Dunaꞌnga sij si ga̱ gu̱dadûꞌ ngà nej ñaꞌanj giꞌhiaj ra̱ꞌa síi
10
Nun ga̱ranꞌ ruhuâj si gi̱ni̱ꞌñu̱n nej suj,
rayiꞌî nuguanꞌ nânj man di̱nï̂n,
dadinꞌ yi nêꞌ nej sachij gimân àsìj nâ ni̱ gimân daranꞌ nej sij riki nnga riñan hioꞌó nàkòo,
ni̱ gachîn daranꞌ nej sij ruhuâ nne na̱ꞌa̱nj ma̱re;
2 ni̱ daranꞌ nej sij gataꞌ nne ngà Moisés riki nnga ni̱ ngà ruhuâ nne ña̱ꞌa̱nj ma̱re,
3 ni̱ gu̱ña̱n chre yâ daranꞌ nej sij nihia gaꞌhuiꞌ Ma̱ꞌan Ñaꞌanj an riñan nej sij,
4 ni̱ gu̱ña̱n chre goꞌo daranꞌ nej sij nne gaꞌhuiꞌ Ma̱ꞌan Ñaꞌanj an riñan nej sij,
dadinꞌ goꞌo nej sij nne gahui riñan huej hua̱j ngà nej sij,
ni̱ huej dânj huin Ma̱ꞌan Cristo.
5 Sani̱ gàꞌì nej sij nun gi̱ꞌhiaj nej sa garanꞌ ruhuâ Ma̱ꞌan Ñaꞌanj an;
rayiꞌî dânj ni̱ gahuiꞌ nej sij riñan hioꞌó nàkòo.
6 Sani̱ daranꞌ sa giranꞌ nej sij ni̱ gahuin ꞌngo̱ daꞌngaꞌa riñan nêꞌ,
ni̱ si̱ gahuin staꞌu ruhuâ nêꞌ guendâ gi̱ꞌhiôꞌ sa yìꞌìi,
dàj rûnꞌ giꞌhiaj nej sij sa yìꞌìi mánj.
7 Ni̱ si̱ ginûn ña̱ꞌa̱nj nej suj riñan nej ñaꞌanj giꞌhiaj ra̱ꞌa síi,
dàj rûnꞌ giꞌhiaj da̱ꞌa̱j nej sij mánj,
dadinꞌ huê danj nnunj riñan ñanj:
“Ni̱ gaꞌanj ga̱ne nej guiì Israelita màn hiuj dânj ni̱ yâ ninj ni̱ goꞌo ninj,
ni̱ neꞌ rùkù ni̱ ganayumàn ninj ni̱ gayiꞌì ninj ni̱ guduku ninj ni̱ ganahuin nìhiàꞌ ruhuâ ninj.”
8 Ni̱ si̱ gaché sìgìchràꞌ nêꞌ,
dàj rûnꞌ gaché sìgìchràꞌ aꞌngô da̱ꞌaj nej sij,
dadinꞌ rayiꞌî dan ni̱ gahuiꞌ nda ko̱ huàꞌnï̀nj mîn nej sij ꞌngo̱ rïn gui dânj.
9 Ni̱ si̱ gayakaj nêꞌ daꞌngaꞌa ngà Ma̱ꞌan Jesús,
dàj rûnꞌ gayakaj nej sij daꞌngaꞌa ngà Ma̱ꞌan Ñaꞌanj an,
ni̱ gahuiꞌ nej sij gi̱ꞌhiaj nej yukuáa gui dânj.
10 Ni̱ si̱ gaꞌmin nej suj yiꞌî Ma̱ꞌan Ñaꞌanj an,
dàj rûnꞌ gaꞌmin nej sij yiꞌî Ma̱ꞌan Ñaꞌanj an,
dadinꞌ gahuiꞌ nej sij giꞌhiaj ángel dagahuiꞌ nej guiì.
11 Ni̱ sa giranꞌ nej sij nga nâ gahuin ꞌngo̱ daꞌngaꞌa riñan nêꞌ màn diû hia̱j,
ni̱ nnunj riñan ñânj guendâ giyiꞌnïnꞌ suun riñunꞌ ni̱ si̱ giꞌhiôꞌ sa giꞌhiaj nej sij mánj.
12 Huê danj ni̱ nej suj anï̂n ruhuâ ga̱nikïnꞌ ran,
ni̱ niꞌhiaj nej suj ni̱ si̱ gininj nej suj riñan gakï̱nꞌïn mánj.
