Ganagui Ma̱ꞌan Ñaꞌanj an yumanꞌ Israel
9
Yàngàꞌ hia huin sa gatâ rayiꞌî Ma̱ꞌan Cristo Jesús,
ni̱ sê si̱ gidigañuꞌûn mánj,
yàngàꞌ hia ganataꞌ daꞌngaꞌ gaꞌnḯn Ma̱ꞌan Ñaꞌanj an ruhuâ nimânj ni̱ Ma̱ꞌan Espíritu Santo huin sa gidigân ñùnj,
2 ni̱ ûta gananï̂n ruhuâj ni̱ gaꞌngaj nimânj ni̱ nitaj si hua̱ dïnꞌïnj ruhuâj.
3 Dadinꞌ hua̱ ruhuâj si ga̱ꞌna̱ꞌ si-kastigû Ma̱ꞌan Ñaꞌanj an riñânj,
ni̱ hua̱ ruhuâj si ga̱huin ane riñan Ma̱ꞌan Cristo guendâ ruhuáj ga̱na̱ni̱n nej israelita,
guendâ ꞌì ruhuâj niꞌín nej dinï̂n,
nej duguiꞌ maꞌán;
4 ni̱ huê nej sôꞌ huin Israelita,
ni̱ nagiꞌhiaj dàꞌnìnj Ma̱ꞌan Ñaꞌanj an nej sôꞌ,
ni̱ gaꞌna Ma̱ꞌan ni̱ gaꞌmin ngà nej sôꞌ,
ni̱ guchij ꞌngo̱ duꞌhua ngà nej sôꞌ,
ni̱ ga̱ꞌhuij si-ley riñan nej sôꞌ,
ni̱ gata si ga̱ꞌhue ginùn ña̱ꞌa̱nj nej sôꞌ ni̱ ga̱chra̱ nej sôꞌ chraꞌa riñanj,
ni̱ gata si hua̱ ꞌngo̱ sa ga̱ꞌhuij riñan nej sôꞌ.
5 Ni̱ rej nej sij gahuin nej sachij ganikïnꞌ riñan yumanꞌ Israel,
ni̱ siganï̂nj nej sôꞌ guendâ tun,
huin gaꞌnaꞌ Ma̱ꞌan Cristo,
ni̱ huê Ma̱ꞌan huin Ñaꞌanj an ni̱ ni̱ka̱j sùnj riñan daranꞌ nej rasu̱un,
ni̱ ga̱ꞌmi̱n hueꞌê nêꞌ riñan Ma̱ꞌan daranꞌ diû,
ni̱ huê danj huin.
6 Ni̱ sê danj ruhuâj ga̱ta si nun ga̱huin dàj rûnꞌ gataj si-nùguànꞌ Ma̱ꞌan Ñaꞌanj an mánj;
dadinꞌ sê daranꞌ nej guiì huin Israelita huin daꞌní Ma̱ꞌan Ñaꞌanj an mánj,
ga̱ꞌhue ga̱huin nej guiì nàsìnùnj un daꞌnin,
7 ni̱ sê da̱dïnꞌ na̱nj si rej nej guiì dânj huin sachij Abraham,
ni̱ ruhuaj ga̱ta si huin daranꞌ ninj daꞌní sôꞌ mánj;
dadinꞌ:
“Gataj Ma̱ꞌan Ñaꞌanj an riñan sij si Isaac ni̱ gayakaj gaꞌanj neꞌ ña̱an ga̱huin ñaan.”
8 Nânj ruhuaj ga̱ta:
Si sê daranꞌ nej guiì ginikaj tun Abraham huin daꞌní Ma̱ꞌan Ñaꞌanj an mánj,
sani̱ ga̱ꞌhue ga̱huin nej guiì guyumân ruhuâ niꞌin Ma̱ꞌan Jesús daꞌní Ma̱ꞌan Ñaꞌanj an na̱nj ánj.
9 Dadinꞌ gaꞌhuiꞌ Ma̱ꞌan Ñaꞌanj an si-nùguànꞌanj riñan sachij Abraham ni̱ sa gata huin:
“Ni̱ nï̀nꞌ diû nânj gàꞌnàj,
ni̱ gi̱nikaj nikat Sara neꞌej.”
10 Ni sê man ꞌngo̱ rïn nan huin mánj,
dadinꞌ nga ginun ri̱ki Rebeca,
daꞌní rej nêꞌ Isaac,
11 nga nï̀nꞌ ga̱chin ga̱ꞌnga̱ neꞌej dânj,
ni̱ nga nï̀nꞌ ga̱chin gi̱ni̱ꞌin sa sàꞌaj ngà sa yìꞌìi,
ni̱ gaꞌanj neꞌ ña̱an ni̱ ganûn sa garanꞌ ruhuâ Ma̱ꞌan Ñaꞌanj an gi̱ꞌhia ni̱ dàj rûnꞌ garanꞌ ruhuaj ganaguij,
sani̱ sê rayiꞌî nej sun giꞌhiaj nej síi ni̱ ga̱na̱ni̱n nej sôꞌ dadinꞌ Ma̱ꞌan Ñaꞌanj an huin sa gakḯn nej sôꞌ.
