj.
16 Huê danj ni̱ gataj da̱ꞌa̱j nej sí fariseo:
—Sê Ñaꞌanj an gaꞌnḯn gaꞌnaꞌ sí dan dadinꞌ nitaj si dagahuin sij gui ganarânj ruhuâ mánj.
Sani̱ aꞌngô da̱ꞌa̱j nej sí dânj gataj:
—Ga̱ꞌhue gi̱ꞌhiaj ꞌngo̱ sí ga̱kï̱nꞌïn ga̱na̱huin ꞌngo̱ guiì na̱nj nîꞌ.
Huê danj ni̱ giyichraꞌ da̱ꞌa̱j nej guiì.
17 Hiôꞌ ni̱ nanikàj ñûn nej sij ni̱ gataj nej sij gu̱nïn sí ga du̱chri dânj:
—Dàj gatajꞌ rayiꞌî sí giꞌhiaj ganayigï̀n rune ñanꞌ ràꞌaj.
Ni̱ gataj sí dânj:
—ꞌNgo̱ sí gataj dàj ga̱huin huin sij na̱nj ánj.
18 Ni̱ nga ganayigï̀n giniꞌhiaj sí nânj ni̱ naꞌhue gùyùmàn ruhuâ nej sí judío si gahuin sôꞌ sí du̱chri,
huê danj ni̱ gakḯn nej sij gaꞌnaꞌ gànàtàꞌ rej sôꞌ,
si yàngàꞌ ga du̱chri sôꞌ.
19 Ni̱ gachín naꞌanj nej sij ni̱ gataj nej sij gu̱nïn rej sôꞌ:
—Daꞌní nguèj ni̱ka̱ suj huin sí nan nîꞌ,
ni̱ hua̱ du̱chri si nga gaꞌnga sij nîꞌ.
Nùnj huin saj ni̱ ganayigï̀n rune ñan sij ràꞌaj.
20 Ni̱ nanikàj rej sôꞌ ngà nni sôꞌ ni̱ gataj nguèj ni̱ka̱ sôꞌ:
—Niꞌin nguèj ñûnj si daꞌní nguèj ñûnj huin sij,
ni̱ gàꞌ hua̱ du̱chri sij àsìj nga gaꞌnga sij;
21 Sani̱ nun niꞌin nguèj ñûnj nùnj huin saj ganayigï̀n rune ñan sij,
ni̱ ahuin sí giꞌhiaj ganayigï̀n rune ñan sij mánj;
gàchìnj naꞌanj nej suj sij,
dadinꞌ gàꞌ añûn ruhuâ sij;
ni̱ gànàtàꞌ sij yiꞌî ma̱ꞌan sij riñan nej suj.
22 Huê dànanj gataj nguèj nìkà rej sí nânj,
dadinꞌ yuꞌhuiꞌ nguèj sôꞌ niꞌin nguèj sôꞌ nej sí judío,
dadinꞌ gàꞌ guchiꞌ nej sí dânj ꞌngo̱ duꞌhua si hua̱ ꞌngo̱ sí ga̱ta̱j si Jesús huin Ma̱ꞌan Mesías,
ni̱ gi̱ri̱ nej sij ruhuâ si-nùhuì nej sij sí gataj dànanj.
23 Rayiꞌî dânj ni̱ gataj nguèj nìkà sôꞌ dànanj:
“Gàꞌ añûn ruhuâ sij,
ni̱ gàchìnj naꞌanj nej suj sij.”
24 Hiôꞌ ni̱ ganakḯn ñûn nej sij sí ga du̱chri dânj,
ni̱ gataj nej sij gu̱nïn sôꞌ:
—Ga̱ꞌmi̱n hueꞌê sòꞌ rayiꞌî Ma̱ꞌan Ñaꞌanj an;
dadinꞌ niꞌin nej ñûnj si sí gakï̱nꞌïn huin sí giꞌhiaj ganahuînꞌ na̱nj ánj.
25 Hiôꞌ ni̱ nanikàj sí dânj ni̱ gataj sôꞌ:
—Si huin sij sí gakï̱nꞌïn,
hiôꞌ ni̱ nun niꞌín mánj;
sani̱ ꞌngo̱ sa niꞌín huin,
si gahuín ꞌngo̱ sí du̱chri,
hia̱j ni̱ ganayigï̀n rune ñanj giꞌhiaj sij.
26 Nanikàj nej sí dânj ni̱ gataj nej sôꞌ:
—Nùnj huin si giꞌhiaj sí dânj sòꞌ,
ni̱ dàj giꞌhiaj sôꞌ nga ganayigï̀n rune ñanꞌ ràꞌaj.
27 Nanikàj sí dânj ni̱ gataj sôꞌ:
—Gàꞌ gatâ dàj giꞌhiaj sij,
sani̱ naꞌhuej nej suj gu̱nïn nej suj mánj;
nùnj huin saj ni̱ ruhuâ nej suj gu̱nïn nej suj aꞌngô ñûn ràꞌaj.
Ruhuâ nej suj ga̱huin nej suj sí ga̱ꞌna̱ꞌ ga̱huin chru̱n riñan sij nîꞌ.
