Nne Ma̱ꞌan Jesús ruhuâ yumanꞌ Nazaret
6
Ni̱ gahui Ma̱ꞌan Jesús hiuj dânj ni̱ gaꞌan yiñan,
ni̱ nìkòꞌ nej sí ꞌna̱ꞌ ga̱huin chru̱n riñanj ni̱ gaꞌanj nej sôꞌ nngaj.
2 Ni̱ nga guyumân gui ganarânj rûhua,
ni̱ gayiꞌì Ma̱ꞌan Jesús ni̱ gidiganj ruhuâ hueꞌ huin nûhui;
ni̱ gunïn ûta gàꞌì nej guiì nej nuguanꞌ gidigân Ma̱ꞌan,
ni̱ ûta gahuin ña̱ꞌanj ruhuâ ninj ni̱ gataj ninj:
—Dànèꞌ gahuin chru̱n sí nânj nej nuguanꞌ nânj ràꞌaj.
Ni̱ ahuin si gidigân riñan sôꞌ ni̱ gahuin chru̱n sôꞌ ni̱ ûta hueꞌê niꞌin sôꞌ ni̱ nda nanè chre ganahuin nej guiì giꞌhiaj sôꞌ ràꞌaj.
3 Sê sí nânj huin sí akôj chrun ni̱ huin si daꞌní María,
ni̱ dinḯn sij huin Jacobo ni̱ dinḯn sij huin José,
ni̱ dinḯn sij huin Judas,
ni̱ sê dinḯn sij huin Simón nej ràꞌ saj ûnꞌ.
Sê nne nej yuguej sij ngà nêꞌ nan ràꞌ saj ûnꞌ.
—Nï̀nꞌ gàꞌchràꞌ ginikaj chre̱j nej guiì riñan nej sí ganataꞌ dàj gahuin,
sani̱ nitaj si ginikaj chre̱j nej guiì màn yiñán nej sôꞌ riñan nej sôꞌ mánj,
ni̱ huê danj na̱nj nitaj si ginikaj chre̱j duguiꞌ anêj nej sôꞌ ngà nej duguiꞌ ma̱ꞌan nej sôꞌ riñan nej sôꞌ mánj.
5 Ni̱ nun ga̱ꞌhue gi̱ꞌhiaj Ma̱ꞌan Jesús si ga̱na̱huin nej guiì nda nanè chre hiuj dânj mánj,
man do̱j nej guiì aꞌnanꞌan ganahuin nga gutaꞌ Ma̱ꞌan Jersús raꞌa yichrá ninj.
6 Ni̱ ûta gahuin ña̱ꞌanj ruhuaj dadinꞌ nitaj si guyumân ruhuâ nej guiì màn yiñan niꞌin ninj Ma̱ꞌan.
Ni̱ gaꞌanj gi̱di̱ganj si-nùguànꞌ Ma̱ꞌan Ñaꞌanj an riñan nej yumanꞌ lij màn ganikàj rukû Nazaret.
Gaꞌnḯn Ma̱ꞌan Jesús gaꞌanj nàtàꞌ nej yùhuìj sí gaꞌnaꞌ ga̱huin chru̱n riñanj si-nùguànꞌ Ma̱ꞌan Ñaꞌanj an
7 Neꞌ rùkù ni̱ gakïn gaꞌnaꞌ nej yùhuìj sí ꞌna̱ꞌ ga̱huin chru̱n riñanj,
ni̱ gaꞌnïn gaꞌanj daꞌ huìj daꞌ huìj ranꞌ nej sôꞌ;
ni̱ gaꞌhuij si gi̱nikaj su̱n nej sôꞌ riñan nej nanè kï̱j huaa.
8 Ni̱ gaꞌnïnꞌ sunj riñan nej sij ni̱ gata si si̱ gi̱nikaj nej sij sa ya̱ nej sij nga ga̱ꞌa̱nj nej sij,
man ꞌngo̱ rïn sa ga̱ꞌhue gi̱nikaj nej sij ga̱ꞌa̱nj nej sij huin chrun du̱guꞌnïnꞌ nej sij riñan hioꞌóo;
ni̱ gàꞌ si̱ gaꞌhue gi̱nikaj nej sij nnanj,
ni̱ si̱ gaꞌhue gi̱nikaj nej sij rachrúun,
ni̱ gàꞌ si̱ gaꞌhue gàꞌnï̀nj nej sij sanꞌanj an ruhuâ si-gosâ nej sij gi̱nikaj nej sij ga̱ꞌa̱nj nej sij.
