Sí giꞌhiaj sun ngà Ma̱ꞌan Ñaꞌanj an
3
Huê danj na̱nj ñùnj nej di̱nï̂nj,
ni̱ nun gàꞌhue gàꞌmìn riñan nej suj nuguanꞌ chìꞌ hua doj dàj rûnꞌ gaꞌmînj riñan nej sí hua̱ ran ruhuâ ngà Ma̱ꞌan Señor mánj,
huê dan ni̱ gaꞌmînj riñan nej suj dàj rûnꞌ gaꞌmînj riñan nej sí nun niꞌin Ma̱ꞌan Ñaꞌanj an,
ni̱ dàj rûnꞌ gaꞌmînj riñan nej sí hia̱j guyumân ruhuâ niꞌin Ma̱ꞌan Cristo huê danj gaꞌmînj riñan nej suj.
2 Ni̱ dàj rûnꞌ goꞌo nej sílìj i tòo huê danj gidigán nuguanꞌ nitaj si hua̱ chìꞌi riñan nej suj,
ni̱ nun gàꞌmìn nuguanꞌ chìꞌ huaa riñan nej suj;
dadinꞌ hua̱ na̱nj nitaj si hua̱ yu̱gui nej suj ga̱na̱huin ra̱ꞌa nej suj nuguanꞌ chìꞌ huaa,
dadinꞌ hua̱ na̱nj gàchin ga̱huin ran ruhuâ nej suj,
3 sê hua̱ na̱nj giꞌhiaj nej suj dàj rûnꞌ giꞌhiaj nej sí nun niꞌin Ma̱ꞌan Ñaꞌanj an;
dadinꞌ hua̱ na̱nj ûta yi̱ko̱j nej suj,
ni̱ hua̱ na̱nj garán riñan duguiꞌ nej suj ni̱ giyichraꞌ da̱ꞌa̱j nej suj,
ni̱ giꞌhiaj nej suj dàj rûnꞌ giꞌhiaj nej sí nun niꞌin Ma̱ꞌan Ñaꞌanj an.
Ni̱ gi̱ꞌhiaj nej suj dàj rûnꞌ gi̱ꞌhiaj nej sí nàsìnùnj un ràꞌ saj ûnꞌ.
4 Dadinꞌ da̱ꞌa̱j nej suj gataj:
“Ñùnj nikòꞌ rukû Pablo”;
ni̱ aꞌngô da̱ꞌa̱j nej suj gataj:
“Ñùnj nikòꞌ rukû Apolos”,
nga gaꞌmin nej suj dànanj ni̱ sê dàj rûnꞌ giꞌhiaj nej sí nun niꞌin Ma̱ꞌan Ñaꞌanj an giꞌhiaj nej suj ràꞌ saj ûnꞌ.
5 Hiôꞌ ni̱ ñaꞌanj an huin Pablo,
ni̱ ñaꞌanj an huin Apolos nga na̱nj nînꞌ.
Sê síi huin nguèj ñûnj ni̱ gunânj gi̱tsi nguèj ñûnj riñan Ma̱ꞌan Ñaꞌanj an ni̱ nga gaꞌmin nguèj ñùnj si-nùguànꞌ Ma̱ꞌan Ñaꞌanj an riñan nej suj ni̱ guyumân ruhuâ nej suj mínj;
ni̱ gaꞌmin nguèj ñûnj riñan nej suj dàj rikî Ma̱ꞌan Señor.
6 Ñùnj gunun,
ni̱ Apolos gutâj nnee riñanj ni̱ giyichraj;
sani̱ Ma̱ꞌan Ñaꞌanj an huin sa gi̱ꞌhiaj gachi.
7 Huê danj ni̱ sê si huin doj sí gunun,
gàꞌ daꞌ sí gutâj nnee mánj,
dadinꞌ Ma̱ꞌan Ñaꞌanj an huin sa giꞌhiaj ni̱ gachij sa giyichraꞌ dânj.
8 Ni̱ sí gunun dânj ngà sí gutâj nnee ni̱ gu̱ña̱n chre huin nguèj sôꞌ;
ni̱ daꞌ goꞌngo̱ nguèj sôꞌ ga̱na̱huin ra̱ꞌa nanìꞌhiaj nguèj sôꞌ ahuin na̱nj sun ma̱ꞌan gi̱ꞌhiaj nguèj sôꞌ.
9 Dadinꞌ nguèj ñûnj gi̱ꞌhiaj sun nùguànꞌàn si-su̱n Ma̱ꞌan Ñaꞌanj an,
ni̱ dàj rûnꞌ huin hioꞌó ñan giꞌhiaj sun Ma̱ꞌan Ñaꞌanj an huin nej suj.
Ni̱ nej suj huin hueꞌ giꞌhiaj Ma̱ꞌan Ñaꞌanj an.
10 Ûta nìko hua̱ sunuj riki Ma̱ꞌan Ñaꞌanj an riñânj,
dadinꞌ gahuín dàj rûnꞌ huin ꞌngo̱ sí ganari raa̱ dàj ga̱ ꞌngo̱ hueꞌe ni̱ guné yiꞌî hueꞌ dânj,
ni̱ aꞌngô nej sôꞌ ganachi nikaj chraan ni̱ gisîj hueꞌ dânj;
sani̱ daꞌ goꞌngo̱ nej sôꞌ gi̱niꞌhiaj dàj ganachi nikaj nej sôꞌ chraan ni̱ gìsìj hueꞌ dânj.
