Nàgàꞌhuìꞌ nej suj ma̱ꞌan nej suj riñan Ma̱ꞌan Ñaꞌanj an
12
Huê danj na̱nj di̱nï̂nj,
ni̱ gachín nìꞌhia riñan nej suj rayiꞌî guendâ gananï̂n àko ruhuâ Ma̱ꞌan Ñaꞌanj an ngà nêꞌ,
ni̱ nàgàꞌhuìꞌ nej suj ma̱ꞌan nej suj riñanj ni̱ ga̱huin nneè kú nej suj dàj rûnꞌ huin ꞌngo̱ yuku hua̱ nìꞌnàꞌ gaꞌhuiꞌ nej síi riñan Ma̱ꞌan Ñaꞌanj an,
ni̱ si̱ giꞌhiaj nej suj gakï̱nꞌïn riñanj,
ni̱ gi̱ꞌhiaj nej suj sa garanꞌ ruhuaj,
ni̱ huê danj ginùn ña̱ꞌa̱nj nej suj Ma̱ꞌan.
2 Si̱ giꞌhiaj nej suj dàj rûnꞌ ꞌhiaj nej sí màn ruhuâ yumiguì nânj,
na̱du̱na̱ nej suj sa gi̱ꞌhiaj nej suj dàj huin chru̱n nej suj ni̱ dàj garânj daꞌnga ruhuâ nej suj,
daꞌnga ni̱ gi̱ni̱ꞌin nej suj ahuin sa garanꞌ ruhuâ Ma̱ꞌan Ñaꞌanj an,
ni̱ dàj hua sa ûta garanꞌ ruhuaj ni̱ dàj garanꞌ ruhuaj ga̱ ni̱ka̱ nej guiì.
3 Huê danj ni̱ gatâ,
riñan daꞌ ꞌngo̱ nej suj,
dadinꞌ ganahuin raꞌá sunuj u giꞌhiaj Ma̱ꞌan Ñaꞌanj an,
ni̱ si̱ ganï̂n ruhuâ nej suj si aꞌnïnꞌ nej suj doj riñan aꞌngô nej duguiꞌ nej suj dadinꞌ gu̱ña̱n huin nej suj,
sìkàꞌ ga̱nï̱n ruhuâ nej suj rayiꞌî nej ma̱ꞌan nej suj,
dàj nìko ma̱ꞌan guyumân ruhuâ daꞌ ꞌngo̱ nej suj giꞌhiaj Ma̱ꞌan Ñaꞌanj an.
4 Dadinꞌ ꞌngo̱ rïn nneè kú nêꞌ hua sani̱ gàꞌì yiꞌnïnꞌïn nika,
sani̱ sê gu̱ña̱n hua si-su̱n daꞌ goꞌngo̱ nej yiꞌnïnꞌ dânj mánj,
5 huê danj na̱nj huaj siganï̂nj nêꞌ,
ni̱ hua̱ ûta gàꞌì rûnꞌ,
sani̱ ꞌngo̱ rïn nneè kú Ma̱ꞌan Cristo huin nêꞌ,
ni̱ sun giꞌhiaj ꞌngo̱ꞌ ni̱ niꞌñan riñan aꞌngôꞌ.
6 Huê danj ni̱ hua̱ gàꞌì suun rikî Ma̱ꞌan Ñaꞌanj an riñan nêꞌ,
ni̱ dàj na̱nj hua ma̱ꞌan sun dânj,
ni̱ si hua̱ ꞌngo̱ nej suj ganahuin ràꞌa sun gànàtàꞌ dàj ga̱huin,
ni̱ ga̱ra̱n sun nej suj dàj nìko ma̱ꞌan guyumân ruhuâ nej suj;
7 ni̱ si rikî Ma̱ꞌan Ñaꞌanj an suun riñan nej suj guendâ gu̱na̱nj gi̱tsi nej suj riñan aꞌngô nej guiì,
ni̱ ga̱ nìhiàꞌ ruhuâ nej suj ni̱ gu̱na̱nj gi̱tsi nej suj riñan ninj;
ni̱ si rikî Ma̱ꞌan Ñaꞌanj an suun riñan nej suj guendâ gi̱di̱gân nej suj si-nùguànꞌ Ma̱ꞌan Ñaꞌanj an ni̱ ga̱ nìhiàꞌ ruhuâ nej suj ni̱ gi̱di̱gân nej suj.
8 Ni̱ si rikî Ma̱ꞌan Ñaꞌanj an suun riñan nej suj guendâ na̱gi̱ꞌhiaj yìtï̀nj nej suj ruhuâ nej guiì,
ni̱ du̱guꞌnïnꞌ nej suj na̱gi̱ꞌhiaj yìtï̀nj nej suj ruhuâ nej guiì;
ni̱ si ganï̂n Ma̱ꞌan Ñaꞌanj an ganikïnꞌ nej suj guendâ ga̱daꞌngaꞌ nej suj rasu̱un,
ni̱ hueꞌê gadaꞌngaꞌ nej suj rasu̱un;
ni̱ si ganï̂n Ma̱ꞌan Ñaꞌanj an si gi̱nikaj ñuꞌunj nej suj,
ni̱ hueꞌê gi̱ni̱kaj ñuꞌunj nej suj ni̱ ga̱ nìhiàꞌ ruhuâ nej suj,
ni̱ si guruguñuꞌunj nej suj aꞌngô nej guiì ni̱ ga̱ nìhiàꞌ ruhuâ nej suj nga sun giꞌhiaj nej suj.
