Gi̱ꞌhiôꞌ sa garanꞌ ruhuâ Espíritu Santo
8
Nej guiì gàꞌ guyumân ruhuâ niꞌin Ma̱ꞌan Cristo ni̱ si nitaj si dagahuin ninj riñan gakï̱nꞌ garanꞌ ruhuâ nneè kú ninj huê danj ni̱ si̱ ga kastîgu riñan ninj mánj,
dadinꞌ dagahuin ninj dàj rûnꞌ garanꞌ ruhuâ Ma̱ꞌan Espíritu Santo.
2 Dadinꞌ si-ley Ma̱ꞌan Espíritu Santo giꞌhiaj ga̱na̱huin nìꞌnàj ni̱ giꞌhia gananinj riñan si-ley gakï̱nꞌ gi̱ꞌhiaj gàhuìj.
3 Dadinꞌ sa nun ga̱ꞌhue gi̱ꞌhiaj ley ni̱ gaꞌhue giꞌhiaj Ma̱ꞌan Ña̱ꞌanj an,
dadinꞌ síi ni̱ gahuin sôꞌ ꞌngo̱ sí nitaj guesâ,
huê danj ni̱ gaꞌnḯn Ma̱ꞌan Ñaꞌanj an gaꞌnaꞌ Daꞌnin Jesús ni̱ gahuin dàj rûn huin sí gakï̱nꞌïn ni̱ gahuij rayiꞌî gakï̱nꞌïn,
ni̱ giꞌhiaj ga̱nanj riñan gakï̱nꞌïn.
4 Ni̱ sa ni̱ka̱ gidigân ley ni̱ gaꞌhue dagahuînꞌ sa taj ley,
dadinꞌ nitaj si achêꞌ ni̱ nitaj si giꞌhiôꞌ dàj rûnꞌ garanꞌ ruhuâ nneè kuꞌ,
dadinꞌ giꞌhiôꞌ dàj rûnꞌ garanꞌ ruhuâ Ma̱ꞌan Espíritu Santo.
5 Dadinꞌ nej guiì nun ga̱ꞌnga̱ nàkà ñûn ni̱ giꞌhiaj ninj sa ganï̂n ruhuâ nneè kú ninj;
sani̱ nej guiì gaꞌnga nàkà giꞌhiaj Ma̱ꞌan Espíritu Santo,
ni̱ ganï̂n ruhuâ ninj gi̱ꞌhiaj ninj sa garanꞌ ruhuâ Ma̱ꞌan Espíritu Santo.
6 Dadinꞌ si gi̱ꞌhiôꞌ nej sa garanꞌ ruhuâ nneè kuꞌ ni̱ gàhuìꞌ nimûnꞌ,
sani̱ si gi̱ꞌhiôꞌ nej sa garanꞌ ruhuâ Ma̱ꞌan Espíritu Santo ni̱ gà nìꞌnàꞌ nimûnꞌ ni̱ ga̱ dïnꞌïnj ruhuôꞌ.
7 Dadinꞌ si giꞌhiôꞌ daranꞌ nej sa garanꞌ ruhuâ nneè kuꞌ ni̱ unïnꞌ ngà Ma̱ꞌan Ñaꞌanj an;
dadinꞌ naꞌhuej ruhuôꞌ ni̱ nitaj si dagahuînꞌ sun giyiꞌnïnꞌ riñunꞌ giꞌhiaj Ma̱ꞌan Ñaꞌanj an mánj;
8 ni̱ nej guiì dagahuin nej sa garanꞌ ruhuâ nneè kú ni̱ nitaj si dagahuin ninj nej sa garanꞌ ruhuâ Ma̱ꞌan Ñaꞌanj an mánj.
9 Sani̱ nej suj ni̱ nitaj si giꞌhiaj nej suj sa garanꞌ ruhuâ nneè kú nej suj,
dadinꞌ giꞌhiaj nej suj nej sa garanꞌ ruhuâ Ma̱ꞌan Espíritu Santo,
si yàngàꞌ hia nne Ma̱ꞌan Espíritu Santo ruhuâ nimân nej suj.
Ni̱ si hua̱ ꞌngo̱ nej suj ni̱ nitaj si nne si-Espíritu Ma̱ꞌan Cristo ruhuâ nimân nej suj,
ni̱ sê daꞌní Ma̱ꞌan huin nej suj mánj.
10 Ni̱ si nne Ma̱ꞌan Cristo ruhuâ nimân nej suj,
ni̱ hua̱ nìꞌnàꞌ nanè nimân nej suj ni̱ nùnj huin si gàꞌ gahuiꞌ nneè kú nej suj giꞌhiaj gakï̱nꞌïn,
sani̱ hua̱ nìꞌnàꞌ nanè nimân nej suj rayiꞌî guendâ giꞌhiaj nej suj sa nìkàa.
