Guyumân Ma̱ꞌan Espíritu Santo
2
Nga guyumân gui gi̱nun giꞌñanj Pentecostés,
ni̱ hua̱ gu̱ña̱n ruhuâ daranꞌ nej sôꞌ nìkòꞌ rukû Ma̱ꞌan Jesús ni̱ màn nùguànꞌàn nej sôꞌ ruhuâ hueꞌe.
2 Ni̱ nàsìnùnj chre gaꞌnaꞌ ꞌngo̱ sa gari̱n xi dânj neꞌ yàtàꞌa ni̱ gahuin dàj rûnꞌ nùkuaj gaꞌhuiꞌ nanèe,
ni̱ gachra nï̀nꞌ sa gari̱n dânj ruhuâ hueꞌ ñan màn nej sij.
3 Ni̱ guruguiꞌ gàꞌì nej nânj aꞌmin nej guiì ni̱ dàj rûnꞌ hua ñaꞌaan huaj,
ni̱ gayaꞌnïnj ñan màn nej sij,
ni̱ gataj ahui nej sij.
4 Ni̱ nda nìchra chre gachra Maꞌan Espíritu Santo ruhuâ nimân nej sij,
ni̱ gayiꞌì nej sij gaꞌmin nej sij aꞌngô nej nânj aꞌmin nej guiì,
dàj gaꞌhuiꞌ Ma̱ꞌan Espíritu Santo ga̱ꞌmi̱n nej sij.
5 Hiôꞌ ni̱ diû nânj ni̱ màn ûta gàꞌì nej judío gayaꞌnï̀n gaꞌanj aꞌngô nej yumanꞌ ri̱ña̱n ginikaj ñuꞌunj Roma,
ni̱ ꞌì ruhuâ nej sôꞌ niꞌin nej sôꞌ Ma̱ꞌan Ñaꞌanj an,
ni̱ nej gui dânj ni̱ nne nej sôꞌ ruhuâ yumanꞌ snàꞌànj Jerusalén.
6 Ni̱ nga gunïn nej guiì sa gari̱n xi dânj;
ni̱ naraꞌhuiꞌ ûta gàꞌì ninj hiuj dânj;
ni̱ guruguiꞌ chìꞌ ruhuâ ninj sa gahuin hiuj dânj,
dadinꞌ gunïn ninj si daꞌ goꞌngo̱ nej guiì màn ruhuâ hueꞌ dânj aꞌmin nej nânj gaꞌminj ninj.
7 Ni̱ nda gaꞌanj ñùn ruhuâ ninj ni̱ gahuin ña̱ꞌanj ruhuâ ninj,
ni̱ taj ni̱nj:
—Niꞌhiaj nej suj,
ni̱ sê nej guiì màn yumanꞌ Galilea huin nej guiì nânj ràꞌ saj ûnꞌ.
Ni̱ nùnj huin saj ni̱ aꞌmin ninj dànanj ràꞌaj.
8 Nùnj huin saj ni̱ gunï̂nꞌ gaꞌmin daꞌ goꞌngo̱ ninj nej nânj aꞌminꞌ daꞌ goꞌngo̱ nêꞌ nuguanꞌ gahuin chru̱nꞌ gaꞌmin àsìj ga liꞌ ràꞌaj.
9 Dadinꞌ màn nej duguiꞌ ꞌna̱ꞌ yumanꞌ Partia,
nej sôꞌ ꞌna̱ꞌ riñan hioꞌó Media,
riñan hioꞌó Elam,
riñan hioꞌó Mesopotamia,
riñan hioꞌó Judea,
riñan hioꞌó Kapodacia,
riñan hioꞌó Ponto,
riñan hioꞌó Asia,
10 riñan hioꞌó Frigia riñan hioꞌó Panfilia,
riñan hioꞌó Egipto riñan hioꞌó Africa,
riñan hioꞌó Sirene,
ni̱ nej sôꞌ màn yumanꞌ snàꞌànj Roma,
ni̱ huê danj na̱nj màn nej judío ni̱ màn nej sí guyumân ruhuâ niꞌin nej nuguanꞌ gidigân nej judío.
