Nuguanꞌ rán aꞌmin rayiꞌî yingâ màn matsïj ï
10
’Yàngàꞌ ni̱ yàngàꞌ hia nï̀nꞌ tâ:
Ni̱ sí nitaj si gatûj riñan yingâ ñan màn nej matsïj ï,
ni̱ guêj sôꞌ raa̱ yingâ ni̱ gatûj sôꞌ ruhuâ yingâ,
sí dânj huin sí tu̱u,
ni̱ sí huej raa̱ yingâ.
2 Sani̱ sí gatûj riñan yingâ,
ni̱ sôꞌ huin sí ni̱kï̱nꞌ dugumîn nej matsïj màn ruhuâ yingâ.
Jesús el buen pastor (Juan 10.1-21)
3 Ni̱ ganaꞌnï̂nj sí ni̱kï̱nꞌ dugumîn riñan yingâ ga̱tu̱ sí dânj,
ni̱ gunïn nej matsïj ï si-nànè sôꞌ;
ni̱ gaꞌmin sôꞌ siyu̱gui daꞌ goꞌngo̱ nej matsïj dânj,
ni̱ giri sôꞌ ruhuâ yingâ nej matsïj dânj.
4 Ni̱ nga giri sôꞌ neꞌ ye̱ꞌ yingâ daranꞌ nej dân sôꞌ matsïj ï,
ni̱ hua̱j sôꞌ neꞌ ña̱an riñan nej yôꞌ;
ni̱ nìkòꞌ nej yôꞌ rukû sôꞌ huaj nej yôꞌ,
dadinꞌ niꞌin nej yôꞌ si-nànè sôꞌ.
5 Sani̱ nga nun na̱ni̱ꞌin nej yôꞌ si sê rikiꞌ nej yôꞌ huin ꞌngo̱ sí dânj huê danj ni̱ nitaj si nìkòꞌ nej yôꞌ,
dànanj gunânj nej yôꞌ riñan sí dânj,
dadinꞌ nun niꞌin nej yôꞌ si-nànè aꞌngô síi mánj.
6 Garânj sun Ma̱ꞌan Jesús nuguanꞌ rán nânj;
sani̱ nun ga̱ra̱n daꞌngaꞌ ruhuâ nej sij nej nuguanꞌ gataj Ma̱ꞌan mánj.
Ma̱ꞌan Jesús huin sa dugumîn nej matsïj ï
7 Nanikàj ñûn Ma̱ꞌan Jesús ni̱ gata:
—Yàngàꞌ ni̱ yàngàꞌ hia nï̀nꞌ gatâ:
Ñùnj huin rahueꞌ ñan ga̱tu̱ nej matsïj ï.
8 Daranꞌ nej sí gaꞌnaꞌ si̱nï̱n gàꞌ daꞌ ñùnj,
ni̱ gahuin nej sôꞌ sí tu̱u,
ni̱ gahuin nej sôꞌ sí guêj raa̱ yingâ;
sani̱ nun gu̱nïn nej matsïj ï si-nùguànꞌ nej sôꞌ.
9 Ñùnj huin riñan rahueꞌe;
sí ga̱tu̱ riñan rahueꞌ dânj ni̱ ga̱na̱ni̱n sôꞌ;
ni̱ ga̱tu̱ sôꞌ,
ni̱ ga̱hui̱ sôꞌ,
ni̱ gìrìꞌ sôꞌ sa ya̱ sôꞌ.
10 ’Sí tu̱u ni̱ mân si gaꞌnaꞌ sôꞌ guendâ gi̱ꞌhiaj tu̱ sôꞌ,
guendâ da̱gahuiꞌ sôꞌ,
guendâ gu̱du̱rëꞌ sôꞌ;
sani̱ ñùnj ni̱ gaꞌná guendâ gi̱ꞌhia si ga̱na̱huin nìꞌnàꞌ nej guiì,
ni̱ ga̱ne nìgànj ninj.
11 Ñùnj huin sí ûta dugumîn nej matsïj ï;
ni̱ sí dugumîn hueꞌê nej matsïj ï ni̱ gaꞌnïnꞌ ruhuâ sôꞌ gàhuìꞌ sôꞌ rayiꞌî dân sôꞌ matsïj ï.
12 Sani̱ sí hua̱ duꞌhue,
ni̱ sê sí ni̱kï̱nꞌ dugumîn nej matsïj huin sôꞌ,
ni̱ sê dân sôꞌ huin nej matsïj dânj,
ni̱ nga giniꞌin sôꞌ ꞌnaꞌ yuku stuj uj,
ni̱ gudunâj sôꞌ nej matsïj ï ni̱ gunânj sôꞌ ni̱ gaꞌanj sôꞌ,
huê danj ni̱ gidaꞌa yuku stuj uj nej matsïj ï ni̱ duyaꞌnï̀n yôꞌ nej matsïj ï.
13 Dadinꞌ hua̱ duꞌhue sôꞌ,
sani̱ nitaj si ganahuij ruhuâ sôꞌ niꞌin sôꞌ nej matsïj ïj.
