Gakï̱nꞌ giꞌhiaj Ananías ngà Safira
5
Sani̱ hua̱ ꞌngo̱ sí dânj ni̱ gùꞌnàj sôꞌ Ananías,
ni̱ Safira huin nika sôꞌ,
ni̱ guduꞌhuêj nguèj ni̱ka̱ sôꞌ ꞌngo̱ doꞌó nguèj ni̱ka̱ sôꞌ.
2 Ni̱ gaꞌmin gu̱ña̱n nguèj ni̱ka̱ sôꞌ,
ni̱ gidaꞌa nguèj sôꞌ sanꞌanj gahuin duꞌhue doꞌó nguèj sôꞌ,
ni̱ man do̱j sanꞌanj an nagaꞌhuiꞌ nguèj sôꞌ raꞌa nej sí gaꞌanj gi̱di̱gân si̱nï̱n si-nùguànꞌ Ma̱ꞌan Ñaꞌanj an.
3 Ni̱ gataj Pedro:
—Ananías nùnj huin saj ni̱ guyumân ruhuâꞌ giꞌhiaj sichre,
ni̱ gachrîj huìꞌ sanꞌanj an gahuin duꞌhue doꞌót,
ni̱ ganï̂n ruhuâꞌ si ga̱ꞌhue gi̱di̱gañuꞌunj Ma̱ꞌan Espíritu Santo na̱nj nînj.
4 Ni̱ sê doꞌôt huin hioꞌó dan ra̱ꞌ saj ûnꞌ,
ni̱ si guduꞌhuêjꞌ ni̱ sê si-sa̱nꞌa̱nj huin sanꞌanj dan ra̱ꞌ saj ûnꞌ.
Nùnj huin saj ni̱ guyumân ruhuâꞌ ni̱ giꞌhiâꞌ dànanj ràꞌaj.
Sê riñan nej ñûnj gidigañuꞌunj mánj,
riñan Ma̱ꞌan Ma̱ꞌan Ñaꞌanj an gidigañuꞌunj na̱nj ánj.
5 Ni̱ nga gunïn Ananías nej nuguanꞌ nânj,
ni̱ ganatûj sôꞌ gaꞌanj sôꞌ ni̱ orâ chre ni̱ gahuiꞌ sôꞌ.
Ni̱ ûta guyuꞌhuiꞌ nej guiì gunïn dàj gahuin.
6 Huê danj ni̱ gaꞌnaꞌ nej sí ña̱n màn hiuj dânj,
ni̱ duriꞌñânj nej sôꞌ atsîj i yichrá sí gahuiꞌ dânj,
ni̱ giri nej sôꞌ neꞌ ye̱ꞌ hueꞌ dânj,
ni̱ gaꞌanj ga̱chi̱nꞌ nej sôꞌ.
7 Ni̱ gachîn daꞌnga ꞌngo̱ si huàꞌnï̀nj ora,
ni̱ guyumân Safira huin nika Ananías ruhuâ hueꞌ dânj,
sani̱ nun gi̱ni̱ꞌin ñûnꞌ nùnj huin si gahuin.
8 Hiôꞌ ni̱ gataj Pedro:
—Ga̱ta̱j hia sòꞌ,
si huê dànanj huin duꞌhue hioꞌó guduꞌhuêj nguèj nikaa râj.
Ni̱ gataj yugûnꞌ dânj:
—Huê dan huin duꞌhuej na̱nj ánj.
9 Ni̱ gataj Pedro gunïn ñûnꞌ:
—Nùnj huin saj ni̱ gaꞌmin gu̱ña̱n nguèj nikaa ni̱ ganï̂n ruhuâ nguèj eꞌ gi̱di̱gañuꞌunj nguèj eꞌ Ma̱ꞌan Espíritu Santo ràꞌaj.
Hia̱j gunumân nej sí ña̱n gaꞌanj gàchìnꞌ nikat,
ni̱ akuanꞌ nï̱n ni̱ ga̱ꞌa̱nj gàchìnꞌ nej sij sòꞌ na̱nj ánj.
10 Ni̱ orâ chre ni̱ ganatûj yugûnꞌ dânj ñan ni̱kï̱nꞌ Pedro ni̱ gahuiꞌ ñûnꞌ;
ni̱ gatûj nej sí ña̱an ruhuâ hueꞌ dânj;
ni̱ ganachi nikaj nej sôꞌ,
ni̱ gaꞌanj gàchìnꞌ nej sôꞌ yugûnꞌ dânj ñan nngaj nika ñûnꞌ.