11 Nej sôꞌ ꞌna̱ꞌ riñan hioꞌó Creta,
riñan hioꞌó Arabia,
ni̱ gunïnꞌ gaꞌmin ninj nej nânj gaꞌmin nêꞌ ni̱ gataj ninj si sa sàꞌ nï̀nꞌïn huin Ma̱ꞌan Ñaꞌanj an.
12 Ni̱ ûta gahuin ña̱ꞌanj ruhuâ nej sij,
ni̱ ûta guruguiꞌ chìꞌ ruhuâ nej sij,
ni̱ gataj nej sij gunïn daꞌ goꞌngo̱ nej duguiꞌ nej sij:
—Nùnj huin si ga̱ta̱j nânj ruhuâꞌ ràꞌaj.
13 Sani̱ da̱ꞌa̱j nej sí màn dânj gaꞌmin duku,
ni̱ aꞌngô da̱ꞌa̱j nej sôꞌ gataj:
—Si àyìnï̀n nej sôꞌ mân nej sôꞌ hiuj nânj.
Nânj huin nga gayiꞌì si̱nï̱n Pedro gaꞌmin sôꞌ
14 Hiôꞌ ni̱ ganayumàn Pedro,
ni̱ huê danj na̱nj ganayumàn aꞌngô nej yàn nej sôꞌ gaꞌnaꞌ gahuin chru̱n riñan Ma̱ꞌan Jesús,
ni̱ ûta nùkuaj gaꞌmin Pedro ni̱ gataj sôꞌ:
—Nej suj màn yumanꞌ Judea,
ni̱ daranꞌ nej suj nne ruhuâ yumanꞌ snàꞌànj Jerusalén,
ni̱ daranꞌ nej suj giniꞌin dàj gahuin ni̱ gu̱nïn nej suj sa gàꞌmìn.
15 Ni̱ gachej ruhuâ nej suj dadinꞌ ganï̂n ruhuâ nej suj si àyìnï̀n nej ñûnj,
sani̱ hia̱j gisîj gaꞌ ꞌï̀n neꞌ ni̱ganꞌan.
16 Dadinꞌ huê dànanj ga̱huin gataj Joel sôꞌ gataj dàj ga̱huin:
17 Ni̱ gataj Ma̱ꞌan Ñaꞌanj an,
si nej gui ga̱ꞌna̱ꞌ neꞌ ña̱an,
ni̱ gàꞌnï̀n ga̱ꞌna̱ꞌ Ma̱ꞌan Espíritu Santo riñan daranꞌ nej suj,
ni̱ ga̱ta̱j daꞌnin naꞌu nej suj ni̱ daꞌnin yànà nej suj dàj ga̱huin diû ga̱ꞌna̱ꞌ neꞌ ña̱an;
ni̱ nej sí ña̱an ngà nej siyànà ña̱an,
ni̱ ga̱nï̱n Ma̱ꞌan Ñaꞌanj an sa gi̱ni̱ꞌin nej sôꞌ,
ni̱ nga atoj nej síchìj achij i ni̱ gàꞌnï̀nꞌ nej sôꞌ gi̱ꞌhiaj Ma̱ꞌan Ñaꞌanj an.
18 Nej gui dânj ni̱ gàꞌnï̀n ga̱ꞌna̱ꞌ Ma̱ꞌan Espíritu Santo,
riñan nej guiì ganahuij ruhuâ gi̱ꞌhiaj sun si-sùnj,
ni̱ ga̱ꞌnaj riñan nej síi ngà riñan nej siyànàa,
ni̱ gànàtàꞌ nej sôꞌ ni̱ ga̱ta̱j nej sôꞌ dàj ga̱huin nej gui ga̱ꞌna̱ꞌ neꞌ ña̱an.
19 Ni̱ gi̱ꞌhiâ si gi̱ni̱ꞌin nej guiì daꞌngaꞌa neꞌ yàtàꞌa,
ni̱ gi̱ni̱ꞌin ninj daꞌngaꞌa riñan hioꞌóo,
ni̱ gi̱ni̱ꞌin ninj tun,
ni̱ ñaꞌaan,
ni̱ dàj rûnꞌ gimân nga huê danj gimàn gatse̱ꞌe riñan hioꞌóo.
