Nej Israelita gàꞌ gananin
11
Hiôꞌ ni̱:
Gudunâj Ma̱ꞌan Ñaꞌanj an yiñan nga na̱nj nîꞌ.
Sê danj huin mánj.
Dadinꞌ dàj rûnꞌ ñùnj ni̱ sí Israelita huín,
ni̱ riñan dan sachij Abraham gaꞌná,
ni̱ gahui riki yiꞌnïnꞌ Benjamín.
2 Nun gudunâj Ma̱ꞌan Ñaꞌanj an yiñan mánj,
dadinꞌ gàꞌ si̱nï̱n yumanꞌ dânj gakïn.
Ni̱ nun niꞌin nej suj dàj taj riñan si-nùguànꞌ Ma̱ꞌan Ñaꞌanj an rayiꞌî Elías ràꞌ saj ûnꞌ.
Dàj garânj ruhuâ sôꞌ rayiꞌî nej Israelita riñan Ma̱ꞌan Ñaꞌanj an,
ni̱ gataj sôꞌ:
3 “Señor,
dagahuiꞌ nej sij nej si-profeta Ma̱ꞌan rèꞌ,
ni̱ duguane nej sij si-nâ Ma̱ꞌan rèꞌ nna hiëj;
ni̱ ꞌngo̱ rḯn gunâj ni̱ ûta ganahuij ruhuâ nej sij da̱gahuiꞌ nej sij ñùnj.”
4 Sani̱ nanikàj Ma̱ꞌan Ñaꞌanj an ni̱ gata gu̱nïn sij.
“Gàꞌ gudunâ chi̱j mîn nej sí Israelita nun ga̱nikïnꞌ rúdàkòj riñan Baal.”
5 Huê gè danj hua diû nânj ni̱ gunâj ꞌngo̱ yiꞌnïnꞌ nej sí gàꞌ ganagui Ma̱ꞌan Ñaꞌanj an ni̱ gi̱ꞌhiaj su̱nu ngà nej sôꞌ.
6 Ni̱ rayiꞌî su̱nu̱j u gi̱ꞌhiaj Ma̱ꞌan Ñaꞌanj an ni̱ ga̱na̱ni̱nꞌ,
ni̱ sê rayiꞌî nej sun giꞌhiôꞌ huin sa gi̱ꞌhiaj gananinꞌ mánj;
hiôꞌ ni̱ si nej sun giꞌhiôꞌ huin sa giꞌhiaj ga̱na̱ni̱nꞌ,
hiôꞌ ni̱ nitaj gue̱nda̱ niꞌñanj sunuj giꞌhiaj su̱nu̱j Ma̱ꞌan Ñaꞌanj an ngo̱ꞌ gàꞌ mánj.
7 Hiôꞌ ràꞌaj.
Ni̱ nun gìrìꞌ nej Israelita nej sa nanaꞌhuiꞌ nej sôꞌ mínj,
sani̱ nej Israelita dagahuin ni̱ ganagui Ma̱ꞌan Ñaꞌanj an nej sôꞌ ni̱ giriꞌ nìꞌhiaj nej sôꞌ ni̱ gahuin nej sôꞌ yiñán Ma̱ꞌan Ñaꞌanj an,
sani̱ ganahuin tsì ruhuâ nimân aꞌngô da̱ꞌa̱j nej Israelita;
8 dàj rûnꞌ taj riñan ñanj:
“Ni̱ gaꞌhuiꞌ Ma̱ꞌan Ñaꞌanj an espíritu gi̱ꞌhiaj sisi̱ si̱ garânj daꞌngaꞌ ruhuâ nej sij,
hua̱ rune ñan nej sij sani̱ naꞌhue gìyìgï̀n gi̱ni̱ꞌhiaj nej sij,
tàj hiuꞌuj u ruhuâ rakïj nej sij sani̱ naꞌhue gu̱nïn nej sij,
ni̱ huê danj giꞌhiaj nej sij nda gui hia̱j.”
9 Ni̱ huê danj gataj David:
Ni̱ ñan huin giꞌñanj màn nej sij yâ nej sij ni̱ gi̱ni̱nj yinu̱u ngà nnanj,
ni̱ ge̱ꞌë̱j dakó nej sij ni̱ giranꞌ sa̱ñu̱n nej sij;
10 Ni̱ ga̱huin du̱chri nej sij hiôꞌ ni̱ si̱ giyigï̀n gi̱niꞌhiaj nej sij,
ni̱ gi̱ranꞌ sa̱ñu̱n nìgànj nej sij.
