Nàgàꞌhuìꞌ sij chrej e riñan nej sí nne garan ràꞌa
7
Rayiꞌî nej nuguanꞌ gachrûn nej suj riñânj,
ni̱ dùgùnàj huaj si si̱ gayakaj síi nika sôꞌ;
2 sani̱ rayiꞌî guendâ si̱ gininj síi riñan gakï̱nꞌ aché sìgìchràꞌ,
ni̱ dùgùnàj huaj si ga̱ya̱ka̱j sôꞌ nika sôꞌ,
ni̱ huê danj na̱nj dùgùnàj huaj si ga̱ya̱ka̱j siyànàa nikaj ninj.
3 Hua̱ ni̱ña̱n si nngaj síi ngà nika sôꞌ,
ni̱ hua̱ ni̱ña̱n si nngaj siyànàa ngà nikaj.
4 Nitaj si ni̱ka̱j su̱n siyànàa riñan nneè ku mánj,
nikaj ni̱ka̱j su̱n riñanj na̱nj ánj:
Ni̱ huê danj na̱nj nitaj si ni̱ka̱j su̱n síi riñan nneè ku sôꞌ,
dadinꞌ ni̱ka̱j su̱n nika sôꞌ riñan nneè kú sôꞌ.
5 Nitaj si dùgùnàj huaj si si̱ gingaj ꞌngo̱ ni̱ aꞌngô nguèj suj ngà nika nguèj suj mánj,
huê si gàꞌ guchiꞌ nguèj suj ꞌngo̱ duꞌhua si si̱ gingaj ꞌnguèj suj ꞌngo̱ diû lij,
rayiꞌî guendâ nànàꞌhuìꞌ staꞌu nguèj suj Ma̱ꞌan Ñaꞌanj an ni̱ gàꞌhue huê danj gaj;
sani̱ nga ganahuij diû ganï̂n nguèj suj,
ni̱ ga̱na̱huin nùguànꞌan ñûn nguèj suj,
daꞌnga ni̱ si gininj nguèj suj riñan gakï̱nꞌïn nga du̱guaneꞌ Sichre riñan nguèj suj rayiꞌî guendâ nitaj si nngaj nguèj suj na̱nj ánj.
6 Huê dànanj hua ꞌngo̱ chrej narikîj riñan nguèj suj,
sani̱ sê sun gaꞌnïnꞌ Ma̱ꞌan Señor huin mánj.
7 Garanꞌ ruhuâj sisi̱ si̱ gayakaj nej suj nika nej suj dàj rûnꞌ giꞌhia;
sani̱ Ma̱ꞌan Ñaꞌanj an gi̱ꞌhiaj si huê danj gàꞌhue gùnùkuaj daꞌ goꞌngo̱ nej suj,
yàngàꞌ ni̱ hua̱ da̱ꞌa̱j nej suj gàꞌ giriꞌ nìꞌhiaj giꞌhiaj Ma̱ꞌan Ñaꞌanj an ni̱ nitaj si̱ nanaꞌhuiꞌ nej suj siyànàa sani̱ hua̱ aꞌngô da̱ꞌa̱j nej suj ni̱ dàñùn nanaꞌhuiꞌ nej suj siyànàa dadinꞌ huê danj gàꞌ giriꞌ nìꞌhiaj nej suj.
8 Ni̱ gatâ riñan nej suj nne ꞌngo̱ rïn danj,
ngà nej suj huin siyànà minj in,
ni̱ dùgùnàj huaj sisi̱ si̱ gayakaj nej suj nika nej suj dàj rûnꞌ gi̱ꞌhiâ;
9 sani̱ si nun gìrìꞌ nìꞌhiaj nej suj guendâ gùnùkuaj nej suj ga̱ne ꞌngo̱ rïn nej suj,
ni̱ dànanj dùgùnàj huaj si ga̱ra̱n ra̱ꞌa nej suj gàꞌ daꞌ si ûta ga̱huin ruhuâ nej suj ga̱ya̱ka̱j nej suj nika nej suj na̱nj ánj.
