Ni̱kï̱nꞌ Pedro ngà Juan riñan junta nìko ni̱ka̱j ñuꞌunj nej rej
4
Ni̱ nga nï̀nꞌ aꞌmin nej sij si-nùguànꞌ Ma̱ꞌan Ñaꞌanj an riñan nej guiì yùmànꞌan,
huê danj ni̱ gaꞌnaꞌ nej rej huin ña̱an ngà sí aꞌnïnꞌ riñan nej sí ni̱kï̱nꞌ dugumîn riñan nûhui nìko,
huê danj na̱nj gaꞌnaꞌ yiꞌnïnꞌ nej sí saduseo ñan ni̱kï̱nꞌ nej sij.
2 Ni̱ ûta ginaꞌan ruhuâ nej sôꞌ guendâ gidigân nej sij si-nùguànꞌ Ma̱ꞌan Ñaꞌanj an riñan nej guiì yùmànꞌan,
rayiꞌî guendâ gataj nej sij si ganaꞌnï̂nj Ma̱ꞌan Jesús siganï̂nj nej nîman.
3 Ni̱ gidaꞌa nej sij Pedro ngà Juan,
ni̱ gachrîj nej sij dukuâ gaꞌa nguèj sôꞌ dadinꞌ gàꞌ ginìn gui dânj ni̱ gane nguèj sôꞌ dan hua̱ gè ñanꞌ dânj dukuâ gaꞌa ni̱ giri nej sij nguèj sôꞌ dukuâ gaꞌa nda garangaꞌ aꞌngô gui.
4 Sani̱ ûta gàꞌì nej guiì gunïn si-nùguànꞌ Ma̱ꞌan Ñaꞌanj an,
ni̱ guyumân ruhuâ ninj niꞌin ninj Ma̱ꞌan Ñaꞌanj an;
ni̱ daꞌnga ꞌngo̱ si ùnꞌùnꞌ mîn huin nej guiì guyumân ruhuâ ginikòꞌ rukû Ma̱ꞌan Jesús.
5 Ni̱ aꞌngô gui dânj,
ni̱ ganahuin chre̱ꞌ nej sí ni̱ka̱j suun,
ni̱ nej síchìj achij i ni̱ ngà nej sí chru̱n ley,
6 ni̱ ganahuin chre̱ꞌ nej rej huin ña̱n nï̀nꞌ gùꞌnàj,
Anás,
Kaifás,
Juan ni̱ Alejandro,
ni̱ daranꞌ nej dùguìꞌ nej rej.
7 Ni̱ ganï̂n nej sôꞌ danï̱n nguèj sij,
ni̱ gachín naꞌanj nej sôꞌ nguèj sij ni̱ gataj nej sôꞌ:
—Ahuin si riki sun nânj,
ni̱ ahuin ngà siyu̱gui,
giꞌhiaj nguèj suj dànanj ràꞌaj.
8 Hiôꞌ ni̱ nda nìchra chre,
nun Ma̱ꞌan Espíritu Santo ruhuâ nimân Pedro,
ni̱ gayiꞌì sôꞌ ni̱ gataj sôꞌ:
—Nej suj nej sí ni̱ka̱j su̱n riñan yumanꞌan,
ni̱ nej suj nej síchìj achij màn ruhuâ yumanꞌ Israel.
9 Ni̱ gachín naꞌanj nej suj nguèj ñûnj rayiꞌî sí aꞌnanꞌ ngà nneè kú,
dadinꞌ gàꞌ ganahuin sàꞌ nneè kú sôꞌ,
10 ni̱ gaꞌ giniꞌin daranꞌ nej suj dàj gahuin,
ni̱ giniꞌin daranꞌ nej guiì màn yumanꞌ Israel,
si ngà siyu̱gui Ma̱ꞌan Jesús ꞌna̱ꞌ yumanꞌ Nazaret,
Ma̱ꞌan sa dunikòꞌ nej suj riñan rugutsìi ni̱ Ma̱ꞌan sa ganaꞌnï̂nj siganï̂nj nej nîman giꞌhiaj Ma̱ꞌan Ñaꞌanj an,
ni̱ huê Ma̱ꞌan giꞌhiaj ganahuin sí ni̱kï̱nꞌ giniꞌhiaj nej suj dânj.
