13
Da̱gahuin daranꞌ nej suj riñan nej sí aꞌnïnꞌ ni̱ka̱j suun,
dadinꞌ nitaj gàꞌ si ꞌngo̱ nej sôꞌ ganï̂n ma̱ꞌan ruhuâ gi̱nikaj sun mánj,
dadinꞌ daranꞌ nej sí ni̱ka̱j suun,
ni̱ Ma̱ꞌan Ñaꞌanj an ganachrûn su̱n nej sôꞌ.
2 Huê danj ni̱ si hua̱ ꞌngo̱ sí gunïnꞌ ngà nej sí ni̱ka̱j su̱n ganachrûn su̱n Ma̱ꞌan Ñaꞌanj an,
ni̱ unïnꞌ sôꞌ ngà Ma̱ꞌan Ñaꞌanj an;
ni̱ si nitaj si guyumân ruhuâ nej sôꞌ,
ni̱ ma̱ꞌan nej sôꞌ giꞌhiaj si gi̱ranꞌ sa̱ñu̱n nej sôꞌ.
3 Dadinꞌ sê si nne nej sí guesì guendâ du̱yuꞌhuiꞌ nej sôꞌ sí giꞌhiaj sa sàꞌaj mánj,
nne nej sôꞌ guendâ gi̱ꞌhiaj nej sôꞌ kastîgu nej sí giꞌhiaj sa yìꞌì.
Ruhuâꞌ si si̱ giꞌhiaj nej sí ni̱ka̱j suun kastîgu sôꞌ nîꞌ.
Gi̱ꞌhiaj sa sàꞌaj,
ni̱ ga̱ꞌmi̱n hueꞌê nej sij rayiꞌîꞌ na̱nj ánj;
4 dadinꞌ nne nej sij ni̱ gunânj gi̱tsi nej sij riñan Ma̱ꞌan Ñaꞌanj an.
Sani̱ si giꞌhiâꞌ sa yìꞌìi,
ni̱ gu̱yuꞌhuiꞌ râj;
dadinꞌ sê si̱ ni̱ka̱j sun chre nej sij mánj.
Dadinꞌ huin nej sij sí gunânj gi̱tsi riñan Ma̱ꞌan Ñaꞌanj an,
nne ni̱ña̱n nej sij guendâ gi̱ꞌhiaj nej sij kastîgu nej sí giꞌhiaj sa yìꞌìi.
5 Huê danj ni̱ ña̱ꞌa̱n huaj si dagahuînꞌ riñan nej sij,
sani̱ sê man guendâ gu̱yuꞌhuîꞌ ga̱na̱huin ràꞌaꞌ kastîgu mánj,
dadinꞌ garanꞌ ruhuâ daꞌngaꞌ gaꞌnḯn Ma̱ꞌan Ñaꞌanj an ruhuâ nimûnꞌ si gi̱nikaj chre̱ꞌ riñan nej sij.
6 Huê rayiꞌî dan ni̱ gutaꞌ nej suj sanꞌanj an ga̱na̱huin ràꞌa nej sij,
dadinꞌ huin nej sij sí gunânj gi̱tsi riñan Ma̱ꞌan Ñaꞌanj an,
ni̱ huê dan huin si-su̱n nej sij.
7 Na̱ru̱ꞌhue nej suj riñan daranꞌ nej guiì daꞌhui nej suj:
Ni̱ si daꞌhui nej suj sanꞌanj gataꞌa guendâ nej sí ni̱ka̱j suun ni̱ ga̱na̱ruꞌhue nej suj sanꞌanj dânj riñan nej sôꞌ,
ni̱ si gadaꞌhui nej suj sanꞌanj kuestu,
ni̱ ga̱na̱ruꞌhue nej suj sanꞌanj dânj riñan nej sôꞌ;
ni̱ si nun da̱gahuin nej suj riñan sí ni̱ka̱j su̱un ni̱ da̱gahuin nej suj riñan sôꞌ,
ni̱ si nun gi̱nikaj chre̱j nej suj riñan ꞌngo̱ síi ni̱ gi̱nikaj chre̱j nej suj riñan sôꞌ.
