Nuguanꞌ ni̱ꞌña̱nj gaꞌnḯn nej sij riñan nej dinï̂nt
16
Gaꞌmin hueꞌé ni̱ duguta sùnj yugueꞌ Febe riñan nej suj dadinꞌ huej huin sa ûta hueꞌê giꞌhiaj sun si-su̱n Ma̱ꞌan Ñaꞌanj an ni̱ huej huin diákona riñan si-nùhuì Ma̱ꞌan Jesús nne ruhuâ yumanꞌ snàꞌànj Sencrea;
2 ni̱ ga̱na̱huin ràꞌa nej suj ngà siyu̱gui Ma̱ꞌan Señor yugueꞌ dânj,
dadinꞌ huê danj daꞌhuîꞌ ga̱na̱huin ro̱ꞌôꞌ nej dinï̂nt guyumân ruhuâ niꞌin Ma̱ꞌan Ñaꞌanj an,
ni̱ gu̱ru̱gûñuꞌunj nej suj daranꞌ sa gàchin riñan yugueꞌ dânj;
dadinꞌ ûta gàꞌì nej dinï̂nt guruguñuꞌunj yugueꞌ dânj,
ni̱ huê danj na̱nj guruguñuꞌun ñùnj nej na̱nj ánj.
3 Nàgàꞌhuìꞌ nej suj ꞌngo̱ nuguanꞌ ni̱ꞌña̱nj an riñan Priscila ngà Aquila,
dadinꞌ huê nej ñûnj ginikaj duguiꞌ giꞌhiaj sun ngà Ma̱ꞌan Cristo Jesús,
4 dadinꞌ ga ruhuâ nej sij gàhuìꞌ nej sij rayiꞌí;
ni̱ sê ꞌngo̱ rḯn gaꞌhuiꞌ si guruhuâ nej sij mánj,
huê danj na̱nj gaꞌhuiꞌ daranꞌ nej dinï̂nt nàsìnùnj huin si-nùhuì Ma̱ꞌan Jesús si guruhuâ nej sij.
5 Nàgàꞌhuìꞌ nej suj ꞌngo̱ nuguanꞌ ni̱ꞌña̱nj an riñan nej dinï̂nt huin si-nùhuì Ma̱ꞌan Jesús naraꞌhuiꞌ dukuâ Priscila ngà Aquila.
Ni̱ nàgàꞌhuìꞌ nej suj ꞌngo̱ nuguanꞌ ni̱ꞌña̱nj an riñan dinï̂nt Epeneto,
sí ûta ꞌì ruhuâj niꞌín,
dadinꞌ huê sôꞌ huin sí guyumân si̱nï̱n ruhuâ niꞌin Ma̱ꞌan Cristo riñan hioꞌó Acaya.
6 Nàgàꞌhuìꞌ nej suj ꞌngo̱ nuguanꞌ ni̱ꞌña̱nj an riñan María,
dadinꞌ huej huin sa ûta giꞌhiaj sun staꞌu siganï̂nj nej suj.
7 Nàgàꞌhuìꞌ nej suj ꞌngo̱ nuguanꞌ ni̱ꞌña̱nj an riñan Andrónico ngà riñan Junias,
nej sôꞌ huin nej duguiꞌí,
dadinꞌ nej ñûnj giꞌnïnj dukuâ gaꞌa,
ni̱ ûta ꞌì ruhuâ nej dinï̂nt gaꞌanj gi̱di̱gân si̱nï̱n si-nùguànꞌ Ma̱ꞌan Ñaꞌanj an niꞌin nej sôꞌ nej sij,
ni̱ gàꞌ si̱nï̱n nej sij giniꞌin si-nùguànꞌ Ma̱ꞌan Ñaꞌanj an gàꞌ daꞌ ñùnj.
8 Nàgàꞌhuìꞌ nej suj ꞌngo̱ nuguanꞌ ni̱ꞌña̱nj an riñan Amplia,
dadinꞌ ûta ꞌì ruhuâj niꞌín sôꞌ dàj rûnꞌ ꞌì ruhuâ Ma̱ꞌan Señor niꞌin sôꞌ.
9 Nàgàꞌhuìꞌ nej suj ꞌngo̱ nuguanꞌ niꞌñanj an riñan Urbano,
dadinꞌ huê nej ñûnj giꞌhiaj sun riñan Ma̱ꞌan Señor Jesús,
ni̱ huê danj na̱nj gaꞌnï̂n ꞌngo̱ nuguanꞌ ni̱ꞌña̱nj an huaj riñan Estaquis,
ni̱ ûta ꞌì ruhuâj niꞌín sôꞌ.