9 Ni̱ man sa giꞌnïnj dakó nej sij huin kanj,
ni̱ si̱ gaꞌhue gi̱nikaj nej sij huìj muda atsìj i guendâ na̱du̱na̱ nej sij ma̱ꞌan nej sij.
10 Ni̱ gata:
—Dànèꞌ gahuin nga ga̱tu̱ nej suj ruhuâ ꞌngo̱ hueꞌe,
ni̱ ga̱ne nej suj hiuj dânj nda ga̱hui̱ nej suj ga̱ꞌa̱nj nej suj aꞌngô yumanꞌan.
11 Ni̱ si hua̱ ꞌngo̱ hueꞌ nun ga̱ꞌhue̱j nej guiì ga̱na̱huin ra̱ꞌa ninj nej suj ni̱ nun ga̱ꞌhue̱j ninj gu̱nïn ninj si-nùguànꞌ Ma̱ꞌan Ñaꞌa̱nj an,
ni̱ ga̱hui̱ nej suj hiuj dânj,
ni̱ na̱gunanꞌ nej suj hioꞌó hiaj màn riki dakó nej suj,
daꞌnga ni̱ ga̱na̱taj dàj giꞌhiaj nej guiì dânj ngà nej suj.
12 Ni̱ nga gahui nej sí ꞌna̱ꞌ ga̱huin chru̱un gaꞌanj nej sôꞌ,
ni̱ gataj nej sôꞌ,
si gànànìkàj ruhuâ nej guiì rayiꞌî si-ga̱kïnꞌ ninj.
13 Ni̱ giri nej sôꞌ ruhuâ nimân nej guiì ûta gàꞌì nej sa kï̱j ï,
ni̱ gachrîj nej sôꞌ ga̱sîti nej guiì aꞌnanꞌan.
Gahuiꞌ Juan Bautista
14 Ni̱ gunïn rey Herodes si ûta hueꞌê gaꞌmin nej guiì rayiꞌî Ma̱ꞌan Jesús,
dadinꞌ gàꞌ giyiꞌnanj siyu̱gui Ma̱ꞌan Jesús nï̀nꞌ gàchràꞌ;
ni̱ gataj sôꞌ:
—Ganaꞌnï̂nj Juan Bautista siganï̂nj nej nîman rayiꞌî dan ni̱ ganahuin ra̱ꞌa sij nìko suun.
15 Ni̱ gataj aꞌngô nej sôꞌ:
—Elias huin sij.
Ni̱ aꞌngô nej sôꞌ gataj:
—Sí gataj dàj ga̱huin huin sij,
nej si huin sij goꞌngo̱ nej sí gataj dàj ga̱huin.
16 Nga gunïn Herodes nej nuguanꞌ nânj ni̱ gataj sôꞌ:
—Sí nânj huin Juan:
Sí a̱hui gaꞌné ni̱ ganaꞌnï̂nj sij siganï̂nj nej nîman.
17 Dadinꞌ huê Herodes huin sí gaꞌnïnꞌ su̱n si ga̱ꞌa̱nj gi̱daꞌa nej sij Juan,
ni̱ gumînj nej sij ngà agaꞌ kadena ni̱ gachrîj nej sij dukuâ gaꞌa sôꞌ rayiꞌî Herodías,
yugûnꞌ yànà huin nika Felipe huin dinḯn sôꞌ;
dadinꞌ ganakaj Herodes yugûnꞌ dânj.
18 Dadinꞌ gataj Juan gu̱nïn Herodes:
—Nitaj si dùgùnàj huaj ga̱na̱ka̱jꞌ nika dinḯnt mánj.
19 Sani̱ gata rùhuà yugûnꞌ Herodías ni̱ ganï̂n ruhuâ ñûnꞌ da̱gahuiꞌ ñûnꞌ Juan,
sani̱ nun niꞌin ñûnꞌ dàj gi̱ꞌhiaj ñûnꞌ ga̱ꞌhue gàhuìꞌ Juan.