11 Ni̱ giꞌhiaj nej suj,
dàj rûnꞌ giꞌhiaj nej sí giꞌhiaj hueꞌe,
dadinꞌ gudunâj nej sôꞌ ꞌngo̱ hiëj ganï̂n ruhuâ nej sôꞌ si nitaj si niꞌñan,
sani̱ hiëj gunâj dânj,
huej huin hiëj nìko nne sikûj hueꞌe.
12 Ni̱ nitaj si hua̱ aꞌngô sa gi̱ꞌhiaj ga̱na̱ni̱n nêꞌ gàꞌ mánj;
dadinꞌ nitaj aꞌngô siyu̱gui hua riki yàtàꞌa,
rikî Ma̱ꞌan Ñaꞌanj an,
si gi̱ꞌhia ga̱na̱ni̱nꞌ mánj.
13 Ni̱ niꞌhiaj nej sí dânj si nitaj si yuꞌhuiꞌ Pedro ngà Juan ga̱ꞌmi̱n nguèj sôꞌ,
ni̱ niꞌin sàꞌ nej sij si nitaj si chru̱n nguèj sôꞌ,
ni̱ ûta gahuin ña̱ꞌanj ruhuâ nej sij,
sani̱ gananiꞌin nej sij si gaché nguèj sôꞌ ngà Ma̱ꞌan Jesús.
14 Ni̱ giniꞌin nej sij si ni̱kï̱nꞌ sí ganahuin sàꞌ nneè kú dânj ngà Pedro ni̱ ngà Juan,
ni̱ nitaj aꞌngô nuguanꞌ ga̱ꞌhue gìrìꞌ nej sij ga̱ꞌmi̱n nej sij gàꞌ mánj.
15 Hiôꞌ ni̱ gaꞌnïnꞌ nej rej suun si ga̱hui̱ nej sij ga̱ꞌa̱nj nej sij neꞌ ye̱ꞌ ñan màn yiꞌnïnꞌ nej sí ni̱ka̱j suun,
ni̱ gayiꞌì nej sôꞌ ni̱ ganarïsnaꞌanj nej sôꞌ siganï̂nj nej ma̱ꞌan nej sôꞌ,
16 ni̱ gataj nej sôꞌ:
—Nùnj huin si gi̱ꞌhiaj nêꞌ ngà nej sí nânj ràꞌaj.
Dadinꞌ yàngàꞌ ni̱ ganahuin ꞌngo̱ sí aꞌnanꞌan giꞌhiaj nej sôꞌ,
ni̱ giniꞌin daranꞌ nej guiì màn yumanꞌ snàꞌànj Jerusalén sa gahuin,
ni̱ si̱ gaꞌhue ga̱ta̱j nêꞌ si sê danj gahuin mánj.
17 Sani̱ guendâ,
si̱ gayaꞌnï̀n doj nej nuguanꞌ gidigân nej sij riñan nej guiì yùmànꞌan,
ni̱ na̱gi̱ꞌhiaj ha̱i̱ nêꞌ sisi̱ si̱ gaꞌmin nej sij riñan nej guiì siyu̱gui Jesús gàꞌ mánj.
18 Ni̱ gakḯn nej sij nguèj sôꞌ,
ni̱ duyuꞌhuiꞌ nej sij ni̱ nagiꞌhiaj ha̱i̱ nej sij si gàꞌ ꞌngo̱ si̱ garânj sun nej sôꞌ siyu̱gui Ma̱ꞌan Jesús nga ga̱ꞌmi̱n nej sôꞌ.
19 Sani̱ nanikàj Pedro ngà Juan ni̱ gataj nguèj sôꞌ:
—Niꞌhiaj nej suj si dùgùnàj huaj riñan Ma̱ꞌan Ñaꞌanj an si gàꞌ si̱nï̱n da̱gahuin nej ñûnj riñan nej suj gàꞌ daꞌ riñan Ma̱ꞌan Ñaꞌanj an;
20 dadinꞌ si̱ gaꞌhue gu̱du̱naj nej ñûnj guendâ ga̱ꞌmi̱n nej ñûnj sa giniꞌin nej ñûnj ngà sa gunïn nej ñûnj mánj.