28 Ni̱ gaꞌmin duku nej sij riñan sí dânj,
ni̱ gataj nej sij gu̱nïn sôꞌ:
—Sòꞌ huin sí gaꞌnaꞌ ga̱huin chru̱n riñan sij;
sani̱ nej ñûnj ni̱ nej sí gaꞌnaꞌ ga̱huin chru̱n riñan Moisés huin nej ñûnj.
29 Niꞌin nej ñûnj si gaꞌmin Ma̱ꞌan Ñaꞌanj an riñan Moisés;
sani̱ rayiꞌî sí nânj,
ni̱ nun niꞌin nej ñûnj dànèꞌ gaꞌnaꞌ sôꞌ mánj.
30 Nanikàj sí dânj ni̱ gataj sôꞌ:
—Sa ga̱na̱huin nìhiàꞌ ruhuôꞌ huin nânj,
dadinꞌ nun niꞌinꞌ nej suj dànèꞌ gaꞌnaꞌ sij,
sani̱ giꞌhiaj sij ganayigï̀n rune ñânj.
31 Ni̱ niꞌin nêꞌ si Ñaꞌanj an ni̱ nitaj si gunïn nej nuguanꞌ gaꞌmin nej sí gakï̱nꞌïn;
sani̱ si hua̱ ꞌngo̱ sí ni̱ niꞌin Ma̱ꞌan Ñaꞌanj an ni̱ nitaj si giꞌhiaj sôꞌ gakï̱nꞌïn,
ni̱ dagahuin sôꞌ sa garanꞌ ruhuâ Ma̱ꞌan Ñaꞌanj an,
ni̱ gu̱nïn Ma̱ꞌan Ñaꞌanj an nej nuguanꞌ gaꞌmin sôꞌ.
32 Àsìj nâ ni̱ nitaj àmàn gunïnꞌ si giꞌhiaj ꞌngo̱ síi ganayigï̀n rune ñan ꞌngo̱ sí hua̱ du̱chri nga gaꞌnga sôꞌ mánj.
33 Ni̱ si sê Ma̱ꞌan Ñaꞌanj an gaꞌnḯn gaꞌnaꞌ sí nânj,
ni̱ nitaj nùnj huin si ga̱ꞌhue gi̱ꞌhiaj sôꞌ mánj.
34 Nanikàj nej sí dânj ni̱ gataj nej sôꞌ:
—Sòꞌ ni̱ gaꞌngaꞌ riñan gakï̱nꞌïn.
Ni̱ ruhuâꞌ gidigânꞌ nej ñûnj na̱nj nîꞌ.
Huê danj ni̱ giri nej sij ruhuâ si-nùhuì nej sij sí dânj.
Hua̱ ru̱mi̱nꞌ ruhuâ daꞌngaꞌ nej sij rayiꞌî dan naꞌhue ga̱ra̱n daꞌngaꞌ ruhuâ nej sij
35 Ni̱ gunïn Ma̱ꞌan Jesús si giri nej sij ruhuâ si-nùhuì nej sij sí dânj ni̱ ganariꞌij sí dânj,
ni̱ gata gu̱nïn sôꞌ:
—Guyumân ruhuâꞌ niꞌînꞌ Daꞌní Ma̱ꞌan Ñaꞌanj an nîꞌ.
36 Nanikàj sí dânj ni̱ gataj sôꞌ:
—Ga̱ta̱j rèꞌ ahuin hiôꞌ ni̱ gùyùmàn ruhuâj niꞌín Ma̱ꞌan na̱nj Señor.
37 Nanikàj Ma̱ꞌan Jesús ni̱ gata:
—Gàꞌ giniꞌînꞌ Ma̱ꞌan,
ni̱ sa ngà aꞌminꞌ,
ni̱ huê Ma̱ꞌan huin na̱nj ánj.
38 Hiôꞌ ni̱ ganikïnꞌ rúdàkòj sí dânj ni̱ ginûn na̱ꞌa̱nj sôꞌ Ma̱ꞌan Jesús.
Ni̱ gataj sôꞌ:
—Guyumân ruhuâj niꞌín Ma̱ꞌân rèꞌ Señor;
39 Ni̱ gataj Ma̱ꞌan Jesús:
—Si̱ gaꞌnaꞌ ga̱ya̱ka̱j guendâj dàj giꞌhiaj nej guiì màn ruhuâ yumiguì nânj;
daꞌnga ni̱ nej guiì du̱chri,
ni̱ ga̱ꞌhue gi̱ni̱ꞌhiaj ninj,
ni̱ nej sí giniꞌhiaj ni̱ ga̱huin nej sôꞌ sí du̱chri na̱nj ánj.
40 Hiôꞌ ni̱ nga gunïn da̱ꞌa̱j nej sí fariseo ni̱kï̱nꞌ ngà Ma̱ꞌan Jesús,
ni̱ gataj nej sôꞌ:
—Hiôꞌ ni̱ hua̱ du̱chri nej ñûnj nga na̱nj nîꞌ.
41 Nanikàj Ma̱ꞌan Jesús ni̱ gata:
—Ni̱ si huin nej suj sí du̱chri,
hiôꞌ ni̱ nitaj gakï̱nꞌïn ata nej suj saj mánj,
sani̱ ñan gataj nej suj:
Nitaj si hua̱ du̱chri nej ñûnj,
hiôꞌ ni̱ hua̱ na̱nj hua̱ si-ga̱kïnꞌ nej suj na̱nj ánj.