20 Dadinꞌ yuꞌhuiꞌ Herodes niꞌin sôꞌ Juan,
dadinꞌ niꞌin sôꞌ si Juan ni̱ huin sôꞌ sí giꞌhiaj sa ni̱ka̱a ni̱ huin sôꞌ sí gèe,
ni̱ dunaꞌhuej sôꞌ rayiꞌî Juan;
ni̱ nga gunïn sôꞌ nej nuguanꞌ gataj Juan ni̱ ûta guruguiꞌ chìꞌ ruhuâ sôꞌ,
sani̱ huê danj na̱nj ûta garanꞌ ruhuâ sôꞌ gu̱nïn sôꞌ nej nuguanꞌ gaꞌmin Juan.
21 Sani̱ guyumân ꞌngo̱ gui nga huaj ga̱ꞌhue gàhuìꞌ Juan,
gui nga ganasîj Herodes hioꞌo,
ni̱ giꞌhiaj Herodes ꞌngo̱ nihia stiꞌnï̀ïn,
ni̱ gaꞌhuiꞌ sôꞌ ya nej sí ni̱ka̱j sun huin ña̱an ngà nej kapitán,
ni̱ huê danj na̱nj gakḯn sôꞌ nej sí huin ña̱n riñan yumanꞌ Galilea.
22 Ni̱ gatûj daꞌnin yànà yugûnꞌ Herodías,
ni̱ giranꞌânj siyànà dânj riñan daranꞌ nej guiì màn hiuj dânj,
ni̱ gahuin nìhiàꞌ ruhuâ Herodes ni̱ huê danj na̱nj gahuin nìhiàꞌ ruhuâ nej guiì nne ngà sôꞌ yiꞌnḯn mesa;
ni̱ gataj rey gu̱nïn siyànà dânj:
—Ga̱ꞌhue̱ gàchìnjꞌ riñânj sa garanꞌ ruhuâꞌ ni̱ gìrìkìj na̱nj ánj.
23 Ni̱ gataj Herodes si yàngàꞌ hia nï̀nꞌ gàꞌhuìꞌ sôꞌ:
Ahuin na̱nj rasu̱n gàchìnj siyànà dânj,
ni̱ ga̱ꞌhue si nda da̱ꞌa̱j nej yumanꞌ ri̱ña̱n ni̱ka̱j ñuꞌunj sôꞌ ga̱ꞌhue nàgàꞌhuìꞌ sôꞌ raꞌa siyànà dânj.
24 Ni̱ gahui siyànà dânj gaꞌan ni̱ gata gu̱nïn nni:
—Nùnj huin si ga̱chin ràꞌaj.
Ni̱ gataj yugûnꞌ dânj:
—Gàchìnj sòꞌ ahui Juan bautista na̱nj ánj.
25 Hiôꞌ ni̱ nda nanè chre gaꞌanj siyànà dânj ñan nne rey Herodes,
ni̱ gata gu̱nïn sôꞌ:
—Garanꞌ ruhuâj si akuanꞌ nï̀n ni̱ ri̱ki̱ rèꞌ ruhuâ ꞌngo̱ rago̱ꞌo gi̱nun ahui Juan bautista riñânj.
26 Ni̱ nga gunïn rey Herodes nuguanꞌ nânj ni̱ ûta gananï̂n ruhuâ sôꞌ;
sani̱ ñan gàꞌ gataj sôꞌ si yàngàꞌ hia nï̀nꞌ gàꞌhuìꞌ sôꞌ ꞌngo̱ rasu̱un riñan siyànà dânj,
ni̱ ñan gàꞌ gunïn nej guiì nne ngà sôꞌ yiꞌnḯn mesa huê dânj ni̱ dusîj sôꞌ si-nùguànꞌ sôꞌ.
27 Ni̱ orâ chre ni̱ gaꞌnḯn rey dânj,
gaꞌanj ꞌngo̱ si-stadû sôꞌ guendâ gàꞌnèꞌ sôꞌ ahui Juan.
28 Ni̱ gaꞌanj sí stadû dânj ni̱ gaꞌneꞌ sôꞌ ahui Juan nda ruhuâ dukuâ gaꞌa,
ni̱ ni̱ka̱j sôꞌ ahui Juan ni̱ nunj ruhuâ ꞌngo̱ goꞌo nikaj sôꞌ gaꞌnaꞌ sôꞌ ni̱ nagaꞌhuiꞌ sôꞌ raꞌa siyànà dânj ni̱ siyànà dânj nagaꞌhuiꞌ ahui Juan raꞌa nni.