10 Sani̱ nej suj gàꞌ garan ra̱ꞌa dânj,
ni̱ sê ñùnj gaꞌnï̂n suun riñan nej suj mánj,
Ma̱ꞌan Señor huin sa gaꞌnïnꞌ suun riñan nej suj:
Ni̱ si̱ gaꞌhue gu̱du̱nâj nej suj siyànà gàꞌ garan ra̱ꞌa ngà nej suj mánj.
11 Ni̱ asàꞌ gudunâj siyànàa nikaj,
ni̱ gàꞌ ꞌngo̱ si̱ gayakaj aꞌngô síi gàꞌ mánj,
sani̱ dànanj dùgùnàj huaj si ga̱na̱ꞌmin ngà nikaj;
huê danj ni̱ si̱ ganachi nikaj síi ñanj acta guendâ gu̱du̱nâj sôꞌ nika sôꞌ gàꞌ mánj,
12 Riñan aꞌngô da̱ꞌa̱j nej suj gatâ,
sani̱ sê Ma̱ꞌan Señor gaꞌnïnꞌ sun nânj mánj,
ni̱ si hua̱ ꞌngo̱ dinï̂nt nne nika sani̱ nitaj si nìkòꞌ nika sôꞌ rukû Ma̱ꞌan Jesús,
sani̱ si hua̱ ruhuâ siyànà dânj ga̱ne ngà sôꞌ,
ni̱ si̱ gaꞌhue gu̱du̱nâj sôꞌ siyànà dânj mánj.
13 Ni̱ si hua̱ ꞌngo̱ yugueꞌ nne nika sani̱ nitaj si nìkòꞌ sôꞌ rukû Ma̱ꞌan Jesús,
sani̱ hua̱ ruhuâ sôꞌ ga̱ne sôꞌ nngaj,
huê danj ni̱ si̱ guduna sôꞌ mánj.
14 Dadin si hua̱ ꞌngo̱ yugueꞌ nne nika ni̱ nitaj si nìkòꞌ sôꞌ rukû Ma̱ꞌan Jesús ni̱ sê gakï̱nꞌïn huin si nne ni̱ka̱ nguèj sij mánj,
ni̱ si hua̱ ꞌngo̱ dinï̂nt nne nika ni̱ nitaj si nìkòꞌ nika sôꞌ rukû Ma̱ꞌan Jesús ni̱ sê gakï̱nꞌïn huin si nne ni̱ka̱ nguèj sôꞌ mánj;
dadinꞌ si gakï̱nꞌïn huin guendâ nne ni̱ka̱ nguèj sôꞌ hiôꞌ ni̱ gahuin daꞌní nguèj sôꞌ neꞌej a̱ta gakï̱nꞌïn,
sani̱ sê danj huin mánj dadinꞌ neꞌej huin daꞌní nguèj sôꞌ ni̱ neꞌej gèe huin riñan Ma̱ꞌan Ñaꞌanj an.
15 Sani̱ si hua̱ ruhuâ sí nitaj si nìkòꞌ rukû Ma̱ꞌan Jesús gu̱du̱nâj sôꞌ nika sôꞌ ni̱ si̱ garanꞌ ñuꞌunꞌ guendâ ganï̂n ruhuâ sôꞌ dànanj mánj,
ni̱ gàꞌhue gu̱du̱nâj sôꞌ nika sôꞌ;
dadinꞌ sê si̱ ànùmin nguèj sôꞌ si nda guesâ chre ga̱ne nguèj sôꞌ,
dadinꞌ gakḯn Ma̱ꞌan Ñaꞌanj an gaꞌnaꞌ nguèj sôꞌ guendâ ga dïnꞌïnj ruhuâ nguèj sôꞌ.
16 Dadinꞌ.
Nùnj huin si gi̱ꞌhiâꞌ gi̱ni̱ꞌînꞌ si gàꞌhue gùnùkuâꞌ gi̱ꞌhiâꞌ ga̱na̱ni̱n nikat hia̱j do̱j yuguej.
