Garânj sun sij nuguanꞌ aꞌmin rayiꞌî sí garan ra̱ꞌa
7
Di̱nï̂nj,
aꞌmînj ngà nej suj niꞌin si-ley Ma̱ꞌan Ñaꞌanj an,
sê ni̱ka̱j su̱n ley riñan ꞌngo̱ síi ngà nï̀nꞌ hua nìꞌnàꞌ sôꞌ ràꞌ saj ûnꞌ.
2 Dadinꞌ siyànà garan ràꞌa ngà nika ni̱ hua̱ ni̱ña̱n si ga̱ne ngà nikaj nga nï̀nꞌ hua nìꞌnàꞌ sôꞌ dadinꞌ hua̱ nï̀nꞌ nikaj su̱n ley garan ràꞌa nguèj sij riñan nguèj sij;
sani̱ nga gahuiꞌ sí gahuin nika siyànà dânj,
ni̱ giyiꞌnêj ley garan ràꞌa nguèj ni̱ka̱ sij.
3 Huê danj ni̱,
si nï̀nꞌ hua nìꞌnàꞌ sí huin nika siyànà dânj ni̱ ganaka aꞌngôꞌ síi,
ni̱ ginin riñan gakï̱nꞌ ni̱ka̱j nika duguiꞌ;
sani̱ si gahuiꞌ sí gahuin nika siyànà dânj,
ni̱ giyîꞌnïnj riñanj ngà ley garan ràꞌa,
hiôꞌ ni̱ asàꞌ garan ràꞌa ngà aꞌngô síi,
ni̱ nitaj si ginin riñan gakï̱nꞌ ni̱ka̱j nika duguiꞌ gàꞌ mánj.
4 Huê danj na̱nj nej suj,
di̱nï̂nj ma̱ꞌan,
ni̱ gàꞌ gahuiꞌ nej suj ngà si-ley Moisés rayiꞌî nneè kú Ma̱ꞌan Jesús,
daꞌnga ni̱ dagahuin nej suj riñan Ma̱ꞌan Jesús,
Ma̱ꞌan sa ganaꞌnï̂nj siganï̂nj nej nîman,
daꞌnga ni̱ gaꞌhue gi̱ꞌhiaj nej suj sa sàꞌaj riñan Ma̱ꞌan Ñaꞌanj an.
5 Dadinꞌ nga nï̀nꞌ ga̱chin ga̱ꞌnga̱ nàkà ñûnꞌ,
ni̱ ley giꞌhiaj si ganahuin nìꞌnàꞌ ñun nneè kuꞌ riñan gakï̱nꞌïn huê dan ni̱ gahuiꞌ nimûnꞌ riñan Ma̱ꞌan Ñaꞌanj an rayiꞌî gakï̱nꞌïn.
6 Sani̱ rayiꞌî guendâ gaꞌnga nàkà ñûnꞌ ni̱ nitaj si ꞌnï̱nꞌ riki si guesâ ley,
dadinꞌ gàꞌ gahuîꞌ riñan sa ginikaj ñuꞌunj riñunꞌ,
huê danj ni̱ dagahuînꞌ riñan chrej nàkà gidigân Ma̱ꞌan Espíritu Santo,
ni̱ si̱ dagahuînꞌ riñan chrej nâ gidigân ley gàꞌ mánj.
Gakï̱nꞌ nne ruhuâ nimânj
7 Nùnj huin si ga̱to̱ꞌ ràꞌaj.
Hiôꞌ ni̱ ley huin gakï̱nꞌïn nga na̱nj nîꞌ.
Sani̱ nun gi̱niꞌín ahuin sa huin gakï̱nꞌïn si nuhuiꞌ ley gidigân riñânj;
dadinꞌ huê danj na̱nj nun niꞌín si gakï̱nꞌïn huin guendâ huin ruhuâj si ga̱ doj nej rasu̱un du̱ꞌhue̱e riñânj,
si nuhuiꞌ si gataj ley si huin gakï̱nꞌïn:
“Si̱ gahuinꞌ ruhuâꞌ ga̱ doj riñanꞌ nej rasu̱n hua̱ riñan nej guiì mánj.”
8 Sani̱ gakï̱nꞌïn,
ni̱ niꞌin si gàꞌ giyiꞌnïnꞌ suun riñânj sisi̱ si̱ gaꞌhue gi̱ꞌhia gakï̱nꞌïn,
ni̱ giꞌhia si ga̱nï̱n ruhuâj niꞌín doj sa gàꞌ hua rinânj;
dadinꞌ nga nitaj ley hua ni̱ nitaj si hua̱ nìꞌnàꞌ gakï̱nꞌïn mánj.
9 Nga nun gi̱ni̱ꞌín ley;
hiôꞌ ni̱ nitaj si giriñun ruhuâj si hua̱ gakï̱nꞌïn,
sani̱ nga giniꞌín ley ni̱ gaꞌnïnj suun riñânj,
huê danj ni̱ ganahuin nìꞌnàꞌ gakï̱nꞌïn riñânj.
