Chrej hueꞌê gidigân sachij Abraham
4
Nùnj huin si giriꞌ sachij Abraham rej nêꞌ,
nga gane sôꞌ ga̱ta̱j nêꞌ hia̱j do̱j,
2 Dadinꞌ si rayiꞌî nej sa sàꞌ giꞌhiaj sachij Abraham huin sa giꞌhiaj ni̱ nitaj gakï̱nꞌïn tá yichrá sij,
hiôꞌ ni̱ hua̱ ni̱ña̱n si ûta huin sij ga̱nïn ruhuâ sij,
sani̱ sê riñan Ma̱ꞌan Ñaꞌanj an huin sa gi̱ꞌhiaj sij dànanj mánj.
3 Dadinꞌ.
Dàj taj riñan ñanj si-nùguànꞌ Ma̱ꞌan Ñaꞌanj an ràꞌaj.
“Sê guendâ guyumân ruhuâ sachij Abraham niꞌin sôꞌ Ma̱ꞌan Ñaꞌanj an,
ni̱ gataj Ma̱ꞌan Ñaꞌanj an si ga̱huin sôꞌ sí giꞌhiaj sa ni̱ka̱a ràꞌ saj ûnꞌ.”
4 Sani̱ sí ꞌhiaj sun riñan ꞌngo̱ yiruꞌhuee,
ni̱ sê si̱ ganahuin ràꞌa chre sôꞌ sanꞌanj an mánj,
ganahuin ràꞌa sôꞌ sanꞌanj gahuin duꞌhue sôꞌ na̱nj ánj;
5 Sani̱ guiì guyumân ruhuâ,
si Ma̱ꞌan Ñaꞌanj an huin sa ga̱ta̱j si nitaj gakï̱nꞌïn tá yichrá guiì gàꞌ nanikàj ruhuâ rayiꞌî si-ga̱kïnꞌ ni̱ gahuin ninj guiì ni̱ka̱a.
6 Gaꞌmin David ni̱ gataj sôꞌ si ga̱na̱huin nìhiàꞌ ruhuâ sí giriꞌ nìꞌhiaj si gàꞌ ganahuin sôꞌ sí ni̱ka̱a,
sani̱ sê guendâ rayiꞌî nej sa sàꞌ giꞌhiaj sôꞌ dânj huin ni̱ gahuin sôꞌ sí giꞌhiaj sa ni̱ka̱a mánj,
7 gataj sôꞌ:
Ga̱na̱huin nìhiàꞌ ruhuâ nej sí gàꞌ ginikaj Ma̱ꞌan Ñaꞌanj an nimân nìko rayiꞌî si-ga̱kïnꞌ,
dadinꞌ gàꞌ garán riñan nej si-ga̱kïnꞌ nej sôꞌ.
8 Ga̱na̱huin nìhiàꞌ ruhuâ sí ri̱ña̱n gàꞌ ginikaj Ma̱ꞌan Ñaꞌanj an nimân nìko rayiꞌî si-ga̱kïnꞌ.
9 Man ꞌngo̱ rïn nej sí giyiꞌneꞌ do̱j nnïnj arán raa̱ nneè nàꞌàj giriꞌ nìꞌhiaj ga̱na̱huin nìhiàꞌ ruhuâ na̱nj nîꞌ,
si giriꞌ nìꞌhiaj nej sí nun gìyìꞌnèꞌ do̱j nnïnj arán raa̱ nneè nàꞌàj ga̱na̱huin nìhiàꞌ ruhuâ sàꞌ.
Dadinꞌ gataj nêꞌ si guendâ guyumân ruhuâ sachij Abraham ni̱ ganakaj guendâ Ma̱ꞌan Ñaꞌanj an ni̱ gahuin sôꞌ sí giꞌhiaj sa ni̱ka̱a riñanj.
10 Gàꞌ giyiꞌneꞌ do̱j nnïnj arán raa̱ nneè nàꞌàj sachij Abraham nga ganakaj guendâ Ma̱ꞌan Ñaꞌanj an si huin sôꞌ sí ni̱ka̱a na̱nj nîꞌ.
Sê danj huin mánj hua̱ na̱nj nun gìyìꞌnèꞌ do̱j nnïnj arán raa̱ nneè nàꞌaj sij,
ni̱ gataj Ma̱ꞌan Ñaꞌanj an si huin sij sí giꞌhiaj sa ni̱ka̱a na̱nj ánj.