11 Ni̱ si nne si-Espíritu Ma̱ꞌan sa giꞌhiaj ganaꞌnï̂nj Ma̱ꞌan Jesús siganï̂nj nej nîman ruhuâ nimân nej suj,
ni̱ huê Ma̱ꞌan sa ganachi nikaj Ma̱ꞌan Cristo siganï̂nj nej nîman ni̱ huê Ma̱ꞌan gi̱ꞌhiaj gànàꞌnï̀nj nneè kú nej suj sa gàꞌ gahuiꞌ dânj si gàꞌ nne Ma̱ꞌan Espíritu Santo ruhuâ nimân nej suj.
12 Huê danj na̱nj di̱nï̂nj,
ni̱ sê man riñan nneè kûꞌ daꞌhuîꞌ mánj,
si hua̱ na̱nj gi̱ꞌhiôꞌ sa garanꞌ ruhuâ nneè kuꞌ mánj;
13 dadinꞌ si dagahuin nej suj sa garanꞌ ruhuâ nneè kú nej suj,
ni̱ gàhuìꞌ nej suj;
ni̱ si dagahuin nej suj nej sa garanꞌ ruhuâ Ma̱ꞌan Espíritu Santo hiôꞌ ni̱ giꞌhiaj nej suj si gàhuìꞌ nej gakï̱nꞌ garanꞌ ruhuâ nneè kú nej suj,
hiôꞌ ni̱ ganahuin nìꞌnàꞌ nej suj.
14 Dadinꞌ daranꞌ nej guiì ri̱ña̱n gi̱di̱gân si-Espíritu Ma̱ꞌan Ñaꞌanj an,
huê nej guiì nânj huin daꞌní Ma̱ꞌan Ñaꞌanj an.
15 Dadinꞌ nun ga̱na̱huin ràꞌa nej suj nanè kï̱j hua ni̱ka̱j ñuꞌunj yumiguìi si giꞌnïnj nej suj gi̱ꞌhiaj sun chre nej suj riñan gakï̱nꞌïn si gu̱yuꞌhuiꞌ nej suj mánj,
dadinꞌ gàꞌ ganahuin ràꞌa nej suj Ma̱ꞌan Espíritu ni̱ nagiꞌhiaj da̱ꞌnin nej suj,
hia̱j ni̱ ga̱ꞌhue ga̱ꞌmi̱n nùkuaj nej suj:
“Tâ lij,
Tâ.”
16 Huê gè Ma̱ꞌan Espíritu Santo ganataꞌ gunïn nanè nimûnꞌ,
si huînꞌ daꞌní Ma̱ꞌan Ñaꞌanj an.
17 Ni̱ guendâ huînꞌ daꞌní Ma̱ꞌan Ñaꞌanj an,
ni̱ hua̱ nani̱ꞌhiôꞌ ga̱na̱huin ro̱ꞌôꞌ,
ni̱ hua̱ nani̱ꞌhiôꞌ si ga̱na̱huin raꞌa Ma̱ꞌan Ñaꞌanj an ñu̱nꞌ ni̱ nej sa ganahuin raꞌa Ma̱ꞌan Cristo ni̱ ga̱ꞌhue ga̱na̱huin ro̱ꞌôꞌ,
si gi̱ranꞌ sa̱ñu̱nꞌ dàj rûnꞌ giranꞌ sa̱ñu̱n Ma̱ꞌan Cristo,
ni̱ gu̱ña̱n chre ga̱ꞌhue ga̱na̱huin hueꞌêꞌ ngà Ma̱ꞌan Cristo.
18 Yàngàꞌ hia ni̱ gàꞌ niꞌín si nej sañun rûnꞌ hia̱j ni̱ do̱j nï̀nꞌ gaj dadinꞌ ûta hueꞌê ga̱ riñunꞌ ngà ga̱nêꞌ ñan nne Ma̱ꞌan Cristo.
19 Dadinꞌ ûta huin ruhuâ yumiguì nânj gi̱ni̱ꞌin gui gimàn nej daꞌní Ma̱ꞌan Ñaꞌanj an riñanj.
20 Dadinꞌ yumiguì giꞌhiaj Ma̱ꞌan Ñaꞌanj an ni̱ dagahuin riñan sa nitaj si niꞌñanj huaa,
sani̱ sê si̱ ga̱ra̱nꞌ ruhuâj da̱gahuin riñan sa nitaj si niꞌñanj hua dânj mánj,
sani̱ dagahuin giꞌhiaj Ma̱ꞌan Ñaꞌanj an sani̱ hua̱ diû ni̱ gi̱yi̱ꞌnï̱n riñanj;
21 dadinꞌ ga̱na̱ni̱n yumiguì nânj ni̱ si̱ ganahui ni̱ huê danj na̱nj si̱ ga sañuun riñan nej guiì gimàn riñanj gàꞌ mánj,
dadinꞌ ga̱na̱huin sàꞌ daranꞌ nej daꞌní Ma̱ꞌan Ñaꞌanj an.
