Gahuiꞌ Juan Bautista
14
Nga diû dânj ni̱ gunïn Herodes tetrarca, si ûta nìko hua nej sa giꞌhiaj Ma̱ꞌan Jesús,
2 Ni̱ gataj sôꞌ gu̱nïn nej sí giꞌhiaj sun riñan sôꞌ:
—Sí nânj huin Juan Bautista; ni̱ ganaꞌnï̂nj sôꞌ siganï̂nj nej nîman, rayiꞌî dan gaꞌhue ûta nìko nej sa giꞌhiaj sôꞌ.
3 Dadinꞌ Herodes huin sí gidaꞌa ni̱ gumînj sôꞌ ngà agaꞌ kadena ni̱ gachrîj sôꞌ dukuâ gaꞌa Juan, rayiꞌî yugûnꞌ Herodías huin nika dinḯn sôꞌ síchìj Felipe;
4 dadinꞌ gataj Juan gu̱nïn sôꞌ:
—Nitaj si dùgùnàj huaj si ga̱na̱ka̱jꞌ nika dinḯnt mánj.
5 Ni̱ ruhuâ Herodes da̱gahuiꞌ sôꞌ Juan, sani̱ yuꞌhuiꞌ sôꞌ niꞌin sôꞌ nej guiì yùmànꞌan; dadinꞌ Juan huin ꞌngo̱ sí ganataꞌ dàj ga̱huin riñan nej guiì màn yumanꞌ dânj.
6 Sani̱ nga ganasîj Herodes aꞌngô hioꞌo ni̱ gahuin giꞌñanj an giꞌhiaj sôꞌ, ni̱ giranꞌânj daꞌnin yànà yugûn Herodías da̱nï̱n ñan nne nej guiì màn hiuj dânj, ni̱ gahuin nìhiàꞌ ruhuâ Herodes.
7 Rayiꞌî dan ni̱ gataj sôꞌ si yàngàꞌ hia gàꞌhuìꞌ sôꞌ, ahuin na̱nj rasu̱n gàchìnj siyànà nânj riñan sôꞌ.
8 Sani̱ gàꞌ gachrîj si̱nï̱n yugûnꞌ Herodías chrej e riki siyànà nânj dàj ga̱ꞌmi̱n, ni̱ rayiꞌî dan ni̱ gata:
—Gàꞌnï̀nj rèꞌ ahui Juan Bautista ni̱ gi̱nunj ruhuâ ꞌngo̱ goꞌo ni̱ ri̱ki̱ rèꞌ riñânj.
9 Ni̱ nga gunïn Herodes nuguanꞌ nânj ni̱ gananï̂n ruhuâ sôꞌ; sani̱ ñan gàꞌ gataj sôꞌ si yàngàꞌ gàꞌhuìꞌ sôꞌ ꞌngo̱ rasu̱un raꞌa siyànà dânj, ni̱ ñan gàꞌ gunïn nej sí nne ngà sô yiꞌnḯn mesa, ni̱ garânj yina sôꞌ gaꞌhuiꞌ sôꞌ ahui Juan,
10 Ni̱ gaꞌnïnꞌ sôꞌ suun riñan nej sí giꞌhiaj sun riñan sôꞌ si ga̱ꞌa̱nj gàꞌnèꞌ nej sôꞌ ahui Juan nda ruhuâ dukuâ gaꞌa.
11 Ni̱ ni̱ka̱j nej sôꞌ ahui Juan ni̱ nunj ruhuâ ꞌngo̱ goꞌo ni̱ gaꞌhuiꞌ nej sôꞌ raꞌa siyànà dânj; ni̱ nagaꞌhuij ahui Juan riñan yugûnꞌ nni.
12 Hiôꞌ ni̱ gaꞌnaꞌ nej sí gahuin chru̱n riñan Juan ni̱ ganakaj nej sôꞌ nneè kú Juan ni̱ gaꞌanj gàchìnꞌ nej sôꞌ; ni̱ neꞌ rùkù ni̱ gaꞌanj gànàtàꞌ nej sôꞌ dàj giranꞌ Juan riñan Ma̱ꞌan Jesús.
Gaꞌhuiꞌ Ma̱ꞌan Jesús yâꞌ ùnꞌùnꞌ mîn síi
13 Ni̱ nga gunïn Ma̱ꞌan Jesús, ni̱ gatu ruhuâ barku ni̱ guxunj Ma̱ꞌan ni̱ gaꞌan nda ñan ga̱nꞌ doj, riñan hioꞌó hua̱ nàkòo ni̱ ñan hua̱ niꞌnï̀nj ïn; sani̱ nga gunïn nej guiì si hiuj dânj hua̱j Ma̱ꞌan Jesús, ni̱ nda yumanꞌ snàꞌànj ñan màn ninj gaché dàkòj ninj ni̱ gaꞌanj ninj ñan hua̱j Ma̱ꞌan Jesús.
