Ganahuin sí naꞌhue ga̱che̱
3
Ni̱ ꞌngo̱ agaꞌ huàꞌnï̀nj ïn huaj nùguànꞌàn Pedro ngà Juan ñan nne nuhuî nìko guendâ ga̱ꞌmi̱n nguèj sôꞌ ngà Ma̱ꞌan Ñaꞌanj an,
dadinꞌ orâ dânj ganaraꞌhuiꞌ nej judío guendâ ga̱ꞌmi̱n nej sôꞌ ngà Ma̱ꞌan Ñaꞌanj an.
2 Ni̱ ni̱ka̱j nej síi gaꞌnaꞌ nej sôꞌ ꞌngo̱ sí naꞌhuej ga̱che̱ dadinꞌ àsìj gaꞌnga sôꞌ naꞌhue ga̱che̱ sôꞌ,
ni̱ daran nej gui guchruj nej sij nngaj sí dânj ñan nu̱n riñan rahueꞌ gùꞌnàj sa nìhiàꞌa,
ni̱ nngaj sôꞌ hiuj nânj gachín sôꞌ karida riñan nej guiì gatûj ruhuâ nuhuî nìko.
3 Ni̱ nga giniꞌin sí nânj,
si hua̱j ga̱tu̱ Pedro ngà Juan ruhuâ nuhuî nìko,
ni̱ gachín nìꞌhiaj sôꞌ si gàꞌhuìꞌ Pedro ngà Juan sanꞌanj an riñan sôꞌ.
4 Ni̱ ûta hueꞌê gaꞌnḯn ñan,
Juan ngà Pedro riñan sí nânj,
ni̱ gataj Pedro gu̱nïn sôꞌ:
—Gi̱niꞌhiaj sòꞌ riñan nguèj ñûnj àj nï̂n.
5 Hiôꞌ ni̱ ûta hueꞌê giniꞌhiaj sí dânj riñan nguèj sij,
dadinꞌ ànàꞌhuìj sôꞌ ga̱na̱huin ra̱ꞌa sôꞌ ꞌngo̱ rasu̱un gàꞌhuìꞌ Pedro ngà Juan.
6 Sani̱ gataj Pedro gu̱nïn sôꞌ:
—Nitaj si ni̱ka̱ sanꞌanj plata ngà sanꞌanj oro rìkìj raꞌâꞌ,
sani̱ rìkìj sa ni̱ka̱ riñanꞌ râj;
ni̱ ngà siyu̱gui Ma̱ꞌan Jesús ꞌna̱ꞌ yumanꞌ snàꞌànj Nazaret,
ni̱ ga̱na̱chî sòꞌ ni̱ ga̱che̱ râj.
7 Ni̱ gidaꞌa Pedro raꞌa neꞌ huàꞌ sí dânj ni̱ ganachi ni̱ka̱j sôꞌ sí dânj;
ni̱ orâ danj ni̱ ganahuin nùkuaj nguèj sirùhuìj sí dânj ngà nguèj dakó sôꞌ;
8 ni̱ huêj sôꞌ,
ni̱ ganikïnꞌ ga̱hia sôꞌ ni̱ gaché sôꞌ;
ni̱ gatûj sôꞌ ruhuâ nuhuî nìko ngà Pedro ni̱ ngà Juan,
huêj sôꞌ ni̱ gaꞌmin hueꞌê sôꞌ yiꞌî Ma̱ꞌan Ñaꞌanj an.
9 Ni̱ giniꞌin daꞌ hua̱ gè yumanꞌan aché sí dânj ni̱ giniꞌin nej guiì si gaꞌmin hueꞌê sôꞌ yiꞌî Ma̱ꞌan Ñaꞌanj an.
10 Ni̱ naniꞌin nej sôꞌ si sí nânj huin sí nne gachín karida riñan nûhui nìko,
ñan nu̱n rahueꞌ gùꞌnàj sa nìhiàꞌa;
ni̱ ûta gahuin ña̱ꞌanj ruhuâ nej guiì màn hiuj dânj ni̱ guyuꞌhuiꞌ ninj nga giniꞌin ninj sa gahuin hiuj dânj.
