Huaꞌanj giꞌhiaj hi̱a nej sij gakï̱nꞌïn riñan guesì nàsìnùnj un
6
Nga hua ꞌngo̱ nuguanꞌ chìꞌ gaꞌmin nej suj ngà dinḯn nej suj,
ni̱ nùnj huin saj ni̱ nitaj si huaꞌanj ga̱ra̱n ruhuâ nej suj rayiꞌî nej sôꞌ riñan nej dinï̂nt nìkòꞌ rukû Ma̱ꞌan Jesús ràꞌaj.
Ni̱ huaꞌanj ga̱ra̱n ruhuâ nej suj rayiꞌî nej sôꞌ riñan guesì nitaj si nìkòꞌ rukû Ma̱ꞌan Jesús.
2 Nun niꞌin nej suj si nej dinï̂nt hua̱ gèe huin ga̱ꞌhue gi̱ꞌhiaj hia rayiꞌî si-ga̱kïnt nej guiì nitaj si nìkòꞌ rukû Ma̱ꞌan Ñaꞌanj an mínj.
Ni̱ si nej suj huin sa gi̱ꞌhiaj hia rayiꞌî nej gakï̱nꞌ nânj.
Hiôꞌ ni̱ nùnj huin saj ni̱ nitaj si chru̱n nej suj gi̱ꞌhiaj hia nej suj gakï̱nꞌ nitaj si hua chìꞌ nìko dânj ràꞌaj.
3 Nun niꞌin nej suj si ga̱na̱ka̱j guendâ nêꞌ dàj gi̱ꞌhiaj nej ángel ràꞌ saj ûnꞌ.
Hiôꞌ ni̱ hua̱ ni̱ña̱n si ga̱na̱ka̱j guendâ nêꞌ nej gakï̱nꞌ giꞌhiaj nej sôꞌ huaj nûhui.
4 Ni̱ si giriꞌ nìꞌhiaj nêꞌ,
guendâ gi̱ꞌhiaj hia nêꞌ rayiꞌî nej gakï̱nꞌ hua̱ siganï̂nj nej sôꞌ hua̱j nûhui,
ni̱ nùnj huin saj ni̱ huaꞌanj gùtàꞌ nej suj nej nuguanꞌ nânj riñan nej guesì nàsìnùnj nitaj si huin si-nùhuì Ma̱ꞌan Jesús ràꞌaj.
5 Gatâ dànanj guendâ ga̱na̱ka̱j nej suj sinàꞌàj nej suj.
Hiôꞌ ni̱ nitaj gàꞌ si ꞌngo̱ nej sí chru̱un hua siganï̂nj nej suj si gi̱ꞌhiaj hia sôꞌ si-ga̱kïnꞌ nej dinḯn nej suj ràꞌ saj ûnꞌ,
6 dadinꞌ gunïnꞌ ꞌngo̱ ni̱ aꞌngô nej dinï̂nt ni̱ huaꞌanj ga̱ra̱n ruhuâ nguèj sôꞌ rayiꞌî ꞌngo̱ ni̱ aꞌngô nguèj sôꞌ riñan nej guesì nitaj si guyumân ruhuâ niꞌin Ma̱ꞌan Ñaꞌanj an ràꞌ saj ûnꞌ.
7 Huê danj ni̱,
yàngàꞌ hia ni̱ rayiꞌî guendâ màn gunïnꞌ nej suj ni̱ nitaj si hua̱ hueꞌej mánj.
Nùnj huin saj si gàꞌnï̀nꞌ ruhuâ nej suj si ranꞌ nej dinï̂nt nej suj.
Ni̱ nùnj huin saj si gàꞌnï̀nꞌ ruhuâ nej suj si gi̱ꞌhiaj tu̱ nej sôꞌ siꞌhiaj nej suj ràꞌaj.
8 Sani̱ sa giꞌhiaj nej suj huin si gunïnꞌ nej suj siganï̂nj nej ma̱ꞌan nej suj,
ni̱ giꞌhiaj tu̱ nej suj siꞌhiaj nej dinḯn nej suj.
9 Nun niꞌin nej suj si nej sí nitaj si giꞌhiaj sa nìkàa ni̱ si̱ gaꞌhue ga̱tu̱ nej sij ñan ni̱ka̱j su̱n Ma̱ꞌan Ñaꞌanj an ràꞌ saj ûnꞌ.
Huê danj ni̱ si̱ gachej ruhuâ nej suj mánj;
huê danj ni̱ si̱ gatûj sí nne sìgìchràꞌ,
sí ginûn ña̱ꞌa̱nj riñan ñaꞌanj giꞌhiaj ra̱ꞌa síi,
sí ni̱ka̱j nika duguiꞌ,
sí nagiꞌhiaj yànà ma̱ꞌan,
sí atoj ngà síi,
10 sí tu̱u,
sí huin ruhuâ ga̱ doj riñan,
ni̱ sí àyìnï̀ïn,
sí gaꞌmin nuguanꞌ yìꞌì chre,
tu ràngàꞌa,
ni̱ ahuin na̱nj sí giꞌhiaj dànanj ni̱ si̱ gatûj nej sôꞌ yiñán Ma̱ꞌan Ñaꞌanj an mánj.
