10
Di̱nï̂nj,
sa garanꞌ ruhuâ nimânj huin,
ni̱ gachín nìꞌhia riñan Ma̱ꞌan Ñaꞌanj an si gi̱ꞌhia ga̱na̱ni̱n nej Israelita.
2 Dadinꞌ ganatá rayiꞌî nej sij riñan nej suj ni̱ ûta ganahuij yàngàꞌ ruhuâ nej sij ni̱ dunaꞌhuej nej sij rayiꞌî Ma̱ꞌan Ñaꞌanj an,
sani̱ naꞌhue ga̱ra̱n daꞌnga ruhuâ nej sij dàj da̱gahuin hueꞌê nej sij riñanj mánj.
3 Dadinꞌ naꞌhue ga̱ya̱ka̱j guendâ nej sij si Ma̱ꞌan Ñaꞌanj an huin sa gi̱ꞌhiaj ga̱na̱huin ni̱ka̱ nej sij,
ni̱ ganï̂n ruhuâ nej sij si ngà sa giꞌhiaj nej sij ni̱ huin nej sij sí giꞌhiaj sa ni̱ka̱a,
huê danj ni̱ nun gi̱ꞌhiaj nej sij sa ni̱ka̱ garanꞌ ruhuâ Ma̱ꞌan Ñaꞌanj an gi̱ꞌhiaj nej sij mánj;
4 dadinꞌ nda ñan guyumân ley huin ngà Ma̱ꞌan Cristo,
ni̱ daranꞌ nej guiì guyumân ruhuâ niꞌin Ma̱ꞌan Cristo ni̱ ga̱ꞌhue gi̱ꞌhiaj ninj sa ni̱ka̱a.
5 Dadinꞌ rayiꞌî sa ni̱ka̱ gidigân ley ni̱ dànanj gachrun Moisés:
“Guiì dagahuin dàj rûnꞌ taj ley,
ni̱ ga̱ nìꞌnàꞌ ninj si dagahuin ninj sa taj ley.”
6 Sani̱ sa ni̱ka̱ gi̱ꞌhiôꞌ nga guyumân ruhuôꞌ taj dànanj:
“Si̱ gatajꞌ ngà ruhuâ nimânt:
Ahuin sí ga̱hui̱ ga̱ꞌa̱nj yàtàꞌa ràꞌaj.
—Ni̱ nânj ruhuâj ga̱ta,
si na̱du̱ninj nìkàꞌa ga̱ꞌna̱ꞌ Ma̱ꞌan Cristo —,
7 Ahuin,
sí ga̱ꞌhue gi̱ni̱nj ga̱ꞌa̱nj riki hioꞌóo ràꞌaj.”
(Nânj ruhuaj ga̱ta,
si gi̱ꞌhiôꞌ si gànàsìj Ma̱ꞌan Cristo siganï̂nj nej nîman).
8 Sani̱ dàj taj riñan ñanj si-nùguànꞌ Ma̱ꞌan Ñaꞌanj an ràꞌaj.
“Nìchrùnꞌ riñanꞌ hua si-nùguànꞌ Ma̱ꞌan Ñaꞌanj an,
ni̱ manj ruhuâ duꞌhuât ni̱ manj ruhuâ nimânt.”
Nânj huin nuguanꞌ guyumân ruhuâ nej ñûnj ni̱ rayiꞌî dan ganataꞌ nej ñûnj riñan nej suj:
9 Ni̱ si gànàtàꞌ ngà duꞌhuât si Jesús huin Ma̱ꞌan Señor,
ni̱ si gùyùmàn ruhuâꞌ ngà ruhuâ nimânt si Ma̱ꞌan Ñaꞌanj an ganachi nikaj Ma̱ꞌan Jesús siganï̂nj nej nîman,
hiôꞌ ni̱ ga̱na̱ni̱nꞌ.
10 Dadinꞌ ngà ruhuâ nimûnt guyumân ruhuôꞌ guendâ gi̱ꞌhiôꞌ sa ni̱ka̱a,
sani̱ ngà duꞌhuôꞌ ganatôꞌ si Ma̱ꞌan Jesús huin Ma̱ꞌan Señor ni̱ ga̱na̱ni̱nꞌ.
11 Dadinꞌ huê danj taj riñan ñanj si-nùguànꞌ Ma̱ꞌan Ñaꞌanj an:
“Ni̱ daranꞌ nej guiì guyumân ruhuâ niꞌin Ma̱ꞌan Jesús,
ni̱ si̱ dunânj ñuꞌun ninj mánj.”
12 Ni̱ nitaj si giꞌhiaj ni̱nïnj nej Israelita ngà nej guiì nàsìnùnj un,
dadinꞌ huej huin Ma̱ꞌan Señor riñan gu̱ña̱n nguèj yiꞌnïnꞌ dânj,
ni̱ ga̱ꞌhue gàꞌhuìꞌ nìko sa gàchìnj daꞌ goꞌngo̱ ninj riñanj.