13 Dadinꞌ nun gàꞌnàꞌ gakï̱nꞌ ûta chìꞌ hua duguaneꞌ sichre riñan nej suj sisi̱ si̱ gunùkuaj nej suj ga̱chi̱n nej suj riñan gakï̱nꞌ dânj;
dadinꞌ hueꞌê dagahuin Ma̱ꞌan Ñaꞌanj an si-nùguànꞌanj ni̱ si̱ gaꞌnïn si ûta gi̱ranꞌ sa̱ñu̱n nej suj mánj,
ni̱ nga gùyùmàn gakï̱nꞌ du̱guaneꞌ sichre riñan nej suj ni̱ ri̱ki̱ Ma̱ꞌan Ñaꞌanj an guesâ ni̱ gùnùkuaj nej suj ga̱chi̱n nej suj riñan sa chìꞌ hua dânj,
daꞌnga ni̱ gaꞌhue gùnùkuaj nej suj ga̱chi̱n nej suj riñan gakï̱nꞌ dânj.
14 Huê danj ni̱ gu̱xu̱n nej suj ma̱ꞌan nej suj,
riñan nej ñaꞌanj giꞌhiaj ra̱ꞌa síi.
15 Gaꞌmîn dànanj riñan nej suj dadinꞌ niꞌín si chru̱n nej suj ga̱ra̱n daꞌngàꞌ ruhuâ nej suj;
ni̱ ga̱ꞌhue ga̱na̱ka̱j guendâ nej suj rayiꞌî nej sa gatâ gu̱nïn nej suj.
16 Nga goꞌo nêꞌ nne chruj uba nu̱n ruhuâ basu garânj sunꞌ nga gaꞌmin hueꞌêꞌ yiꞌî Ma̱ꞌan Ñaꞌanj an,
ni̱ sê tun Ma̱ꞌan Cristo huin ni̱ goꞌo nùguànꞌàn nêꞌ ràꞌ saj ûnꞌ.
Rachrún yôꞌ ni̱ sê nneè kú Ma̱ꞌan Cristo huin ni̱ yâ nùguànꞌan nêꞌ ràꞌ saj ûnꞌ.
17 Ni̱ man ꞌngo̱ rïn rachrúun huin,
sani̱ ûta gàꞌì ranꞌ nêꞌ huin,
ni̱ huînꞌ ꞌngo̱ rïn nneè kúu;
ni̱ yâ darûnꞌ rachrún dânj.
18 Gi̱niꞌhiaj nej suj dàj giꞌhiaj nej sôꞌ gimân yumanꞌ Israel;
dadinꞌ yâ nùguànꞌàn nej sôꞌ nneè nej yuku gutaꞌ nej guiì riñan si-na ñaꞌanj an.
19 Ni̱ sê sa ña̱ꞌa̱n doj huin nej ñaꞌanj giꞌhiaj ra̱ꞌa síi,
ni̱ sê sa ña̱ꞌa̱n doj huin nneè nej yuku gutaꞌ nej sôꞌ riñan nej ñaꞌanj giꞌhiaj ra̱ꞌa síi gàꞌ daꞌ aꞌngô nej nneè mánj.
20 Sa gatâ huin si nga gutaꞌ nej sí nàsìnùnj un nihiaa,
ni̱ riñan sichre gutaꞌ nej sôꞌ nihia dânj,
ni̱ sê riñan Ma̱ꞌan Ñaꞌanj an gutaꞌ nej sôꞌ nej nihia dânj;
ni̱ rayiꞌî dan ni̱ nun ga̱ra̱nꞌ ruhuâj si ya̱ nej suj nej nihia gutaꞌ nej sôꞌ riñan sichre mánj.
21 Ni̱ si gaꞌhue go̱ꞌo̱ nej suj nne chruj uba nu̱n ruhuâ si-basû Ma̱ꞌan Señor,
ni̱ si̱ gaꞌhue go̱ꞌo̱ nej suj sa nu̱n ruhuâ si-basû sichre,
ni̱ si gane nej suj ya̱ nej suj yiꞌnḯn si-mesa Ma̱ꞌan Señor,
ni̱ si̱ gaꞌhue ga̱ne nej suj ya̱ nej suj yiꞌnḯn si-mesa sichre mánj.
22 Ni̱ ga̱ꞌhue gi̱ꞌhiôꞌ si gi̱na̱ꞌan ruhuâ Ma̱ꞌan Señor niꞌin ñùnꞌ na̱nj nînꞌ.
Ni̱ dànanj nùkuôꞌ doj gàꞌ daꞌ Ma̱ꞌan Señor na̱nj nîꞌ.
Daranꞌ nej sa giꞌhio ni̱ gi̱ꞌhio si ga̱ꞌmi̱n hueꞌê nej guiì yiꞌî Ma̱ꞌan Ñaꞌanj an
23 Daranꞌanj huin sa gàꞌhue gi̱ꞌhiâ,
sani̱ sê daranꞌanj huin sa ni̱ꞌñanj an riñânj mánj;
daranꞌanj huin sa gàꞌhue gi̱ꞌhiâ,
sani̱ sê daranꞌanj huin sa gi̱ꞌhiaj ga̱na̱huin nùkuaj ruhuâ nimânj mánj.
24 Si̱ gaꞌhue nànàꞌhuìꞌ sa sàꞌ doj ga̱ riñunꞌ mánj,
nànàꞌhuìꞌ sa ga̱ hueꞌê riñan aꞌngô nej duguiꞌ.
25 Daranꞌ nej nneè guduꞌhuêj nej sij ñan ganeꞌ nneè,
ni̱ gi̱ra̱n nej suj ya̱ nej suj,
sani̱ si̱ gachín naꞌanj nej suj dànèꞌ gaꞌnaꞌ nneè dânj,
rayiꞌî daꞌngaꞌ nu̱n ruhuâ nimân nej suj;
26 dadinꞌ si-ꞌhiaj Ma̱ꞌan Señor huin hioꞌóo ni̱ daranꞌ nej sa màn riñanj.
27 Si gakḯn ꞌngo̱ sí nun guyumân ruhuâ niꞌin Ma̱ꞌan Jesús gàꞌànj ya̱ nej suj dukuâ sôꞌ,
ni̱ si garânj yina nej suj ga̱ꞌa̱nj nej suj ngà sôꞌ,
ni̱ ya̱ nej suj daranꞌ nihia ri̱ki̱ sôꞌ,
ni̱ si̱ gachín naꞌanj nej suj rayiꞌî nihia dânj mánj,
rayiꞌî daꞌngaꞌ nu̱n ruhuâ nimân nej suj.
28 Sani̱ si gataj ꞌngo̱ sí dânj:
“Nihia nan ni̱ sa gitá riñan nej ñaꞌanj giꞌhiaj ra̱ꞌa síi gahuin”;
hiôꞌ ni̱ si̱ yâ nej suj nihia dânj,
guendâ gàꞌ ganataꞌ sí dânj ñan gitá nihia dânj,
rayiꞌî daꞌngaꞌ nu̱n ruhuâ nimân aꞌngô nej sôꞌ hua̱ ninaj ruhuâ;
dadinꞌ si-ꞌhiaj Ma̱ꞌan Señor huin hioꞌóo ngà daranꞌ nej sa màn riñanj.
29 Gaꞌmînj rayiꞌî,
daꞌngaꞌ nu̱n ruhuâ nimân aꞌngô nej guiì,
ni̱ sê rayiꞌî daꞌnga nu̱n ruhuâ nimân nej suj gaꞌmînj mánj.
Dadinꞌ nun ga̱ra̱nꞌ ruhuâj,
“si rayiꞌî sa giꞌhia ni̱ gàꞌhuìꞌ yìꞌij riñan daꞌngaꞌ nu̱n ruhuâ nimân aꞌngô nej guiì ni̱ ga̱ꞌmi̱n ninj rayiꞌí.
30 Ni̱ si gàꞌ gaꞌhuí si guruhuâ Ma̱ꞌan Ñaꞌanj an rayiꞌî nihia yaj,
sani̱ nùnj huin saj ni̱ dàñùn daꞌhuí ga̱ gudadûj rayiꞌî sa gi̱ꞌhia ràꞌaj.
Ni̱ huê dànanj gi̱ꞌhia daꞌnga ni̱ si̱ gaꞌmin nej sij yiꞌî Ma̱ꞌan Ñaꞌanj an na̱nj ánj,”
31 Ni̱ si yâ nej suj,
ni̱ goꞌo nej suj,
ni̱ si hua̱ aꞌngô sa gi̱ꞌhiaj nej suj,
ni̱ daranꞌ diû ni̱ gi̱nikaj chre̱j nej suj ngà Ma̱ꞌan Ñaꞌnaj an rayiꞌî nej sa giꞌhiaj nej suj.
32 Ni̱ si̱ giꞌhiaj nej suj sa gi̱ni̱nj aꞌnanꞌ riñan nej judío ni̱ sa gi̱ni̱nj aꞌnanꞌ riñan nej sí nàsìnùnj un ni̱ sa gi̱ni̱nj aꞌnanꞌ riñan nej sôꞌ huin si-nùhuì Ma̱ꞌan Ñaꞌanj an.
33 Ni̱ huê danj na̱nj ñùnj ni̱ duguꞌnḯn si gi̱ꞌhiaj hueꞌê riñan daranꞌ nej guiì,
ni̱ nitaj si nanaꞌhuí sa ga̱huin maꞌán mánj,
sa giꞌhia huin si duguꞌnḯn si ga̱ hueꞌê riñan aꞌngô nej guiì,
daꞌnga ni̱ gaꞌhue ga̱na̱ni̱n ninj.