21 Huê danj ni̱ nagiꞌhiaj ha̱i̱ staꞌu nej sij riñan nej sôꞌ ni̱ ganaꞌnḯn raꞌa nej sij nej sôꞌ,
ni̱ nun gìrìꞌ nej sij sa ga̱chru̱n nej sij guendâ gàꞌhuìꞌ nej sij kastîgu nej sôꞌ,
dadinꞌ yuꞌhuiꞌ nej sij niꞌin nej sij nej guiì yùmànꞌan;
dadinꞌ daranꞌ ninj gaꞌmin hueꞌê rayiꞌî Ma̱ꞌan Ñaꞌanj an ngà rayiꞌî sa gahuin,
22 dadinꞌ gachîn riñan hioꞌ huìj xia,
huaj sí ganahuin hueꞌê nneè kú dânj.
Gachín nìꞌhiaj nej sôꞌ si gi̱ꞌhiaj Ma̱ꞌan Jesús si ga̱ nùkuaj doj ruhuâ nej sôꞌ
23 Ni̱ nga giri nej sí dânj nguèj sij dukuâ gaꞌa,
ni̱ gaꞌanj nguèj sij ñan nne nej sí ni̱ka̱j duguiꞌ ngà nguèj sij ni̱ ganataꞌ nguèj sij dàj gataj nej rej huin ña̱an ni̱ dàj gataj nej síchìj achij i gunïn nguèj sij.
24 Ni̱ nga gunïn nej sôꞌ nej nuguanꞌ ganataꞌ nguèj sij,
ni̱ gachín nìꞌhiaj nùguànꞌàn nej sij riñan Ma̱ꞌan Ñaꞌanj an,
ni̱ gataj nej sij:
—Huê Ma̱ꞌân rèꞌ huin Ma̱ꞌan Señor ni̱ka̱j sun nìko,
ni̱ huê Ma̱ꞌân rèꞌ huin Ma̱ꞌan Ñaꞌanj giꞌhiaj yàtàꞌa ngà hioꞌóo,
nne ña̱ꞌa̱nj ni̱ daranꞌ nej sa màn ruhuâ nnee;
25 ni̱ garânj sun Ma̱ꞌân Espíritu Santo ni̱ gaꞌmin David ni̱ gataj sôꞌ:
Nùnj huin saj ni̱ ûta huin duꞌhua nej guiì,
ni̱ ganï̂n ruhuâ ninj rayiꞌî nej sa nitaj si niꞌñanj an ràꞌaj.
26 Ni̱ ganahuin chre̱ꞌ nej rey ni̱ka̱j sun riñan hioꞌóo,
ni̱ ganahuin chre̱ꞌ nej sí aꞌnïnꞌïn ni̱ gu̱ña̱n guchiꞌ nej sôꞌ ꞌngo̱ duꞌhua,
guendâ si̱ ganahuin ra̱ꞌa nej sôꞌ Ma̱ꞌan Ñaꞌanj an,
ni̱ si̱ ganahuin ra̱ꞌa nej sôꞌ si-Cristo Ma̱ꞌan Ñaꞌanj an.
Huê dànanj gaꞌmin David.
27 ’Dadinꞌ yàngàꞌ hia nï̀nꞌ ni̱ ganakaj duguiꞌ Herodes ngà Poncio Pilato,
ni̱ nej sí màn yumanꞌ Roma,
ni̱ nej sí Israelita màn ruhuâ yumanꞌ snàꞌànj nânj,
guendâ dagahuiꞌ nej sôꞌ Ma̱ꞌan Cristo,
Ma̱ꞌan sa ganagui Ma̱ꞌân rèꞌ ga̱huin Rey riñan nej ñûnj.
28 Ni̱ huê dànanj ga̱huin daꞌnga ni̱ gisîj nuguanꞌan,
dàj rûnꞌ ganï̂n ruhuâ Ma̱ꞌan Ñaꞌanj an àsìj nâ.