Nùnj huin si ꞌhiâꞌ gi̱ni̱ꞌînꞌ si gàꞌhue gùnùkuaꞌ gi̱ꞌhiâꞌ ga̱na̱ni̱n nikaꞌ hia̱j do̱j di̱nï̂nj.
17 Sani̱ gi̱ꞌhiaj nej suj dàj riki Ma̱ꞌan Señor riñan nej suj,
ni̱ huê dàj rûnꞌ giꞌhiaj Ma̱ꞌan Señor nga gakïn nej suj,
ni̱ huê danj gi̱ꞌhiaj nej suj;
ni̱ huê dànanj gaꞌnïnꞌ sùnj riñan daranꞌ nej si-nùhuì Ma̱ꞌan Jesús màn nï̀nꞌ gàchràꞌ.
18 Ni̱ si hua̱ da̱ꞌa̱j nej suj gàꞌ giyiꞌneꞌ do̱j nnïnj arán raa̱ nneè nàꞌàj nga gakḯn Ma̱ꞌan Ñaꞌanj an gaꞌnaꞌ nej suj.
Ni̱ huê danj ga̱ nej suj.
Ni̱ si hua̱ da̱ꞌa̱j nej suj gakḯn Ma̱ꞌan Ñaꞌanj an gaꞌnaꞌ sani̱ hua̱ nï̀nꞌ gàchin gìyìꞌnèꞌ do̱j nnïnj arán raa̱ nneè nàꞌàj nej suj nga gakḯn Ma̱ꞌan Ñaꞌanj an gaꞌnaꞌ nej suj.
Hiôꞌ ni̱ si̱ gaꞌneꞌ nej suj nnïnj arán raa̱ nneè nàꞌàj nej suj mánj.
19 Dadinꞌ sê sa ña̱ꞌa̱n huin si si̱ giyiꞌneꞌ do̱j nnïnj arán raa̱ nneè nàꞌàj nej suj,
nej si̱ giyiꞌneꞌ do̱j nnïnj arán raa̱ nneè nàꞌàj nej suj mánj,
sa ña̱ꞌa̱n huin si dagahuînꞌ nej suj sun giyiꞌnïn giꞌhiaj Ma̱ꞌan Ñaꞌanj an na̱nj ánj.
20 Dàj na̱nj hua ma̱ꞌan nej suj nga gakḯn Ma̱ꞌan Ñaꞌanj an gaꞌnaꞌ nej suj,
ni̱ huê danj ga̱ nej suj.
21 Sani̱ si nga gakḯn Ma̱ꞌan Ñaꞌanj an gaꞌnaꞌ ni̱ huînꞌ ꞌngo̱ musû ꞌnï̱nj giꞌhiaj sun chre riñan ꞌngo̱ yiruꞌhuee,
ni̱ si̱ giriñun ruhuâꞌ mánj;
sani̱ si huaj gàꞌhue gùnùkuaꞌ gàꞌnï̀nj raꞌa yiruꞌhue dan sòꞌ ni̱ du̱guꞌnïnꞌ ni̱ gi̱yi̱ꞌnï̱n riñanꞌ na̱nj ánj.
22 Dadinꞌ si gakḯn Ma̱ꞌan Señor gaꞌnaꞌ ꞌngo̱ musû giꞌnïnj giꞌhiaj sun chre riñan ꞌngo̱ yiruꞌhuee,
ni̱ gi̱yi̱ꞌnï̱n riñan sôꞌ nga gùyùmàn ruhuâ sôꞌ niꞌin sôꞌ Ma̱ꞌan Señor;
sani̱ nej sí nitaj si huin si-musû ꞌngo̱ sí yiruꞌhuee nga gakḯn Ma̱ꞌan Señor ga̱ꞌna̱ꞌ sôꞌ riñanj,
ni̱ ga̱huin sôꞌ ꞌngo̱ musû giꞌnïnj gi̱ꞌhiaj sun chre riñan Ma̱ꞌan Cristo.
23 Sa gàꞌ girânj Ma̱ꞌan Señor Jesús huin nej suj;
huê danj ni̱ si̱ gahuin nej suj musû giꞌnïnj giꞌhiaj sun chre riñan nej síi gàꞌ mánj.