8 Ni̱ si̱ gadaꞌhui nej suj riñan gàꞌ si ꞌngo̱ guiì mánj,
ga̱ ꞌì ruhuâ nej suj niꞌin nej suj ꞌngo̱ ni̱ aꞌngô nej duguiꞌ nej suj;
dadinꞌ sí ꞌì ruhuâ niꞌin duguiꞌ,
ni̱ gàꞌ dagahuin sôꞌ si-ley Ma̱ꞌan Ñaꞌanj an.
9 Dadinꞌ huê danj taj riñan ley:
“Ni̱ si̱ ginikajꞌ nika duguît,
ni̱ si̱ dagahuîꞌ,
ni̱ si̱ giꞌhiaj tu̱ꞌ,
ni̱ si̱ gutaꞌ chreꞌ gakï̱nꞌïn nej duguît,
ni̱ si̱ ganï̂n gu̱ꞌma̱n ruhuâꞌ ngà si-ꞌhiaj nej duguît”;
ni̱ daranꞌ nej sun giyiꞌnïnꞌ su̱n riñan ñanj,
ni̱ ganahuin ꞌngo̱ rïn nuguanꞌ giyiꞌnïnꞌ su̱n giꞌhiaj Ma̱ꞌan Ñaꞌanj an:
“Ga̱ ꞌì ruhuâꞌ niꞌînꞌ nej duguît dàj rûnꞌ ꞌì ruhuâꞌ niꞌînꞌ ma̱ꞌânꞌ.”
10 Si ꞌì ruhuâꞌ niꞌînꞌ nej duguît ni̱ nitaj si giꞌhiâꞌ sa yìꞌìi ngà nej sôꞌ;
ni̱ si ꞌì ruhuâꞌ niꞌînꞌ nej duguît ni̱ gàꞌ dagahuînꞌ si-ley Ma̱ꞌan Ña̱ꞌanj an.
11 Ni̱ rayiꞌî nej nânj,
ni̱ gàꞌ niꞌin nej suj dàj hua diû nneꞌ;
ni̱ gàꞌ gisîj diû si ga̱na̱ri̱ nej suj nnej e riñan nej suj dadinꞌ hia̱j ni̱ gàꞌ gahuin nìchrùnꞌ doj gui gùyùmàn sa gi̱ꞌhiaj ga̱na̱ni̱nꞌ.
12 Ni̱ ûta gaché ñanꞌan ni̱ gàꞌ ꞌna̱ꞌ gìyìgï̀n.
Ni̱ si̱ giꞌhiôꞌ gakï̱nꞌïn,
ni̱ duguꞌnï̂nꞌ ga̱rrûnꞌ mu̱ꞌûnꞌ ngà si-nùguànꞌ Ma̱ꞌan Ñaꞌanj an dadinꞌ huej huin sa giꞌhiaj gìyìgï̀n ga̱che̱ꞌ.
13 Ga̱che̱ꞌ dàj rûnꞌ gaché nej guiì gaché neꞌ gui,
ni̱ sìkàꞌ ga̱che̱ꞌ;
ni̱ si̱ ya kï̱j staꞌuꞌ,
ni̱ si̱ ganahuij ruhuôꞌ ngà sun àyìnï̀ïn,
ni̱ si̱ gahuin staꞌu ruhuô ngôꞌ ngà aꞌngô siyànàa,
ni̱ si̱ gaꞌnḯn ñunꞌ riñan aꞌngô nej siyànàa,
ni̱ si̱ garrûnꞌ riñan nej duguiꞌ,
ni̱ si̱ gahuin yìkòj ruhuôꞌ,
14 Sa gi̱ꞌhiaj daꞌ ꞌngo̱ nej suj huin si dànanj du̱guꞌnïnꞌ nej suj gi̱ꞌhiaj nej suj dàj rûnꞌ giꞌhiaj Ma̱ꞌan Señor Jesús,
ni̱ si̱ giꞌhiaj nej suj sa garanꞌ ruhuâ nneè kú nej suj mánj.