20 Ni̱ ga̱huin ru̱mi̱nꞌ riñan gui,
ni̱ dàj rûnꞌ ma̱re hua tun huê danj ga̱ ma̱re riñan ahuii.
Ni̱ gàꞌ si̱nï̱n ga̱huin dànanj daꞌnga ni̱ guyumân gui nga ga̱ꞌna̱ꞌ Ma̱ꞌan Señor,
ni̱ na̱gi̱ꞌhia guendâ ngà nej guiì màn ruhuâ yumiguìi,
ûta nìko ga̱ sa ga̱huin gui dânj ni̱ gi̱ni̱ꞌin daranꞌ nej guiì sa ga̱huin.
21 Ni̱ daranꞌ nej guiì gànàtàꞌ duꞌhua siyu̱gui Ma̱ꞌan ni̱ ga̱na̱ni̱n ninj gi̱ꞌhiaj Ma̱ꞌan.
22 ’Gu̱nïn daranꞌ nej suj màn yumanꞌ Israel nuguanꞌ gàꞌmìn:
Dadinꞌ gànànï̀nj rayiꞌî Ma̱ꞌan Jesús ꞌna̱ꞌ yumanꞌ Nazaret,
daranꞌ nêꞌ niꞌin si Ma̱ꞌan Ñaꞌanj an gaꞌnḯn Ma̱ꞌan Jesús gaꞌnaj siganï̂nj nêꞌ ni̱ giꞌhia ûta gàꞌì nej sa sàꞌa,
ni̱ giꞌhia daꞌngaꞌa giniꞌin nêꞌ,
dàj rûnꞌ gàꞌ niꞌin nej suj;
23 huê sí nânj,
huin sí nagaꞌhuiꞌ nej yìꞌnï̀nꞌ nej rej,
dadinꞌ huê dànanj gi̱ranꞌ ni̱ña̱n sôꞌ gataj Ma̱ꞌan Ñaꞌanj an,
gi̱da̱ꞌa nej suj sij,
ni̱ nàgàꞌhuìꞌ nej suj sij raꞌa nej sí romano,
ni̱ godokoꞌ nej sôꞌ sij riñan rugutsìi ni̱ gàhuìꞌ sij.
24 Sani̱ ganaꞌnï̂nj sij giꞌhiaj Ma̱ꞌan Ñaꞌanj an,
dadinꞌ si̱ gaꞌhue gàꞌ ꞌngo̱ gàhuìꞌ sij ni̱ si̱ gaꞌhue gùnàj sij daranꞌ diû siganï̂nj nej nîman mánj.
25 Dadinꞌ àsìj nâ gàꞌ gaꞌmin David rayiꞌî sij ni̱ gataj sôꞌ:
Daranꞌ diû giniꞌín Ma̱ꞌan si-Señoj ni̱ hua neꞌ ña̱an riñânj;
dadinꞌ ni̱kïnj raꞌá neꞌ huàꞌàj,
ni̱ si̱ guyuꞌhuí mánj.
26 Rayiꞌî dan ni̱ hua̱ dïnꞌïnj ruhuâ nimânj,
ni̱ ganahuin nìhiàꞌ ruhuâj ni̱ gachrâ chraꞌa,
ni̱ daranꞌ diû gànàꞌhuì si gu̱ru̱gûñuꞌunj Ma̱ꞌan si-Señoj ñùnj.
27 Dadinꞌ si̱ gudunâj Ma̱ꞌân rèꞌ ma̱ꞌan nimânj ñan màn nej nîman,
ni̱ si̱ gaꞌnï̂nj Ma̱ꞌân rèꞌ si gi̱ri̱ꞌhiuj nneè kú.
28 Ni̱ gidigân Ma̱ꞌân rèꞌ chrej gàchè nga gané riñan hioꞌóo;
ni̱ ûta ganahuin nìhiàꞌ ruhuâj giꞌhiaj Ma̱ꞌân rèꞌ dadinꞌ nne Ma̱ꞌân rèꞌ ngàj na̱nj ánj.
29 ’Gu̱nïn nej suj di̱nï̂nj,
dadinꞌ gaꞌmin nîꞌnï̀n rayiꞌî sachij David riñan nej suj,
dadinꞌ gahuiꞌ sôꞌ ni̱ gachinꞌ nej sij nneè kú sôꞌ,
ni̱ niꞌinꞌ nêꞌ ñan nngaj nneè kú sôꞌ nda gui hia̱j.