24 Huê dàj rûnꞌ hua nej suj nga gakḯn Ma̱ꞌan Señor Jesús gàꞌnaꞌ nej suj riñanj,
huê danj ga̱ nej suj ni̱ ganikïnꞌ ran nej suj riñan Ma̱ꞌan Ñaꞌanj an.
25 Rayiꞌî nej siyànà ña̱an ni̱ nitaj suun gaꞌnïnꞌ Ma̱ꞌan Señor riñânj dàj gàꞌnï̀nꞌ sùnj riñan ninj;
sani̱ gatâ dànanj riñan daranꞌ nej dinï̂nt ni̱ nej yugueꞌ dàj garânj daꞌngaꞌ ruhuâj,
ni̱ dàj rûnꞌ gananï̂n àko ruhuâ Ma̱ꞌan Señor niꞌin ñùnj guendâ huín ꞌngo̱ sí hueꞌê da̱gahuin riñanj.
26 Ganï̂n ruhuâj si dùgùnàj huaj si ga̱ne ꞌngo̱ rïn síi,
rayiꞌî nej diû sa̱ñu̱n ꞌna̱ꞌ neꞌ ña̱an riñan sôꞌ.
27 Si hua̱ nikaꞌ ni̱ si̱ ganï̂n ruhuâꞌ ga̱na̱chi nikaj ñanj acta guendâ gu̱du̱nâj nikaꞌ mánj.
Si hua̱ nun ga̱ya̱ka̱j nikaꞌ,
hiôꞌ ni̱ si̱ gahuin staꞌu ruhuâꞌ ga̱ra̱n ra̱ꞌa mánj.
28 Sani̱ si ganï̂n ruhuâꞌ ga̱ra̱n ra̱ꞌaꞌ ni̱ sê gakï̱nꞌïn huin mánj;
ni̱ si ga̱ya̱ka̱j siyànà ña̱an nikaj ni̱ ga̱ra̱n ra̱ꞌa ni̱ sê gakï̱nꞌïn huin mánj,
sani̱ nej siyànà ña̱an ni̱ nej sí ña̱an ga̱ra̱n ra̱ꞌa ni̱ ûta gi̱ranꞌ sa̱ñu̱n nej sôꞌ,
sani̱ nun ga̱ra̱nꞌ ruhuâj si gi̱ranꞌ sa̱ñu̱n nej suj mánj.
29 Sani̱ gatâ dànanj,
gu̱nïn nej suj di̱nï̂nj:
Dadinꞌ do̱j sînj diû hua,
ni̱ nej suj nne nika ni̱ gi̱ꞌhiaj nej suj dàj rûnꞌ giꞌhiaj nej sí nitaj si nne nika;
30 ni̱ nej suj dugueꞌe ni̱ gi̱ꞌhiaj nej suj si nitaj si dugueꞌe nej suj;
ni̱ nej guiì hua̱ nìhiàꞌ ruhuâ ni̱ gi̱ꞌhiaj ninj si nitaj si hua̱ nìhiàꞌ ruhuâ ninj;
ni̱ nej guiì girânj ni̱ gi̱ꞌhiaj ninj guenda si nitaj si girânj ninj;
31 ni̱ nej suj garânj sun nej rasu̱n màn ruhuâ yumiguì nânj,
ni̱ giꞌhiaj nej suj guenda si nitaj si garânj sun nej suj nej rasu̱n nânj,
dadinꞌ sa ga̱na̱huij huin daranꞌ nej rasu̱n dânj.
32 Sa ruhuâj huin si si̱ ginichre ruhuâ nej suj.
Dadinꞌ sí nne ꞌngo̱ rïn ni̱ hua̱ diû riñan sôꞌ guendâ gu̱na̱nj gi̱tsi sôꞌ riñan Ma̱ꞌan Señor,
ni̱ dàj gi̱ꞌhiaj sun hueꞌê sôꞌ riñan Ma̱ꞌan Señor;
33 sani̱ sí nne nika ni̱ nu̱n ruhuâ sôꞌ gi̱ra̱n sôꞌ nej rasu̱n màn ruhuâ yumiguì nânj guendâ ga̱ hueꞌê ga̱ne nej dùguìꞌ sôꞌ,
ni̱ huê danj na̱nj nu̱n ruhuâ sôꞌ dàj da̱gahuin hueꞌê sôꞌ riñan nika sôꞌ.