12 Ni̱ gàꞌ danj gata:
“Ni̱ gu̱na̱nj gi̱ꞌtsi sí yàhuàꞌa riñan sí gaꞌnga neꞌ rùkùu.”
13 Ni̱ huê dàj rûnꞌ nnunj riñan ñanj:
“Ga ꞌì ruhuâj niꞌín Jacob,
sani̱ gininj ꞌì Esaú riñânj.”
14 Nùnj huin,
si ga̱to̱ꞌ,
hia̱j ràꞌaj.
Hiôꞌ ni̱ nitaj si giꞌhiaj Ma̱ꞌan Ñaꞌanj an sa ni̱ka̱a ra̱ꞌ saj ûnꞌ.
Si̱ gaꞌhue ga̱to̱ꞌ danj mánj.
15 Sani̱ gataj Ma̱ꞌan Ñaꞌanj an gu̱nïn Moisés:
“Gu̱ru̱gûñuꞌun guiì garanꞌ ruhuâj gu̱ru̱gûñuꞌun,
ni̱ ga̱na̱nï̱n àko ruhuâj niꞌín guiì garanꞌ ruhuâj ga̱na̱nï̱n àko ruhuâj.”
16 Huê danj ni̱ sê dàj garanꞌ ruhuâ ꞌngo̱ sí ga̱huin,
ni̱ sê dàj ganahuij ruhuâ ꞌngo̱ síi ganaꞌhuiꞌ sôꞌ Ma̱ꞌan Ñaꞌanj an huin,
dadinꞌ Ma̱ꞌan Ñaꞌanj an ni̱ gu̱ru̱gûñuꞌun guiì garanꞌ ruhuaj.
17 Dadinꞌ huê danj taj riñan ñanj si-nùguànꞌ Ma̱ꞌan Ñaꞌanj an gu̱nïn Faraón:
“Huê rayiꞌî dan gachrûn sùnj sòꞌ,
guendâ gi̱di̱gán riñanꞌ dàj nìko nùkua,
daꞌnga ni̱ gu̱nu̱na̱ nej guiì màn nï̀nꞌ gàchràꞌ riñan hioꞌó siyu̱guí.”
18 Huê danj ni̱ guiì garanꞌ ruhuâ Ma̱ꞌan Ñaꞌanj an,
ni̱ guruguñuꞌun,
ni̱ guiì garanꞌ ruhuaj ni̱ nagiꞌhiaj tsij nimân ninj.
19 Sani̱ ga̱ꞌhue ga̱ta̱jꞌ gu̱nḯn:
“Nùnj huin saj,
ni̱ gutaj gakï̱nꞌïn nej guiì ràꞌaj.
Dadinꞌ ahuin sí gùnùkuaj du̱nanikàj nej sa garanꞌ ruhuâ Ma̱ꞌan Ñaꞌanj an ràꞌaj.”
20 Sani̱ gàꞌ si̱nï̱n gàtà dànanj gu̱nïnꞌ,
hiôꞌ ni̱ ûta huînꞌ ruhuâꞌ,
dadinꞌ ruhuâꞌ gùnï̀nꞌ ngà Ma̱ꞌan Ñaꞌanj an na̱nj nîꞌ.
Ga̱ꞌhue ga̱ta̱j goꞌo huin hioꞌó bârru gu̱nïn sí giꞌhiaj man:
“Nùnj huin saj ni̱ giꞌhiá dànanj ñùnj ràꞌaj.”
21 Nitaj si ni̱ka̱j su̱n sí giꞌhiaj goꞌo riñan hioꞌó bârru,
ni̱ ga̱ꞌhue si huê gè hioꞌó bârru dânj giꞌhiaj sij ꞌngo̱ goꞌo hiaj a nej si giꞌhiaj sij ꞌngo̱ goꞌo ga̱ni̱ki ràꞌ saj ûnꞌ.
22 Hiôꞌ ràꞌaj,
ni̱ si Ma̱ꞌan Ñaꞌanj an,
garanꞌ ruhuâ gi̱di̱ganj si chrunj ga̱ꞌma̱n ruhuaj ni̱ hua̱ ruhuaj si giniꞌin daranꞌ nej guiì si huin ꞌngo̱ sa ûta nùkuaj,
sani̱ huê danj na̱nj ûta hua nùkuaj ruhuaj ngà nej guiì giꞌhiaj gakï̱nꞌïn dadinꞌ gàꞌ hua̱ yu̱gui ninj mân ninj guendâ ga̱na̱huin ràꞌa ninj kastîgu.