22 Dadinꞌ niꞌînꞌ si daꞌ hua̱ gè yumiguìi ni̱ ûta ranꞌ sa̱ñunj,
ni̱ dàj rûnꞌ ranꞌ sa̱ñu̱n ꞌngo̱ siyànàa nga ga̱ꞌnga̱ daꞌnin neꞌej huê danj giranꞌ sa̱ñu̱n yumiguìi nda gui hia̱j;
23 ni̱ sê man ꞌngo̱ rïn yumiguìi ranꞌ sa̱ñu̱n,
dadinꞌ huê danj na̱nj ranꞌ sa̱ñu̱nꞌ,
ni̱ gàꞌ si̱nï̱n rikî Ma̱ꞌan Ñaꞌanj an riñunꞌ Ma̱ꞌan Espíritu Santo,
ni̱ huê danj na̱nj ûta huin ruhuôꞌ,
ni̱ man si ànàꞌhuìꞌ si na̱gi̱ꞌhiaj dàꞌnìnj Ma̱ꞌan Ñaꞌanj an ñùnꞌ,
ni̱ gi̱ꞌhia si ga̱na̱ni̱n nneè kûꞌ.
24 Dadinꞌ guendâ ganaꞌhuìꞌ Ma̱ꞌan Ñaꞌanj an ni̱ gananinꞌ;
sani̱ si gàꞌ giniꞌînꞌ sa gànàꞌhuì dânj,
ni̱ nitaj si niꞌñanj si huaj gànàꞌhuìj doj gàꞌ mánj;
25 Sani̱ si sa ànàhuìꞌ ni̱ hua̱ nun gi̱ni̱ꞌinꞌ riñanj,
ni̱ gà nùkuaj ruhuôꞌ nda gi̱ni̱ꞌinꞌ riñanj.
26 Ni̱ huê danj giꞌhiaj Ma̱ꞌan Espíritu ni̱ guruguñuꞌun nga gininaj ruhuôꞌ;
dadinꞌ nun niꞌînꞌ,
ahuin sa garanꞌ ruhuâ Ma̱ꞌan Ñaꞌanj an gàchìnꞌ riñanj,
ni̱ Ma̱ꞌan Espíritu ûta àko gachín nìꞌhia riñan Ma̱ꞌan Ñaꞌanj an rayiꞌîꞌ ngà nej nuguanꞌ nitaj si huaj ga̱ra̱n daꞌngaꞌ ruhuôꞌ.
27 Sani̱ Ma̱ꞌan Ñaꞌanj an huin sa nadigiꞌñûn dàj hua ruhuâ nimûnꞌ,
ni̱ niꞌin ahuin sa garanꞌ ruhuâ Ma̱ꞌan Espíritu,
ni̱ Espíritu huin sa niꞌin nej sa garanꞌ ruhuâ Ma̱ꞌan Ñaꞌanj an ni̱ gachín nìꞌhia rayiꞌî nej guiì huin daꞌní Ma̱ꞌan Ñaꞌanj an.
Huînꞌ sí gàꞌ gunukuaj giꞌhiaj ga̱nan
28 Ni̱ niꞌin nej ñûnj si giꞌhiaj yu̱gui Ma̱ꞌan Ñaꞌanj an nej rasu̱un,
ni̱ gurugûñuꞌun rukû daranꞌ nej guiì ꞌì ruhuâ niꞌin Ma̱ꞌan,
ni̱ gakḯn Ma̱ꞌan gaꞌnaꞌ ninj dadinꞌ gàꞌ hua yu̱gui ꞌngo̱ suun gàꞌhuij riñan ninj.
29 Dadinꞌ Ma̱ꞌan Ñaꞌanj an ni̱ gàꞌ giniꞌin si̱nïnj dàj hua nej guiì,
ni̱ huê nej guiì dânj ganaguij daꞌnga ni̱ ga̱ ninj dàj rûnꞌ hua Daꞌnin,
ni̱ Daꞌnin huin sa yàhuàꞌa siganï̂nj ûta gàꞌì nej dinï̂nt.
30 Nej guiì ganagui Ma̱ꞌan Ñaꞌanj an,
ni̱ huê nej guiì dânj huin sa gakïn;
ni̱ nagiꞌhiaj sàꞌaj ninj,
ni̱ nej guiì nagiꞌhiaj sàꞌaj,
ni̱ giꞌhia si ga̱ne ninj ñan nne nej guiì ni̱ka̱j su̱n riñanj.
31 Nùnj huin si ga̱to̱ꞌ,
rayiꞌî nej nânj ràꞌaj.