34 Sê gu̱ña̱n hua diû riñan siyànà nne nika ngà siyànà ña̱an mánj.
Siyànà ña̱an ni̱ hua diû riñanj guendâ gu̱na̱nj gi̱tsi riñan Ma̱ꞌan Señor ni̱ guendâ na̱gi̱ꞌhiaj gej nneè ku ni̱ na̱giꞌhiaj gèj nanè nimanj riñan Ma̱ꞌan Ñaꞌanj an;
sani̱ siyànà nne nika ni̱ ganahuij ruhuâj guendâ na̱gi̱ꞌhiaj sàꞌaj nej rasu̱n màn ruhuâ dukuaj,
ni̱ dàj da̱gahuin hueꞌej riñan nikaj.
35 Gatâ dànanj gu̱nïn nej suj sani̱ sê si̱ nagiꞌhiaj chìꞌ staꞌuj riñan nej suj mánj;
gatâ guendâ si sàꞌ ma̱ꞌan nej suj ni̱ gi̱ni̱ꞌin nej suj dàj da̱gahuin hueꞌê nej suj,
hiôꞌ ni̱ nitaj nùnj garanꞌ ñuꞌunj riñan nej suj guendâ gu̱na̱nj gi̱tsi nej suj riñan Ma̱ꞌan Señor.
36 Sani̱ si hua̱ da̱ꞌa̱j nej suj ganï̂n ruhuâ si gàꞌ añûn ruhuâ daꞌnin yànà nej suj,
ni̱ daꞌhui ga̱ra̱n ra̱ꞌa ngà sôꞌ gàꞌ hua̱ yu̱gui ga̱ra̱n ra̱ꞌa,
ni̱ gàꞌhue ga̱ra̱n ra̱ꞌa ni̱ sê gakï̱nꞌïn huin mánj.
37 Sani̱ sí ña̱n ni̱ siyànà ñan hua̱ yìtï̀nj ruhuâ ngà nimân si si̱ gayakaj nika,
ni̱ chru̱n nej sij gi̱nikaj su̱n nej sij riñan nneè kú nej sij,
ni̱ dùgùnàj huaj si si̱ gayakaj nej sij nika nej sij na̱nj ánj.
38 Huê danj ni̱ sí garânj yina ga̱ra̱n ra̱ꞌa daꞌnin yànà ni̱ dùgùnàj giꞌhiaj sôꞌ,
sani̱ sí nun ga̱ra̱n yina si ga̱ra̱n ra̱ꞌa daꞌnin yànà ni̱ dànanj ûta dùgùnàj giꞌhiaj sôꞌ.
39 Siyànà nne garan ra̱ꞌa riñan ley ngà nika ni̱ ni̱ka̱j sun ley riñan nguèj ni̱ka̱ sij nga nï̀nꞌ hua nìꞌnàꞌ nguèj sij,
sani̱ nga gahuiꞌ nika siyànà dânj,
ni̱ giyiꞌnï̂nj riñanj ni̱ ga̱ꞌhue ga̱ra̱n ra̱ꞌa ñunj ngà aꞌngô sí garanꞌ ruhuaj,
sani̱ daꞌhui ga̱ra̱n ra̱ꞌa ngà sí nìkòꞌ rukû Ma̱ꞌan Señor.
40 Sani̱ ñùnj ganï̂n ruhuâ ni̱ dànanj ga̱ hueꞌê ga̱ne si si̱ gayakaj nika na̱nj ánj;
gatâ dànanj dadinꞌ ganï̂n ruhuâj si nne si-Espíritu Ma̱ꞌan Señor ngàj na̱nj ánj.