Ga̱na̱huij ruhuâꞌ sa hua̱ hueꞌê riñan nej duguît ni̱ si̱ ganahuij ruhuâꞌ rayiꞌî ma̱ꞌânꞌ mánj
15
Huê danj ni̱ nêꞌ hua̱ nùkuaj doj ngà si-nùguànꞌ Ma̱ꞌan Ñaꞌanj an ni̱ ga̱ nùkuaj ruhuôꞌ ngà nej sôꞌ hua̱ ninaj ruhuâ ngà si-nùguànꞌ Ma̱ꞌan Ñaꞌanj an,
ni̱ si̱ giꞌhiôꞌ sa garanꞌ ruhuâ mu̱ꞌunꞌ mánj.
2 Daꞌ ꞌngo̱ nêꞌ daꞌhuiꞌ gi̱ꞌhiaj hueꞌê ngà nej duguiꞌ nga sa sàꞌa ni̱ ga̱na̱huin nùkuaj nej sij ngà si-nùguànꞌ Ma̱ꞌan Ñaꞌanj an.
3 Dadinꞌ gàꞌ Ma̱ꞌan Cristo ni̱ nun gi̱ꞌhia sa ga̱ranꞌ ruhuâj mánj;
sa si̱nï̱n giꞌhia huin si dagahuin dàj rûnꞌ taj nuguanꞌ nnùn riñan ñanj gachrûn nej sôꞌ gataj dàj gahuin,
dadinꞌ ni̱ ta dànanj:
“Nej nuguanꞌ kï̱j gaꞌmin nej sí dânj riñan Ma̱ꞌân rèꞌ,
huê riñânj gaꞌmin kï̱j nej sôꞌ nej nuguanꞌ dânj.”
4 Dadinꞌ nej nuguanꞌ gachrûn si̱nï̱n nej sôꞌ,
ni̱ gachrûn nej sôꞌ guendâ ga̱ꞌhue ga̱huin chru̱nꞌ,
huê danj ni̱ si-nùguànꞌ Ma̱ꞌan Ñaꞌanj an gi̱ꞌhiaj ga̱na̱huin nùkuaj ruhuôꞌ ni̱ gànàrìꞌ ruhuôꞌ,
huê danj ni̱ ga̱ꞌhue gànàꞌhuìꞌ Ma̱ꞌan Ñaꞌanj an.
5 Ma̱ꞌan Ñaꞌanj an gi̱ꞌhiaj ga̱huin nùkuaj ruhuôꞌ ni̱ Ma̱ꞌan gi̱ꞌhiaj gànàrìꞌ ruhuôꞌ huej huin sa ri̱ki si gu̱ña̱n chre ga̱nï̱n ruhuôꞌ dàj rûnꞌ garanꞌ ruhuâ Ma̱ꞌan Cristo,
6 ni̱ ga̱ gu̱ña̱n ruhuâ nej suj,
ni̱ gu̱ña̱n ga̱ꞌmi̱n hueꞌê nej suj,
ni̱ na̱gi̱ꞌhiaj nìko nej suj Ma̱ꞌan Ñaꞌanj an,
dadinꞌ huê Ma̱ꞌan huin Rej Ma̱ꞌan Señor Jesucristo.
Gaꞌmin nej sij riñan nej sí nàsìnùnj un nuguanꞌ gi̱ꞌhiaj ga̱na̱ni̱n nej sôꞌ
7 Huê danj ni̱,
ga̱na̱huin ràꞌa ꞌngo̱ ni̱ aꞌngô nej suj nej duguiꞌ nej suj,
dàj rûnꞌ giꞌhiaj Ma̱ꞌan Cristo nga ganahuin ràꞌa ñùnꞌ,
daꞌnga ni̱ giniꞌin nej guiì si dùgùnàj hua sa giꞌhiaj Ma̱ꞌan Ñaꞌanj an ngòꞌ.