Nuguanꞌ gaꞌmin Pedro nga nikïnꞌ sôꞌ riñan rahueꞌ ni̱ka̱j siyu̱gui Salomón
11 Ni̱ àràꞌhuèꞌ ran sí ga̱na̱huin dânj Pedro ngà Juan,
ni̱ ûta gahuin ña̱ꞌanj,
ruhuâ daranꞌ nej guiì yùmànꞌan,
ni̱ naraꞌhui ninj ñan nu̱n rahueꞌ gùꞌnàj Salomón dadinꞌ hiuj dânj nikïnꞌ Pedro ngà Juan.
12 Ni̱ giniꞌin Pedro si naraꞌhuiꞌ nej guiì rigìi hiuj dânj,
ni̱ gataj sôꞌ gu̱nïn nej guiì dânj:
—Nej suj huin Israelita.
Nùnj huin saj ni̱ gahuin ña̱ꞌanj ruhuâ nej suj rayiꞌî sa gahuin nânj ràꞌaj.
Nùnj huin saj ni̱ gaꞌnḯn ñan nej suj riñan nej ñûnj,
ni̱ ganï̂n ruhuâ nej suj si nej ñûnj giꞌhiaj gaꞌhue gaché si nânj ràꞌaj.
13 Ñaꞌanj nìkòꞌ sachij Abraham,
ni̱ sachij Isaac,
ni̱ sachij Jacob,
ni̱ huej huin Ñaꞌanj nìkòꞌ nêꞌ,
ni̱ huê Ma̱ꞌan huin sa nagiꞌhiaj nìko Ma̱ꞌan Jesús,
ni̱ nej suj nagaꞌhuiꞌ Ma̱ꞌan Jesús guendâ da̱gahuiꞌ nej sí romano ni̱ nga gataj Pilato si gàꞌnï̀nj raꞌa sôꞌ Ma̱ꞌan Jesús ni̱ nun ga̱ꞌhue̱j nej suj mánj.
14 Sani̱ nun ga̱ꞌhue̱j nej suj ga̱na̱huin ra̱ꞌa nej suj Ma̱ꞌan sa gèe ni̱ Ma̱ꞌan sa giꞌhiaj sa Ni̱ka̱a,
ni̱ gachín nìꞌhiaj nej suj si ga̱hui̱ sí dagahuiꞌ guiì ruhuâ dukuâ gaꞌa.
15 Ni̱ dagahuiꞌ nej suj Ma̱ꞌan sa giꞌhiaj ga̱na̱huin nìꞌnàꞌ nej guiì,
ni̱ huê Ma̱ꞌan huin sa ganaꞌnï̂nj siganï̂nj nej nîman giꞌhiaj Ma̱ꞌan Ñaꞌanj an,
ni̱ nej ñûnj huin nej sí giniꞌin dàj giranꞌanj.
16 Ni̱ guendâ guyumân ruhuâ nej ñûnj niꞌin nej ñûnj siyu̱gui Ma̱ꞌan Jesús,
ni̱ rayiꞌî dan ni̱ ganahuin hueꞌê nneè kú sí ni̱kï̱nꞌ giniꞌhiaj nej suj hiuj nânj.
17 ’Di̱nï̂nj sani̱ niꞌín si nun ga̱ra̱n daꞌngaꞌ ruhuâ nej suj màn yumanꞌ Israel sa giꞌhiaj nej suj,
ni̱ huê danj na̱nj nun gi̱ni̱ꞌin daꞌngaꞌ nej sí ni̱ka̱j su̱n riñan nej suj sa giꞌhiaj nej sôꞌ.