11 Ni̱ nda neꞌ rùkù ni̱ giyiꞌneꞌ do̱j nnïnj arán raa̱ nneè nàꞌàj sij,
ni̱ dânj gahuin daꞌngaꞌa ginikaj sij ni̱ gahuin sij sí giꞌhiaj sa ni̱ka̱a guendâ guyumân ruhuâ sij niꞌin sij Ma̱ꞌan Ñaꞌanj an nga nï̀nꞌ gàchin gìyìꞌnèꞌ do̱j nnïnj arán raa̱ nneè nàꞌaj sij;
daꞌnga ni̱ gaꞌhue ga̱huin sij rej daranꞌ nej sí nun gìyìꞌnèꞌ do̱j nnïnj arán raa̱ nneè nàꞌàj sani̱ guyumân ruhuâ nej sôꞌ,
ni̱ guendâ guyumân ruhuâ nej sôꞌ ni̱ gaꞌhue gahuin nej sôꞌ sí giꞌhiaj sa ni̱ka̱a na̱nj ánj;
12 ni̱ gahuin sij rej nej sí giyiꞌneꞌ do̱j raa̱ nneè nàꞌaj,
ni̱ sê man ꞌngo̱ rïn rej nej sôꞌ giyiꞌneꞌ do̱j nnïnj arán raa̱ nneè nàꞌàj dânj gahuin sij mánj,
dadinꞌ ga̱ꞌhue ga̱huin sij rej nej sôꞌ guyumân ruhuâ dàj rûnꞌ guyumân ruhuâ sij dadinꞌ nga guyumân ruhuâ sij ni̱ hua̱ na̱nj ga̱chin gìyìꞌnèꞌ do̱j nnïnj arán raa̱ nneè nàꞌàj sij na̱nj ánj.
Guyumân ruhuâ sachij Abraham ni̱ dagahuin sôꞌ sa gataj Ma̱ꞌan Ñaꞌanj an riñan sôꞌ
13 Dadinꞌ sê rayiꞌî si-ley Moisés huin ni̱ gataj Ma̱ꞌan Ñaꞌanj an si hua̱ ꞌngo̱ sa gàꞌhuij raꞌa sachij Abraham ngà nej daꞌní sôꞌ mánj,
gata si gi̱nikaj su̱n sôꞌ riñan yumiguìi guendâ guyumân ruhuâ sôꞌ ni̱ gahuin sôꞌ sí giꞌhiaj sa ni̱ka̱a.
14 Dadinꞌ si man nej sí ni̱ka̱j ley huin nej sí giriꞌ nìꞌhiaj ga̱huin daꞌní Ma̱ꞌan Ñaꞌanj an,
hiôꞌ ni̱ nitaj nùnj gue̱nda̱ niꞌñanj si guyumân ruhuôꞌ mánj,
hiôꞌ ni̱ girëꞌ nuguanꞌ gataj Ma̱ꞌan Ñaꞌanj an si hua̱ sa ri̱kij riñan nêꞌ guyumân ruhuâ.
15 Dadinꞌ giꞌhiaj ley si gùyùmàn kastîgu riñan nej guiì nitaj si dagahuin;
sani̱ ñan nitaj si hua̱ ley,
ni̱ nitaj gakï̱nꞌïn hua mánj.
16 Rayiꞌî dan ni̱,
gàꞌ si̱nï̱n guyumân ruhuâ sij,
ni̱ neꞌ rùkù ni̱ guyumân sunuj u riñan sij,
ni̱ gataj Ma̱ꞌan Ñaꞌanj an si hua̱ ꞌngo̱ sa gàꞌhuij riñan sij ni̱ nagiꞌhiaj yìtïn si-nùguànꞌanj riñan nej daꞌní sij;
ni̱ sê man ꞌngo̱ rïn riñan nej sôꞌ ni̱ka̱j ley huin mánj,
huê danj na̱nj giriꞌ nìꞌhiaj nej sôꞌ guyumân ruhuâ dàj rûnꞌ guyumân ruhuâ sachij Abraham,
dadinꞌ huê sôꞌ huin rej darûnꞌ.
17 Dàj rûnꞌ taj riñan ñanj:
“Ni̱ giꞌhiâ si ga̱huînꞌ rej ûta gàꞌì nej país.”