14 “Ñùnj huin sí ûta hueꞌê dugumîn nej matsïj ï;
ni̱ niꞌin hueꞌê nej dán matsïj ïn ñùnj,
15 ’Dàj rûnꞌ niꞌin Ma̱ꞌan Rê ñùnj,
ni̱ huê danj niꞌín Ma̱ꞌan Rê;
ni̱ hua̱ ruhuâj gàhuìj rayiꞌî nej dán matsïj ï.
16 Ni̱ nìkà aꞌngô nej matsïj ï sani̱ sê nej matsïj màn ruhuâ yingâ nânj huin nej yôꞌ mánj;
sani̱ daꞌhuí ga̱ꞌa̱nj gànàkà nej yôꞌ,
ni̱ gu̱nïn nej yôꞌ si-nùguànꞌànj;
ni̱ ga̱ ꞌngo̱ rïn yiꞌnïnꞌïn ni̱ ga̱ ꞌngo̱ rïn sí ga̱nikïnꞌ du̱gumîn nej yôꞌ na̱nj ánj.
17 ’Rayiꞌî dan ni̱ ꞌì ruhuâ Ma̱ꞌan Rê niꞌin ñùnj,
dadinꞌ hua̱ ruhuâj gàhuìj rayiꞌî nej dán matsïj ï,
sani̱ ga̱ꞌhue ga̱na̱huin nìꞌnàꞌ ñûn Ma̱ꞌán gi̱ꞌhia na̱nj ánj.
18 Sê nej síi giri ra̱ si gàhuìj mánj,
Ma̱ꞌán ganï̂n ruhuâ gàhuìꞌ.
Ga̱ꞌhue gàhuìj sani̱ ga̱ꞌhue gànàꞌnï̀nj ñún.
Dadinꞌ hue dànanj giyiꞌnïnꞌ suun riñânj giꞌhiaj Ma̱ꞌan Rê Ñaꞌanj an.
19 Nga gunïn nej sí judío nuguanꞌ gaꞌmin Ma̱ꞌan Jesús ni̱ giyichraꞌ da̱ꞌa̱j ñûn nej sôꞌ.
20 Ûta gàꞌì ranꞌ nej sôꞌ gataj:
—Sa nàsàꞌa nun ruhuâ nimân sí nânj,
ni̱ sinûn sôꞌ;
nùnj huin si ꞌhiaj nej suj gunïn nej suj sa gaꞌmin sij gàꞌ ûnj.
21 Ni̱ gataj aꞌngô da̱ꞌa̱j nej sí dânj:
—Nej nuguanꞌ nan ni̱ sê si-nùguànꞌ sí nu̱n sa nàsàꞌa ruhuâ nimân huin mánj.
Ga̱ꞌhue gànàyìgï̀n rune ñan ꞌngo̱ sí du̱chri gi̱ꞌhiaj sa nàsàꞌa na̱nj nîꞌ.
Naꞌhuej nej judío ga̱na̱huin raꞌa nej sôꞌ Ma̱ꞌan Jesús
22 Diû gahiu ꞌhueꞌe,
gahuin nga gananun si-gi̱ꞌña̱nj nûhui nìko nne ruhuâ yumanꞌ Jerusalén.
Jesús acusado de blasfemia (Juan 10.22-42)
23 Ni̱ aché nun Ma̱ꞌan Jesús ñan nne nûhui nìko riñan rahueꞌ ni̱ka̱j siyu̱gui Salomón.
24 Ni̱ nda gachra chre ganikàj mân nej judío rùkù Ma̱ꞌan Jesús ni̱ gataj nej sôꞌ gu̱nïn:
—Nda àmàn gu̱du̱nâjꞌ gi̱ꞌhiâꞌ si gùrùguìꞌ chìꞌ ruhuâ ma̱ꞌan nimân nej ñûnj niꞌin nej ñûnj sòꞌ ràꞌaj.
Si huêꞌ huin Maꞌân Cristo,
ni̱ ri̱ña̱n ga̱ta̱j sòꞌ gu̱nïn nej ñûnj na̱nj ánj.
25 Nanikàj Ma̱ꞌan Jesús ni̱ gata:
—Huê gàꞌ gatâ,
sani̱ naꞌhuej nej suj gùyùmàn ruhuâ nej suj niꞌin nej suj ñùnj mánj;
nga giꞌhia ganahuin nej guiì ni̱ garânj sunj siyu̱gui Ma̱ꞌan Rê,
ni̱ huê nej sa giꞌhia dânj ganataꞌ rayiꞌí;
26 sani̱ naꞌhuej nej suj gùyùmàn ruhuâ nej suj niꞌin nej suj ñùnj,
dadinꞌ sê dán matsïj ï huin nej suj mánj.
27 Nej dán matsïj ï ni̱ gunïn nej xuj si-nùguànꞌànj,
ni̱ niꞌín nej xuj,
ni̱ nìkòꞌ nej xuj ñùnj.
28 Ni̱ ñùnj gi̱ꞌhiaj ga̱ne nìgànj nej guiì guyumân ruhuâ niꞌin ñùnj;
ni̱ nitaj si huaj gàhuìꞌ nìgànj ninj,
ni̱ gàꞌ si ꞌngo̱ síi si̱ gaꞌnêj nej guiì dânj raꞌá mánj.
