Nej guiì giꞌhiaj gakï̱nꞌïn ni̱ huin ninj guiì gahuiꞌi
6
Nùnj huin si ga̱to̱ꞌ ràꞌaj.
Du̱guꞌnïnꞌ gi̱ꞌhiôꞌ doj gakï̱nꞌïn daꞌnga ni̱ gaꞌhue ga̱huin nìko doj sunuj u riñunꞌ nîꞌ.
2 Si̱ gaꞌhue giꞌhiôꞌ doj gakï̱nꞌïn mánj.
Dadinꞌ si gàꞌ gahuîꞌ riñan gakï̱nꞌïn.
Ni̱ hua̱ na̱nj gi̱ꞌhiôꞌ doj gakï̱nꞌïn nga na̱nj nîꞌ.
3 Nun niꞌin nej suj si daranꞌ nêꞌ gàꞌ gataꞌ nne ngà siyu̱gui Ma̱ꞌan Cristo Jesús,
ni̱ gàꞌ gahuîꞌ ngà Ma̱ꞌan nga gàꞌ gataꞌ nneꞌ ràꞌ saj ûnꞌ.
4 Dadinꞌ gàꞌ gahuîꞌ ni̱ gachinꞌ nùguànꞌàn nej sij ñûnꞌ ngà Ma̱ꞌan Jesús nga gataꞌ nneꞌ,
ni̱ dàj rûnꞌ ganaꞌnï̂nj Ma̱ꞌan Jesús siganï̂nj nej nîman ni̱ ûta hueꞌê ganahuin sàꞌaj ni̱ huaj dàj rûnꞌ hua Ma̱ꞌan Re huaj,
ni̱ huê danj na̱nj ga̱na̱huin nìꞌnòꞌ ni̱ gacheꞌ ni̱ giꞌhiôꞌ sa garanꞌ ruhuâ Ma̱ꞌan.
5 Dadinꞌ dàj rûnꞌ gachinꞌ nej sij Ma̱ꞌan Jesús huê danj gachinꞌ nej sij nêꞌ,
ni̱ huê dàj rûnꞌ ganaꞌnï̂nj Ma̱ꞌan Jesús siganï̂nj nej nimân ni̱ huê danj ga̱na̱huin nìꞌnàꞌ nêꞌ;
6 niꞌînꞌ si nej gakï̱nꞌ ga riñunꞌ ni̱ gàꞌ giniko̱j riñan rugutsìi ngà Ma̱ꞌan Jesús,
huê danj ni̱ gudurëꞌ Ma̱ꞌan Ñaꞌanj an nneè kú gakï̱nꞌ dânj,
daꞌnga ni̱ si dagahuînꞌ doj riñan gakï̱nꞌïn gàꞌ mánj.
7 Dadinꞌ ꞌngo̱ guiì gàꞌ gahuiꞌ,
ni̱ si̱ gaꞌhue gi̱ꞌhiaj ninj gakï̱nꞌïn gàꞌ mánj.
8 Ni̱ si gahuîꞌ ngà Ma̱ꞌan Cristo,
ni̱ huê danj na̱nj guyumân ruhuôꞌ si ga̱ne nìgùnꞌ ngà Ma̱ꞌan;
9 gàꞌ niꞌînꞌ si gàꞌ ganaꞌnï̂nj Ma̱ꞌan Cristo siganï̂nj nej nîman,
ni̱ si̱ gaꞌhue gàhuij gàꞌ mánj,
nitaj àmàn huaj gi̱nikaj su̱n sa giꞌhiaj gàhuìꞌ nej guiì riñan ninj gàꞌ mánj.
10 Dadinꞌ nga gahuiꞌ Ma̱ꞌan Cristo,
ni̱ ꞌngo̱ rïn gahuij riñan nej gakï̱nꞌïn;
sani̱ nga ga̱na̱huin nìꞌnaj,
ni̱ nne nìꞌnaj ni̱ unânj gi̱ꞌtsi riñan Ma̱ꞌan Ñaꞌanj an na̱nj ánj.
11 Huê danj na̱nj nej suj ni̱ gàꞌ niꞌin nej suj si gàꞌ gahuiꞌ nej suj ngà gakï̱nꞌïn,
sani̱ hua̱ nìꞌnàꞌ nej suj guendâ gi̱ꞌhiaj su̱n nej suj si-su̱n Ma̱ꞌan Ñaꞌanj an giꞌhiaj Ma̱ꞌan Cristo Jesús,
huin Ma̱ꞌan Señor ni̱ka̱j su̱n riñan nêꞌ.
12 Huê danj ni̱ si̱ gaꞌnï̂nj nej suj si gi̱nikaj ñuꞌunj gakï̱nꞌïn riñan nneè kú nej suj gàꞌ mánj,
ni̱ nga huin ruhuâ nneè kú nej suj gi̱ꞌhia gakï̱nꞌïn ni̱ si̱ dagahuin nej suj riñanj mánj.
13 Ni̱ si̱ gaꞌhue ga̱ra̱n sun nej suj nneè kú nej suj riñan gakï̱nꞌïn ni̱ si̱ gaꞌhue ga̱huin ꞌngo̱ rasu̱n gi̱ꞌhiaj gakï̱nꞌïn gàꞌ mánj,
nàgàꞌhuìꞌ nej suj ma̱ꞌan nej suj riñan Ma̱ꞌan Ñaꞌanj an dadinꞌ gàꞌ ganahuin nìꞌnàꞌ nej suj siganï̂nj nej nîman,
ni̱ nàgàhuìꞌ nej suj nneè kú nej suj riñan Ma̱ꞌan Ñaꞌanj an ni̱ ga̱huin nej suj ꞌngo̱ sa gi̱ꞌhiaj sa ni̱ka̱a riñan Ma̱ꞌan Ñaꞌanj an.