Sa daꞌhui nej guiì nìkòꞌ rukû Ma̱ꞌan Jesús gi̱ꞌhiaj ninj
9 Ga̱ ꞌì yàngàꞌ ruhuâ nej suj niꞌin nej suj nej duguiꞌ nej suj.
Ni̱ gu̱du̱nâj nej suj chrej aꞌnanꞌan,
ni̱ du̱guꞌnïnꞌ nej suj guendâ gi̱ꞌhiaj nej suj sa sàꞌaj.
10 Ga̱ ꞌì ruhuâ nej suj niꞌin nej suj ꞌngo̱ ni̱ aꞌngô nej duguiꞌ nej suj ni̱ ga̱ ꞌì ruhuâ nej suj ni̱ ga̱ gu̱ña̱n ruhuâ nej suj;
ni̱ gi̱nikaj chre̱j nej suj ngà nej dinḯn nej suj,
ni̱ gàꞌ si̱nï̱n ga̱ta̱j niꞌñanj nej suj nej dinḯn nej suj.
11 Hio ga̱ nej suj,
ni̱ si̱ ga rùmìn nej suj;
gi̱nun ña̱ꞌa̱n ruhuâ nanè nimân nej suj,
ni̱ gu̱na̱nj gi̱tsi nej suj riñan Ma̱ꞌan Señor.
12 Ga̱ nìhiàꞌ ruhuâ nej suj ni̱ gànàꞌhuìj nej suj Ma̱ꞌan Jesús;
ni̱ si giranꞌ sa̱ñu̱n nej suj ni̱ ga̱ nùkuaj ruhuâ nej suj;
ni̱ si̱ gudunâj nej suj guendâ ga̱ꞌmi̱n nej suj ngà Ma̱ꞌan Ñaꞌanj an mánj.
13 Gàꞌhuìꞌ nej suj sa ga̱chin riñan nej dinï̂nt;
ni̱ gàꞌhuìꞌ nej suj dukuâ nej suj gùnàj nej dinï̂nt ꞌna̱ꞌ aꞌngô yumanꞌ snàꞌànj an.
14 Ga̱ꞌmi̱n hueꞌê nej suj rayiꞌî nej guiì gata rùhuà nej suj;
ni̱ ga̱ꞌmi̱n hueꞌê nej suj riñan ninj,
ni̱ si̱ gaꞌmin kï̱j nej suj riñan ninj mánj.
15 Ga̱na̱huin nìhiàꞌ ruhuâ nej suj ngà nej guiì hua̱ nìhiàꞌ ruhuâ;
ni̱ gu̱du̱gue̱ꞌe nej suj ngà nej guiì gudugueꞌe.
16 Ga̱ gu̱ña̱n ruhuâ nej suj ngà nej dinï̂nt;
ni̱ si̱ ganï̂n ruhuâ nej suj si ûta huin nej suj doj,
ni̱ ga̱na̱ka̱j duguiꞌ nej suj ngà nej sí nu̱n ñan niꞌin Ma̱ꞌan Ñaꞌanj an.
Ni̱ si̱ ganï̂n ruhuâ nej suj si ûta niꞌin nej suj doj gàꞌ daꞌ aꞌngôꞌ nej duguiꞌ nej suj.
17 Si hua̱ ꞌngo̱ sí giꞌhiaj sa yìꞌìi ngà nej suj ni̱ si̱ gananikàj nej suj gi̱ꞌhiaj nej suj sa yìꞌìi ngà sôꞌ;
du̱guꞌnïnꞌ nej suj gi̱ꞌhiaj nej suj sa sàꞌaj ngà daranꞌ nej guiì.
18 Gi̱ꞌhiaj guesâ nej suj nda andaꞌ gùnùkuaj nej suj ga̱ꞌhue,
si ga̱ dïnꞌïnj gimàn nej suj ngà daranꞌ nej guiì.
19 ꞌÌ ruhuâj niꞌín nej suj ni̱ rayiꞌî dan ni̱ gatâ nuguanꞌ nan gu̱nïn nej suj di̱nï̂nj,
ni̱ si hua̱ ꞌngo̱ sí garanꞌ ñuꞌunj nej suj ni̱ si̱ garanꞌ ñuꞌunj nej suj sôꞌ,
gu̱du̱nâj nej suj si gi̱ꞌhiaj Ma̱ꞌan Ñaꞌanj an kastîgu ngà nej sôꞌ;
dadinꞌ huê danj nnunj riñan ñanj si-nùguànꞌ Ma̱ꞌan Ñaꞌanj an:
Ñùnj huin sa nànìkàj gi̱ꞌhiaj kastîgu ngà nej sij.
“Ni̱ na̱ru̱ꞌhuej dàj na̱nj hua ma̱ꞌan sa gi̱ꞌhiaj daꞌ ꞌngo̱ nej sij,
gataj Ma̱ꞌan Señor.”
20 Huê danj taj riñan ñanj:
“Ni̱ si giniꞌînꞌ ganachinj yiꞌnaa riki sí gunïnꞌ ngàꞌ,
ni̱ gàꞌhuìꞌ ya̱ sij;
ni̱ si giniꞌînꞌ si ganakô sij nnee,
ni̱ gàꞌhuìꞌ nnee go̱ꞌo̱ sij;
ni̱ si dànanj gi̱ꞌhiáꞌ ngà sij,
ni̱ ga̱na̱ka̱j sij sinàꞌàj a sij.”
21 Niꞌhiaj ni̱ si̱ gi̱ꞌhiaj ga̱nan sa yìꞌìi sòꞌ mánj,
gi̱ꞌhiaj sa sàꞌaj ni̱ gi̱ꞌhiaj ga̱nânꞌ riñan sa yìꞌì na̱nj ánj.