29 Ni̱ Ma̱ꞌan Rê Ñaꞌanj an rikî nej guiì nânj raꞌá,
ni̱ sa nìko staꞌuu huin Ma̱ꞌan riñan nej guiì nânj,
ni̱ gàꞌ si ꞌngo̱ síi si̱ gaꞌhue ga̱ꞌne̱ nej guiì nânj raꞌa Ma̱ꞌan Rê mánj.
30 Ñùnj ngà Ma̱ꞌan Rê ni̱ ꞌngo̱ rïn nguèj ñûnj huin.
31 Hiôꞌ ni̱ gidaꞌa ñûn nej síchìj judío hiëj guendâ ga̱rru̱n nej sôꞌ Ma̱ꞌan Jesús.
32 Nanikàj Ma̱ꞌan Jesús ni̱ gata:
—Ûta gàꞌì nej sa hua̱ hueꞌê gidigân Ma̱ꞌan reꞌ giꞌhia;
ni̱ ahuin rayiꞌî goꞌngo̱ nej sa hua̱ hueꞌê dânj ga̱rru̱n nej suj hiëj ñùnj ràꞌaj.
33 Nanikàj nej sí judío,
ni̱ gataj nej sôꞌ:
—Sê rayiꞌî nej sa hueꞌê giꞌhiâꞌ dan ga̱rru̱n nej ñûnj hiëj sòꞌ mánj,
rayiꞌî guendâ gaꞌminꞌ kï̱jꞌ;
dadinꞌ sòꞌ ni̱ síi huînꞌ ni̱ gatajꞌ si gu̱ña̱n chre huînꞌ ngà Ma̱ꞌan Ñaꞌanj an.
34 Nanikàj Ma̱ꞌan Jesús ni̱ gata:
—Sê huê danj gàꞌ nnunj riñan si-ley nej suj:
Ni̱ gataj Ma̱ꞌan Ñaꞌanj an.
“Si ñaꞌanj an huin nej suj ràꞌ saj ûnꞌ.”
35 Ni̱ si Ma̱ꞌan Ñaꞌanj an gataj si ñaꞌanj an huin nej sí ri̱ña̱n guyumân si-nùguànꞌanj ni̱ si̱ gaꞌhue ga̱ꞌne̱ꞌ si-nùguànꞌ Ma̱ꞌan Ñaꞌanj an mánj,
36 Ni̱ nagiꞌhiaj gè Ma̱ꞌan Rê Ñaꞌanj an ñùnj ni̱ gaꞌnïn gaꞌná ruhuâ yumiguìi,
ni̱ gataj nej suj gu̱nḯn:
Gaꞌmin kï̱jꞌ riñan Ma̱ꞌan Ñaꞌanj an,
rayiꞌî guendâ gatâ:
Si huín Daꞌní Ma̱ꞌan Ñaꞌanj an na̱nj nîꞌ.
37 Ni̱ si nitaj si giꞌhiâ nej sa hueꞌê gidigân Ma̱ꞌan Rê Ñaꞌanj an,
ni̱ si̱ guyumân ruhuâ nej suj niꞌin nej suj ñùnj mánj.
38 Ni̱ si giꞌhiâ nej sa hua̱ hueꞌê ni̱ nùnj huin sisi̱ si̱ guyumân ruhuâ nej suj niꞌin nej suj ñùnj,
ni̱ gùyùmàn ruhuâ nej suj niꞌin nej suj sa hueꞌê giꞌhiâ,
daꞌnga ni̱ gaꞌhue gi̱ni̱ꞌin nej suj ni̱ gùyùmàn ruhuâ nej suj si nne Ma̱ꞌan Rê ngàj,
ni̱ nné ngà Ma̱ꞌan Rê.
39 Ni̱ ûta huin ruhuâ nej sij gi̱daꞌa nej sij Ma̱ꞌan Jesús guendâ gu̱ne̱ꞌ nej sij dukuâ gaꞌa,
sani̱ guxunj Ma̱ꞌan riñan nej sij.
40 Ni̱ gaꞌanj ñûn Ma̱ꞌan Jesús ané duꞌhua kïn Jordán,
ñan duguataꞌ nne si̱nï̱n Juan nej guiì;
ni̱ guna hiuj dânj.
41 Ni̱ gaꞌnaꞌ gi̱niꞌhiaj ûta gàꞌì nej guiì Ma̱ꞌan Jesús,
ni̱ gataj ninj:
—Yàngàꞌ ni̱ Juan,
ni̱ nitaj gàꞌ si ꞌngo̱ daꞌngaꞌa giꞌhiaj sôꞌ gi̱niꞌin nej ñûnj;
sani̱ daranꞌ nej nuguanꞌ gataj sôꞌ rayiꞌî sí nânj,
ni̱ sa yàngàꞌ huin sa gataj sôꞌ.
42 Ni̱ ûta gàꞌì nej guiì màn hiuj dânj guyumân ruhuâ niꞌin Ma̱ꞌan Jesús.