3
Hiôꞌ ni̱ sa du̱ꞌhue̱e huin si ga̱huînꞌ judío na̱nj nîꞌ.
Hiôꞌ ni̱ dùgùnàj huaj si gìyìꞌnèꞌ do̱j nnïnj raa̱ nneè nòꞌòꞌ nga na̱nj nîꞌ.
2 Ûta hueꞌê doj huaj si ga̱huînꞌ judío,
dadinꞌ yàngàꞌ ni̱ gàꞌ si̱nï̱n riñan nej judío,
gaꞌhuiꞌ Ma̱ꞌan Ñaꞌanj an si-nùguànꞌanj.
3 Hiôꞌ ràꞌaj,
ni̱ si hua̱ da̱ꞌa̱j nej judío nun da̱gahuin riñan Ma̱ꞌan Ñaꞌanj an ni̱ guendâ nun ga̱ꞌhue da̱gahuin nej sij ni̱ giniꞌñûn Ma̱ꞌan Ñaꞌanj an nej sij na̱nj nîꞌ.
4 Sê danj huin mánj;
dadinꞌ gàꞌ si̱nï̱n ni̱ Ma̱ꞌan Ñaꞌanj an huin daranꞌ sa yàngàꞌa,
ni̱ daranꞌ nej síi huin sí gidigañuꞌunj un;
dàj rûnꞌ taj riñan ñanj si-nùguànꞌ Ma̱ꞌan Ñaꞌanj an:
Ni̱ si nitaj gakï̱nꞌïn ꞌhiáꞌ ni̱ gu̱nïn nej guiì si-nùguànꞌ,
ni̱ gunukuâꞌ gi̱ꞌhiaj ga̱nânꞌ nga ga̱ya̱ka̱j guendâ nej guiì si-nùguànꞌ.
5 Sani̱ si si-ga̱kï̂nꞌ nêꞌ niꞌñanj guendâ gi̱di̱gûnꞌ si sa ni̱ka̱a huin Ma̱ꞌan Ñaꞌanj an.
Ni̱ nùnj huin si ga̱to̱ꞌ hiôꞌ hia̱j do̱j.
Hiôꞌ ni̱ ruhuâj gàtà si hua̱ aꞌnanꞌ sa giꞌhiaj Ma̱ꞌan Ñaꞌanj an nga gaꞌhuij kastîgu riñan nej guiì na̱nj nîꞌ.
(Aꞌminj dàj rûnꞌ aꞌmin ꞌngo̱ síi.)
6 Sê danj huin mánj;
dadinꞌ si nitaj si giꞌhiaj Ma̱ꞌan Ñaꞌanj an sa ni̱ka̱a,
ni̱ dàj gi̱ꞌhia ga̱ꞌhue ga̱ne ga̱ya̱ka̱j guendaj si-ga̱kïnꞌ nej guiì ràꞌaj.
7 Sani̱ si nuguanꞌ digaꞌñuꞌunj gaꞌmînj giꞌhiaj gahuin nìko doj nuguanꞌ yàngàꞌ gidigân Ma̱ꞌan Ñaꞌanj an,
nùnj huin saj ni̱ gataj Ma̱ꞌan Ñaꞌanj an si hua̱ na̱nj huín sí gakï̱nꞌïn ràꞌaj.
8 Gataj da̱ꞌa̱j nej síi si gidigán si ga̱ꞌhue gi̱di̱gañuꞌunj un nej guiì ni̱ ga̱ꞌna̱ꞌ sa sàꞌaj riñan ninj.
Dànanj gataj da̱ꞌa̱j nej sôꞌ rayiꞌí guendâ ruhuâ nej sôꞌ gu̱du̱nâj aꞌnanꞌ nej sôꞌ ñùnj,
ni̱ huê dànanj gidigán gataj nej sôꞌ,
sani̱ sí aꞌmin dànanj ni̱ hua̱ ni̱ña̱n si ga̱ꞌna̱ꞌ si-kastigû Ma̱ꞌan Ñaꞌanj an riñan sôꞌ.
Giꞌhiaj daranꞌ nej guiì nun niꞌin Ma̱ꞌan Ñaꞌanj an gakï̱nꞌïn
9 Hiôꞌ nga ràꞌaj,
ni̱ dànanj huin nêꞌ nej judío doj gàꞌ daꞌ nej sí nàsìnùnj un nga na̱nj nîꞌ.
Sê danj huin mánj;
ni̱ gàꞌ garânj ruhuôꞌ rayiꞌî nej sí judío ngà nej sí nàsìnùnj un,
si daranꞌ nej sôꞌ huin sí gakï̱nꞌïn.