30 Sani̱ David huin sí gataj dàj ga̱huin,
ni̱ gaꞌ niꞌin sôꞌ si Ma̱ꞌan Ñaꞌanj an gataj si yàngàꞌ hia nï̀nꞌ ga̱na̱chinika,
siganï̂nj nej daꞌní sôꞌ Ma̱ꞌan Cristo guendâ ga̱ne gi̱nikaj sunj ñan gane sôꞌ gi̱nikaj su̱n sôꞌ.
31 Ni̱ àsìj diû dânj ni̱ gàꞌ niꞌin David si gànàꞌnï̀nj Ma̱ꞌan Cristo,
ni̱ gaꞌmin sôꞌ si hua̱ ni̱ña̱n si gàhuìꞌ Ma̱ꞌan Cristo sani̱ ga̱na̱ꞌnïn siganï̂nj nej nîman,
ni̱ si̱ giriꞌhiuj nneè ku mánj.
32 Ni̱ daranꞌ nêꞌ giniꞌin si ganaꞌnï̂nj Ma̱ꞌan Jesús giꞌhiaj Ma̱ꞌan Ñaꞌanj an.
33 Huê danj,
ni̱ ginika Ma̱ꞌan Jesús gaꞌan ni̱ gunej raꞌa neꞌ huàꞌaj,
ni̱ huê Ma̱ꞌan gaꞌhuiꞌ Espíritu Santo ra̱ꞌa Ma̱ꞌan Jesús,
hia̱j ni̱ Ma̱ꞌan Jesús gaꞌnḯn gaꞌnaꞌ Ma̱ꞌan Espíritu Santo riñan nêꞌ.
34 Dadinꞌ gàꞌ niꞌînꞌ si sê David gahui gaꞌanj yàtàꞌa mánj;
dadinꞌ gataj sij:
Gataj Ma̱ꞌan Ñaꞌanj an gu̱nïn si-Seño maꞌán:
“Ganê sòꞌ raꞌá neꞌ huàꞌàj,
35 nda gùchrù gi̱ngaj nej sí gunïnꞌ ngàꞌ riki dakót.”
36 ’Ni̱ giniꞌin daranꞌ nej suj nne,
ruhuâ yumanꞌ Israel,
si Ma̱ꞌan Jesús dunikòꞌ nej suj riñan rugutsìi,
ni̱ giꞌhiaj Ma̱ꞌan Ñaꞌanj an si ga̱huin Señor ni̱ ga̱huin Ma̱ꞌan Cristo riñan daranꞌ nej guiì màn ruhuâ yumiguìi.
37 Ni̱ nga gunïn daranꞌ nej guiì nej nuguanꞌ nânj,
ni̱ ûta gahuin ruhuâ ninj ngà nda ruhuâ nimân ninj,
ni̱ gataj ninj riñan Pedro ngà riñan aꞌngô nej sí gidigân si-nùguànꞌ Ma̱ꞌan Ñaꞌanj an:
—Nùnj huin si gi̱ꞌhiaj nej ñûnj ni̱ ga̱ꞌhue gi̱nikaj Ma̱ꞌan Ñaꞌanj an nimân nìko rayiꞌî si-ga̱kïnꞌ nej ñûnj ràꞌaj di̱nï̂nj.
38 Ni̱ gataj Pedro:
—Nànìkàj ruhuâ nej suj rayiꞌî si-ga̱kïnꞌ nej suj,
ni̱ gàtàꞌ nne daꞌ goꞌngo̱ nej suj ngà siyu̱gui Ma̱ꞌan Jesucristo daꞌnga ni̱ gaꞌhue gi̱nikaj Ma̱ꞌan Ñaꞌanj an nimân nìko rayiꞌî si-ga̱kïnꞌ nej suj;
ni̱ ga̱ꞌhue ga̱na̱huin ra̱ꞌa nej suj Ma̱ꞌan Espíritu Santo.