10 Nàgàꞌhuìꞌ nej suj ꞌngo̱ nuguanꞌ ni̱ꞌña̱nj an riñan Apeles,
dadinꞌ gàꞌ ganahuin ràꞌa Ma̱ꞌan Cristo sôꞌ.
Ni̱ nàgàꞌhuìꞌ nej suj ꞌngo̱ nuguanꞌ ni̱ꞌña̱nj an riñan nej dùguìꞌ Aristóbulo.
11 Nàgàꞌhuìꞌ nej suj nuguanꞌ ni̱ꞌñanj an riñan Herodión,
sôꞌ huin duguiꞌí.
Ni̱ nàgàꞌhuìꞌ nej suj nuguanꞌ ni̱ꞌña̱nj an riñan nej duguiꞌ Narciso,
dadinꞌ gàꞌ guyumân ruhuâ nej sôꞌ niꞌin nej sôꞌ Ma̱ꞌan Señor.
12 Nàgàꞌhuìꞌ nej suj ꞌngo̱ nuguanꞌ ni̱ꞌña̱nj an riñan Trifena ngà riñan Trifosa,
dadinꞌ gunânj gi̱tsi nguèj yuguet dan riñan Ma̱ꞌan Señor:
Ni̱ nàgàꞌhuìꞌ nej suj nuguanꞌ ni̱ꞌña̱nj an riñan Pérsida dadinꞌ ûta ꞌì ruhuâj niꞌín yuguet dânj,
dadinꞌ ûta giꞌhiaj sun yuguet dan riñan Ma̱ꞌan Señor.
13 Nàgàꞌhuìꞌ nej suj nuguanꞌ ni̱ꞌña̱nj an riñan Rufo,
dadinꞌ gàꞌ ganagui Ma̱ꞌan Señor sij,
huê danj na̱nj nàgàꞌhuìꞌ nej suj nuguanꞌ ni̱ꞌña̱nj an riñan sachij nni sij dadinꞌ dàj rûnꞌ huin ruhuâj niꞌín nnî huê danj huin ruhuâj niꞌín sachij dânj.
14 Nàgàꞌhuìꞌ nej suj ꞌngo̱ nuguanꞌ ni̱ꞌñanj an riñan Asíncrito,
ngà riñan Flegonte,
ngà riñan Hermas,
ngà riñan Patrobas,
ngà riñan Hermes ni̱ huê danj nàgàꞌhuìꞌ nej suj nuguanꞌ ni̱ꞌña̱nj an riñan nej dinï̂nt màn ngà nej sij.
15 Nàgàꞌhuìꞌ nej suj nuguanꞌ ni̱ꞌña̱nj an riñan Filólogo,
ngà riñan Julia,
ni̱ riñan Nereo,
ni̱ riñan yuguij julia nej,
ni̱ nàgàꞌhuìꞌ nej suj nuguanꞌ ni̱ꞌña̱nj an riñan Olimpas,
ni̱ ngà riñan daranꞌ nej dinï̂nt gè màn ngà nej sij.
16 Nàgàꞌhuìꞌ nej suj nuguanꞌ ni̱ꞌña̱nj an riñan ꞌngo̱ ni̱ aꞌngô nej duguiꞌ nej suj ni̱ gi̱da̱ꞌa nej suj raꞌa ꞌngo̱ ni̱ aꞌngô nej duguiꞌ nej suj.
Ni̱ huê danj na̱nj gaꞌnḯn nej dinï̂nt huin si-nùhuì Ma̱ꞌan Jesús ꞌngo̱ nuguanꞌ ni̱ꞌña̱nj an huaj riñan nej suj.
17 Sani̱ gachín ni̱ꞌhia riñan nej suj di̱nï̂nj,
si hueꞌê ga̱ꞌnï̱nj ñan nej suj nej sôꞌ guchraꞌ da̱ꞌa̱j ni̱ giꞌhiaj nej sôꞌ si ga̱che̱j ruhuâ nej suj ngà nej yìꞌnï̀nꞌ nuguanꞌ gàꞌ gahuin chru̱n nej suj,
ni̱ gi̱ꞌhiaj anêj nej suj ma̱ꞌan nej suj riñan nej sôꞌ.
18 Dadinꞌ sê riñan Ma̱ꞌan Señor gunânj gi̱tsi nej sí dânj mánj,
gunânj gi̱tsi nej sij guendâ ganachinj yiꞌnaa riki nej sôꞌ,
ni̱ ûta nàj gaꞌmin nej sôꞌ ni̱ nda nngaj riñan hioꞌó gaꞌmin nej sôꞌ guendâ gi̱di̱gañuꞌunj nej sôꞌ nej guiì nitaj si chru̱n.