29 Ni̱ nga gunïn nej sí ꞌna̱ꞌ ga̱huin chru̱n riñan Juan dàj gahuin,
ni̱ gaꞌnaꞌ nej sôꞌ ni̱ ganakaj nej sôꞌ nneè kú Juan Bautista,
ni̱ gaꞌanj gàchìnꞌ nej sôꞌ nneè kú sôꞌ ñan gachinꞌ nej sij nej nîman.
Gaꞌhuiꞌ Ma̱ꞌan Jesús ya ùnꞌùnꞌ mîn síi
30 Huê danj ni̱ ganahuin chre̱ꞌ nej apóstol ngà Ma̱ꞌan Jesús,
ni̱ ganataꞌ nej sôꞌ gu̱nïn Ma̱ꞌan Jesús,
rayiꞌî daranꞌ nej sa giꞌhiaj nej sôꞌ,
ni̱ dàj gidigân nej sôꞌ.
31 Ni̱ gataj Ma̱ꞌan Jesús:
—Ga̱ꞌna̱ꞌ ni̱nï̱n nej suj riñan hioꞌó hua̱ niꞌnï̱nj ïn,
ni̱ ga̱na̱ra̱n ruhuâ nej suj do̱j hiuj nânj.
Dadinꞌ ûta gàꞌì nej guiì huaj nanꞌ ni̱ gàꞌì ninj ꞌnaꞌ,
ni̱ nitaj si giyîꞌnï̱nj riñan nej sij ni̱ gàꞌ guendâ ya̱ nej sij mánj.
32 Huê danj ni̱ gaꞌanj ꞌngo̱ rïn nej sí gaꞌna ga̱huin chru̱un ngà Ma̱ꞌan Jesús ruhuâ barku nda riñan hioꞌó hua̱ nàkòo.
33 Sani̱ giniꞌin ûta gàꞌì nej guiì nga gaꞌanj nej sij,
ni̱ ganï̂n ruhuâ ninj dànèꞌ ga̱ꞌa̱nj nej sij;
huê danj ni̱ gaché dàkòj ninj ni̱ gunânj ninj gaꞌanj ninj ni̱ gàꞌ si̱nï̱n ninj guchiꞌ ñan hua̱j nej sij.
34 Ni̱ nga gananinj Ma̱ꞌan Jesús ruhuâ barkû ni̱ giniꞌin si gàꞌ màn ûta gàꞌì nej guiì,
ni̱ gananï̂n àko ruhuaj niꞌin ninj,
dadinꞌ dàj rûnꞌ huin nej matsïj nitaj sí dugumîn huê danj huin ninj;
Ni̱ gayiꞌì Ma̱ꞌan Jesús ni̱ gidiganj ûta gàꞌì nej nuguanꞌan riñan ninj.
35 Ni̱ nga ûta hua̱j ginìn,
ni̱ gaꞌnaꞌ nichì nej sí ꞌna̱ꞌ ga̱huin chru̱n riñan Ma̱ꞌan Jesús ni̱ gataj nej sôꞌ:
—Riñan hioꞌó hua̱ niꞌnï̱nj ïn huin hiuj nânj,
ni̱ gàꞌ hua̱j gìnìn.
36 Ni̱ gataj nej sôꞌ gu̱nïn Ma̱ꞌan Jesús,
gànàꞌnï̀nj Ma̱ꞌân rèꞌ na̱nꞌ nej guiì ni̱ ga̱ꞌa̱nj ninj ñan màn nej hueꞌe ni̱ ñan nngaj nej ranchu,
ni̱ hiuj dânj gi̱ra̱n ninj rachrúun ya̱ ninj,
dadinꞌ nitaj sa ya̱ ninj hua hiuj nânj mánj.
37 Nanikàj Ma̱ꞌan Jesús ni̱ gata:
—Gàꞌhuìꞌ nej suj ya̱ ninj na̱nj ánj.