39 Dadinꞌ gàꞌ gataj Ma̱ꞌan Ñaꞌanj an si ri̱kij Ma̱ꞌan Espíritu Santo ga̱ne ngà nej suj,
ni̱ huê danj na̱nj ga̱ne ngà nej daꞌní nej suj,
ni̱ huê danj na̱nj ga̱ne ni̱ gi̱ꞌhia ga̱na̱ni̱n daranꞌ nej guiì màn nï̀nꞌ gàchràꞌ ruhuâ yimiguìi.
40 Ni̱ dunaꞌnga Pedro ni̱ gaꞌmin sôꞌ riñan nej guiì màn hiuj dânj,
ni̱ gataj sôꞌ:
—Akï̂n si ga̱ꞌna̱ꞌ nej suj riñan Ma̱ꞌan Ñaꞌanj an ni̱ gi̱ꞌhia si ga̱na̱ni̱n nej suj riñan sañun gàꞌ hua̱ yu̱gui ga̱na̱huin ra̱ꞌa nej guiì kï̱j huaa.
41 Huê danj ni̱ guyumân ruhuâ nej guiì niꞌin ninj si-nùguànꞌ Ma̱ꞌan Ñaꞌanj an ni̱ gataꞌ nne ninj,
ni̱ huàꞌnï̀nj mîn ninj huin;
ni̱ ganakaj duguiꞌ ninj ngà nej dinï̂nt.
42 Ni̱ guyumân ruhuâ ninj niꞌin ninj nej nuguanꞌ gidigân nej sôꞌ gaꞌanj gi̱di̱gân si̱nï̱n si-nùguànꞌ Ma̱ꞌan Ñaꞌanj an,
ni̱ hua̱ nùguànꞌàn ruhuâ daranꞌ ninj,
ni̱ yâ nùguànꞌàn daranꞌ ninj,
ni̱ màn nùguànꞌàn ninj aꞌmin ninj ngà Ma̱ꞌan Ñaꞌanj an.
Dàj giꞌhiaj nej cristiano gimân nga gayiꞌì nuhuî si̱nï̱ïn
43 Ni̱ gaꞌnaꞌ sa yuꞌhuiꞌi riñan daranꞌ nej guiì;
ni̱ ûta nìko hua sa giꞌhiaj nej sí gidigân si̱nï̱n si-nùguànꞌ Ma̱ꞌan Ñaꞌanj an ni̱ ûta hua nej daꞌngaꞌa giꞌhiaj nej sôꞌ.
44 Ni̱ hua̱ nùguànꞌàn ruhuâ daranꞌ nej sôꞌ guyumân ruhuâ niꞌin si-nùguànꞌ Ma̱ꞌan Ñaꞌanj an,
ni̱ guruguñuꞌunj nej sôꞌ sa gàchin riñan ꞌngo̱ ni̱ aꞌngô nej duguiꞌ nej sôꞌ;
45 ni̱ guduꞌhuêj nej sôꞌ doꞌó nej sôꞌ ngà nej sa hua̱ riñan nej sôꞌ,
ni̱ gunuchraꞌ da̱ꞌa̱j nej sôꞌ nej rasu̱n dânj,
dàj gachîn ma̱ꞌan riñan daꞌ goꞌngo̱ nej sôꞌ.
46 Ni̱ hua̱ gu̱ña̱n ruhuâ nej sôꞌ ni̱ nitaj si giyichinꞌ ruhuâ nej sôꞌ guendâ ga̱ꞌa̱nj nej sôꞌ nûhui,
ni̱ huê danj na̱nj gidaꞌa nej sôꞌ si-sena Ma̱ꞌan Señor,
ni̱ nda nìhiàꞌ chre hua ruhuâ nej sôꞌ ni̱ ya nùguànꞌàn nej sôꞌ ngà nej duguiꞌ nej sôꞌ.
47 Ni̱ gaꞌmin hueꞌê nej sôꞌ yiꞌî Ma̱ꞌan Ñaꞌanj an,
ni̱ huê danj na̱nj gaꞌmin hueꞌê nej guiì yùmànꞌan rayiꞌî nej sôꞌ.
Ni̱ daꞌ gui ni̱ gaꞌnḯn Ma̱ꞌan Ñaꞌanj an gaꞌnaꞌ nej guiì gananikàj ruhuâ rayiꞌî si-ga̱kïnꞌ ñan màn nej sij.