8 Huê danj gatâ,
dadinꞌ gaꞌnaꞌ Ma̱ꞌan Cristo ni̱ gunânj gi̱tsi riñan nej judío guendâ gidiganj riñan nej sôꞌ sa yàngàꞌ gidigân Ma̱ꞌan Ñaꞌanj an,
ni̱ nadiganj si yàngàꞌ gaꞌhuiꞌ Ma̱ꞌan Ñaꞌanj an si-nùguànꞌanj riñan nej sachij gimân diû ri̱ki,
9 ni̱ gaꞌnaj riñan nej sí nàsìnùnj un ni̱ nagiꞌhiaj nìko nej sôꞌ Ma̱ꞌan rayiꞌî guendâ gananï̂n àko ruhuaj niꞌin nej sôꞌ,
dàj rûnꞌ nnunj riñan ñanj huê danj ni̱ gata:
Gànànï̀nj rayiꞌî rèꞌ siganï̂nj nej sí nàsìnùnj un,
ni̱ gàchrà chraꞌa ngà siyu̱gui Ma̱ꞌân rèꞌ.
10 Gata aꞌngô ñûn:
Ga̱na̱huin nìhiàꞌ ruhuâ nej suj nej sí nàsìnùnj un:
Ni̱ huê danj na̱nj ga̱na̱huin nìhiàꞌ ruhuâ yiñán Ma̱ꞌan Señor.
11 Gata aꞌngô ñûn:
Ga̱ꞌmi̱n hueꞌê daranꞌ nej suj nej sí nàsìnùnj un rayiꞌî Ma̱ꞌan Señor,
ni̱ huê danj na̱nj gaꞌmin hueꞌê daranꞌ nej yumanꞌan rayiꞌî Ma̱ꞌan Señor.
12 Gataj Isaías aꞌngô ñûn:
Riñan nej daꞌnin si̱ꞌnï̱n Isaí ga̱hui̱ Ma̱ꞌan sa gànàꞌhuìj nej sí nàsìnùnj un ni̱
gi̱nikaj sunj riñan nej sôꞌ.
13 Ni̱ Ma̱ꞌan Ñaꞌanj ànùꞌhuìj nêꞌ gi̱ꞌhiaj ga̱na̱huin nìhiàꞌ staꞌu ruhuâ nej suj ni̱ ga̱ dïnꞌïnj ruhuâ nej suj nga guyumân ruhuâ nej suj,
huê danj na̱nj ga̱ꞌhue gànàꞌhuìj nìko nej suj ngà sun ri̱ki̱ Ma̱ꞌan Ma̱ꞌan Espíritu Santo riñan nej suj.
14 Hua̱ yìtï̀nj ruhuâj niꞌín nej suj,
na̱nj di̱nï̂n ma̱ꞌanj,
dadinꞌ ûta nìchra hua ruhuâ nimân nej suj ngà nuguanꞌ gananï̂n àko ruhuâ niꞌin nej guiì,
huê danj na̱nj ûta nìko niꞌin nej suj si-nùguànꞌ Ma̱ꞌan Ñaꞌanj an,
ni̱ garânj daꞌngaꞌ ruhuâj si ga̱ꞌhue du̱gunïn gàꞌì nej suj ꞌngo̱ ni̱ aꞌngô nej duguiꞌ nej suj.
15 Sani̱ da̱ꞌa̱j da̱nï̱n ni̱ nitaj si guyuꞌhuí,
nga gachrûnj riñan nej suj man di̱nï̂n,
dadinꞌ giꞌhia si ga̱na̱nun ruhuâ nej suj,
dadinꞌ girikî Ma̱ꞌan Ñaꞌanj an si-su̱nu riñânj,
16 daꞌnga ni̱ gahuín sí gànàtàꞌ si-nùguànꞌ Ma̱ꞌan Jesucristo riñan nej sí nàsìnùnj un,
ni̱ gànàtàj nuguanꞌ gi̱ꞌhiaj ga̱na̱ni̱n nej guiì,
daꞌnga ni̱ ga̱huin nej sí nàsìnùnj un ꞌngo̱ ofrenda sa garanꞌ ruhuâ Ma̱ꞌan Ñaꞌanj an,
dadinꞌ Ma̱ꞌan Espíritu Santo huin sa na̱gi̱ꞌhia̱j gè nej sij.
