Sun giꞌhiaj nej apóstol
4
Huê danj ni̱,
gi̱nikaj chrej nêꞌ riñan nej sôꞌ gunânj gi̱tsi riñan Ma̱ꞌan Cristo,
dadinꞌ huê danj na̱nj huin nej sôꞌ sí ni̱ka̱j ñuꞌunj riñan si-su̱n Ma̱ꞌan Ñaꞌanj an ni̱ gidigân nej sôꞌ riñan nej guiì ni̱ riñan nej sa ga huì àsìj nâ giꞌhiaj Ma̱ꞌan Ñaꞌanj an.
2 Hia̱j ni̱ dùgùnàj huaj,
si daꞌ goꞌngo̱ nej sí ni̱ka̱j ñuꞌunj riñan si-su̱n Ma̱ꞌan Señor ni̱ daꞌhui nej sôꞌ hueꞌê ga̱da̱gahuin nej sôꞌ sun ganahuin ra̱ꞌa nej sôꞌ,
daꞌnga ni̱ gaꞌhue gùyùmàn ruhuâ nej guiì niꞌin ninj nej sôꞌ.
3 Ñùnj ni̱ nitaj si giriñun ruhuâj si ga̱na̱ka̱j guendâ nej suj rayiꞌí,
ni̱ huê danj na̱nj nitaj si giriñun ruhuâj si ga̱na̱ka̱j guendâ nej sí guesì ni̱ka̱j su̱n riñan hioꞌó nânj rayiꞌí;
ni̱ gàꞌ ñùnj ni̱ nitaj si giriñun ruhuâj niꞌín ma̱ꞌán dadinꞌ nitaj gakï̱nꞌïn giꞌhia mánj.
4 Dadinꞌ nùnj huin si nitaj si gaꞌmin gakï̱nꞌ daꞌngaꞌ nu̱n ruhuâ nimânj riñânj,
sani̱ sê danj ruhuâj ga̱ta si nitaj gakï̱nꞌïn hua riñânj mánj;
sani̱ sa ganakaj guendâ dàj giꞌhiâ huin Ma̱ꞌan Señor.
5 Huê danj,
ni̱ si̱ gutaꞌ chre nej suj gakï̱nꞌïn nej duguiꞌ nej suj mánj,
gànàꞌhuìj nej suj nda gàꞌnàꞌ Ma̱ꞌan Señor,
ni̱ ga̱na̱di̱ganj daranꞌ nej gakï̱nꞌ ꞌnï̱nj huì ñan hua̱ ru̱mi̱nꞌ gi̱ꞌhiaj nej síi,
ni̱ ga̱na̱di̱ganj dàj ganï̂n yàngàꞌ ruhuâ nimân nej sij;
hiôꞌ ni̱ ga̱na̱huin ra̱ꞌa daꞌ goꞌngo̱ nej sij dàj na̱nj hua ma̱ꞌan nej sa gi̱ꞌhiaj nej sij.
6 Sani̱ gatâ dànanj gu̱nïn nej suj di̱nï̂nj,
ni̱ gahuín ni̱ gahuin Apolos ꞌngo̱ daꞌngaꞌ garânj sûnj guendâ ꞌì ruhuâj niꞌín nej suj,
daꞌnga ni̱ gahuin chru̱n nej suj ni̱ si̱ gunutaꞌ nej suj nìko doj yichrá si-nùguànꞌ Ma̱ꞌan Ñaꞌanj an,
daꞌnga ni̱ si̱ ganï̂n ruhuâ nej suj si huin nej suj doj ni̱ gi̱ni̱nj ꞌì aꞌngô nej duguiꞌ nej suj riñan nej suj.
7 Dadinꞌ ahuin si gataj si ni̱ka̱j su̱nꞌ riñan aꞌngô nej duguît ràꞌaj.
Ni̱ si niꞌînꞌ doj ni̱ sê Ma̱ꞌan Ñaꞌanj an rikî sa niꞌînꞌ dânj ràꞌ saj ûnꞌ,
ni̱ si Ma̱ꞌan Ñaꞌanj an rikî sa niꞌînꞌ dânj,
ni̱ nùnj huin saj ni̱ gatajꞌ si gahuin chru̱n ma̱ꞌânꞌ ràꞌaj.
8 Gàꞌ hua̱ daranꞌanj riñan nej suj,
ni̱ gàꞌ hua yi̱ruꞌhue nej suj,
ni̱ gàꞌ ni̱ka̱j su̱n nej suj riñan ma̱ꞌan nej suj.
Ni̱ dùgùnàj huaj si ni̱ka̱j su̱n yàngàꞌ nej suj riñan nej suj,
hiôꞌ ni̱ ꞌngo̱ gui ni̱ gi̱ni̱kaj sun nùguànꞌàn nêꞌ.
9 Dadinꞌ ganï̂n ruhuâj,
si gudunâj Ma̱ꞌan Ñaꞌanj an nda neꞌ rùkùu nej ñûnj nej sí gaꞌanj gànàtàꞌ si̱nï̱n si-nùguànꞌ Ma̱ꞌan,
ni̱ gàꞌ giriꞌ nìꞌhiaj nej ñûnj guendâ da̱gahuiꞌ nej síi nej ñûnj;
ni̱ mân si nne nej ñûnj guendâ ga̱huin nej ñûnj sa nìhiàꞌa riñan nej guiì màn ruhuâ yumiguìi,
ni̱ huê danj na̱nj huin nej ñûnj sa nìhiàꞌa riñan nej ángel ngà riñan nej guiì.