10 Dàj rûnꞌ nnunj riñan ñanj:
Ni̱ nitaj gàꞌ si ꞌngo̱ sí giꞌhiaj sa ni̱ka̱a mánj,
ni̱ gàꞌ si ꞌngo̱ nej sôꞌ nitaj mánj;
11 Nitaj sí garânj daꞌngaꞌ ruhuâ,
ni̱ nitaj sí nanaꞌhuiꞌ Ma̱ꞌan Ñaꞌanj an mánj.
12 Daranꞌ nej guiì gudunâ gaꞌanj chrej aꞌnanꞌan,
ni̱ daranꞌ ninj giꞌhiaj gakï̱nꞌïn;
nitaj guiì giꞌhiaj sa sàꞌaj mánj,
ni̱ gàꞌ si ꞌngo̱ ninj nitaj mánj.
13 Dàj rûnꞌ hua niꞌnï̂nj duꞌhua hiuꞌuj ñan gachinꞌ nej sij nîman huê danj hua hiuꞌuj tàj sigàn nej sij;
ngà hia nej sij digañuꞌunj nej sij.
Ni̱ dàj rûnꞌ mân nne giꞌhiaj gàhuìꞌ ruhuâ duꞌhua yukuáa huê danj mân nuguanꞌ kï̱j huaa ruhuâ duꞌhua nej sij;
14 Nda nìchra chre mân nuguanꞌ yìꞌìi ruhuâ duꞌhua nej sij ni̱ sa naꞌan chre dan giꞌhiaj nej sij.
15 Ûta hio nej sij ngà dakó nej sij guendâ dagahuiꞌ nej sij guiì;
16 giꞌhiaj yìꞌì nej sij ni̱ ûta giranꞌ sa̱ñu̱n nej guiì giꞌhiaj nej sij ngà nej chrej aꞌnanꞌ giꞌhiaj nej sij;
17 nitaj àmàn giniꞌin nej sij chrej giꞌhiaj ga̱ dïnꞌïnj ruhuâ nej sij mánj.
18 Nitaj àmàn nun yuꞌhuiꞌ ruhuâ nej sij niꞌin nej sij Ma̱ꞌan Ñaꞌanj an mánj.
19 Sani̱ niꞌin nej ñûnj dàj taj riñan si-ley Moisés,
ni̱ gaꞌmin riñan nej guiì ꞌnï̱nj riki ley,
daꞌnga ni̱ dḯn ga̱ duꞌhua daranꞌ nej guiì,
ni̱ dàñùn gùyùmàn si-kastigû Ma̱ꞌan Ñaꞌanj an riñan daranꞌ ninj;
20 dadinꞌ gàꞌ si ꞌngo̱ nej guiì si̱ gaꞌhue gataj si dagahuin ninj ley;
ni̱ ga̱ta̱j ninj si nitaj gakï̱nꞌïn tá yichrá ninj mánj;
dadinꞌ ley giꞌhiaj ni̱ giniꞌin ninj si giꞌhiaj ninj gakï̱nꞌïn,
nej si giꞌhiaj ninj sa sàꞌa.
Guendâ guyumân ruhuâ nej guiì ni̱ giꞌhiaj ninj sa ni̱ka̱a
21 Hia̱j ni̱ nùnj huin si gàꞌ hua̱ ley,
sani̱ gidigân Ma̱ꞌan Ñaꞌanj an sa ni̱ka̱ giꞌhia ngà nej guiì,
dadinꞌ huê danj nnunj riñan ley ni̱ huê danj gàꞌ gataj nej sôꞌ gataj dàj ga̱huin;
22 dadinꞌ guendâ guyumân ruhuâ nej guiì niꞌin ninj Ma̱ꞌan Jesucristo,
ni̱ gaꞌhue giꞌhiaj Ma̱ꞌan Ñaꞌanj an si ga̱huin ninj guiì giꞌhiaj sa ni̱ka̱a.
