Nej nihia gaꞌhuiꞌ nej sij riñan ñaꞌanj giꞌhiaj ra̱ꞌa síi
8
Rayiꞌî nej sa gaꞌhuiꞌ nej sij riñan nej ñaꞌanj giꞌhiaj ra̱ꞌa síi,
ni̱ daranꞌ nêꞌ gàꞌ niꞌin dàdòꞌ rayiꞌî nej nânj.
Sani̱ sa niꞌînꞌ dânj ni̱ giꞌhia si ganï̂n ruhuâꞌ si huînꞌ doj,
sani̱ sa ꞌì ruhuôꞌ dânj ni̱ gàꞌhue gi̱ꞌhia ga̱na̱huin nùkuaj aꞌngô nej duguiꞌ nìkòꞌ rukû Ma̱ꞌan Cristo.
2 Ni̱ si hua̱ ꞌngo̱ nej suj ganï̂n ruhuâ si niꞌin nej suj doj,
ni̱ hua na̱nj ga̱chin gi̱ni̱ꞌin nej suj sa daꞌhui nej suj giniꞌin nej suj.
3 Sani̱ si hua̱ ꞌngo̱ nej suj ꞌì ruhuâ niꞌin Ma̱ꞌan Ñaꞌanj an,
ni̱ gàꞌ niꞌin Ma̱ꞌan Ñaꞌanj an si ꞌì ruhuâ nej suj niꞌin nej suj Ma̱ꞌan.
4 Rayiꞌî nej nihia gaꞌhuiꞌ nej suj riñan ñaꞌanj giꞌhiaj ra̱ꞌa síi,
ni̱ gàꞌ niꞌînꞌ si nitaj nùnj huin nej ñaꞌanj digaꞌñuꞌunj màn ruhuâ yumiguì mánj,
ni̱ ꞌngo̱ rïn Ma̱ꞌan Ñaꞌanj an hua.
5 Nùnj huin si hua̱ da̱ꞌa̱j nej sôꞌ gataj si ûta gàꞌì ñaꞌanj an hua neꞌ yàtàꞌa ngà riñan hioꞌóo,
ni̱ huê danj na̱nj gataj nej sôꞌ si ûta gàꞌì Señor hua.
6 Guendâ nej ñûnj ni̱ ꞌngo̱ rïn Ma̱ꞌan Ñaꞌanj an hua,
ni̱ huej huin Rej daranꞌ nêꞌ,
ni̱ huê Ma̱ꞌan huin sa giꞌhiaj daranꞌ nej sa màn ruhuâ yumiguìi,
ni̱ nêꞌ huin siꞌhiaj Ma̱ꞌan;
ni̱ ꞌngo̱ rïn Ma̱ꞌan Jesucristo huin Señor riñan nêꞌ,
ni̱ huê Ma̱ꞌan huin sa giꞌhiaj ni̱ rayiꞌî dan gaꞌhue man nêꞌ ni̱ gaꞌhue mân daranꞌ nej sa màn giniꞌhio.
7 Sani̱ sê daranꞌ nej guiì garânj daꞌngaꞌ ruhuâ rayiꞌî nej nuguanꞌ nânj mánj;
dadinꞌ hua̱ da̱ꞌa̱j ninj ni̱ hua̱ na̱nj nnùn ña̱ꞌanj ninj riñan nej ñaꞌanj giꞌhiaj ra̱ꞌa síi,
ni̱ nga yâ ninj nej nihia tàj riñan nej ñaꞌanj giꞌhiaj ra̱ꞌa síi ni̱ ganï̂n ruhuâ ninj si giꞌhiaj ninj gakï̱nꞌïn dadinꞌ gaꞌmin gakï̱nꞌ daꞌngaꞌ nu̱n ruhuâ nimân ninj riñan ninj.
8 Yàngàꞌ ni̱ sê sa yôꞌ dan giꞌhiaj si ga̱na̱huin ra̱ꞌa Ma̱ꞌan Ñaꞌanj an ñùnꞌ mánj,
ni̱ si yôꞌ ni̱ si̱ ganï̂n ruhuôꞌ si huînꞌ doj mánj,
ni̱ si nitaj si yôꞌ ni̱ si̱ ganï̂n ruhuôꞌ si huinꞌ doj mánj.
9 Sani̱ nùnj huin si gàꞌhue ya̱ nej suj sani̱ ga̱ gudadû nej suj ni̱ si̱ yâ nej suj daꞌnga ni̱ si̱ giꞌhiaj nej suj si gi̱ni̱na̱j ruhuâ aꞌngô duguiꞌ nej suj hua̱ ninaj ruhuâ.
10 Dadinꞌ si sòꞌ ni̱ gàꞌ niꞌînꞌ si nitaj nùnj huin nej ñaꞌanj giꞌhiaj ra̱ꞌa nej síi ni̱ rayiꞌî dan ni̱ nnêꞌ yâꞌ ñan nne nej ñaꞌanj giꞌhiaj ra̱ꞌa síi,
sani̱ giniꞌin aꞌngô dinï̂nt hia̱j do̱j guyumân ruhuâ si nneꞌ hiuj dânj yâꞌ,
ni̱ si̱ ganï̂n ruhuâ sij ya̱ sij nihia dânj ràꞌ saj ûnꞌ.
11 Sani̱ sòꞌ ni̱ gàꞌ niꞌînꞌ si nitaj nùnj huin nej ñaꞌanj digaꞌñuꞌunj ni̱ rayiꞌî dan ni̱ nnêꞌ yâꞌ ñan nne nej ñaꞌanj giꞌhiaj ra̱ꞌa síi,
sani̱ giꞌhiâꞌ si gàꞌànj ni̱ꞌhia̱ dinḯnt hua̱ ninaj ruhuâ nimân guendâ ganï̂n huàꞌ ruhuâ nimân sôꞌ nga nne sôꞌ ya sôꞌ hiuj dânj,
sani̱ rayiꞌî sôꞌ gahuiꞌ Ma̱ꞌan Cristo na̱nj ánj.
12 Huê dànanj giꞌhiaj nej suj,
ni̱ gi̱ꞌhiaj nej suj si gi̱ni̱na̱j ruhuâ nej dinï̂nt ni̱ gininaj ruhuâ daꞌngaꞌ nu̱n ruhuâ nimân sôꞌ giꞌhiaj nej suj,
hiôꞌ ni̱ riñan Ma̱ꞌan Cristo giꞌhiaj nej suj gakï̱nꞌïn.
13 Huê dan ni̱,
si rayiꞌî nihia yâj ni̱ giꞌhia si gininj dinï̂n riñan gakï̱nꞌïn,
huê danj ni̱ gàꞌ ꞌngo̱ si yâj nihia dânj gàꞌ mánj,
guendâ si̱ gi̱ꞌhia ga̱na̱tu̱ sôꞌ riñan gakï̱nꞌïn.