Giꞌhiaj Ma̱ꞌan Ñaꞌanj an si ga̱na̱ni̱n nej sí nàsìnùnj un
11 Hiôꞌ ni̱ gàtà:
Ni̱ guendâ ganatûj nej Israelita ni̱ rayiꞌî dan ni̱ gàꞌ ꞌngo̱ si̱ ga̱ꞌhue ga̱na̱chi nej sij mínj.
Sê dan huin mánj;
sani̱ rayiꞌî guendâ nun ga̱ꞌhue̱j nej sij da̱gahuin nej sij ni̱ giꞌhiaj Ma̱ꞌan Ñaꞌanj an si ga̱ꞌhue ga̱na̱ni̱n nej sí nàsìnùnj un,
huê danj ni̱ giꞌhiaj Ma̱ꞌan Ñaꞌanj an si ga̱huin yìkòj ruhuâ nej sij niꞌin nej sij nej sôꞌ.
12 Ni̱ guendâ nun ga̱ꞌhue̱j nej sij da̱gahuin nej sij,
ni̱ gaꞌhue giniꞌin nej guiì màn nï̀nꞌ gàchràꞌ ruhuâ yumiguìi si-nùguànꞌ Ma̱ꞌan Ñaꞌanj an,
ni̱ sê dànanj ga̱ꞌhue ga̱ra̱n sun Ma̱ꞌan Ñaꞌanj an nej sij ni̱ gunïn ûta gàꞌì nej guiì nàsìnùnj un si-nùguànꞌanj gi̱ꞌhiaj nej sij nga na̱gi̱ꞌhiaj sàꞌ ñûn Ma̱ꞌan Ñaꞌanj an nej sij mínj.
13 Sani̱ gaꞌmînj riñan nej suj nej sí nàsìnùnj dânj.
Dadinꞌ ñùnj huin sí gidigân si̱nï̱n riñan nej suj,
ni̱ ûta nikaj chre̱ ngà sun ganahuin raꞌá,
14 Sani̱ giꞌhia dànanj dadinꞌ garanꞌ ruhuâj si ga̱huin yìkòj ruhuâ nej sí ni̱ka̱j tún niꞌin nej sôꞌ nej suj,
ni̱ ga̱ꞌhue ga̱na̱ni̱n nùnj huin si do̱j nej sôꞌ.
15 Ni̱ si guendâ guxun Ma̱ꞌan Ñaꞌanj an nej sij riñanj ni̱ gaꞌhue ganaꞌmin nej guiì nàsìnùnj màn ruhuâ yumiguìi ngà Ma̱ꞌan.
Ni̱ dàj ga̱huin nga ga̱na̱huin ràꞌa ñûn Ma̱ꞌan Ñaꞌanj an nej sij ràꞌaj.
Dàñùn ganaꞌnïn ñûn nej sij siganï̂nj nej guiì gàꞌ gahuiꞌi gi̱ꞌhiaj Ma̱ꞌan Ñaꞌanj an.
16 Ni̱ si sa gèe huin rachrún si̱nï̱n gaꞌhuiꞌ nej sij riñan Ma̱ꞌan Ñaꞌanj an,
ni̱ huê sa gèe huin kïnj arina gunâj dânj nej na̱nj ánj;
ni̱ si sa gèe huin hiaꞌa ꞌngo̱ chrun ni̱ huê sa gèe huin raꞌa chrun dânj.
17 Ni̱ si gaꞌnêj Ma̱ꞌan Ñaꞌanj an da̱ꞌa̱j nej Israelita gahuin raꞌa chrun dânj,
ni̱ gidaꞌa sòꞌ huin chrun olibo kï̱j ï ni̱ gunutaj sòꞌ raa̱ chrun olibo sàꞌa,
ni̱ giriꞌ nìꞌhiâꞌ gahuin nùkuâꞌ giꞌhiaj hiaꞌa chrun olibo sàꞌ dânj ni̱ giriꞌ nne chrun dânj rayiꞌî dan gaꞌhue hua nìꞌnàꞌ,
18 ni̱ si̱ gatajꞌ si ûta huînꞌ doj gàꞌ daꞌ nej Israelita mánj;
niꞌhiajꞌ dadinꞌ sêꞌ ganahuin ràꞌa si̱nï̱n si-nùguànꞌ Ma̱ꞌan Ñaꞌanj an ni̱ gaꞌhuiꞌ riñan nej sij mánj,
gi̱nun ruhuâꞌ si gàꞌ si̱nï̱n riñan nej sij guyumanj ni̱ nda neꞌ rùkù guyumanj riñanꞌ na̱nj ánj.