19 Dadinꞌ gàꞌ gunïn gàꞌì nej guiì si hueꞌê dagahuin nej suj,
huê danj ni̱ huin nìhiàꞌ ruhuâj niꞌín nej suj;
sani̱ garanꞌ ruhuâj si ga̱huin nej suj sí gi̱ni̱ꞌin hueꞌê guendâ gi̱ꞌhiaj nej suj sa sàꞌaj,
ni̱ ga̱huin nej suj sí nitaj si chru̱n giꞌhiaj sa aꞌnanꞌan.
20 Ni̱ Ma̱ꞌan Ñaꞌanj ꞌhiaj hua dïnꞌïnj gi̱ꞌhiaj ni̱ gùnùkuaj nej suj gùtàꞌ nej suj dakó nej suj yichrá sichre.
Ni̱ sunuj rikî Ma̱ꞌan Señor ga̱ne ngà nej suj.
21 Ni̱ gaꞌnḯn Timoteo sôꞌ giꞌhiaj sun ngàj nuguanꞌ ni̱ꞌña̱nj an huaj riñan nej suj ni̱ huê danj na̱nj gaꞌnḯn sôꞌ gùꞌnàj Lucio,
ni̱ Jasón ni̱ Sosípater huin nej duguiꞌí,
gaꞌnḯn nuguanꞌ ni̱ꞌña̱nj an huaj riñan nej suj.
22 Ñùnj gùꞌnàj Tercio,
gachrûn ñanj karta nânj,
ni̱ ngà siyu̱gui Ma̱ꞌan Señor ni̱ gaꞌnï̂n nuguanꞌ ni̱ꞌña̱nj an huaj riñan nej suj.
23 Ni̱ gaꞌnḯn Gayo nuguanꞌ ni̱ꞌña̱nj an huaj riñan nej suj,
ni̱ dukuâ sôꞌ guna,
ni̱ huê danj na̱nj gaꞌnḯn daranꞌ nej dinï̂nt huin si-nùhuì Ma̱ꞌan Jesús nuguan ni̱ꞌña̱nj an huaj riñan nej suj.
Ni̱ huê danj na̱nj gaꞌnḯn Erasto nuguanꞌ ni̱ꞌña̱nj huaj riñan nej suj,
ni̱ sôꞌ huin sí dugumîn si-sa̱nꞌa̱nj yumanꞌ snàꞌànj nânj,
ni̱ huê danj na̱nj gaꞌnḯn dinï̂nt gùꞌnàj sa ga̱ꞌanj nuguanꞌ ni̱ꞌña̱nj an huaj riñan nej suj.
24 Ni̱ si-su̱nu̱j Ma̱ꞌan Señor Jesucristo huin ngà daꞌ ꞌngo̱ nej suj.
Ni̱ huê danj huin rûꞌhuaj.
Dunaꞌnga Pablo si ga̱ꞌmi̱n hueꞌê nej sij riñan Ma̱ꞌan Ñaꞌanj an
25 Ni̱ huê Ma̱ꞌan Ñaꞌanj an huin sa na̱gi̱ꞌhiaj yìtï̀nj nuguanꞌ gidigán ni̱ nuguanꞌ giꞌhiaj ga̱na̱ni̱n nej suj dadinꞌ huê danj gidigân Ma̱ꞌan Jesucristo,
dadinꞌ hia̱j ni̱ naruguiꞌ nuguanꞌ giꞌnïnj huì àsìj nâ xi,
26 sani̱ hia̱j ni̱ ûta niꞌnï̱nj hua riñan ñanj gachrûn nej sôꞌ gataj dàj gahuin,
dadinꞌ huê danj giyiꞌnïnꞌ suun giꞌhiaj Ma̱ꞌan Ñaꞌanj nne nìgànj nï̀nꞌ,
si hua̱ ni̱ña̱n si giniꞌin daranꞌ nej guiì si-nùguànꞌ Ma̱ꞌan Ñaꞌanj an daꞌnga ni̱ guyumân ruhuâ ninj ni̱ da̱gahuin ninj riñanj.
27 Ni̱ ꞌngo̱ rïn Ma̱ꞌan Ñaꞌanj an ûta sàꞌ niꞌin,
ni̱ ga̱ꞌmi̱n hueꞌê nej guiì rayiꞌij giꞌhiaj Ma̱ꞌan Jesucristo nìgànj chre.
Ni̱ huê danj huin rûꞌhuaj na̱nj ánj.