Ni̱ka̱ huaj si ga̱na̱ka̱j guendâ Ma̱ꞌan Ñaꞌanj an sa giꞌhiaj daꞌ goꞌngo̱ nej guiì
2
Huê danj ni̱,
si̱ gaꞌhue ga̱ta̱jꞌ si nun niꞌin daꞌngâꞌ sa giꞌhiâꞌ mánj;
ni̱ ahuin na̱nj sí huînꞌ,
dadinꞌ si ûtaꞌ chrêꞌ gakï̱nꞌïn yichrá nej duguiꞌ ni̱ ga̱ꞌhue ni̱ ga̱ꞌa̱nj ni̱ꞌhia̱ ma̱ꞌânꞌ,
dadinꞌ dàj rûnꞌ giꞌhiaj nej sí dânj huê danj giꞌhiâꞌ.
2 Sani̱ niꞌin nej ñûnj si yàngàꞌ hia ni̱ gi̱ꞌhiaj Ma̱ꞌan Ñaꞌanj an kastîgu nej guiì giꞌhiaj gakï̱nꞌïn riñanj.
3 Ni̱ ganï̂n ruhuâꞌ,
si ga̱ꞌhue ga̱na̱ka̱j guendâꞌ rayiꞌî aꞌngô nej guiì sani̱ nitaj si nakaj guendâꞌ rayiꞌî ma̱ꞌânꞌ dadinꞌ dàj rûnꞌ giꞌhiaj ninj ni̱ huê danj giꞌhiâꞌ,
ni̱ si̱ gahuin chre sa giꞌhiâꞌ dadinꞌ dàñùn ga̱na̱huin ràꞌâꞌ si-kastigû Ma̱ꞌan Ñaꞌanj an na̱nj ánj.
4 Nun gayakaj guendâꞌ sa du̱ꞌhue̱ staꞌu riki Ma̱ꞌan Ñaꞌanj an riñanꞌ dadinꞌ guruguñuꞌun sòꞌ,
ni̱ ûta nùkuaj hua ruhuaj ngàꞌ ni̱ ûta nìchràj hua ruhuaj niꞌin sòꞌ,
ni̱ nitaj si gayakaj guendâꞌ si guruguñuꞌun sòꞌ ni̱ nne anaꞌhui si gànànìkàj ruhuâꞌ rayiꞌî nej si-gakï̂nꞌ mínj.
5 Sani̱ guendâ ûta ganahuin tsì nimânt ni̱ ñan nun gànànìkàj ruhuâꞌ rayiꞌî nej si-ga̱kï̂nt,
ni̱ dànanj ûta nachrâꞌ doj gakï̱nꞌïn ruhuâ nimânt ni̱ nga gùyùmàn gui nga na̱gi̱ꞌhiaj Ma̱ꞌan Ñaꞌanj an guendâ ngàꞌ ni̱ ûta nìko kastîgu ga̱na̱huin ràꞌâꞌ.
6 Ni̱ na̱ruꞌhue Ma̱ꞌan Ñaꞌanj an riñan daꞌ ꞌngo̱ nej guiì dàj na̱nj hua ma̱ꞌan nej sa giꞌhiaj ninj:
7 Ni̱ gi̱ꞌhiaj Ma̱ꞌan Ñaꞌanj an si ga̱ne nìgànj nej guiì ni̱kï̱n ran,
si dagahuin hueꞌê ninj si-nùguànꞌanj,
ni̱ gaꞌnḯn ñan ninj nej sa màn yàtàꞌa,
ni̱ ga̱ꞌmi̱n hueꞌê Ma̱ꞌan Ñaꞌanj an rayiꞌî ninj dadinꞌ nanaꞌhuiꞌ ninj guendâ ga̱ne nìgànj ninj,
8 sani̱ ûta naꞌan ruhuâ Ma̱ꞌan niꞌin nej guiì ûta ganahuij ruhuâ niꞌin ma̱ꞌan,
ni̱ nitaj si dagahuin ninj nuguanꞌ yàngàꞌa,
dadinꞌ dànanj nìhiàꞌ ruhuâ ninj giꞌhiaj ninj gakï̱nꞌïn;
9 sani̱ ûta gi̱ranꞌ sa̱ñu̱n ni̱ ûta ga̱huin ruhuâ nej guiì giꞌhiaj gakï̱nꞌïn giꞌhiaj Ma̱ꞌan Ñaꞌanj an,
ni̱ gàꞌ si̱nï̱n gi̱ranꞌ sa̱ñu̱n nej sí judío ni̱ neꞌ rùkù ni̱ gi̱ranꞌ sa̱ñu̱n nej sí nàsìnùnj un,
10 sani̱ dànanj ga̱ꞌmi̱n hueꞌê Ma̱ꞌan Ñaꞌanj an ni̱ gi̱ꞌhia si ga̱ dïnꞌïnj ruhuâ nej guiì giꞌhiaj sa sàꞌa ni̱ ga̱na̱nanj ninj,
ni̱ gàꞌ si̱nï̱n ni̱ gi̱ꞌhia sa sàꞌaj ngà nej judío ni̱ neꞌ rùkù ni̱ gi̱ꞌhiaj sa sàꞌaj ngà nej guiì nàsìnùnj un.