Nânj huin Ñaꞌanj guyumân ruhuâ sachij Abraham,
dadinꞌ huê Ma̱ꞌan giꞌhiaj ga̱na̱ꞌnï̱nj nej nîman,
ni̱ gaꞌmin rayiꞌî nej rasu̱un nitaj si hua̱,
ni̱ guruguiꞌ nej rasu̱n dânj gi̱ꞌhia.
18 Nùnj huin si nitaj si ànàꞌhuìj Sachij Abraham si ga̱ daꞌní sôꞌ,
sani̱ guyumân ruhuâ sôꞌ nga gataj Ma̱ꞌan Ñaꞌanj an si ga̱ daꞌní sôꞌ ni̱ ganaꞌhuìj sôꞌ si ga̱ daꞌní sôꞌ,
“rayiꞌî dânj ni̱ gaꞌhue ga̱huin sôꞌ rej ûta gàꞌì nej guiì”,
dàj rûnꞌ gàꞌ gataj Ma̱ꞌan Ñaꞌanj an gu̱nïn sôꞌ:
“Hiôꞌ ni̱ ga̱ gàꞌì nï̀nꞌ ruhuâ daꞌníꞌ.”
19 Sani̱ nun gi̱ni̱na̱j ruhuâ sôꞌ rayiꞌî sa guyumân ruhuâ sôꞌ,
nùnj huin si gàꞌ añûn staꞌu ruhuâ sôꞌ,
dadinꞌ hua̱ sôꞌ dàj rûnꞌ hua ꞌngo̱ sí gàꞌ ꞌna̱ꞌ gàhuìꞌ ni̱ huaj sôꞌ daꞌnga ꞌngo̱ si sientu hioꞌo,
ni̱ huê danj na̱nj hua̱ a̱tïn si-dùkuà Sara.
20 Ni̱ nun ga̱nï̱n chìꞌ ruhuâ sôꞌ ni̱ nun ga̱nï̱n huàꞌ ruhuâ sôꞌ,
rayiꞌî nuguanꞌ gataj Ma̱ꞌan Ñaꞌanj an si hua̱ sa gàꞌhuij riñan sôꞌ,
dadinꞌ dànanj guyumân nìko doj ruhuâ sôꞌ niꞌin sôꞌ Ma̱ꞌan Ñaꞌanj an,
ni̱ ûta gaꞌmin hueꞌê sôꞌ yiꞌî Ma̱ꞌan Ñaꞌanj an.
21 Ni̱ huê danj na̱nj guyumân yìtï̀nj ruhuâ sôꞌ niꞌin sôꞌ Ma̱ꞌan Ñaꞌanj an si huin ꞌngo̱ sa ûta nùkuaj hua dadinꞌ ga̱ꞌhue gu̱du̱si nuguanꞌ gata gu̱nïn sôꞌ;
22 ni̱ guendâ guyumân ruhuâ sachij Abraham sa gataj Ma̱ꞌan Ñaꞌanj an ni̱ gahuin sôꞌ sí giꞌhiaj sa ni̱ka̱a riñan Ñaꞌanj an.
23 Ni̱ nga ganakaj guendâ Ma̱ꞌan Ñaꞌanj an sa giꞌhiaj sachij Abraham ni̱ sê man ꞌngo̱ rayiꞌî sij aꞌmin nuguan nnùn riñan ñanj si-nùguànꞌ Ma̱ꞌan Ñaꞌanj an mánj,
24 dadinꞌ huê danj gachrûn nej sij rayiꞌî nêꞌ,
dadinꞌ guyumân ruhuôꞌ niꞌînꞌ Ma̱ꞌan Ñaꞌanj giꞌhiaj ganaꞌnï̂nj Ma̱ꞌan Jesús siganï̂nj nej nîman,
ni̱ huê Ma̱ꞌan huin si-Seño nêꞌ,
25 dadinꞌ Ma̱ꞌan Ñaꞌanj an nagaꞌhuiꞌ Ma̱ꞌan Jesús guendâ ga̱huij rayiꞌî si-ga̱kïnꞌ nêꞌ,
ni̱ ganahuin nìꞌnaj siganï̂nj nej nîman ni̱ ga̱ꞌhue gi̱ꞌhia si ga̱huin nêꞌ guiì giꞌhiaj sa ni̱ka̱a.