10 Sani̱ giꞌhiaj nej ñûnj sí huin nej ñûnj sí naꞌhue ga̱ya̱ka̱j guendâ nìko rayiꞌî guendâ ꞌì ruhuâ nej ñûnj niꞌin nej ñûnj Ma̱ꞌan Cristo,
sani̱ nej suj ni̱ guruhuâ Ma̱ꞌan Cristo,
si huin nej suj sí ûta sìkàꞌ raa̱;
ni̱ nej ñûnj huin ꞌngo̱ sí gininaj chrej,
sani̱ nej suj huin ꞌngo̱ nej sí ûta nùkuaj;
ni̱ ni̱ka̱j chre̱j nej guiì ngà nej suj,
sani̱ gininj ꞌì nej ñûnj riñan nej guiì.
11 Nda gui hia̱j ni̱ ganachinj yiꞌnaa riki nej ñûnj,
ni̱ ganakô nej ñûnj nnee,
ni̱ naꞌhue gìrìꞌ nej ñûnj atsìj i gi̱nun nej ñûnj,
ni̱ garaꞌhui nej sij riñan nej ñûnj,
ni̱ huê danj na̱nj nitaj si hua̱ yìtï̀nj ñan ga̱ne nej ñûnj.
12 Ni̱ nda gininaj nej ñûnj gi̱ꞌhiaj sun nej ñûnj ngà raꞌa nej ñûnj;
ni̱ gaꞌmin kï̱j nej sij riñan nej ñûnj,
sani̱ gaꞌmin hueꞌê nej ñûnj riñan nej sij;
ni̱ gata ra̱ꞌa nej sij nej ñûnj,
sani̱ hua̱ nùkuaj ruhuâ nej ñûnj.
13 Ni̱ gutaꞌ chre nej sij gakï̱nꞌïn yichrá nej ñûnj,
sani̱ gachín nìꞌhiaj nej ñûnj sisi̱ si̱ gayakaj guendâ Ma̱ꞌan Ñaꞌanj an sa giꞌhiaj nej sij ngà nej ñûnj;
ni̱ ꞌna̱ꞌ ga̱huin nej ñûnj dàj rûnꞌ huin nej sa nitaj si niꞌñanj an riñan yumiguìi,
ni̱ dàj rûnꞌ huin akò girëꞌëj nej guiì huê danj huin nej ñûnj riñan daranꞌ nej guiì.
14 Sê si̱ gachrûnj nej nuguanꞌ ñanj guendâ gi̱ꞌhia si gìrìꞌ nàꞌàj nej suj mánj,
gachrûnj guendâ du̱gunïn gàꞌìj nej suj dàj rûnꞌ giꞌhiaj ꞌngo̱ sí ꞌì ruhuâ niꞌin daꞌní dadinꞌ ûta ꞌì ruhuâj niꞌín nej suj.
15 Dadinꞌ nùnj huin si gàꞌ hua chi̱ꞌ mîn nej sí gidigân si-nùguànꞌ Ma̱ꞌan Cristo riñan nej suj,
sani̱ si̱ gaꞌhue ga̱ gàꞌì rej nej suj mánj;
dadinꞌ ñùnj huin rej nej suj ni̱ rikîj nuguanꞌ gi̱ꞌhiaj ga̱na̱ni̱n nej suj huê danj ni̱ guyumân ruhuâ nej suj niꞌin nej suj Ma̱ꞌan Cristo Jesús.
16 Huê danj ni̱,
gachín ni̱ꞌhia si gi̱ꞌhiaj nej suj dàj rûnꞌ giꞌhia.
17 Rayiꞌî dan ni̱ gaꞌnï̂n daꞌnî Timoteo guchiꞌ sôꞌ riñan nej suj,
ni̱ ûta ꞌì ruhuâj niꞌín sôꞌ dadinꞌ hueꞌê dagahuin sôꞌ riñan Ma̱ꞌan Señor,
ni̱ nga gùchìꞌ sôꞌ riñan nej suj ni̱ du̱nanun sôꞌ ruhuâ nej suj dàj hua chrej gidigán riñan nej suj,
dadinꞌ dànèꞌ gahuin ni̱ huê danj gidigán riñan nej dinï̂nt huin si-nùhuì Ma̱ꞌan Jesús.
18 Sani̱ hua̱ da̱ꞌa̱j nej suj anï̂n ruhuâ si ûta huin nej suj,
dadinꞌ anï̂n ruhuâ nej suj si nitaj àmàn gùchìꞌ gi̱ni̱ꞌhia ñan màn nej suj.
19 Sani̱ si garanꞌ ruhuâ Ma̱ꞌan Señor ni̱ gùchìꞌ raꞌña̱n ñan màn nej suj,
hiôꞌ ni̱ gi̱ni̱ꞌín dàj gi̱ꞌhiaj nej sí ganï̂n ruhuâ si ûta huin nej sôꞌ,
ni̱ giniꞌín si yàngàꞌ hia dagahuin nej sôꞌ nuguanꞌ gaꞌmin nej sôꞌ.
20 Dadinꞌ ñan ni̱ka̱j su̱n Ma̱ꞌan Ñaꞌanj an ni̱ nitaj si niꞌñanj si ûta chru̱n ꞌngo̱ síi,
si nitaj si-guesâ Ma̱ꞌan Ñaꞌanj an nikaj nej nuguanꞌ gaꞌmin sôꞌ.
21 Dàj gi̱ꞌhiâ nga gùchìj ñan màn nej suj ruhuâ nej suj ràꞌaj.
Ni̱ ruhuâ nej suj si gi̱nika rutsìi guendâ du̱guañûnj nej suj nîꞌ,
si ruhuâ nej suj si gàꞌmìn nuguanꞌ ꞌì rûhua ni̱ nuguanꞌ niꞌñanj an riñan nej suj sàꞌ.