Guendâ guyumân ruhuôꞌ ni̱ dagahuînꞌ ni̱ nitaj gakï̱nꞌïn tá yichrôꞌ
5
Guendâ guyumân ruhuôꞌ ni̱ dagahuînꞌ sa garanꞌ ruhuâ Ma̱ꞌan Señor Jesús,
ni̱ nitaj gakï̱nꞌïn tá yichrôꞌ,
ni̱ hua̱ dïnꞌïnj ruhuôꞌ giꞌhiaj Ma̱ꞌan;
2 dadinꞌ Ma̱ꞌan Cristo giꞌhiaj ni̱ gaꞌhue ga̱ꞌa̱nj nichìꞌ riñan Ma̱ꞌan Ñaꞌanj an ni̱ guendâ guyumân ruhuôꞌ,
ni̱ giriꞌ nìꞌhioꞌ ga̱na̱huin ro̱ꞌôꞌ sunuj u ni̱ hua̱ yìtï̀nj ruhuôꞌ niꞌînꞌ Ma̱ꞌan,
ni̱ ganahuin nìhiàꞌ ruhuôꞌ dadinꞌ ànàꞌhuìꞌ si ga̱na̱huin sòꞌ dàj rûnꞌ hua sàꞌ Ma̱ꞌan Ñaꞌanj an.
3 Ni̱ sê man ꞌngo̱ rïn rayiꞌî nânj ganahuin nìhiàꞌ ruhuôꞌ mánj,
hua̱ nìhiàꞌ ruhuôꞌ rayiꞌî guendâ girûnꞌ sañuun,
dadinꞌ niꞌînꞌ si nej sañuun ni̱ gurugûñuꞌun si ga̱na̱huin nùkuaj ruhuôꞌ;
4 ni̱ sa nùkuaj ruhuôꞌ,
giꞌhiaj ni̱ ga̱chi̱nꞌ riñan sañuun,
ni̱ nga gachînꞌ riñan sañuun,
ni̱ ànàꞌhuìꞌ si gi̱ꞌhiaj Ma̱ꞌan Ñaꞌanj an si ga̱na̱ni̱nꞌ;
5 ni̱ nga anaꞌhuìꞌ ni̱ nitaj si nàꞌàj ñunꞌ;
dadinꞌ nga ganahuin ro̱ꞌôꞌ Ma̱ꞌan Espíritu Santo ni̱ gachra sa ꞌì ruhuâ Ma̱ꞌan Ñaꞌanj an ruhuâ nimûnꞌ.
6 Ni̱ nga nï̀nꞌ gahuînꞌ sí giꞌhiaj gakï̱nꞌïn,
ni̱ nun niꞌînꞌ nùnj huin si gi̱ꞌhiôꞌ ga̱ꞌhue ga̱na̱ni̱nꞌ,
ni̱ guyumân diû ni̱ gahuiꞌ Ma̱ꞌan Cristo rayiꞌî nej sí giꞌhiaj gakï̱nꞌïn.
7 Yàngàꞌ hia ni̱ nda nuhuiꞌ si sàꞌ ni̱ ga̱ꞌhue gàhuìꞌ ꞌngo̱ síi rayiꞌî ꞌngo̱ sí giꞌhiaj sa ni̱ka̱a;
ni̱ ga̱ꞌhue si hua̱ ꞌngo̱ sí nitaj si yuꞌhuiꞌ gàhuìꞌ rayiꞌî ꞌngo̱ sí sàꞌaj.
8 Sani̱ gidigân Ma̱ꞌan Ñaꞌanj an si ꞌì ruhuâj niꞌin ñùnꞌ,
dadinꞌ nùnj si hua̱ nï̀nꞌ huînꞌ sí gakï̱nꞌïn,
sani̱ gàꞌ gahuiꞌ Ma̱ꞌan Cristo rayiꞌîꞌ.
9 Sani̱ dànanj nìko doj huin,
dadinꞌ nitaj gakï̱nꞌïn tá yichrôꞌ rayiꞌî guendâ gàꞌ naruꞌhue Ma̱ꞌan Jesús tun rayiꞌî nej si-ga̱kï̂nꞌ,
huê danj ni̱ gananinꞌ riñan kastîgu ꞌna̱ꞌ neꞌ ña̱an.
10 Dadinꞌ si gahuînꞌ sí gunïnꞌ ngà Ma̱ꞌan Ñaꞌanj an,
ni̱ ganaꞌminꞌ ngà Ma̱ꞌan Ñaꞌanj an rayiꞌî guendâ gahuiꞌ Daꞌnin,
ni̱ dànanj nìko doj huin nânj,
dadinꞌ si ga̱na̱ꞌmi̱nꞌ ngà Ma̱ꞌan,
ni̱ ga̱na̱ni̱nꞌ rayiꞌî guendâ naruꞌhuej Ma̱ꞌan rayiꞌîꞌ.
11 Ni̱ sê man ꞌngo̱ rïn nânj huin mánj,
dadinꞌ hua̱ nìhiàꞌ ruhuôꞌ niꞌînꞌ Ma̱ꞌan Ñaꞌanj an,
rayiꞌî guendâ Ma̱ꞌan Jesús huin sa giꞌhiaj ni̱ ga̱ꞌhue ga̱na̱ꞌmi̱nꞌ ngà Ma̱ꞌan Ñaꞌanj an na̱nj ánj.
Adán ni̱ Cristo
12 Huê danj ni̱,
dàj rûnꞌ gatûj gakï̱nꞌïn ruhuâ yumiguìi giꞌhiaj ꞌngo̱ síi,
ni̱ huê gakï̱nꞌ dânj giꞌhiaj ni̱ gahuiꞌ daranꞌ nej guiì,
huê danj ni̱ giriꞌ nìꞌhiaj daranꞌ nej guiì gahuiꞌ ninj,
rayiꞌî guendâ giꞌhiaj daranꞌ ninj gakï̱nꞌïn.