17 Hua̱ ni̱ña̱n si ga̱huin nìhiàꞌ ruhuâj rayiꞌî si-sùnj dadinꞌ guruguñuꞌunj Ma̱ꞌan Cristo ñùnj ni̱ gaꞌmînj si-nùguànꞌ Ma̱ꞌan Ñaꞌanj an.
18 Dadinꞌ si̱ ga̱ꞌhuej ruhuâj ga̱ꞌmi̱n rayiꞌî nej sa nun gi̱ꞌhia,
dadinꞌ hua̱ ni̱ña̱n si gànàtàj rayiꞌî nej sa gaꞌhue giꞌhia dadinꞌ guruguñuꞌunj Ma̱ꞌan Cristo ñùnj ni̱ rayiꞌî dan ni̱ gaꞌhue gaꞌmînj riñan nej sí nàsìnùnj un ni̱ dagahuin nej sôꞌ,
ni̱ gi̱ꞌhiaj Ma̱ꞌan Ñaꞌanj an sa sàꞌaj ngà nej sôꞌ,
19 ni̱ ûta nùkuaj hua nej daꞌngaꞌa giꞌhia ni̱ gahuin ña̱ꞌanj ruhuôꞌ hua nej sa gahuin,
dadinꞌ si-Espíritu Ma̱ꞌan Ñaꞌanj an huin sa giꞌhiaj:
Ni̱ àsìj Jerusalén,
ni̱ nda ganahuij neꞌ rùkùj ni̱ nda riñan hioꞌó Ilirico,
ganahui gidigán si-nùguànꞌ Ma̱ꞌan Cristo nuguanꞌ gi̱ꞌhiaj ga̱na̱ni̱n nej guiì.
20 Huê dànanj giꞌhia,
ni̱ duguꞌnḯn gananï̂nj nuguanꞌ gi̱ꞌhiaj ga̱na̱ni̱n nej guiì,
sani̱ nun ga̱ꞌa̱nj gànàtàj si-nùguànꞌ Ma̱ꞌan Ñaꞌanj an riñan nej guiì gàꞌ gunïn rayiꞌî Ma̱ꞌan Cristo giꞌhiaj aꞌngô nej síi,
dadinꞌ nun ga̱ra̱nꞌ ruhuâj si ni̱nï̱n gi̱di̱gán riñan nej sôꞌ dadinꞌ gàꞌ ni̱ka̱j chre̱j nej sôꞌ ngà nuguanꞌ gahuin chru̱n nej sòꞌ giꞌhiaj aꞌngô nej síi,
21 dadinꞌ,
dàj rûnꞌ nnunj riñan ñanj:
Ni̱ riñan nej guiì nitaj àmàn ganataꞌ nej sij rayiꞌî Ma̱ꞌan,
ni̱ gu̱nïn nej guiì dânj rayiꞌî Ma̱ꞌan;
ni̱ nej guiì nitaj àmàn gunïn rayiꞌî Ma̱ꞌan,
ni ga̱ra̱n daꞌnga ruhuâ ninj rayiꞌij.