19 Ga̱ꞌhue ga̱ta̱jꞌ:
“Gu̱nïn raꞌa chrun dânj,
ga̱ꞌne̱ nej sij sòꞌ ni̱ ga̱na̱chru̱n nej sij ñùnj riñanꞌ na̱nj ánj.”
20 Yàngàꞌ ni̱ rayiꞌî guendâ nun gùyùmàn ruhuâ nej sij ni̱ gaꞌnêj Ma̱ꞌan Ñaꞌanj an nej sij riñan chrun olibo sàꞌa,
sani̱ sòꞌ ni̱ man rayiꞌî guendâ guyumân ruhuâꞌ ni̱ dugumînꞌ si-nùguànꞌ Ma̱ꞌan Ñaꞌanj an ni̱ ni̱kï̱nꞌ ranꞌ.
Sani̱ si̱ ga nne staꞌuꞌ mánj,
gi̱nun yuꞌhuiꞌ ruhuâ niꞌînꞌ Ma̱ꞌan Ñaꞌanj an ni̱ da̱gahuînꞌ riñanj na̱nj ánj.
21 Dadinꞌ si nun gi̱nikaj Ma̱ꞌan Ñaꞌanj an nimân nìko rayiꞌî nej sí Israelita,
ni̱ huê danj na̱nj si̱ ginika nimân nìko rayiꞌîꞌ mánj.
22 Gi̱niꞌhiaj sòꞌ,
dadinꞌ Ma̱ꞌan Ñaꞌanj an ni̱ ûta sàꞌaj,
sani̱ huê danj na̱nj chrunj ga̱ꞌman ruhuaj niꞌin nej guiì giꞌhiaj gakï̱nꞌïn riñanj,
sani̱ chrunj ga̱na̱nï̱n àko ruhuaj niꞌin sòꞌ,
si gananï̂n àko ruhuâꞌ niꞌînꞌ aꞌngô nej guiì;
ni̱ si nitaj si giꞌhiâꞌ dànanj ni̱ huê danj na̱nj gi̱ꞌhiaj ane sòꞌ riñanj na̱nj ánj.
23 Ni̱ huê danj ga̱ꞌhue gi̱ꞌhiaj Ma̱ꞌan Ñaꞌanj an ngà nej sôꞌ,
ni̱ si gùyùmàn ruhuâ nej sôꞌ,
ni̱ ga̱ꞌhue gùnùtàꞌ ñûn Ma̱ꞌan Ñaꞌanj an nej sôꞌ raa̱ chrun olibo sàꞌaj,
dadinꞌ ûta nùkuaj Ma̱ꞌan Ñaꞌanj an ni̱ ga̱ꞌhue gùnùtàꞌ ñunj raa̱ chrun olibo sàꞌ dânj nej sôꞌ.
24 Dadinꞌ si gaꞌneꞌ Ma̱ꞌan Ñaꞌanj an sòꞌ raa̱ chrun olibo kï̱j ï,
ni̱ nitaj si giri daꞌngaj si gànàtàꞌ raa̱ chrun olibo sàꞌa sani̱ gunutaj sòꞌ raa̱ chrun olibo sàꞌa,
huê danj na̱nj ga̱ꞌhue ga̱ꞌne sòꞌ ni̱ gùnùtàꞌ ñunj raa̱ chrun olibo sàꞌ dânj nej sij,
dadinꞌ huê gè raa̱ chrun olibo sàꞌ dânj gàꞌ gitá nej sij,
ni̱ si̱ gaꞌhue gùnùtàꞌ ñûnj nej sij raa̱ chrun olibo sàꞌ dan ràꞌ saj ûnꞌ.
Nda diû ganahuij yumiguìi ni̱ ga̱na̱ni̱n nej Israelita
25 Dadinꞌ nun ga̱ra̱nꞌ ruhuâj,
sisi̱ si̱ giniꞌin nej suj rayiꞌî nuguanꞌ hua̱ huì nânj,
man di̱nï̂nj,
daꞌnga ni̱ si̱ ganï̂n ruhuâ nej suj si ûta huin nej suj doj gàꞌ mánj:
Dadinꞌ ganahuin tsì ruhuâ nimân da̱ꞌa̱j nej guiì Israelita,
daꞌnga ni̱ giniꞌin ûta gàꞌì nej sí nàsìnùnj un si-nùguànꞌ Ma̱ꞌan Ñaꞌanj an;
26 huê danj ni̱ nda râꞌñanj chre ni̱ gi̱ꞌhiaj Ma̱ꞌan Ñaꞌanj an si ga̱na̱ni̱n daranꞌ nej guiì màn Israel,
dàj rûnꞌ nnunj riñan ñanj:
Ni̱ ruhuâ yumanꞌ snàꞌànj Jerusalén gaꞌnaꞌ Ma̱ꞌan sa du̱nanin nej guiì,
ni̱ ga̱ꞌne si-ga̱kïnt nej guiì Israelita.