14 Huê danj ni̱ si̱ ginikaj su̱n gakï̱nꞌïn riñan nej suj gàꞌ mánj;
dadinꞌ nitaj si ꞌnï̱nj nej suj riki si-ley Moisés gàꞌ mánj,
dadinꞌ ꞌnï̱nj nej suj riki sunuj rikî Ma̱ꞌan Jesús.
Ga̱huînꞌ musû da̱gahuin riñan Ma̱ꞌan Ñaꞌanj an hiôꞌ ni̱ ga̱huînꞌ guiì giꞌhiaj sa ni̱ka̱a
15 Hiôꞌ ràꞌaj,
ni̱ ga̱ꞌhue gi̱ꞌhio gakï̱nꞌïn dadinꞌ nitaj si ꞌnï̱nꞌ riki si-ley Moisés dadinꞌ ꞌnï̱nꞌ riki si-su̱nu̱j Ma̱ꞌan Ñaꞌanj an nga na̱nj nîꞌ.
Nitaj àmàn huaj ga̱ꞌhue gi̱ꞌhiôꞌ danj mánj.
16 Nun niꞌin nej suj si nga ꞌnïnj nej suj giꞌhiaj sun nej suj riñan ꞌngo̱ yiruꞌhuee,
ni̱ dagahuin nej suj riñan sôꞌ ràꞌ saj ûnꞌ,
ga̱ꞌhue si dagahuin nej suj riñan gakï̱nꞌïn guendâ gàhuìꞌ nej suj,
nej si dagahuin nej suj riñan Ma̱ꞌan Ñaꞌanj an guendâ ga̱huin nej suj sí giꞌhiaj sa ni̱ka̱a.
17 Sani̱ guruhuâ Ma̱ꞌan Ñaꞌanj an,
dadinꞌ nùnj huin si giꞌnïnj nej suj giꞌhiaj sun nej suj riñan gakï̱nꞌïn,
sani̱ hia̱j ni̱ dagahuin nej suj ngà daranꞌ nimân nej suj nej nuguanꞌ gidigân nej ñûnj riñan nej suj;
18 ni̱ nga gàꞌ gananin nej suj riñan gakï̱nꞌïn,
hia̱j ni̱ ganahuin nej suj musû giꞌhiaj sa ni̱ka̱a na̱nj ánj.
19 Aꞌmînj dàj ga̱ꞌhue ga̱ra̱n daꞌnga ruhuâ nej suj,
dadinꞌ ûta ꞌì garânj daꞌngaꞌ ruhuâ nej suj;
ni̱ dàj rûnꞌ giꞌhiaj nej suj nga garânj sun nej suj nneè kú nej suj riñan gakï̱nꞌïn ni̱ dagahuin nej suj riñan sa kï̱j ï ngà riñan sa yìꞌìi,
hia̱j ni̱ si̱ giꞌhiaj nej suj gakï̱nꞌïn ngà nneè kú nej suj gàꞌ mánj,
ni̱ ga̱ra̱n sun nej suj nneè kú nej suj riñan Ma̱ꞌan Ñaꞌanj an ni̱ gi̱ꞌhiaj nej suj sa ni̱ka̱a ni̱ na̱gi̱ꞌhiaj gè nej suj ma̱ꞌan nej suj.
20 Dadinꞌ nga dagahuin nej suj riñan gakï̱nꞌïn,
ni̱ hua̱ nîꞌnï̱nj riñan nej suj ni̱ nitaj si nahuij ruhuâ nej suj gi̱ꞌhiaj nej suj sa ni̱ka̱a mánj.
21 Sani̱ nùnj huin si giꞌhiaj ga̱nan nej suj nga giꞌhiaj nej suj gakï̱nꞌïn,
ni̱ giriꞌ nej suj sinàꞌàj a ràꞌaj.
Dadinꞌ nga giꞌhiaj nej suj gakï̱nꞌïn ni̱ gahuiꞌ nej suj riñan Ma̱ꞌan Ñaꞌanj an na̱nj ánj.
22 Sani̱ hia̱j ni̱ nitaj si dagahuin nej suj riñan gakï̱nꞌïn ni̱ gahuin nej suj si-musû Ma̱ꞌan Ñaꞌanj an,
ni̱ guruguiꞌ si ganahuin nej suj guiì giꞌhiaj sa gèe,
ni̱ gunùkuaj nej suj ganariꞌ nej suj ñan ga̱ne nìgànj nej suj.
23 Dadinꞌ sa ga̱huin duꞌhue nej guiì rayiꞌî si-ga̱kïnꞌ ninj huin si gàhuìꞌ ninj ni̱ ga̱huin anêj ninj riñan Ma̱ꞌan Ñaꞌanj an,
sani̱ sunuj rikî Ma̱ꞌan Ñaꞌanj an huin si gìrìꞌ nìꞌhiaj nej guiì guyumân ruhuâ niꞌin Ma̱ꞌan Señor Jesús ni̱ ga̱ne nìgànj ninj ngà Ma̱ꞌan Ñaꞌanj an na̱nj ánj.