13 Dàj rûnꞌ taj riñan ñanj:
“Dadinꞌ daranꞌ nej guiì ganataꞌ duꞌhua siyu̱gui Ma̱ꞌan Señor,
ni̱ ga̱na̱ni̱n ninj.”
14 Dàj gi̱ꞌhiaj nej guiì,
ga̱ꞌmi̱n ninj ngà Ma̱ꞌan Jesús si hua̱ nitaj si guyumân ruhuâ ninj niꞌin ninj Ma̱ꞌan ràꞌaj.
Dàj giꞌhiaj ninj gùyùmàn ruhuâ ninj si nun gu̱nïn ninj rayiꞌî Ma̱ꞌan Jesús ràꞌaj.
Ni̱ dàj gi̱ꞌhiaj ninj gu̱nïn ninj si nitaj sí gànàtàꞌ rayiꞌî Ma̱ꞌan Jesús riñan ninj ràꞌaj.
15 Dàj gi̱ꞌhiaj nej sôꞌ gànàtàꞌ nej sôꞌ si nun gàꞌnï̀nj Ma̱ꞌan Ñaꞌanj an ga̱ꞌa̱nj nej sôꞌ ràꞌaj.
Dàj rûnꞌ nnunj riñan ñanj:
“Ni̱ ûta hueꞌê giꞌhiaj nej sí gaché ganataꞌ nuguanꞌ gi̱ꞌhiaj ga̱ dïnꞌïnj ruhuâ nej guiì,
ni̱ nuguanꞌ gi̱ꞌhiaj ga̱na̱ni̱n ninj.”
16 Sani̱ sê daranꞌ nej guiì ganahuin ràꞌa nuguanꞌ giꞌhiaj ga̱na̱ni̱n ninj mánj;
dadinꞌ huê danj gataj Isaias:
“Señor.
Ahuin nej guiì guyumân ruhuâ nuguanꞌ duyingaꞌ nej ñûnj ràꞌaj.”
17 Huê danj ni̱ guendâ gùyùmàn ruhuâ nej guiì ni̱ gàꞌ si̱nï̱n daꞌhuiꞌ ninj gu̱nïnꞌ ninj,
ni̱ nuguanꞌ daꞌhui ninj gu̱nïn ninj,
huin si-nùguànꞌ Ma̱ꞌan Ñaꞌanj an.
18 Sani̱ ñùnj tâ:
Ni̱ nun gu̱nïn ninj mínj.
Dadinꞌ nda ganûn riñan hioꞌóo gaché ganataꞌ nej sôꞌ si-nùguànꞌ Ma̱ꞌan Ñaꞌanj an,
ni̱ guchij nda ñan ganahuij riñan hioꞌóo ruhuâ yumiguìi.
19 Ni̱ huê danj na̱nj gàchìnj naꞌan nej suj:
Ni̱ nun ga̱ra̱n daꞌngaꞌ ruhuâ nej Israelita nuguanꞌ nânj ràꞌ saj ûn.
Gàꞌ si̱nï̱n gataj Ma̱ꞌan Ñaꞌanj an nga garânj sunj gaꞌmin Moisés:
Gi̱ꞌhia si ga̱huin yìkòj ruhuâ nej suj niꞌin nej suj aꞌngô yumanꞌ nitaj si huin yiñân;
ni̱ gi̱ꞌhia si̱ gi̱na̱ꞌan ruhuâ nej suj niꞌin nej suj aꞌngô yumanꞌ nun ga̱ꞌhue ga̱ya̱ka̱j guendâ.
20 Ni̱ nun ga̱nï̱n yuꞌhuiꞌ ruhuâ Isaias nga gaꞌmin sôꞌ giꞌhiaj Ma̱ꞌan Ñaꞌanj an:
Nej guiì nun gànàꞌhuìꞌ ñùnj ni̱ gànàrìꞌ ninj ñùnj;
ni̱ gidigán Maꞌán riñan nej guiì nun gàchìnj naꞌanj rayiꞌî.
21 Sani̱ nga gaꞌmin Isaias giꞌhiaj Ma̱ꞌan Ñaꞌanj an rayiꞌî nej Israelita ni̱ gataj sôꞌ:
“Nu̱guí gudukuín raꞌá riñan ꞌngo̱ yumanꞌ naꞌhuej gùyùmàn ruhuâ niꞌin ñùnj ni̱ gatâ dàj gi̱ꞌhiaj yumanꞌ dânj sani̱ giꞌhiaj yumanꞌ dânj dàj garanꞌ ruhuaj na̱nj ánj.”