Ni̱ gataj nej sij:
—Ruhuâ Ma̱ꞌân rèꞌ si ga̱ꞌa̱nj gi̱ra̱n nej ñûnj rachrúun nînꞌ,
sani̱ gi̱niꞌñanj nej ñûnj sanꞌanj ga̱huin duꞌhue nej guiì huìj sientu gui,
daꞌnga ni̱ gisi gi̱ra̱n nej ñûnj rachrúun ni̱ gàꞌhuìꞌ nej ñûnj ya̱ nej guiì.
38 Ni̱ gataj Ma̱ꞌan Jesús:
—Andaj rachrúun nikaj nej suj ràꞌaj.
Ga̱ꞌa̱nj gi̱ni̱ꞌhiaj nej suj ni̱ gi̱ni̱ꞌin nej suj anda hua.
Huê danj ni̱ nga giniꞌin nej sij andaj rachrúun hua,
ni̱ ganataꞌ nej sij gu̱nïn Ma̱ꞌan Jesús:
—Man ùnꞌùnꞌ gè rachrúun ni̱ huìj gè yukuaj a hua na̱nj ánj.
39 Ni̱ gaꞌnïnꞌ su̱n Ma̱ꞌan Jesús si ga̱ta̱j nej sij gu̱nïn daranꞌ nej guiì màn hiuj dânj,
si gi̱ꞌhiaj ninj daꞌ yiꞌnïnꞌ nìko xi ma̱ꞌan ninj ni̱ ga̱ꞌa̱nj ga̱ne ninj riñan nej koj mare̱e.
40 Ni̱ daꞌ yiꞌnïnꞌïn gaꞌanj ga̱ne nej guiì hiuj dânj,
daꞌ ꞌngo̱ sientu,
daꞌ huìj xia chi̱ꞌ.
41 Hiôꞌ ni̱ gidaꞌa Ma̱ꞌa Jesús nej ùnꞌùnꞌ rachrúun ngà huìj nej yukuaj a,
ni̱ ganachi nikaj ñanj ne̱ꞌ yàtàꞌa ni̱ gaꞌhuij si guruhuâ Ma̱ꞌan Ñaꞌanj an,
ni̱ gaꞌneꞌ da̱ꞌa nej rachrúun,
ni̱ gaꞌhuij raꞌa nej sí ꞌna̱ꞌ ga̱huin chru̱n riñanj,
ni̱ guneꞌ nej sôꞌ neꞌ ña̱an;
ni̱ guchraꞌ da̱ꞌa nguèj yukuaj dânj ni̱ gaꞌhuij raꞌa daranꞌ nej guiì.
42 Ni̱ ya daranꞌ nej guiì ni̱ gachra riki ninj.
43 Ni̱ ganaranꞌ nej sij nej dasû lij gunâj dânj ni̱ ganasîj nda yùhuìj yugûti,
ni̱ huê danj na̱nj ganaranꞌ nej sij nej yukuaj gunâj.
44 Ni̱ gisi yâ nda ùnꞌùnꞌ mîn nej síi.
Aché Ma̱ꞌan Jesús riñan nne ña̱ꞌa̱nj
45 Ni̱ neꞌ rùkù ni̱ giꞌhiaj guesâ Ma̱ꞌan Jesús riñan nej sí ꞌna̱ꞌ ga̱huin chru̱n riñanj si ga̱tu̱ nej sôꞌ ruhuâ barku ni̱ ga̱ꞌa̱nj nej sôꞌ neꞌ ña̱n ñan nngaj yumanꞌ Betsaida,
neꞌ ané duꞌhua nne ña̱ꞌa̱nj,
nga ni̱ gunâj Ma̱ꞌan Jesús ni̱ ganaꞌnïn nanꞌ nej guiì dukuâ ninj.
46 Ni̱ neꞌ rùkù nga ganaꞌnïn nanꞌ nej guiì dukuâ ninj,
ni̱ gaꞌan ra̱ ꞌngo̱ kïj ï ni̱ gaꞌmin ngà Ma̱ꞌan Ñaꞌanj an.
47 Ni̱ nga ginìn gui dânj,
ni̱ gàꞌ hua̱j barku nda da̱ꞌa̱j nne ña̱ꞌa̱nj,
ni̱ ꞌngo̱ rïn Ma̱ꞌan Jesús gunâj nikïnꞌ riñan hioꞌó hua̱ niꞌnï̱nj ïn.