18 Sani̱ gàꞌ gataj Ma̱ꞌan Ñaꞌanj an,
nga garânj sunj gaꞌmin nej sôꞌ gataj dàj gahuin,
si hua̱ ni̱ña̱n si gi̱ranꞌ sa̱ñu̱n si-Cristo Ma̱ꞌan.
19 Huê danj ni̱ nànìkàj ruhuâ nej suj rayiꞌî si-ga̱kïnꞌ nej suj ni̱ na̱du̱na̱ nej suj ma̱ꞌan nej suj,
daꞌnga ni̱ gaꞌhue gànàrë̀ꞌ si-ga̱kïnꞌ nej suj.
Ni̱ ga̱ꞌhue ga̱ꞌna̱ꞌ nej suj riñan Ma̱ꞌan Señor ni̱ ga̱na̱ra̱n ruhuâ nej suj.
20 Dadinꞌ àsìj si̱nï̱ïn ni̱ gàꞌ giꞌhiaj yu̱gui ni̱ gàꞌnïn ga̱ꞌna̱ꞌ Ma̱ꞌan Jesús,
ni̱ rayiꞌî dan guyumân Ma̱ꞌan Jesús.
21 Ni̱ hua̱ ni̱ña̱n si ga̱ne Ma̱ꞌan Jesucristo yàtàꞌa nda gui ga̱na̱huin nàkà daranꞌ nej sa màn riñan hioꞌóo,
dadinꞌ huê danj gàꞌ gataj Ma̱ꞌan Ñaꞌanj an duꞌhua nej sôꞌ gataj dàj ga̱huin nej sôꞌ gimân diû ri̱ki.
22 Dadinꞌ gataj Moisés gunïn nej sachij gimân diû ri̱ki:
“Ma̱ꞌan Señor huin Daꞌanj nej suj ga̱na̱chi ni̱ka̱j ꞌngo̱ sôꞌ gànàtàꞌ dàj ga̱huin siganï̂nj nej dinḯn nej suj,
dàj rûnꞌ giꞌhia ngàj;
ni̱ gu̱nïn nej suj daranꞌ nej nuguanꞌ ga̱ꞌmi̱n sôꞌ;
23 ni̱ daranꞌ ma̱ꞌan nimân nej guiì nun gu̱nïn sa gaꞌmin sôꞌ gataj dàj gahuin,
ni̱ si̱ gaꞌhue ga̱huin yiñán ninj ñan nne Ma̱ꞌan Ñaꞌanj an gàꞌ mánj.
Huê dànanj gataj Moisés.”
24 ’Daranꞌ nej sôꞌ gataj dàj ga̱huin àsìj gayiꞌij ngà Samuel gaꞌnaꞌ neꞌ ña̱an,
ni̱ gaꞌmin nej sôꞌ,
ni̱ gataj nej sôꞌ dàj ga̱huin rayiꞌî nej gui nânj.
25 Nej suj huin daꞌní nej sôꞌ gataj dàj gahuin,
dadinꞌ huê danj gàꞌ guchiꞌ Ma̱ꞌan Ñaꞌanj an ꞌngo̱ duꞌhua ngà rej nêꞌ,
ni̱ gata gu̱nïn sachij Abraham:
“ꞌNgo̱ nej daꞌnít ni̱ ûta hueꞌê hua sa gi̱ꞌhia ngà daranꞌ nej guiì màn ruhuâ yumiguìi.”
26 Hia̱j ni̱ giꞌhiaj Ma̱ꞌan Ñaꞌanj an si gànàꞌnï̀nj Daꞌnin siganï̂nj nej nîman,
ni̱ gaꞌnïn gaꞌnaꞌ Daꞌnin guendâ na̱gi̱ꞌhiaj hueꞌej nej suj,
si na̱du̱na̱ nej suj ma̱ꞌan nej suj riñan nej sa kï̱j giꞌhiaj nej suj na̱nj ánj.