Ganakaj guendâ rayiꞌî ꞌngo̱ sí gininj gakï̱nꞌïn ngà nni yìchèj
5
Yàngàꞌ ni̱ giyiꞌngaꞌ nuguanꞌan si hua̱ da̱ꞌa̱j nej suj màn hiuj dânj nne sìgìchràꞌ,
sani̱ gàꞌ siganï̂nj nej sí nàsìnùnj un ni̱ nitaj si huaj dànanj mánj;
dadinꞌ hua̱ ꞌngo̱ sí nne siganï̂nj nej suj ni̱ ganakaj sôꞌ nni gàꞌàn sôꞌ.
2 Ni̱ guendâ giꞌhiaj nej suj dànanj ni̱ ganï̂n ruhuâ nej suj si ûta huin nej suj.
Sani̱ daꞌhui nej suj ni̱ ga̱na̱nï̱n ruhuâ nej suj ni̱ gu̱du̱gue̱ꞌe ni̱ ga̱gua̱j hia nej suj rayiꞌî gakï̱nꞌ nânj,
ni̱ daꞌhui nej suj ni̱ gìrìꞌ nàꞌàj nej suj rayiꞌî sí giꞌhiaj gakï̱nꞌ nânj siganï̂nj nej suj.
3 Yàngàꞌ hia nï̀nꞌ ni̱ ñùnj,
ni̱ nùnj huin si nitaj si nné ngà nneè ku siganï̂nj nej suj sani̱ nne nanè nimânj ngà nej suj,
ni̱ gàꞌ gatâ dàj ganï̂n ruhuâj rayiꞌî sí giꞌhiaj gakï̱nꞌ dânj.
4 Ni̱ ngà siyu̱gui Ma̱ꞌan Señor Jesucristo,
ni̱ nga màn chre̱ꞌ nej suj ni̱ huê danj na̱nj nne nanè nimânj ngà nej suj,
ni̱ huê danj na̱nj ni̱ka̱j su̱n Ma̱ꞌan Señor Jesucristo riñan nej suj,
5 ni̱ nàgàꞌhuìꞌ nej suj sí giꞌhiaj gakï̱nꞌ dânj raꞌa sichre daꞌnga ni̱ giranꞌ sa̱ñu̱n nneè kú sôꞌ,
hiôꞌ ni̱ ga̱na̱ni̱n nanè nimânj sôꞌ gui nga gàꞌnàꞌ ñûn Ma̱ꞌan Jesús.
6 Nitaj si dùgùnàj huaj si ga̱nï̱n ruhuâ nej suj si ûta huin nej suj mánj.
Nun niꞌin nej suj:
“Si ga̱tu̱ doj sínj chru dunuꞌmanꞌan siganï̂nj kïnj hua̱ sàꞌaj ni̱ gunuꞌmanꞌ daranꞌ kïnj sàꞌ dânj gi̱ꞌhia mínj.”
(Dadinꞌ si giꞌnïnj sí giꞌhiaj gakï̱nꞌ nânj siganï̂nj nej suj ni̱ gi̱daꞌa aꞌngô nej sí huaj nûhui chrej aꞌnanꞌ giꞌhiaj sôꞌ).
7 Huê danj ni̱ gu̱du̱nâj nej suj nej gakï̱nꞌïn,
daꞌnga ni̱ ganahuin nej suj guiì nàkàa,
hiôꞌ ni̱ ga̱huin nej suj dàj rûnꞌ huin rachrún nàkà ya nej sij pascua,
dadinꞌ gàꞌ gahuiꞌ Ma̱ꞌan Cristo rayiꞌî si-ga̱kïnꞌ nêꞌ.
8 Huê danj ni̱ ga̱na̱nun ruhuôꞌ niꞌînꞌ giꞌñanj pascua,
sani̱ si̱ giꞌhiôꞌ gakï̱nꞌïn gàꞌ mánj,
dadinꞌ dàj rûnꞌ huin chru dunuꞌmanꞌan huê danj huin gakï̱nꞌïn ngà sa kï̱j huaa,
huê danj ni̱ si̱ ga̱ gakï̱nꞌïn riñan nej suj ni̱ ga̱huin nej suj sí gi̱ꞌhiaj sa nìkàa ni̱ sí da̱gahuin yàngàꞌ.
9 Ni̱ gachrûnj ñanj karta riñan nej suj,
ni̱ gatâ sisi̱ si̱ gi̱ni̱kaj duguiꞌ nej suj ngà nej sí nne sìgìchràꞌ;
10 sani̱ sê si̱ naꞌhuê si gi̱daꞌa duguiꞌ nej suj ngà nej sí nun niꞌin Ma̱ꞌan Ñaꞌanj an mánj,
sí nne sìgìchràꞌ,
sí ûta huin ruhuâ gaj doj riñan,
sí tu̱u,
sí nnùn ña̱ꞌa̱nj riñan ñaꞌanj giꞌhiaj ra̱ꞌa síi;
ni̱ si naꞌhuej ruhuâ nej suj gi̱daꞌa duguiꞌ nej suj ngà nej sí dânj,
hiôꞌ ni̱ daꞌhui nej suj ni̱ ga̱hui̱ nej suj neꞌ ye̱ꞌ yumiguì nânj.
11 Sani̱ sa ràyìꞌì gatâ nga gachrûnj riñan nej suj huin sisi̱ si̱ gidaꞌa duguiꞌ nej suj ngà nej sí gataj,
si huin nej sôꞌ dinï̂nt,
sani̱ nne sìgìchràꞌ nej sôꞌ,
sí ûta huin ruhuâ ga̱ doj riñan,
sí ginûn ña̱ꞌa̱nj riñan nej ñaꞌanj giꞌhiaj ra̱ꞌa síi,
sí gaꞌmin nuguanꞌ yìꞌì chre,
sí goꞌo nne yi̱na̱j a,
sí tu̱u;
sí giꞌhiaj dànanj ni̱ gàꞌ si ya nej suj ngà nej sôꞌ mánj.
12 Dadinꞌ nitaj guèndàj ganakaj guendâj si-ga̱kïnꞌ nej sí nitaj si nìkòꞌ rukû Ma̱ꞌan Jesús mánj.
Sani̱ nej suj daꞌhui ga̱na̱ka̱j guendâ si-ga̱kïnꞌ nej sôꞌ nìkòꞌ rukû Ma̱ꞌan Jesús.
13 Dadinꞌ nej sí nitaj si nìkòꞌ rukû Ma̱ꞌan Jesús,
ni̱ Ma̱ꞌan Ñaꞌanj an huin sa ga̱na̱ka̱j guendâ si-ga̱kïnꞌ nej sôꞌ.
Huê danj ni̱ gi̱ri̱ nej suj nej sí gi̱ꞌhiaj gakï̱nꞌïn siganï̂nj nej suj na̱nj ánj.