Si̱ gaꞌmin nej suj rayiꞌî nej guiì hua̱ ninaj doj ruhuâ sani̱ guyumân ruhuâ ninj niꞌin Ma̱ꞌan Jesús
14
Ga̱na̱huin ràꞌa nej suj nej sí hua̱ ninaj ruhuâ,
sani̱ si gaꞌhue gu̱nï̱nꞌ nej suj ngà nej sôꞌ rayiꞌî dàj hua nej nuguanꞌ guyumân ruhuâ nej sôꞌ.
2 Dadinꞌ ganï̂n ruhuôꞌ si ga̱ꞌhue yo̱ꞌ daranꞌanj;
sani̱ aꞌngô sí hua̱ ninaj ruhuâ,
ni̱ man kuej e ya sôꞌ.
3 Sí chru̱n ya daranꞌanj,
ni̱ si̱ gininj ꞌì sí nitaj si chru̱n ya daranꞌanj riñan sôꞌ,
ni̱ sí nitaj si chru̱n ya̱ daranꞌanj ni̱ si̱ ganakaj guendâ sôꞌ rayiꞌî sí chru̱n ya daranꞌanj mánj;
dadinꞌ gàꞌ ganahuin ràꞌa Ma̱ꞌan Ñaꞌanj an sôꞌ.
4 Ahuin sun nikajꞌ ni̱ ganakaj guendâꞌ dàj giꞌhiaj aꞌngô musû ânèj e ràꞌaj.
Guendâ si-yi̱ruꞌhue sij huin si hua̱ na̱nj gunânj gi̱tsi sij,
sani̱ si ganatûj sij ni̱ hua̱ na̱nj ganikïnꞌ ran sij,
dadinꞌ ûta nùkuaj Ma̱ꞌan Señor ni̱ huê Ma̱ꞌan gi̱ꞌhiaj ga̱ꞌhue ga̱nikïnꞌ ran sij.
5 Hua̱ sí gataj si hua̱ ꞌngo̱ gui huin gui gè doj;
ni̱ aꞌngô nej sij gataj si gu̱ña̱n chre huin daranꞌ nej gui.
Ga̱ yìtï̀nj ruhuâ daꞌ ꞌngo̱ nej suj dàj ganï̂n ruhuâ nej suj.
6 Sí ni̱ka̱j chre̱j ngà ꞌngo̱ gui ni̱ riñan Ma̱ꞌan Señor nikaj chre̱j sôꞌ,
ni sí nitaj si ni̱ka̱j chre̱j ngà ꞌngo̱ gui ni̱ riñan Ma̱ꞌan Señor nitaj si ni̱ka̱j chre̱j sôꞌ.
Ni̱ sí ya,
ni̱ guendâ Ma̱ꞌan Señor ya sôꞌ,
dadin gaꞌhuiꞌ sôꞌ si guruhuâ Ma̱ꞌan Ñaꞌanj an;
sí nitaj si ya ni̱ nitaj si ya sôꞌ guendâ Ma̱ꞌan Señor,
ni̱ gaꞌhuiꞌ sôꞌ si guruhuâ Ma̱ꞌan Ñaꞌanj an.
7 Dadinꞌ gàꞌ si ꞌngo̱ nêꞌ nitaj si nne guendâ muꞌûnꞌ,
ni̱ nitaj gàꞌ si ꞌngo̱ guiì gahuiꞌ guendâ ma̱ꞌan ninj mánj.
8 Ni̱ si hua̱ nìꞌnòꞌ,
ni̱ hua̱ nìꞌnòꞌ guendâ Ma̱ꞌan Señor;
ni̱ si gahuiꞌ,
ni̱ guendâ Ma̱ꞌan Señor gahuiꞌ.
Huê danj,
ni̱ si hua̱ nìꞌnòꞌ,
nej si gahuiꞌ,
ni̱ daꞌní Ma̱ꞌan Señor huînꞌ.
9 Dadinꞌ huê rayiꞌî nânj gahuiꞌ Ma̱ꞌan Cristo sani̱ ganaꞌnïn siganï̂nj nej nîman,
ni̱ nanꞌ ñunj yàtàꞌa,
ni̱ ginikaj sunj riñan nej nîman ngà riñan nej guiì nne nìꞌnàꞌ.
10 Sani̱ sòꞌ ni̱ nùnj huin saj ni̱ gaꞌminꞌ yiꞌî dinḯnt ràꞌaj.
Ni̱ sòꞌ.
Ni̱ nùnj huin saj ni̱ gataj si nitaj si niꞌñanj dinḯnt ràꞌaj.
Dadinꞌ hua̱ ni̱ña̱n si ga̱na̱nikïnꞌ darûnꞌ riñan Ma̱ꞌan Cristo.
11 Dadinꞌ huê danj nnunj riñan ñanj:
Ni̱ nné taj Ma̱ꞌan Señor,
ni̱ riñânj ganikïnꞌ rúdàkòj daranꞌ nej guiì,
ni̱ daranꞌ nej guiì gànàtàꞌ si-ga̱kïnꞌ ninj riñan Ma̱ꞌan Ñaꞌanj an.
12 Huê danj ni̱ daꞌ ꞌngo̱ nêꞌ nàgàꞌhuìꞌ guenda rayiꞌî si-ga̱kï̂nt riñan Ma̱ꞌan Ñaꞌanj an.
Si̱ giꞌhiâꞌ si gi̱ni̱nj dinï̂nt riñan gakï̱nꞌïn mánj
13 Huê danj ni̱ si̱ gaꞌminꞌ yiꞌî ꞌngo̱ ni̱ aꞌngô nej duguîꞌ gàꞌ mánj,
sa ga̱nï̱n ruhuôꞌ huin si si̱ giꞌhiôꞌ si gi̱ni̱na̱j ruhuâ aꞌngô nej dinḯnt.