29 Señor,
hia̱j ni̱ gi̱niꞌhiaj Ma̱ꞌân rèꞌ dadinꞌ aꞌmin hu̱e nej sij riñan nej ñûnj,
ni̱ gurugûꞌñunj Ma̱ꞌân rèꞌ rukû nej ñûnj ni̱ si̱ guyuꞌhuiꞌ nej ñûnj ga̱ꞌmi̱n nej ñûnj si-nùguànꞌ Ma̱ꞌân rèꞌ riñan nej guiì mánj,
30 gu̱ru̱gûñuꞌunj Ma̱ꞌân rèꞌ si ga̱na̱huin nej guiì gi̱ꞌhiaj nej ñûnj,
ni̱ nda nanè chre gi̱yi̱ne̱ si-yìꞌì ninj ni̱ huê danj ga̱ nej daꞌngaꞌa gi̱ꞌhiaj nej ñûnj,
hiôꞌ ni̱ ga̱ꞌmi̱n hueꞌê nej guiì rayiꞌî Ma̱ꞌân Jesús,
dadinꞌ huej huin sa gaꞌnaꞌ gu̱na̱nj gi̱tsî riñan Ma̱ꞌân rèꞌ.
31 Ni̱ nga gisîj gaꞌmin nej sij ngà Ma̱ꞌan Ñaꞌanj an,
ni̱ gaꞌhuij ñûn ñan màn sij;
ni̱ nda gachra chre ruhuâ nimân nej sij ginun Ma̱ꞌan Espíritu Santo,
hiôꞌ ni̱ nitaj si guyuꞌhuiꞌ nej sij ga̱ꞌmi̱n nej sij si-nùguànꞌ Ma̱ꞌan Ñaꞌanj an gàꞌ mánj.
Hua̱ nùguànꞌan ruhuâ daranꞌ nej sij
32 Ni̱ hua̱ gu̱ña̱n ruhuâ nej guiì rìgì guyumân ruhuâ niꞌin Ma̱ꞌan Jesús ni̱ hua̱ gu̱ña̱n ruhuâ ma̱ꞌan nimân ninj;
ni̱ gàꞌ si ꞌngo̱ nej guiì dânj nitaj si taj si si-ꞌhiaj ꞌngo̱ rïn ninj huin nej sa hua̱ riñan ninj,
ni̱ taj ninj si si-ꞌhiaj daranꞌ ninj huin nej rasu̱n hua̱ riñan daꞌ goꞌngo̱ ninj.
33 Ni̱ nitaj si yuꞌhuiꞌ nej sij gi̱di̱gân nej sij ni̱ gànàtàꞌ nej sij si hia nï̀nꞌ ganaꞌnï̂nj Ma̱ꞌan Jesús siganï̂nj nej nîman,
ni̱ ûta giꞌhiaj su̱nu̱j Ma̱ꞌan Ñaꞌanj an ngà nej sij.
34 Ni̱ nitaj gàꞌ si ꞌngo̱ nej sí ranꞌ àko hua siganï̂nj nej sij;
dadinꞌ daranꞌ nej sí hua̱ doꞌó ngà dukuâ ni̱ naduꞌhuej nej sôꞌ,
ni̱ ni̱ka̱j nej sôꞌ sanꞌanj gahuin duꞌhue nej rasu̱n dânj gaꞌnaꞌ nej sôꞌ,
35 ni̱ gaꞌhuiꞌ nej sôꞌ sanꞌanj dânj raꞌa nej sôꞌ gaꞌanj gi̱di̱gân si̱nï̱n si-nùguànꞌ Ma̱ꞌan Ñaꞌanj an;
ni̱ gunuchraꞌ da̱ꞌa̱j nej sôꞌ sanꞌanj dânj ni̱ gaꞌhuiꞌ nej sôꞌ dàj gachín ma̱ꞌan riñan daꞌ goꞌngo̱ nej duguiꞌ nej sôꞌ.
36 Ni̱ huê danj na̱nj giꞌhiaj José sôꞌ dugûꞌnàj nej sij Bernabé ni̱ guduꞌhuêj sôꞌ siꞌhiaj sôꞌ,
(ni̱ Bernabé ruhuaj ga̱ta,
sí nagiꞌhiaj nùkuaj ruhuâ nêꞌ) ni̱ levita huin sôꞌ ni̱ gaꞌnga sôꞌ riñan hioꞌó Chipre,
37 ni̱ hua̱ ꞌngo̱ doꞌó sôꞌ,
ni̱ guduꞌhuêj sôꞌ hioꞌó dânj,
ni̱ ni̱ka̱j sôꞌ gaꞌnaꞌ sôꞌ sanꞌanj gahuin duꞌhue doꞌó sôꞌ ni̱ nagaꞌhuiꞌ sôꞌ raꞌa nej sí gaꞌanj gi̱di̱gân si̱nï̱n.