Ni̱ si Ma̱ꞌan Ñaꞌanj an huin ngà nêꞌ,
ni̱ ahuin guiì ga̱ta̱ rùhuà niꞌin ñùnꞌ ràꞌaj.
32 Ga ruhuâ Ma̱ꞌan Ñaꞌanj an ni̱ rikij Daꞌnin gahuiꞌ,
rayiꞌî si-ga̱kïnꞌ daranꞌ nêꞌ,
ni̱ si̱ gaꞌhue gi̱ri̱kij nej sa hua̱ riñan Daꞌnin dânj ga̱ riñan nêꞌ ràꞌ saj ûnꞌ.
33 Ahuin guiì ga̱ꞌhue ga̱ra̱n ruhuâ rayiꞌî nej guiì gàꞌ ganagui Ma̱ꞌan Ñaꞌanj an ràꞌaj.
Dadinꞌ Ma̱ꞌan Ñaꞌanj an huin sa nagiꞌhiaj ni̱ka̱ nej guiì guyumân ruhuâ niꞌin Ma̱ꞌan ni̱ rayiꞌî dan ni̱ nitaj gakï̱nꞌïn tá yichrá ninj mánj.
34 Ahuin guiì ga̱ꞌhue gataj si hua nï̀nꞌ tá gakï̱nꞌïn yichrôꞌ ràꞌaj.
Dadinꞌ gàꞌ gahuiꞌ Ma̱ꞌan Cristo;
sani̱ huê danj na̱nj,
gàꞌ ganaꞌnïn siganï̂nj nej nîman,
ni̱ gàꞌ nne raꞌa nêꞌ huàꞌ Ma̱ꞌan Ñaꞌanj an,
ni̱ nne gachín nìꞌhia rayiꞌî nêꞌ.
35 Ahuin si ga̱ꞌhue giꞌhiaj anêj ñùnꞌ riñan sa ꞌì ruhuâ Ma̱ꞌan Cristo ràꞌaj.
Ga̱ꞌhue gi̱ꞌhiaj anêj sañuun ñùnꞌ nîꞌ,
ga̱ꞌhue gi̱ꞌhiaj anêj sa ûta chìꞌ huaa ñùnꞌ nîꞌ,
ga̱ꞌhue gi̱ꞌhiaj anêj guendâ ga̱ta̱ ràꞌa nej guiì ñùnꞌ nîꞌ,
ga̱ꞌhue gi̱ꞌhiaj anêj yiꞌnaa ñùnꞌ nîꞌ,
ga̱ꞌhue gi̱ꞌhiaj anêj guendâ ga̱chin atsìj i gi̱nunꞌ nîꞌ,
ga̱ꞌhue gi̱ꞌhiaj anêj sa hua̱ ha̱i̱i ñùnꞌ nîꞌ,
ga̱ꞌhue gi̱ꞌhiaj anêj yîti ñùnꞌ nîꞌ.
36 Dàj rûnꞌ taj riñan ñanj:
Ni̱ rayiꞌî Ma̱ꞌan rèꞌ ni̱ gahuiꞌ nej ñûnj daranꞌ diû;
ni̱ dàj rûnꞌ gahia nej sij nej matsïj dagahuiꞌ nej sij huê danj giꞌhiaj nej sij ngà nej ñûnj.
37 Sani̱ nùnj huin si giranꞌ sa̱ñu̱n nej ñûnj,
sani̱ giꞌhiaj ga̱nan nej ñûnj dadinꞌ ꞌì ruhuâ Ma̱ꞌan Cristo niꞌin nej ñûnj.
38 Rayiꞌî dan ni̱ yìtï̀nj hua ruhuâj ni̱ nùnj huin si gàhuìj,
ni̱ nùnj huin si ga̱ne nìꞌnàj,
ni̱ gàꞌ si giꞌhiaj anêj nej ángel ñùnj,
ni̱ gàꞌ sí huin ña̱an ni̱ gàꞌ sí nùkuaj,
ni̱ gàꞌ sa hua̱ hia̱j ni̱ gàꞌ sa ga̱na̱ꞌa̱,
39 ni̱ sa màn yàtàꞌa,
ni̱ gàꞌ sa màn riki hioꞌóo,
ni̱ gàꞌ si ꞌngo̱ nej sa giꞌhiaj ràꞌa Ma̱ꞌan Ñaꞌanj an ni̱ si̱ gaꞌhue gi̱ꞌhiaj ane ñùnꞌ dadinꞌ ꞌì ruhuâ Ma̱ꞌan Ñaꞌanj an niꞌin ñùnꞌ,
dadinꞌ huînꞌ ngà Ma̱ꞌan Cristo Jesús Ma̱ꞌan Señor ni̱ka̱j su̱n riñunꞌ na̱nj ánj.