11 Ni̱ guyuꞌhuiꞌ daranꞌ nej guiì nìkòꞌ rukû Ma̱ꞌan Jesús,
ni̱ huê danj na̱nj guyuꞌhuiꞌ daranꞌ nej guiì gunïn dàj gahuin hiuj dânj.
Ûta ganahuin nej guiì giꞌhiaj nej sij
12 Ni̱ garânj sun Ma̱ꞌan Ñaꞌanj an nej sôꞌ gaꞌanj gànàtàꞌ si̱nï̱n si-nùguànꞌanj ni̱ nga gutaꞌ nej sôꞌ raꞌa nej sôꞌ ni̱ ganahuin ûta gàꞌì nej guiì aꞌnanꞌan ni̱ ûta nìko hua sa giꞌhiaj nej sôꞌ ruhuâ yumanꞌan;
ni̱ hua̱ nùguànꞌàn ruhuâ daranꞌ nej sij mân nej sij ñan nu̱n riñan rahueꞌ gùꞌnàj Salomón.
13 Ni̱ naꞌhuej ruhuâ aꞌngô nej guiì gi̱nikaj duguiꞌ ninj ngà nej sí nìkòꞌ rukû Ma̱ꞌan Jesús;
sani̱ ûta hueꞌê gaꞌmin nej guiì yùmànꞌan rayiꞌî nej sij.
14 Ni̱ daꞌ gui ni̱ guyumân ruhuâ gàꞌì nej síi ni̱ gàꞌì nej siyànà ni̱ nanikòꞌ nej sij rukû Ma̱ꞌan Jesús.
15 Huê danj ni̱ giri nej sij nej guiì aꞌnanꞌan ni̱ guchruj nej sij ruhuâ chrej gàchràꞌ huaj riki yumanꞌan,
ni̱ tàj nej sôꞌ riñan nna nngaj nej sôꞌ,
ni̱ nngaj nej sôꞌ riñan huée,
ni̱ nga gachîn Pedro huaj sôꞌ,
ni̱ ganahuin nej guiì aꞌnanꞌan ñan gachîn si-gàxùnꞌ sôꞌ.
16 Ni̱ huê danj na̱nj ꞌnaꞌ ûta gàꞌì nej guiì màn nìchrùnꞌ ñan nngaj yumanꞌ snàꞌànj Jerusalén,
ni̱ ni̱ka̱j ninj gaꞌnaꞌ ninj nej guiì aꞌnanꞌan,
ni̱ nej guiì giranꞌ sa̱ñu̱n giꞌhiaj nej nanè kï̱j huaa;
ni̱ ganahuin daranꞌ ninj.
Gata ra̱ꞌa nej sí dânj Pedro ngà Juan
17 Huê danj ni̱ ûta gahuin yìkòj ruhuâ rej aꞌnïnꞌ nï̀nꞌïn,
ni̱ huê danj na̱nj gahuin yìkòj ruhuâ daranꞌ nej sí saduseo;
18 Ni̱ gidaꞌa nej sij nguèj sí gaꞌanj gi̱di̱gan si̱nï̱n si-nùguànꞌ Ma̱ꞌan Ñaꞌanj an ni̱ gachrîj nej sij dukuâ gaꞌa nguèj sôꞌ;
19 Sani̱ nga nne nguèj sij ruhuâ dukuâ gaꞌa,
ni̱ ruhuâ ña̱nꞌ mánj ni̱ gaꞌanj gànàꞌnï̀nj ángel riñan nej rahueꞌ nu̱n riñan dukuâ gaꞌa,
ni̱ girij neꞌ yeꞌe nguèj sij ni̱ gata gu̱nïn nguèj sij:
20 —Ga̱ꞌa̱nj nguèj suj ruhuâ nuhuî nìko ni̱ ga̱nikïnꞌ nguèj suj hiuj dânj,
ni̱ gànàtàꞌ nguèj suj nuguanꞌ ga̱ꞌhue giꞌhiaj ga̱na̱huin nìꞌnàꞌ nej guiì.
21 Ni̱ nga gunïn nguèj sij nej nuguanꞌ nânj,
ni̱ hua ni̱ganꞌ ni̱ gatûj nguèj sij ruhuâ nûhui nìko ni̱ gidigân nguèj sij si-nùguànꞌ Ma̱ꞌan Ñaꞌanj an riñan nej guiì.
Huê danj ni̱ nagiