Nani̱ꞌhiaj ꞌngo̱ apóstol
9
Sê sí gaꞌanj gi̱digân si̱nï̱n si-nùguànꞌ Ma̱ꞌan Ñaꞌanj an huín,
ni̱ sê gàꞌ gahuî riki chrej yìñànj ni̱ka̱j nej sí judío.
Ni̱ sê gàꞌ giniꞌín Ma̱ꞌan Señor Jesús ràꞌ saj ûnꞌ.
Ni̱ sê ñùnj gidigân rayiꞌî Ma̱ꞌan Señor Jesús riñan nej suj ni̱ rayiꞌî dan ni̱ guyumân ruhuâ nej suj niꞌin nej suj Ma̱ꞌan ràꞌ saj ûnꞌ.
2 Ni̱ si nitaj si guyumân ruhuâ aꞌngô nej sôꞌ si huín sí gaꞌanj gi̱di̱gân si̱nï̱n si-nùguànꞌ Ma̱ꞌan Ñaꞌanj an,
sani̱ guendâ nej suj ni̱ huín sí gaꞌanj gidigân si̱nï̱n si-nùguànꞌ Ma̱ꞌan Ñaꞌanj an;
dadinꞌ guendâ guyumân ruhuâ nej suj giꞌhiâ ni̱ dânj huin ꞌngo̱ daꞌngaꞌ ni̱ka̱j nej suj si yàꞌngàꞌ hia ni̱ huín sí gaꞌanj gi̱di̱gân si̱nï̱n si-nùguànꞌ Ma̱ꞌan Señor riñan nej suj.
3 Sani̱ dànanj gatâ riñan nej sôꞌ ganachinꞌ guenda riñânj,
nga dunaꞌhuê rayiꞌí riñan nej sôꞌ.
4 Hiôꞌ ni̱ nitaj nìꞌhiaj nguèj ñûnj Bernabé ya̱ nguèj ñûnj ni̱ gòꞌò nguèj ñùnj ràꞌ saj ûnꞌ.
5 Hiôꞌ ni̱ nitaj nìꞌhiaj nguèj ñûnj Bernabé ga̱ra̱n ràꞌa nguèj ñûnj ngà ꞌngo̱ nej yugueꞌ ni̱ gi̱nikaj nguèj ñûnj ga̱ꞌa̱nj nguèj ñûnj dànèꞌ huaj nguèj ñûnj ràꞌ saj ûnꞌ,
dàj rûnꞌ giꞌhiaj aꞌngô nej dinï̂nt gaꞌanj gi̱di̱gân si̱nï̱n si-nùguànꞌ Ma̱ꞌan Ñaꞌanj an ràꞌ saj ûnꞌ,
dadinꞌ huê danj na̱nj garan ra̱ꞌa nej dinḯn Ma̱ꞌan Señor,
ni̱ huê danj na̱nj garan ra̱ꞌa Cefas nej ràꞌ saj ûnꞌ.
6 Hiôꞌ ni̱ man ꞌngo̱ rïn nguèj ñûnj Bernabé giriꞌ nìꞌhiaj gi̱ꞌhiaj sun daꞌnga ni̱ gaꞌhue gìrìꞌ nguèj ñûnj ya̱ nguèj na̱nj nîꞌ.
7 Ni̱ gàꞌ si ꞌngo̱ nej stadû nitaj si gutïnꞌ si-sànꞌànj rayiꞌî sa ga̱chin riñan sôꞌ dadinꞌ gobierno guruꞌhue daranꞌ sa gachin riñan sôꞌ.
Ni̱ ahuin sí gunun chrun uba ni̱ nitaj si yâ sôꞌ chruj uba gahiu ra̱ꞌa chrun dânj ràꞌaj.
Ni̱ ahuin sí dugumîn matsïj ï ni̱ nitaj si goꞌo sôꞌ si-tò matsïj dugumîn sôꞌ ràꞌaj.
8 Ni̱ si̱ ganï̂n ruhuâ nej suj si nuguanꞌ giri rà nej síi huin sa gaꞌmînj,
dadinꞌ huê dànanj gataj riñan si-ley Ma̱ꞌan Ñaꞌanj an na̱nj ánj.
9 Dadinꞌ huê danj taj riñan ley gachrûn Moisés:
“Ni̱ si̱ gaꞌnï̂nꞌ nnanj duꞌhua rô gutïnꞌ riñan chrinꞌ trigu mánj.”
Hiôꞌ ni̱ ni̱ka̱j gu̱dadû Ma̱ꞌan Ñaꞌanj an ngà nej rô gurûn riñan chrinꞌ trigu na̱nj nîꞌ,
10 rayiꞌî nej ñûnj giꞌhiaj sun si-su̱n Ma̱ꞌan Ñaꞌanj an huin gaꞌmin dànanj.
Ni̱ rayiꞌî nej ñûnj giꞌhiaj huin sa gaꞌmin riñan ñanj;
dadinꞌ sí ganachej hioꞌóo ni̱ daꞌhui sôꞌ gànàꞌhuìj sôꞌ sa ga̱hui̱ riñan hioꞌó dânj,
ni̱ sí gutïn chrinꞌ trigu,
ni̱ ganaꞌhuìj sôꞌ si gahui ka̱n trigu gìrìꞌ sôꞌ.
11 Ni̱ si gaꞌmin nej ñûnj,
si-nùguànꞌ Ma̱ꞌan Ñaꞌanj an siganï̂nj nej suj ni̱ ûta aꞌnanꞌ huaj si ga̱na̱huin ra̱ꞌa nej ñûnj do̱j sanꞌanj riki nej suj riñan nej ñûnj na̱nj nîꞌ.
12 Ni̱ si ganahuin ràꞌa aꞌngô nej sôꞌ sanꞌanj daꞌhui nej ñûnj ga̱na̱huin ràꞌa nej ñûnj giꞌhiaj nej suj,
hiôꞌ ni̱ sê hua̱ ni̱ña̱n si ga̱na̱huin ràꞌa nej ñûnj sanꞌanj dânj gi̱ꞌhiaj nej suj ràꞌ saj ûnꞌ.
Sani̱ nitaj si ganachinꞌ nej ñûnj sanꞌanj dânj riñan nej suj mánj,
dadinꞌ hua̱ nùkuaj ruhuâ nej ñûnj ngà daranꞌ nej sa ga̱chin riñan nej ñûnj.
Guendâ nun ga̱ranꞌ ruhuâ nej ñûnj si ga̱ꞌmi̱n aꞌnanꞌ nej guiì rayiꞌî si-nùguàn Ma̱ꞌan Jesucristo na̱nj ánj.
13 Nun niꞌin nej suj si nej rej giꞌnïnj ruhuâ nûhui nìko ni̱ yâ nej sôꞌ nej sa huaꞌanj gàꞌhuìꞌ nej guiì ruhuâ nûhui ràꞌ saj ûnꞌ,
ni̱ nej sôꞌ gi̱ꞌhiaj sun ñan ni̱kï̱nꞌ si-na ñaꞌanj an ni̱ yâ nej sôꞌ nej yuku huaꞌanj gàꞌhuìꞌ nej guiì riñan si-na ñaꞌanj an dânj ràꞌ saj ûnꞌ.
14 Ni̱ huê danj gataj Ma̱ꞌan Señor gu̱nïn nej sôꞌ huaꞌanj ga̱na̱nï̱n nuguanꞌ gi̱ꞌhiaj ga̱na̱ni̱n nej guiì,
si ya̱ nej sôꞌ sa gàꞌhuìꞌ nej guiì riñan Ma̱ꞌan Ñaꞌanj an na̱nj ánj.
15 Sani̱ ñùnj ni̱ nitaj àmàn garânj sunj nej sa gaꞌhuiꞌ nej guiì riñan Ma̱ꞌan Ñaꞌanj an,
ni̱ sê si̱ gachrûnj nuguanꞌ nânj guendâ huin ruhuâj si ri̱ki̱ nej suj do̱j sanꞌanj an ga̱ra̱n sunj mánj;
dadinꞌ si ri̱ki̱ nej suj sanꞌanj dânj ga̱ra̱n sûnj ni̱ dànanj dùgùnàj huaj si gàhuìj gàꞌ daꞌ guendâ ga̱na̱huin raꞌá sanꞌanj dânj,
dadinꞌ nun ga̱ra̱nꞌ ruhuâj si ga̱ꞌmi̱n aꞌnanꞌ aꞌngô nej guiì rayiꞌî nej sa giꞌhia mánj.
16 Dadinꞌ si ganatá nuguanꞌ gi̱ꞌhiaj ga̱na̱ni̱n nej guiì,
ni̱ si̱ gaꞌhue gàtà si ûta huín doj mánj;
dadinꞌ hua ni̱ña̱n si daꞌhuí gàꞌmìn;
ni̱ ûta ni̱kí si gi̱ranꞌ sàñùnj sisi̱ si̱ ganatá riñan nej guiì nuguanꞌ gi̱ꞌhiaj ga̱na̱ni̱n ninj.
17 Huê danj ni̱ ganï̂n ma̱ꞌan ruhuâj ni̱ gananï̂nj si-nùguànꞌ Ma̱ꞌan Ñaꞌanj an riñan aꞌngô nej guiì,
huê dan ni̱ Ma̱ꞌan Ñaꞌanj an huin sa na̱ruꞌhue riñânj;
sani̱ si nitaj si dàꞌngàꞌ ruhuâj nga gaꞌmînj si-nùguànꞌ Ma̱ꞌan Ñaꞌanj an,
ni̱ ga̱ꞌmi̱n gakï̱nꞌ Ma̱ꞌan Ñaꞌanj an riñânj dadinꞌ hua̱ ni̱ña̱n si gànànï̀nj si-nùguànꞌ Ma̱ꞌan dadinꞌ gàꞌ duguta sûnj ñùnj na̱nj ánj.
18 Huê dan ni̱ ahuin sa huin duꞌhuêj ràꞌaj.
Duꞌhuêj huin guendâ gananï̂nj nuguanꞌ gi̱ꞌhiaj ga̱na̱ni̱n nej guiì,
ni̱ ganataꞌ chré si-nùguànꞌ Ma̱ꞌan Cristo riñan ninj,
ni̱ nùnj huin si nanìꞌhia huin sanꞌanj gaꞌhuiꞌ nej guiì riñan Ma̱ꞌan Ñaꞌanj an ni̱ ga̱ꞌhue ga̱ra̱n sûnj sanꞌanj dânj guendâ gànànï̀nj doj si-nùguànꞌ Ma̱ꞌan Ñaꞌanj an sani̱ gàꞌ dânj ni̱ nitaj si garânj sûnj sanꞌanj dânj mánj.
19 Huê danj ni̱ nga gi̱ꞌhiaj sun chré riñan nej guiì,
ni̱ gahuín ꞌngo̱ musû giꞌnïnj giꞌhiaj sun chre riñan daranꞌ ninj,
guendâ huin ruhuâj gi̱ꞌhiaj ga̱nanj ûta gàꞌì nej guiì gi̱nikòꞌ rukû Ma̱ꞌan Cristo.
20 Ni̱ nga nikḯn ngà nej judío,
ni̱ huín judío dàj rûnꞌ huin nej sôꞌ guendâ gi̱ꞌhia si ga̱na̱ni̱n nej sôꞌ;
ni̱ huê danj na̱nj giꞌhia si ni̱ka̱j chre̱ si-ley Moisés nùnj huin si nitaj si ni̱ka̱j chre̱ si-ley Moisés,
ni̱ giꞌhia dànanj guendâ huin ruhuâj gi̱ꞌhiaj ga̱nanj nej sôꞌ ni̱ka̱j chre̱j si-ley Moisés;
21 ni̱ nga nikḯn ngà nej sí nitaj si niꞌin si-ley Moisés,
ni̱ giꞌhia si nitaj si niꞌín si-ley Moisés riñan nej sôꞌ ni̱ sê danj ruhuaj ga̱ta si nitaj si ꞌnï̀n riki si-ley Ma̱ꞌan Ñaꞌanj an mánj,
dadinꞌ ꞌnï̀n riki si-ley Ma̱ꞌan Cristo,
daꞌnga ni̱ gaꞌhue gi̱ꞌhiaj ga̱nanj nej sôꞌ nitaj si ꞌnï̀nj riki si-ley Moisés.
22 Ni̱ giꞌhia si huín ꞌngo̱ sí ninaj chre nga nikḯn ngà ꞌngo̱ sí nitaj guesâ nìko,
ni̱ giꞌhia dànanj guendâ huin ruhuâj gi̱ꞌhiaj ga̱nanj nej sôꞌ;
ni̱ ꞌhiâ si anï̂n ruhuâj dàj rûnꞌ anï̂n ruhuâ aꞌngô nej sí dânj,
guendâ huin ruhuâj gi̱ꞌhia ga̱na̱ni̱n nej sôꞌ.
23 Ni̱ giꞌhia dànanj rayiꞌî nuguanꞌ gi̱ꞌhiaj ga̱na̱ni̱n nej guiì,
dadinꞌ ruhuâj ga̱na̱huin raꞌá nej sa taj riñan nuguanꞌ dânj.
24 Nun niꞌin nej suj si nej sí gunânj ñan duku nej sij rumin,
ni̱ yàngàꞌ hia ni̱ gunânj daranꞌ nej sôꞌ,
sani̱ ꞌngo̱ rïn nej sôꞌ gi̱ꞌhiaj ga̱nan ràꞌ sa ûnꞌ.
Gu̱na̱nj nej suj nda gùnùkuaj nej suj gi̱ꞌhiaj ga̱nan nej suj ni̱ ga̱na̱huin ra̱ꞌa nej suj sa ri̱ki̱ Ma̱ꞌan Ñaꞌanj an riñan nej suj.
25 Daranꞌ nej sí ûta huin ruhuâ gi̱ꞌhiaj ga̱nan ñan duku nej sôꞌ rumin,
ni̱ ûta dugumîn nej sôꞌ ma̱ꞌan nej sôꞌ,
yàngàꞌ hia,
ni̱ sa ganahuin ra̱ꞌa nej sôꞌ,
ni̱ huin ꞌngo̱ korona koj runanj an gi̱nun ahui nej sôꞌ sani̱ nânj ni̱ huin sa gi̱rë̱ꞌ,
sani̱ sa ga̱na̱huin ra̱ꞌa nêꞌ nga gi̱ꞌhiaj ga̱nan nêꞌ,
ni̱ sê sa gi̱rë̱ꞌë huin mánj.
26 Ni̱ huê dànanj gunân,
sani̱ sê si̱ man dïnꞌ na̱nj gunân mánj;
sani̱ huê danj na̱nj gutá daꞌnga hia,
ni̱ nitaj si giꞌhia dàj rûnꞌ giꞌhiaj sí man si gaꞌhuiꞌ guchruꞌu riñan nanèe mánj,
27 dadinꞌ sa giꞌhia huin si ûta dugumînj ma̱ꞌán,
ni̱ gunânj gi̱tsi chrê riñan nej guiì,
dadinꞌ nun ga̱ra̱nꞌ ruhuâj si neꞌ rùkù nga gisîj gahuín ꞌngo̱ sí gaꞌanj gànàtàꞌ si-nùguànꞌ Ma̱ꞌan Ñaꞌanj an ni̱ si̱ ganahuin ra̱ꞌa Ma̱ꞌan Ñaꞌanj an ñùnj mánj.