11 Dadinꞌ nitaj si hua̱ ni̱ña̱n ꞌngo̱ yiꞌnïnꞌ nej guiì gininj hueꞌê riñan Ma̱ꞌan Ñaꞌanj an mánj.
12 Dadinꞌ daranꞌ nej guiì giꞌhiaj gakï̱nꞌïn sani̱ nun gi̱ni̱ꞌin ninj si-ley Moisés,
ni̱ gahuiꞌ ninj sani̱ ga̱na̱huin ràꞌa ninj kastîgu dàj nìko ma̱ꞌan giꞌhiaj ninj gakï̱nꞌïn;
ni̱ daranꞌ nej guiì giniꞌin si-ley Moisés ni̱ giꞌhiaj ninj gakï̱nꞌïn,
ni̱ gahuin kastîgu ninj dàj rûnꞌ giyiꞌnïnꞌ suun riñan si-ley Moisés;
13 dadinꞌ si gunïn nej guiì si-nùguànꞌ Ma̱ꞌan Ñaꞌanj an sani̱ nitaj si dagahuin ninj huê danj ni̱ nitaj si huin ninj guiì ni̱ka̱a mánj,
dadinꞌ nej guiì gunïn ni̱ dagahuin ninj dàj rûnꞌ taj ley ni̱ nitaj gakï̱nꞌïn tá yichrá ninj mánj.
14 Dadinꞌ nej sí nàsìnùnj un ni̱ nùnj huin si nitaj si niꞌin nej sôꞌ sun giyiꞌnïnꞌ giꞌhiaj ley ni̱ dagahuin nej sôꞌ sun giyiꞌnïnꞌ giꞌhiaj ley,
dadinꞌ niꞌin nej sôꞌ ahuin sa huin sa aꞌnanꞌan ni̱ niꞌin nej sôꞌ ahuin sa huin sa sàꞌaj,
15 ni̱ ngà nej sa sàꞌ giꞌhiaj nej sôꞌ ni̱ gidigân nej sôꞌ si gàꞌ nu̱n si-ley Ma̱ꞌan Ñaꞌanj an ruhuâ nimân nej sôꞌ,
dadinꞌ huê danj gidigân daꞌnga gaꞌnḯn Ma̱ꞌan Ñaꞌanj an ruhuâ nimân nej sôꞌ,
ni̱ ga̱ꞌmi̱n gakïnj rayiꞌî nej gakï̱nꞌ giꞌhiaj nej sôꞌ nej si dunaꞌhue rayiꞌî nej sa sàꞌ giꞌhiaj nej sôꞌ,
16 ni̱ huê danj na̱nj na̱gi̱ꞌhiaj Ma̱ꞌan Ñaꞌanj an guendâ ngà daꞌ ꞌngo̱ nej guiì,
rayiꞌî nej gakï̱nꞌ hua̱ huì giꞌhiaj ninj,
nga gùyùmàn gui nga ga̱na̱nikïnꞌ ninj riñan Ma̱ꞌan Jesucristo,
dàj rûnꞌ nanï̂n nuguan gi̱ꞌhiaj ga̱na̱ni̱n nej guiì nga gidigán.
Nej judío ngà si-ley Moisés
17 Huê danj,
ni̱ sòꞌ taj si huînꞌ judío,
ni̱ tajꞌ si ûta huînꞌ dadinꞌ niꞌînꞌ si-ley Moisés,
ni̱ taj si niꞌînꞌ Ma̱ꞌan Ñaꞌanj an,
18 ni̱ niꞌînꞌ sa garanꞌ ruhuâ Ma̱ꞌan Ñaꞌanj an,
ni̱ chru̱nꞌ si-ley Moisés ni̱ ganï̂n ruhuâꞌ si ûta niꞌînꞌ doj,
19 ni̱ ganï̂n ruhuâꞌ si chru̱nꞌ ni̱ ga̱ꞌhue gi̱di̱gânꞌ nej sí du̱chri,
ni̱ ga̱ꞌhue gi̱ꞌhiáꞌ ga̱ra̱n daꞌngaꞌ ruhuâ nej guiì nne riñan gakï̱nꞌïn,
20 ni̱ ganï̂n ruhuâꞌ si ga̱ꞌhue gidigânꞌ riñan nej sí nitaj si chru̱un,
ni̱ ga̱huînꞌ maestrû riñan nej sílìj i,
ni̱ giꞌhiâꞌ si si-ley Moisés ni̱ huin dàj rûnꞌ huin nej nuguanꞌ chru̱n gidigân nej sí chru̱un ni̱ huê danj na̱nj niꞌînꞌ si huin nuguanꞌ yàngàꞌa.