14 Ni̱ nga gananinj Ma̱ꞌan Jesús, ni̱ giniꞌin si gàꞌ màn ûta gàꞌì nej guiì hiuj dânj, ni̱ gananï̂n àko ruhuaj niꞌin ninj ni̱ giꞌhia si ga̱na̱huin nej guiì aꞌnanꞌan.
15 Nga ginìn gui dânj ni̱ gaꞌnaꞌ nichì nej sí ꞌna̱ꞌ ga̱huin chru̱n riñan Ma̱ꞌan Jesús, ni̱ gataj nej sôꞌ gu̱nïn:
—Nitaj nùnj mân hiuj nânj yo̱ꞌ dadinꞌ gàꞌ ginìn ni̱ gàꞌnï̀nj Ma̱ꞌân rèꞌ ga̱ꞌa̱nj nej guiì ñan nngaj nej yumanꞌ lij nan ni̱ gi̱ra̱n ninj sa ya̱ ninj na̱nj ánj.
16 Nanikàj Ma̱ꞌan Jesús ni̱ gata:
—Nitaj si ûta ña̱ꞌa̱n huaj si na̱nꞌ ninj mánj; gàꞌhuìꞌ nej suj ya̱ ninj na̱nj ánj.
17 Ni̱ gataj nej sí gaꞌnaꞌ gahuin chru̱un gu̱nïn Ma̱ꞌan Jesús:
—Nitaj sa yo̱ꞌ nikaj nej ñûnj ꞌna̱ꞌ nej ñûnj mánj, man ùnꞌùnꞌ rachrúun ngà huìj yukuaj a nikaj nej ñûnj ꞌna̱ꞌ nej ñûnj na̱nj ánj.
18 Ni̱ gataj Ma̱ꞌan Jesús:
—Gi̱nikaj nej suj nej rasu̱n dânj ga̱ꞌna̱ꞌ nej suj riñânj.
19 Hiôꞌ ni̱ gaꞌnïnꞌ su̱n Ma̱ꞌan Jesús riñan nej sí gaꞌnaꞌ gahuin chru̱n riñanj si ga̱ta̱j nej sôꞌ si ga̱ꞌa̱nj ga̱ne nej guiì riñan koj o; ni̱ gidaꞌa nej ùnꞌùnꞌ rachrúun ngà huìj nej yukuaj a, ni̱ ganachi nikaj ñanj neꞌ yàtàꞌa ni̱ gaꞌhuij si guruhuâ Ma̱ꞌan Ñaꞌanj an, ni̱ guchraꞌ da̱ꞌa ni̱ gaꞌhuij rachrúun raꞌa nej sí ꞌna̱ꞌ ga̱huin chru̱n riñanj, ni̱ gadaꞌngaꞌ nej sôꞌ yâ daranꞌ nej guiì màn hiuj dânj.
20 Ni̱ yâ daranꞌ nej guiì, ni̱ gachra riki ninj; ni̱ ganaranꞌ nej sí ꞌna̱ꞌ ga̱huin chru̱un nej dasû lij gunâj dânj, ni̱ ganachra aꞌngô yùhuìj yugûti ganaranꞌ nej sôꞌ.
21 Ni̱ daꞌngaꞌ ꞌngo̱ si ùnꞌùnꞌ mîn nej síi huin sa yâ, sani̱ nun gi̱ꞌhiaj nej sij guendâ nej siyànàa ngà nej sílìj i mánj.
Gaché Ma̱ꞌan Jesús riñan nne ña̱ꞌa̱nj
22 Ni̱ nga gisîj yâ nej guiì ni̱ gataj Ma̱ꞌan Jesús si ga̱tu̱ nej sí ꞌna̱ꞌ ga̱huin chru̱n riñanj ruhuâ barku, ni̱ gataꞌ ña̱n nej sôꞌ ni̱ gachin nej sôꞌ ga̱ꞌa̱nj nej sôꞌ ané duꞌhua nne ña̱ꞌa̱nj ni̱ gunâj Ma̱ꞌan Jesús aꞌmin ngà nej guiì màn hiuj dânj.
23 Nga gisîj ganaꞌnḯn Ma̱ꞌan Jesús nanꞌ nej guiì rigìi yiñán ninj huê danj ni̱ gahui raa̱ kïj ni̱kï̱nꞌ hiuj dânj ni̱ gaꞌmin ngà Ma̱ꞌan Ñaꞌanj an; ni̱ gàꞌ gahuin ru̱mi̱nꞌ, ni̱ aꞌngo̱ rïn gunâj hiuj dânj.