27 Ni̱ nânj ga̱huin ꞌngo̱ duꞌhua gùchìj ngà nej sij,
nga ga̱ꞌne si-ga̱kïnt nej sij.
28 Huê danj ni̱ rayiꞌî nuguanꞌ giꞌhiaj ga̱na̱ni̱n nej guiì,
ni̱ huin nej judío sí gunïnꞌ ngà Ma̱ꞌan Ñaꞌanj an,
daꞌnga ni̱ gaꞌhue ga̱na̱huin ràꞌa nej suj si-nùguànꞌ Ma̱ꞌan Ñaꞌanj an;
sani̱ hua̱ na̱nj huin nej sij sí ganagui Ma̱ꞌan Ñaꞌanj an,
ni̱ ꞌì ruhuâ Ma̱ꞌan Ñaꞌanj an niꞌin nej sij dadinꞌ gàꞌ ganaguij rej nej sij.
29 Dadinꞌ nga gaꞌhuiꞌ chre Ma̱ꞌan Ñaꞌanj an ꞌngo̱ sunuj u riñan nej guiì ni̱ nitaj si ganachinꞌ ñunj sunuj gaꞌhuij dânj gàꞌ mánj,
ni̱ gàꞌ danj ni̱ nitaj si giniꞌñunj guendâ ga̱na̱kïn nej guiì dânj mánj.
30 Dadinꞌ huê danj giꞌhiaj nej suj aꞌngô diû ni̱ nun ga̱ꞌhue da̱gahuin nej suj riñan Ma̱ꞌan Ñaꞌanj an,
sani̱ hia̱j ni̱ giriꞌ nìꞌhiaj nej suj ni̱ guruguñuꞌunj Ma̱ꞌan Ñaꞌanj an nej suj,
rayiꞌî guendâ nun da̱gahuin nej sôꞌ riñan Ma̱ꞌan,
31 hia̱j ni̱ huê danj na̱nj naꞌhuej nej sôꞌ da̱gahuin nej sôꞌ,
ni̱ huê dàj rûnꞌ giꞌhiaj Ma̱ꞌan Ñaꞌanj an nga gananï̂n àko ruhuaj niꞌin nej suj,
ni̱ huê danj na̱nj giriꞌ nìꞌhiaj nej sij ni̱ gananï̂n àko ruhuâ Maꞌan niꞌin nej sij.
32 Dadinꞌ giꞌhiaj Ma̱ꞌan Ñaꞌanj an si dagahuin daranꞌ nej guiì riñanj,
daꞌnga ni̱ ga̱ꞌhue gu̱ru̱gûñuꞌun daranꞌ ninj.
33 Ûta nìko ni̱ gùnùn nï̀nꞌ ruhuâ niꞌin Ma̱ꞌan Ñaꞌanj an ni̱ chru̱n nï̀nꞌ ruhuaj.
Ni̱ ꞌnïnj huì nï̀nꞌ ruhuâ sa niꞌin,
ni̱ hua huì nï̀nꞌ ruhuâ si-chrej Ma̱ꞌan Ñaꞌanj an ni̱ gàꞌ si ꞌngo̱ nej guiì si̱ gaꞌhue ga̱ra̱n daꞌngaꞌ ruhuâ daranꞌ sa niꞌin Ma̱ꞌan Ñaꞌanj an mánj.
34 Dadinꞌ “ahuin sí niꞌin dàj hua sa ganï̂n ruhuâ Ma̱ꞌan Señor ràꞌaj.
Ni̱ ahuin sí nagaꞌhuiꞌ chrej e riñan Ma̱ꞌan Señor ràꞌaj.
35 Ahuin sí gàꞌ gaꞌhuiꞌ si̱nï̱n ꞌngo̱ rasu̱un raꞌa Ma̱ꞌan Señor,
hiôꞌ ni̱ neꞌ rùkù ni̱ nagaꞌhuij aꞌngô rasu̱un ràꞌa sôꞌ ràꞌaj.”
36 Dadinꞌ daranꞌ nej rasu̱n màn guruguiꞌ giniꞌhiôꞌ ni̱ Ma̱ꞌan Ñaꞌanj an huin sa giꞌhiaj,
ni̱ guendaj huin daranꞌ nej rasu̱n dânj.
Ni̱ rayiꞌî dan ni̱ ga̱ꞌmi̱n sàꞌ nêꞌ rayiꞌij daranꞌ nej diû.
Ni̱ huê dan huin rûꞌhuaj.