21 Ni̱ si gidigânꞌ aꞌngô nej guiì,
ni̱ nitaj si dagahuînꞌ nej sa gidigânꞌ dânj ni̱ ganatâꞌ si-nùguànꞌ Ma̱ꞌan Ñaꞌanj an ni̱ gatajꞌ si si̱ giꞌhiaj tu̱ nej guiì,
ni̱ sòꞌ ni̱ giꞌhiaj tu̱ꞌ.
22 Ni̱ gatajꞌ si si̱ gaꞌhue gi̱nikaj nej guiì nika duguiꞌ ninj,
ni̱ sòꞌ ni̱ ni̱ka̱j nika duguît.
Ni̱ gatajꞌ si gininj aꞌnanꞌ nej ñaꞌanj giꞌhiaj ra̱ꞌa nej síi riñanꞌ.
Ni̱ giꞌhiaj tu̱ꞌ nej rasu̱n gutaꞌ nej guiì riñan nej ñaꞌanj giꞌhiaj ra̱ꞌa nej síi.
23 Ni̱ gatajꞌ si ûta huînꞌ dadinꞌ niꞌînꞌ si-nùguànꞌ Ma̱ꞌan Ñaꞌanj an.
Sani̱ nitaj si dagahuînꞌ ni̱ nitaj sij ni̱ka̱jꞌ chre̱j riñan Ma̱ꞌan Ñaꞌanj an mánj.
24 Dadinꞌ huê danj nnunj riñan ñanj si-nùguànꞌ Ma̱ꞌan Ñaꞌanj an.
“Ni̱ gaꞌmin kï̱j nej guiì nàsìnùnj un rayiꞌî Ma̱ꞌan Ñaꞌanj an guendâ giꞌhiaj nej suj sa aꞌnanꞌan.”
25 Yàngàꞌ hia ni̱ dùgùnàj huaj si gìyìꞌnèꞌ do̱j nnïnj arán raa̱ nneè nàꞌàjꞌ,
si hia dagahuînꞌ si-ley Ma̱ꞌan Ñaꞌanj an;
sani̱ si nitaj si dagahuînꞌ si-ley Ma̱ꞌan Ñaꞌanj an,
hiôꞌ ni̱ dàj rûnꞌ huin si nun gìyìꞌnèꞌ do̱j nnïnj arán raa̱ nneè nàꞌàjꞌ huin na̱nj ánj.
26 Ni̱ sí nun gìyìꞌnèꞌ do̱j nnïnj arán raa̱ nneè nàꞌàj sani̱ dagahuin hueꞌê sôꞌ si-ley Ma̱ꞌan Ñaꞌanj an,
ni̱ dàj rûnꞌ huin si gàꞌ giyiꞌneꞌ do̱j nnïnj arán raa̱ nneè nàꞌàj huin sôꞌ huin.
27 Sani̱ sí nun gìyìꞌnèꞌ do̱j nnïnj arán raa̱ nneè nàꞌàj,
sani̱ dagahuin sôꞌ si-ley Ma̱ꞌan Ñaꞌanj an,
ni̱ ga̱ra̱n ruhuâ sôꞌ rayiꞌîꞌ,
dadinꞌ giyiꞌneꞌ do̱j nnïnj arán raa̱ nneè nàꞌàjꞌ sani̱ nitaj si dagahuînꞌ si-ley Ma̱ꞌan Ñaꞌanj an ni̱ dàj rûnꞌ huin si nun gìyìꞌnèꞌ do̱j nnïnj arán raa̱ nneè nàꞌàjꞌ huin.
28 Dadinꞌ sê guendâ giyiꞌneꞌ do̱j nnïnj arán raa̱ nneè nàꞌàjꞌ ni̱ gàꞌ huînꞌ judío,
ni̱ sê guendâ giyiꞌneꞌ do̱j nnïnj arán raa̱ nneè nàꞌàjꞌ ni̱ huînꞌ doj mánj.
29 Judío yàngàꞌa huin sí gàꞌ ganahuin sàꞌ ruhuâ nimân,
dadinꞌ gàꞌ ganahuin nàkà nimân sôꞌ,
ni̱ guendâ giyiꞌneꞌ do̱j nnïnj raa̱ nneè nàꞌàj nej síi ni̱ sê sa ña̱ꞌa̱n staꞌu huin,
dadinꞌ sa ña̱ꞌa̱n staꞌu huin si ga̱na̱huin nàkà nimân nej guiì:
Ni̱ sê sa ña̱ꞌa̱n staꞌu huin guendâ ga̱huin chru̱nꞌ ley mánj,
sa ña̱ꞌa̱n staꞌu huin si ga̱huin chru̱nꞌ da̱gahuînꞌ sun gaꞌnïn su̱n Ma̱ꞌan Espíritu Santo riñunꞌ,
ni̱ nùnj huin si nun ga̱ranꞌ ruhuâ nej síi sa giꞌhiôꞌ sani̱ ga̱ra̱nꞌ ruhuâ Ma̱ꞌan Ñaꞌanj an sa giꞌhiôꞌ na̱nj ánj.