14 Ni̱ niꞌín,
si Ma̱ꞌan Señor Jesús,
ni̱ gàꞌ nagiꞌhiaj sàꞌaj ꞌngo̱ nihia,
huê danj ni̱ gàꞌ si ꞌngo̱ nej sa yôꞌ ni̱ nitaj si kï̱j huaj;
sani̱ nej guiì ganï̂n ruhuâ si hua̱ da̱ꞌa̱j nej sa ya ninj huin sa kï̱j huaa ni̱ guendâ ninj ni̱ huê danj hua yàngaj.
15 Sani̱ si rayiꞌî nihia yâꞌ ni̱ giꞌhiâꞌ si gananï̂n ruhuâ dinḯnt,
ôꞌ ni̱ nitaj si ꞌì ruhuâꞌ niꞌînꞌ sôꞌ mánj.
Niꞌhiaj sòꞌ ni̱ si̱ giꞌhiâꞌ si ga̱ꞌa̱nj ni̱ꞌhia̱ dinḯnt rayiꞌî nihia yaꞌ dânj dadinꞌ gàꞌ gahuiꞌ Ma̱ꞌan Cristo rayiꞌî sôꞌ.
16 Ga̱ gudadû nej suj,
ni̱ si̱ giꞌhiaj nej suj si ga̱ꞌmi̱n aꞌnanꞌ nej guiì rayiꞌî nej sa sàꞌ giꞌhiaj nej suj mánj;
17 dadinꞌ nej daꞌní Ma̱ꞌan Ñaꞌanj an,
ni̱ nitaj si giriñun ruhuâ nej sij si gìrìꞌ nìko nej sij ya̱ nej sij nej si do̱j gìrìꞌ nej sij ya̱ nej sij ni̱ nitaj si giriñun ruhuâ nej sij si gìrìꞌ nìko nej sij go̱ꞌo̱ nej sij nej si do̱j gìrìꞌ nej sij go̱ꞌo̱ nej sij,
sa ña̱ꞌa̱n huin si giꞌhiaj nej sij sa ni̱ka̱a ni̱ ga̱ dïnꞌïnj ruhuâ nej sij,
ni̱ hua̱ nìhiàꞌ ruhuâ nej sij ngà Ma̱ꞌan Espíritu Santo.
18 Dadinꞌ sí giꞌhiaj dànanj ni̱ riñan Ma̱ꞌan Cristo gunânj gi̱tsî sôꞌ,
ni̱ garanꞌ ruhuâ Ma̱ꞌan Ñaꞌanj an sa giꞌhiaj sôꞌ,
ni̱ huê danj na̱nj garanꞌ ruhuâ nej guiì niꞌin ninj nej sa giꞌhiaj sôꞌ.
19 Huê danj ni̱,
du̱guꞌnïnꞌ gi̱ꞌhiôꞌ si ga̱ dïnꞌïnj ni̱ gu̱ru̱gûñuꞌunꞌ si ga̱na̱huin nùkuaj aꞌngô nej sij ngà si-nùguànꞌ Ma̱ꞌan Ñaꞌanj an.
20 Si̱ giꞌhiâꞌ si gi̱ni̱na̱j ruhuâ ꞌngo̱ duguît rayiꞌî nihia yâꞌ mánj;
yàngàꞌ ni̱ daranꞌ nej nihiaa ni̱ hua sàꞌ man,
ni̱ sa aꞌnanꞌan huin si yo̱ꞌ nihia gi̱ꞌhiaj ga̱ꞌa̱nj niꞌhia aꞌngô nej duguiꞌ.
21 Dùgùnàj huaj sisi̱ si̱ yôꞌ nneè,
ni̱ si̱ goꞌoꞌ nne berente,
ni̱ aꞌngô nej sa gi̱ꞌhiaj gi̱ni̱na̱j ruhuâ nej dinï̂nt,
nej si gi̱na̱ꞌan ruhuâ sôꞌ,
nej si gi̱ni̱chre ruhuâ sôꞌ.
22 Guyumân yìtï̀nj ruhuâꞌ nîꞌ.
Huê danj gùyùmàn yìtï̀nj ruhuâ sòꞌ niꞌînꞌ Ma̱ꞌan Ñaꞌanj an na̱nj ánj.
Ga̱na̱huin nìhiàꞌ ruhuâꞌ si niꞌînꞌ si sê gakï̱nꞌïn huin sa giꞌhiâꞌ dânj ni̱ si nitaj si gaꞌmin gakï̱nꞌ sa nu̱n ruhuâ nimânꞌ rayiꞌî sa giꞌhiâꞌ.
23 Sani̱ sí anï̂n chìꞌ ruhuâ rayiꞌî nihia ya̱ sôꞌ,
ni̱ ya sôꞌ ni̱ gakï̱nꞌïn huin sa giꞌhiaj sôꞌ guendâ ganï̂n huàꞌ ruhuâ sôꞌ,
dadinꞌ nitaj si hua̱ yìtï̀nj ruhuâ sôꞌ ngà sa ya sôꞌ mánj;
dadinꞌ daranꞌ sa ꞌhioꞌ nga nitaj si hua̱ yìtï̀nj ruhuôꞌ,
ni̱ gakï̱nꞌïn huin.