10 Hiôꞌ ni̱ gahuí,
huê danj ni̱ giniꞌín si ley gi̱ꞌhiaj ga̱na̱huin nìꞌnàj,
ni̱ huej gi̱ꞌhiaj gàhuìj na̱nj ánj;
11 dadinꞌ gakï̱nꞌïn,
ni̱ garânj sunj ley guendâ gi̱di̱gañuꞌun ñùnj ni̱ giꞌhia si dagahuín riñan gakï̱nꞌïn,
ni̱ rayiꞌî guendâ giꞌhia gakï̱nꞌïn ni̱ gahuí.
12 Huê danj ni̱ yàngàꞌ hia ni̱ sa gèe huin si-ley Ma̱ꞌan Ñaꞌanj an,
huê danj na̱nj sa gèe huin sun giyiꞌnïnꞌ giꞌhiaj Ma̱ꞌan Ñaꞌanj an,
ni̱ ni̱ka̱ hua sa giꞌhiaj Ma̱ꞌan ni̱ sàꞌ hua̱ sa giꞌhiaj Ma̱ꞌan.
13 Hiôꞌ ni̱ sa sàꞌ dânj,
guyumân ni̱ huej giꞌhiaj gahuí nga na̱nj nîꞌ.
Sej giꞌhiaj mánj;
sa giꞌhiaj gahuí huin gakï̱nꞌïn,
guendâ gi̱ni̱ꞌín dàj nìko nùkuaj gakï̱nꞌïn,
ni̱ garânj sunj sa sàꞌ dânj,
ni̱ rayiꞌî sun giyiꞌnïn dânj ni̱ ûta gahuin nùkuaj gakï̱nꞌïn ni̱ giniꞌín si ganinï̀nꞌ nï̀nꞌ ruhuâ hua gakï̱nꞌïn.
14 Dadinꞌ niꞌín si ley ni̱ huin si-nànè Ma̱ꞌan Ñaꞌanj an;
sani̱ ñùnj ni̱ huín sí nitaj si nùkuaj,
ni̱ giꞌnï̂n dagahuín riñan gakï̱nꞌïn.
15 Dadinꞌ nitaj si garânj daꞌngaꞌ ruhuâj rayiꞌî nej sa giꞌhiâ;
dadinꞌ ganï̂n ruhuâj gi̱ꞌhia sa sàꞌaj,
sani̱ giꞌhia sa aꞌnanꞌ nun ga̱ranꞌ ruhuâj gi̱ꞌhia.
16 Ni̱ si nej sa nun ga̱ra̱nꞌ ruhuâj gi̱ꞌhiâ ni̱ huê nej dânj giꞌhiâ,
ni̱ garânj yinaj si sa sàꞌ hia huin si-ley Ma̱ꞌan Ñaꞌanj an.
17 Hiôꞌ ni̱ sê ñùnj huin sa giꞌhiaj nej gakï̱nꞌ dânj mánj,
nej gakï̱nꞌ màn ruhuâ nimânj huin sa giꞌhiaj.
18 Ni̱ niꞌín si nitaj si màn,
sa hua̱ sàꞌaj ruhuâ nimânj;
dadinꞌ ganï̂n ruhuâj gi̱ꞌhia sa sàꞌaj,
sani̱ nitaj si giꞌhiâ sa sàꞌ ganï̂n ruhuâj.
19 Dadinꞌ nitaj si giꞌhiâ nej sa sàꞌ garanꞌ ruhuâj gi̱ꞌhia,
dadinꞌ nej sa aꞌnanꞌ nun ga̱ranꞌ ruhuâj gi̱ꞌhia,
sa aꞌnanꞌ dânj huin sa giꞌhiâ.
20 Ni̱ si giꞌhiâ nej sa nun ga̱ranꞌ ruhuâj,
hiôꞌ ni̱ sê ñùnj huin sa giꞌhiaj mánj,
nej gakï̱nꞌ màn ruhuâ nimânj huin sa giꞌhiaj.
21 Huê danj ni̱ garanꞌ ruhuâj gi̱ꞌhia sa sàꞌaj,
sani̱ ganariꞌí ley gidigân:
Si ruhuâ nimânj mân gakï̱nꞌïn.
22 Dadinꞌ nanè nimânj,
ni̱ garanꞌ ruhuâ si di̱giꞌñunj si-nùguànꞌ Ma̱ꞌan Ñaꞌanj an;
23 sani̱ niꞌín si hua̱ aꞌngô ley ni̱ka̱j su̱n riñan nneè kû,
dadinꞌ nun ga̱ra̱n yinaj sa taj ley gaꞌmin daꞌngá,
huê danj ni̱ dagahuín riñan si-ley gakï̱nꞌ garanꞌ ruhuâ nneè kû.
24 Ûta nikí si raꞌán.
Ahuin si gi̱ꞌhiaj ni̱ gànànìnj riñan gakï̱nꞌ ni̱ka̱j ñuꞌunj riñan nneè kû,
dadinꞌ gàhuìj gi̱ꞌhia ràꞌaj.
25 Sani̱ gaꞌhuí si guruhuâ Ma̱ꞌan Ñaꞌanj an,
dadinꞌ Ma̱ꞌan Señor Jesucristo giꞌhiaj gananînj riñan gakï̱nꞌïn.
Huê danj ni̱ garânj daꞌngaꞌ ruhuâj si daꞌhuí da̱gahuín si-ley Ma̱ꞌan Ñaꞌanj an,
sani̱ ñan gininaj ruhuâj ni̱ dagahuín riñan gakï̱nꞌïn na̱nj ánj.