13 Dadinꞌ nga nï̀nꞌ gàchin gùyùmàn ley,
ni̱ gàꞌ hua̱ gakï̱nꞌïn ruhuâ yumiguìi;
sani̱ ñan nitaj si hua̱ ley ni̱ nitaj si gaꞌmin gakï̱nꞌ Ma̱ꞌan Ñaꞌanj an riñan nej guiì rayiꞌî nej gakï̱nꞌïn mánj.
14 Sani̱ àsìj diû gane sachij Adán ngà nda diû gane sachij Moisés ni̱ ginikaj su̱n sa giꞌhiaj gàhuìꞌ nej guiì,
nùnj huin si nun gùtàꞌ ninj sun gi̱ꞌhiaj ninj dàj rûnꞌ giꞌhiaj Adán dadinꞌ sôꞌ ni̱ nun da̱gahuin sôꞌ sa gataj Ma̱ꞌan Ñaꞌanj an gu̱nïn sôꞌ,
dadinꞌ sôꞌ gahuin ꞌngo̱ daꞌngaꞌa si hua̱ ni̱ña̱n si hua̱ ꞌngo̱ sa ga̱ꞌna̱ꞌ.
15 Sani̱ sa riki chre Ma̱ꞌan Ñaꞌanj an ni̱ si̱ gaꞌhue gaj dàj rûnꞌ hua gakï̱nꞌ giꞌhiaj Adán mánj,
dadinꞌ rayiꞌî gakï̱nꞌ giꞌhiaj sôꞌ ni̱ gahuiꞌ ûta gàꞌì nej guiì,
ni̱ rayiꞌî Ma̱ꞌan Jesús ni̱ ûta gàꞌì nej guiì ga̱na̱huin ràꞌa chre sunuj rikî Ma̱ꞌan Ñaꞌanj an.
16 Ni̱ gakï̱nꞌ giꞌhiaj ꞌngo̱ síi ni̱ si̱ gaꞌhue giꞌhiôꞌ si gu̱ña̱n huin ngà sunuj rikî chre Ma̱ꞌan Ñaꞌanj an mánj;
dadinꞌ rayiꞌî ꞌngo̱ gakï̱nꞌïn ni̱ gaꞌnaꞌ kastîgu guendâ ga̱ꞌa̱nj ni̱ꞌhia̱ nej guiì,
sani̱ rayiꞌî sunuj gaꞌnaꞌ chre giꞌhiaj Ma̱ꞌan Ñaꞌanj an ni̱ ga̱na̱ni̱n ûta gàꞌì nej guiì gakï̱nꞌïn daꞌnga ni̱ si̱ gitá gakï̱nꞌïn yichrá ninj gàꞌ mánj.
17 Dadinꞌ si man rayiꞌî ꞌngo̱ rïn sí gakï̱nꞌïn ni̱ ginikaj su̱n gakï̱nꞌïn riñan gàꞌì nej guiì,
huê danj na̱nj ûta nìko gi̱nikaj su̱n nej guiì ganahuin ràꞌa chre sunuj u gi̱ꞌhiaj Ma̱ꞌan Jesucristo,
ni̱ gi̱ꞌhia si ga̱na̱huin ràꞌa nej sôꞌ nìko sunuj u ni̱ ganahuin ràꞌa nej sôꞌ nìko suun guendâ gi̱ꞌhiaj nej sôꞌ sa ni̱ka̱a.
18 Huê danj ni̱,
ꞌngo̱ rïn Adán giꞌhiaj gakï̱nꞌïn sani̱ giriꞌ nìꞌhiaj daranꞌ nej guiì ga̱ꞌa̱nj ni̱ꞌhia̱ ninj,
ni̱ sa ni̱ka̱ dagahuin Ma̱ꞌan Jesús giꞌhiaj ni̱ giriꞌ nìꞌhiaj daranꞌ nej guiì ni̱ si gitá gakï̱nꞌïn yichrá ninj ni̱ ga̱na̱huin nìꞌnàꞌ ninj.
19 Dadinꞌ dàj rûnꞌ nun ga̱ꞌhue da̱gahuin ꞌngo̱ síi riñan Ma̱ꞌan Ñaꞌanj an ni̱ huê danj na̱nj nun ga̱ꞌhue da̱gahuin aꞌngô nej síi ni̱ giꞌhiaj nej sôꞌ gakï̱nꞌïn,
huê danj ni̱ guendâ dagahuin Ma̱ꞌan Jesús riñan Ma̱ꞌan Ñaꞌanj an,
ni̱ ûta gàꞌì nej síi giꞌhiaj sa nìkàa.
20 Sani̱ nga guyumân ley ni̱ dànanj gahuin nìko gakï̱nꞌïn;
sani̱ nga gahuin nìko gakï̱nꞌïn,
ni̱ huê danj na̱nj gahuin nìko sunuj rikî Ma̱ꞌan Ñaꞌanj an;
21 hiôꞌ ni̱ dàj rûnꞌ gahuiꞌ nej guiì nga ginikaj su̱n gakï̱nꞌïn riñan ninj,
huê danj na̱nj ga̱ꞌhue gi̱nikaj su̱n sunuj u riñan ninj guendâ gi̱ꞌhiaj ninj sa ni̱ka̱a ni̱ ga̱ꞌhue ga̱na̱huin nìꞌnàꞌ ninj ni̱ ga̱ne nìgànj ninj.