23 Ni̱ giꞌhia dànanj guendâ ruhuaj si gi̱ni̱ꞌin nej guiì dàj nìko huaj,
ni̱ gidiganj riñan nej guiì ri̱ña̱n gananï̂n àko ruhuaj ni̱ giꞌhiaj yu̱gui ni̱ nagiꞌhiaj sàꞌaj nej guiì dânj,
24 ni̱ huê nej guiì dânj gakïn,
ni̱ nej guiì dânj huin nêꞌ,
hiôꞌ ni̱ ꞌngo̱ rïn nej judío huin sa gakïn na̱nj nîꞌ,
sê huê danj na̱nj gakïn nej si nàsìnùnj un nej ràꞌ saj ûnꞌ.
25 Dàj rûnꞌ taj riñan ñanj gachrûn Oseas:
Gàtà si yiñân huin yumanꞌ nun ga̱huin yiñân,
ni̱ yumanꞌ nun ga̱ ꞌì ruhuâj niꞌín,
hia̱j ni̱ ꞌì ruhuâj niꞌín yumanꞌ dânj.
26 Ni̱ riñan nej guiì gataj Ma̱ꞌan Ñaꞌanj an:
“Sê yiñân huin nej suj mánj”,
ni̱ riñan nej guiì dânj gataj Ma̱ꞌan Ñaꞌanj an si huin ninj daꞌní Ma̱ꞌan Ñaꞌanj hua̱ nìꞌnàꞌa.
27 Ni̱ huê danj gaꞌmin Isaías rayiꞌî Israel:
“Ni̱ dàj rûnꞌ man hioꞌó chru màn duꞌhua nne ña̱ꞌa̱nj huê danj gàꞌì nej daꞌní Israel,
ni̱ man do̱j nej sôꞌ ga̱na̱ni̱n gi̱ꞌhiâ na̱nj ánj,
28 dadin nda râꞌñanj chre giꞌhiaj Ma̱ꞌan Señor sa nìkàa riñan hioꞌóo ni̱ gìsìj si-nùguànꞌanj.”
29 Dàj rûnꞌ gataj Isaías àsìj nâ:
Ni̱ si nuhuiꞌ si gudunâj Ma̱ꞌan Señor si gahuin nêꞌ ñaan
ni̱ gàꞌ ganahuij nêꞌ gahuiꞌ giꞌhiaj Ma̱ꞌan Señor ni̱ka̱j su̱n riñan nej stâdu,
dàj rûnꞌ giꞌhia ngà Sodoma ni̱ ngà Gomorra.
Sa ni̱ka̱ giꞌhiôꞌ nga guyumân ruhuôꞌ
30 Nùnj huin si ga̱to̱ꞌ hiôꞌ ràꞌaj.
Ni̱ si nej sí nàsìnùnj un,
ni̱ nun gi̱ꞌhiaj nej sôꞌ sa nìkàa,
sani̱ rayiꞌî guendâ guyumân ruhuâ nej sôꞌ ni̱ giꞌhiaj nej sôꞌ sa nìkàa.
31 Sani̱ nej Israelita,
ni̱ ganï̂n ruhuâ nej sôꞌ si giꞌhiaj nej sôꞌ sa ni̱ka̱a guendâ ganï̂n ruhuâ nej sôꞌ si dagahuin nej sôꞌ ley,
sani̱ nun ga̱ꞌhue da̱gahuin nej sôꞌ ley mánj.
32 Nùnj huin saj ni̱ nun ga̱na̱huin ràꞌa Ma̱ꞌan Ña̱ꞌanj an nej sôꞌ ràꞌaj.
Dadinꞌ hua̱j nej sij rukû ley sani̱ nitaj si guyumân ruhuâ nej sij mánj,
dadinꞌ ganï̂n ruhuâ nej sij si ga̱na̱ka̱j Ma̱ꞌan Ñaꞌanj an nej sij ngà rayiꞌî nej sa giꞌhiaj nej sij,
sani̱ geꞌë̂j dakó nej sij “ngà hiëj giꞌhiaj ganatûj nej sij,”
33 dàj rûnꞌ nnunj riñan ñanj:
Ni̱ ruhuâ yumanꞌ snàꞌànj Jerusalén gùchrù ꞌngo̱ hiëj gi̱ꞌhiaj gèꞌë̀j dakó nej guiì ni̱ huej gi̱ꞌhiaj ga̱na̱tu̱ ninj;
ni̱ nej guiì guyumân ruhuâ niꞌin Ma̱ꞌan Jesús,
ni̱ si̱ giriꞌ ninj sinàꞌàj a mánj.