11 Huê dànanj giꞌhiaj da̱ꞌa̱j nej suj;
sani̱ gàꞌ ganaruhui si-ga̱kïnꞌ nej suj,
ni̱ gàꞌ nagiꞌhiaj gè Ma̱ꞌan Ñaꞌanj an nej suj,
huê danj ni̱ nitaj gakï̱nꞌïn hua ruhuâ nimân nej suj ngà rayiꞌî siyu̱gui Ma̱ꞌan Jesús,
ni̱ ngà si-Espíritu Ma̱ꞌan Ñaꞌanj an gàꞌ mánj.
Na̱gi̱ꞌhiaj sàꞌ nej suj nneè kú nej suj riñan Ma̱ꞌan Ñaꞌanj an
12 “Daranꞌanj gàꞌhue gi̱ꞌhiâ”,
sani̱ sê sa sàꞌaj huin daranꞌanj mánj;
daranꞌanj gàꞌhue gi̱ꞌhia sani̱ si̱ gaꞌnï̂n si gi̱ꞌhiaj ga̱nan gàꞌ si ꞌngo̱ nej dânj ñùnj mánj.
13 Sa yôꞌ niꞌñanj guendâ ga̱huin ran rikiꞌ,
ni̱ rikiꞌ niꞌñanj nej sa yôꞌ;
sani̱ ꞌngo̱j ni̱ aꞌngoj ni̱ gu̱ña̱n gu̱du̱rëꞌ Ma̱ꞌan Ñaꞌanj an ngue.
Sani̱ nneè kuꞌ ni̱ sê si̱ giꞌhiaj Ma̱ꞌan Ñaꞌanj an guendâ ga̱ne sìgìchròꞌ mánj,
giꞌhia guendâ ga̱ra̱n sun Ma̱ꞌan nneè kûꞌ ni̱ nneè kûꞌ niꞌñanj Ma̱ꞌan Señor.
14 Ni̱ dàj rûnꞌ giꞌhiaj Ma̱ꞌan Ñaꞌanj an nga ganaꞌnï̂nj Ma̱ꞌan Señor siganï̂nj nej nîman ni̱ huê danj na̱nj ûta nùkua ni̱ gi̱ꞌhia si gànàꞌnï̀nj nêꞌ siganï̂nj nej nîman.
15 Nun niꞌin nej suj si nneè kú nej suj ni̱ huin nneè kú Ma̱ꞌan Cristo ràꞌ saj ûnꞌ.
Ni̱ ga̱ꞌhue ga̱ꞌne̱ꞌ nneè kú Ma̱ꞌan Cristo ni̱ gi̱ꞌhiôꞌ si ga̱na̱ka̱j duguiꞌij ngà nneè kú nej siyànà guduꞌhuêj ma̱ꞌan na̱nj nîꞌ.
Si gàꞌhue danj gaj mánj.
16 Nun niꞌin nej suj si sí atsïj siyànà guduꞌhuêj ma̱ꞌan ni̱ ꞌngo̱ rïn nneè kúu ganahuin sôꞌ ngà siyànà dânj ra̱ꞌ saj ûnꞌ.
Dadinꞌ taj riñan ñanj si-nùguànꞌ Ma̱ꞌan Ñaꞌanj an:
“Ni̱ ꞌngo̱ rïn nneè kúu ganahuin nguèj sij.”
17 Sani̱ sí ganakaj duguiꞌ ngà Ma̱ꞌan Señor,
ni̱ ꞌngo̱ rïn nanè nimân sôꞌ huin ngà Ma̱ꞌan Señor.
18 Gu̱na̱nj nej suj riñan gakï̱nꞌ aché sìgìchràꞌ.
Ahuin na̱nj aꞌngô gakï̱nꞌ giꞌhiaj síi,
sani̱ sê ngà nneè ku sôꞌ giꞌhiaj sôꞌ gakï̱nꞌ dânj mánj;
sani̱ sí aché sìgìchràꞌ,
ni̱ ngà nneè kú sôꞌ giꞌhiaj sôꞌ gakï̱nꞌïn na̱nj ánj.
19 Nun niꞌin nej suj si nneè kú nej suj huin si-nùhuì Ma̱ꞌan Espíritu Santo,
ni̱ nne Ma̱ꞌan ruhuâ nneè kú nej suj,
ni̱ Ma̱ꞌan Ñaꞌanj an giꞌhiaj nneè kú nej suj,
huê danj ni̱ sê siꞌhiaj nej suj huin nneè kú nej suj ràꞌ saj ûnꞌ.
20 Dadinꞌ gàꞌ ganaruꞌhue Jesucristo ma̱ꞌan rayiꞌî si-ga̱kïnꞌ nej suj;
huê danj ni̱ ña̱ꞌa̱n huaj si gi̱nikaj chre̱j nej suj ngà nneè kú nej suj ni̱ ngà nanè nimân nej suj riñan Ma̱ꞌan Ñaꞌanj an,
dadinꞌ siꞌhiaj Ma̱ꞌan Ñaꞌanj an huin nej suj na̱nj ánj.