48 Ni̱ nga giniꞌin si ûta giꞌhiaj guesâ nej sij guendâ gu̱xu̱n nej sij nnee ngà chrun ruguechràꞌa,
dadinꞌ nanèe ni̱ dànanj gaꞌhuij neꞌ ri̱ña̱n nej sij,
ni̱ gàꞌ ruhuâ gahuin si̱ꞌnï̱nꞌ neꞌ ruhuâ giyigï̀n mánj ni̱ gaꞌnaꞌ Ma̱ꞌan ni̱ ache riñan nne ña̱ꞌa̱nj ni̱ guyumanj riñan nej sij,
ni̱ ruhuaj gàchìnj gaꞌan neꞌ ña̱n doj.
49 Ni̱ nga giniꞌin nej sij ache hua riñan nne ña̱ꞌa̱nj ni̱ gaguâj nej sij dadinꞌ guyuꞌhuiꞌ nej sij,
dadinꞌ ganï̂n ruhuâ nej sij si huin ꞌngo̱ staꞌnaj a;
50 Dadinꞌ giniꞌin daranꞌ nej sij,
ni̱ gaꞌanj daꞌngaꞌ nej sij sani̱ orâ chre ni̱ gaꞌmin ngà nej sij,
ni̱ gata gu̱nïn nej sij:
—Ga̱ nùkuaj ruhuâ nej suj;
dadinꞌ ñùnj huin ni̱ si̱ guyuꞌhuiꞌ nej suj mánj.
51 Ni̱ gatu ngà nej sij ruhuâ barku huê danj ni̱ ganikïnꞌ si gaꞌhuij nanèe;
ni̱ ûta gahuin ña̱ꞌanj ruhuâ nej sij sani̱ huê danj na̱nj gahuin nìhiàꞌ ruhuâ nej sij.
52 Dadinꞌ hua̱ na̱nj nun ga̱ꞌhue ga̱ra̱n daꞌngaꞌ ruhuâ nej sij dàj giꞌhia nga ganahuin gàꞌì nej rachrúun,
dadinꞌ neꞌ hua tsì ruhuâ nimân nej sij.
Giꞌhiaj Ma̱ꞌan Jesús ganahuin nej guiì màn yumanꞌ Genesaret
53 Ni̱ nga gachîn nej sij riñan nne ña̱ꞌa̱nj,
ni̱ gaꞌnaꞌ nej sij riñan hioꞌó gùꞌnàj Genesaret,
ni̱ gahuin nìchrùnꞌ nej sij duꞌhua hioꞌó dânj ni̱ gumînj nej sij barku nu̱n nej sij huaj nej sij.
54 Ni̱ gananinj nej sij ruhuâ barku,
ni̱ orâ chre ni̱ gananiꞌin nej guiì màn hiuj dânj nej sij.
55 Ni̱ gaꞌanj gànàtàꞌ nej guiì dânj riñan nej guiì màn ganikàj rukû yumanꞌ dânj,
ni̱ gayiꞌì nej sôꞌ ni̱ ginikaj nej sôꞌ nej sí aꞌnanꞌan gaꞌnaꞌ nej sôꞌ ni̱ tàj nej sí dânj riñan chrun ata nej sôꞌ gaꞌnaꞌ nej sôꞌ,
ñan gunïn nej sôꞌ nne Ma̱ꞌan Jesús.
56 Ni̱ dànèꞌ gahuin gatûj Ma̱ꞌan Jesús ñan hua̱ ꞌngo̱ yumanꞌ lij,
ni̱ ñan nngaj ꞌngo̱ yumanꞌ snàꞌànj an ni̱ riñan hioꞌó giꞌhiaj sun nej sij,
ni̱ guchruj nej sij gingaj nej sí aꞌnanꞌan duꞌhua chrej e,
ni̱ gachín nìꞌhiaj nej guiì dânj si ga̱ꞌhue̱j Ma̱ꞌan Jesús ni̱ gàgànꞌ raꞌa ninj man ꞌhuej nìkòꞌ duꞌhua atsîj ni̱ke̱ Ma̱ꞌan,
ni̱ nej guiì gaganꞌ raꞌa ꞌhuej nìkòꞌ duꞌhua atsîj tàj yichrá Ma̱ꞌan ni̱ ganahuin daranꞌ ninj giꞌhia.