Dadinꞌ nitaj si giꞌhiaj ni̱nï̱n Ma̱ꞌan Ñaꞌanj an nej guiì mánj,
23 dadinꞌ rayiꞌî guendâ giꞌhiaj daranꞌ nej guiì gakï̱nꞌïn riñan Ma̱ꞌan Ñaꞌanj an,
ni̱ rayiꞌî dan ni̱ giꞌhiaj ane ninj riñanj,
24 sani̱ nitaj gakï̱nꞌïn tá yichrá nej guiì gàꞌ gananikàj ruhuâ niꞌin si-ga̱kïnꞌ dadinꞌ gàꞌ ginikaj chre Ma̱ꞌan Ñaꞌanj an nimân nìko rayiꞌî si-ga̱kïnꞌ ninj,
ni̱ Ma̱ꞌan Cristo Jesús huin sa giꞌhiaj ga̱na̱ni̱n ninj,
25 Ma̱ꞌan Ñaꞌanj an giꞌhiaj si ga̱ꞌhue gàhuìꞌ Ma̱ꞌan Cristo ni̱ gañanj tun,
ni̱ huej huin si ga̱ꞌhue gi̱ni̱kaj nimân nìko rayiꞌîꞌ si-ga̱kïnꞌ nej guiì.
Ni̱ si gùyùmàn ruhuâ nej guiì niꞌin ninj Ma̱ꞌan ni̱ ga̱ꞌhue gi̱nika nimân nìko rayiꞌî si-ga̱kïnꞌ ninj.
Ni̱ gidigân Ma̱ꞌan dàj ganahuin sàꞌ nimân ninj,
ni̱ ginika nimân nìko rayiꞌî nej gakï̱nꞌ giꞌhiaj ninj nga nï̀nꞌ gàchin gùyùmàn ruhuâ ninj niꞌin ninj Ma̱ꞌan.
26 Dadinꞌ ûta nùkuaj ruhuâ Ma̱ꞌan Jesús,
ni̱ gidiganj dàj ga̱na̱huin ni̱ka̱ sa gi̱ꞌhiaj nej guiì diû hia̱j,
dadinꞌ dàj rûnꞌ hua ni̱ka̱ sa giꞌhiaj Ma̱ꞌan Ñaꞌanj an ni̱ giniꞌînꞌ si huin ꞌngo̱ Ñaꞌanj giꞌhiaj sa ni̱ka̱a,
ni̱ nga guyumân ruhuôꞌ niꞌînꞌ Ma̱ꞌan ni̱ nagiꞌhiaj ni̱kaj ñùnꞌ.
27 Hiôꞌ ni̱ dànèꞌ gunâj sa ûta huin síi ruhuâ sôꞌ ràꞌaj.
Ganarëꞌ man.
Ni̱ ahuin ley giꞌhiaj ganarëꞌëj ràꞌaj.
Ganarëꞌ man guendâ giꞌhiaj ninj sa sàꞌa nîꞌ.
Sê danj huin mánj,
ganarëꞌ man guendâ guyumân ruhuâ ninj niꞌin ninj Ma̱ꞌan Jesús.
28 Sa garânj daꞌngaꞌ ruhuôꞌ huin si,
nagiꞌhiaj ni̱ka̱ Ma̱ꞌan Ñaꞌanj an nej guiì guendâ guyumân ruhuâ ninj niꞌin ninj Ma̱ꞌan Jesús,
ni̱ sê guendâ dagahuin ninj sa taj si-ley Moisés ni̱ gananin ninj mánj.
29 Man ꞌngo̱ rïn Daꞌanj nej judío huin Ma̱ꞌan Ñaꞌanj an na̱nj nîꞌ.
Sê huej huin Daꞌanj nej sí nàsìnùnj un nej ràꞌ saj ûnꞌ.
Yàngàꞌ hia ni̱ huej huin Daꞌanj nej sí nàsìnùnj un nej na̱nj ánj.
30 Dadinꞌ ꞌngo̱ rïn Ma̱ꞌan Ñaꞌanj an hua,
ni̱ si gùyùmàn ruhuâ nej sôꞌ giyiꞌneꞌ do̱j nnïnj arán raa̱ nneè nàꞌàj niꞌin nej sôꞌ Ma̱ꞌan Jesús ni̱ ga̱ꞌhue gi̱nika nimân nìko rayiꞌî nej sôꞌ,
ni̱ huê danj na̱nj ga̱ꞌhue ginika nimân nìko rayiꞌî nej sôꞌ nitaj si giyiꞌneꞌ do̱j nnïnj arán raa̱ nneè nàꞌàj na̱nj ánj.
31 Hiôꞌ ni̱ guendâ guyumân ruhuôꞌ niꞌînꞌ Ma̱ꞌan Jesús ni̱ gudurëꞌ si-ley Moisés na̱nj nîꞌ.
Sê danj huin mánj,
dànanj nagiꞌhiôꞌ si ley ni̱ huin sa du̱ꞌhue̱ doj na̱nj ánj.