Ganï̂n ruhuâ Pablo ga̱ꞌa̱nj sôꞌ Roma
22 Huin ruhuâj gùchìj ñan màn nej suj sani̱ rayiꞌî nej nânj ni̱ naꞌhue gi̱yi̱ꞌnï̱n riñânj gùchìj ñan màn nej suj mánj.
23 Sani̱ hia̱j,
ni̱ gàꞌ ganûnj gaché ganatá si-nùguànꞌ Ma̱ꞌan Ñaꞌanj an riñan hioꞌó nânj,
ni̱ gàꞌ nâ huin ruhuâj gùchìj ñan màn nej suj,
24 sani̱ nga hua gàꞌàn Rukû Nnee ni̱ gùchìj ñan màn nej suj;
dadinꞌ huin ruhuâj gi̱ni̱ꞌín nej suj nga gùchìj ñan màn nej suj,
ni̱ ga̱na̱huin nìhiàꞌ nùguànꞌàn ruhuâ nêꞌ ni̱ neꞌ rùkù ni̱ ruhuâj si gi̱di̱gân nej suj dànèꞌ huaj chrej e gàꞌàn.
25 Dadinꞌ gàꞌàn Jerusalén guendâ ga̱ꞌa̱nj nàrë̀ꞌë̀ sanꞌanj an riñan nej sôꞌ nìkoꞌ rukû Ma̱ꞌan Jesús.
26 Dadinꞌ nej dinï̂nt nne riñan hioꞌó Macedonia ngà nej dinï̂nt nne riñan hioꞌó Acaya ganï̂n ruhuâ ga̱na̱chi nikaj ꞌngo̱ ofrenda ni̱ ruhuâ nej sôꞌ si gi̱nikâ gàꞌàn sanꞌanj dânj riñan nej dinï̂nt ranꞌ àko màn Jerusalén.
27 Dadinꞌ ganï̂n ruhuâ nej sôꞌ,
si daꞌhui nej sôꞌ riñan nej dinï̂nt judío màn hiuj dânj;
dadinꞌ gachîn nanìꞌhiaj nej judío riñan nej sôꞌ,
huê danj ni̱ hua̱ ni̱ña̱n si gu̱ru̱gûñuꞌunj nej sôꞌ ngà nej sa hua̱ riñan nej sôꞌ riñan nej dinï̂nt judío.
28 Huê danj ni̱,
nga guchí ñan màn nej sôꞌ,
ni̱ nga gisîj nagaꞌhuí ofrenda nìkà huâ riñan nej sôꞌ,
ni̱ gàchìnj ñan màn nej suj ni̱ gàꞌàn Rukû Nnee.
29 Ni̱ niꞌín si nga gùchìj ñan màn nej suj,
ni̱ nìkà ûta gàꞌì nuguanꞌ sàꞌaj ni̱ nuguanꞌ gi̱ꞌhiaj ga̱na̱huin nùkuaj ruhuâ nej suj ngà Ma̱ꞌan Cristo.
30 Ni̱ gachín nìꞌhia riñan nej suj di̱nï̂nj,
ngà siyu̱gui Ma̱ꞌan Jesucristo,
ni̱ ngà si-guesâ Ma̱ꞌan Espíritu Santo ni̱ gurugûñuꞌunj nej suj gàchìnj nìꞌhiaj nej suj rayiꞌí riñan Ma̱ꞌan Ñaꞌanj an,
31 gàchìnj nìꞌhiaj nej suj rayiꞌî si ga̱na̱ni̱nj riñan nej sí màn Judea nej sôꞌ nitaj si guyumân ruhuâ niꞌin Ma̱ꞌan Cristo,
ni̱ huê danj na̱nj ga̱ꞌhue̱j nej dinï̂nt màn Jerusalén ga̱na̱huin ràꞌa nej sôꞌ ofrenda nìkà huâ nàgàꞌhuìj raꞌa nej sôꞌ;
32 ni̱ nga gùchìj ñan màn nej suj ni̱ ga̱huin nìhiàꞌ ruhuâ daranꞌ nêꞌ ni̱ ga̱huin dïnꞌïnj ruhuâj ga̱ne do̱j siganï̂nj nej suj.
33 Ni̱ Ma̱ꞌan Ñaꞌanj an gi̱ꞌhiaj ga̱ dïnꞌïnj ruhuâ darûnꞌ.
Ni̱ huê danj huin rûꞌhuaj na̱nj ánj.