11 Dadinꞌ gàꞌ si ꞌngo̱ sí si̱ gàꞌhue na̱du̱na̱ dàj ga̱ne yiꞌî ꞌngo̱ hueꞌe nga gàꞌ nne yiꞌî hueꞌ dânj,
ni̱ yiꞌî hueꞌ dânj huin Ma̱ꞌan Jesucristo.
12 Ni̱ si riñan yiꞌî hueꞌ dânj guneꞌ nej sôꞌ agaꞌ oro,
agaꞌ plata,
hiëj nìhiàꞌa,
chrun,
chrinꞌ nakòo,
koj raꞌa chrun.
13 Ni̱ gi̱ni̱ꞌînꞌ dàj hua sun giꞌhiaj daꞌ goꞌngo̱ nej guiì;
dadin gi̱ni̱ꞌînꞌ dàj gaj nga ga̱huin neꞌ gui nga gàꞌhuìꞌ nân riñanj,
ni̱ gi̱ni̱ꞌînꞌ dàj gi̱ra̱nꞌanj nga ga̱chinj riñan ñaꞌaan;
huê danj ni̱ dàj na̱nj hua ma̱ꞌan sun gi̱ꞌhiaj nej guiì,
ni̱ ga̱na̱di̱gân ñaꞌaan dàj na̱nj hua ma̱ꞌan ninj.
14 Ni̱ si gane ran hueꞌ giꞌhiaj ꞌngo̱ sí dânj,
ni̱ ga̱na̱huin raꞌa sôꞌ nanìꞌhiaj sôꞌ gi̱ꞌhiaj Ma̱ꞌan Ñaꞌanj an.
15 Ni̱ asàꞌ gaka hueꞌ giꞌhiaj ꞌngo̱ sí dânj,
ni̱ ga̱na̱huij daranꞌ si-su̱n sôꞌ gi̱rë̱ꞌ,
ni̱ nda nuhuiꞌ si sàꞌ ni̱ ga̱na̱ni̱n sôꞌ,
dàj rûnꞌ gananin ꞌngo̱ sí gahui siganï̂nj ñan ganûn ñaꞌaan.
16 Nun niꞌin nej suj si huin nej suj si-nùhuì Ma̱ꞌan Ñaꞌanj an,
ni̱ nne si-Espíritu Ma̱ꞌan ruhuâ nimân nej suj mínj.
17 Ni̱ si hua̱ ꞌngo̱ sí gi̱ꞌhiaj gi̱rë̱ꞌ si-nùhuì Ma̱ꞌan Ñaꞌanj an,
ni̱ gàhuìꞌ sôꞌ gi̱ꞌhiaj Ma̱ꞌan Ñaꞌanj an;
nej suj huin si-nùhuì Ma̱ꞌan Ñaꞌanj an,
ni̱ huin nej suj ꞌngo̱ nuhuî gèe.
18 Ni̱ si̱ gidigañuꞌunj gàꞌ si ꞌngo̱ nej suj ma̱ꞌan nej suj mánj;
ni̱ si hua̱ ꞌngo̱ nej suj ganï̂n ruhuâ si chru̱n nï̀nꞌ ruhuâ nej suj diû nânj,
ni̱ gi̱ꞌhiaj nej suj si nitaj si nùnj niꞌin nej suj,
daꞌnga ni̱ gahuin chru̱n nï̀nꞌ ruhuâ nej suj gi̱ꞌhiaj Ma̱ꞌan Ñaꞌanj an.
19 Dadinꞌ sa chru̱n nï̀nꞌ ruhuâ nej guiì ni̱ nitaj si niꞌñanj man riñan Ma̱ꞌan Ñaꞌanj an;
dadinꞌ huê danj nnunj riñan ñanj:
“Ni̱ gu̱du̱ninj Ma̱ꞌan Ñaꞌanj an nej sí chru̱n nï̀nꞌ ruhuâ dânj riñan yinùu dadinꞌ ganï̂n ruhuâ nej sôꞌ si ûta hueꞌê chru̱n nej sôꞌ ni̱ rayiꞌî dan ni̱ dagaꞌmin nej sôꞌ nej guiì guendâ si̱ guyumân ruhuâ ninj niꞌin ninj Ma̱ꞌan Ñaꞌanj an.”
20 Aꞌngô ñûn:
“Ni̱ niꞌin Ma̱ꞌan Señor dàj ganï̂n ruhuâ nej sí chrun nï̀nꞌ ruhuâ,
sani̱ nitaj nùnj gue̱nda̱ niꞌñanj sa chru̱n nej sôꞌ.”
21 Huê danj,
ni̱ si gataj nej suj si ûta huin ꞌngo̱ sí gidigân riñan nej suj,
dadinꞌ gàꞌhue gahuin chru̱n nej suj daranꞌanj:
22 Nùnj huin si Pablo,
ni̱ nùnj si Apolos,
ni̱ nùnj huin si Cefas,
ni̱ nùnj huin si yumiguìi,
nùnj huin si sa ga̱ nìꞌnòꞌ,
ni̱ nùnj huin si sa gàhuìꞌ,
ni̱ nùnj huin si sa hua diû hia̱j,
ni̱ nùnj huin si sa gàꞌnàꞌ diû neꞌ ña̱an,
daranꞌanj huin guendâ nej suj,
23 ni̱ siꞌhiaj Ma̱ꞌan Cristo huin nêꞌ,
ni̱ Cristo huin siꞌhiaj Ma̱ꞌan Ñaꞌanj an.