24 Ni̱ gàꞌ huaj barku nda da̱ꞌa̱j nne ña̱ꞌa̱nj sani̱ ûta nùkuaj gaganꞌ nne ña̱ꞌa̱nj riñan barkû dânj, dadinꞌ dànanj gaꞌhuiꞌ nanèe ne̱ꞌ ri̱ña̱n nej sij.
25 Sani̱ gàꞌ gisîj ꞌngo̱ si agaꞌ gàꞌânj ruhuâ giyigï̀n man, ni̱ aché Ma̱ꞌan Jesús riñan nne ña̱ꞌa̱nj guyumanj riñan nej sij.
26 Ni̱ nga giniꞌin nej sí ꞌna̱ꞌ ga̱huin chru̱un sí aché Ma̱ꞌan Jesús hua riñan nnee, ni̱ ûta guyuꞌhuiꞌ nej sôꞌ ni̱ gaguâj nùkuaj nej sôꞌ, ni̱ nda gaꞌmin yuꞌhuiꞌ chre nej sôꞌ ni̱ gataj nej sôꞌ:
—ꞌNgo̱ staꞌnaj a ꞌna̱ꞌ na̱nj ánj.
27 Sani̱ orâ chre ni̱ gaꞌmin Ma̱ꞌan Jesús, ni̱ gata:
—Si̱ guyuꞌhuiꞌ nej suj mánj, ñùnj huin na̱nj ánj.
28 Hiôꞌ ni̱ nanikàj Pedro ni̱ gataj sôꞌ:
—Señor, si huê Ma̱ꞌân rèꞌ huin, ni̱ gi̱ꞌhia rèꞌ si ga̱ꞌhue gàchè riñan nnee ni̱ gùchìj ñan ꞌna̱ꞌ Ma̱ꞌân rèꞌ.
29 Ni̱ gataj Ma̱ꞌan Jesús:
—Gu̱hua̱ꞌ sòꞌ aj nï̂nj.
Ni̱ gananinj Pedro ruhuâ barku, ni̱ gaché sôꞌ riñan nnee ni̱ gaꞌanj sôꞌ ñan ꞌna̱ꞌ Ma̱ꞌan Jesús.
30 Sani̱ nga giniꞌin Pedro si ûta nùkuaj gaꞌhuij nanèe, ni̱ guyuꞌhuiꞌ sôꞌ; ni̱ gayiꞌij ni̱ ganagaꞌ sôꞌ riki nnee, ni̱ gayiꞌì sôꞌ ni̱ gaguâj sôꞌ, ni̱ gataj sôꞌ:
—Señor gi̱ꞌhiá rèꞌ si gànànìnj na̱nj ánj.
31 Orâ chre ni̱ gidaꞌa Ma̱ꞌan Jesús raꞌa Pedro ni̱ gata gu̱nïn sôꞌ:
—Do̱j sînj guyumân ruhuâ sí sòꞌ na̱nj ánj. Nùnj huin saj ni̱ ganîn chìꞌ ruhuâꞌ ràꞌaj.
32 Ni̱ nga gatûj nguèj sij ruhuâ barku ni̱ ganikïnꞌ si gaꞌhuij nanèe.
33 Hiôꞌ ni̱ ganikïnꞌ rúdàkòj nej sôꞌ màn ruhuâ barku riñan Ma̱ꞌan Jesús ni̱ gataj nej sôꞌ:
—Yàngàꞌ hia nï̀nꞌ ni̱ huê Ma̱ꞌân rèꞌ huin Daꞌní Ma̱ꞌan Ñaꞌanj an na̱nj ánj.
Giꞌhiaj Ma̱ꞌan Jesús si ganahuin nej guiì ruhuâ yumanꞌ Genaseret
34 Ni̱ gachîn nej sij ané nne ña̱ꞌa̱nj, ni̱ guyumân nej sij riñan hioꞌó Genesaret.
35 Ni̱ gananiꞌin nej guiì màn riñan hioꞌó dânj Ma̱ꞌan Jesús, ni̱ duyaꞌnï̀n ninj nuguanꞌan gaꞌanj nï̀nꞌ gàchràꞌ riñan nej guiì màn ganikàj riñan hioꞌó dânj, ni̱ ni̱ka̱j ninj daranꞌ nej guiì aꞌnanꞌan gaꞌnaꞌ ninj riñan Ma̱ꞌan Jesús.
36 Ni̱ gachín nìꞌhiaj ninj si ga̱ꞌhue̱j Ma̱ꞌan Jesús ni̱ gàgànꞌ raꞌa ninj man duꞌhua atsîj ni̱kej; ni̱ daranꞌ nej guiì gaganꞌ raꞌa atsîj ni̱ke̱ Ma̱ꞌan Jesús ni̱ ganahuin ninj giꞌhia.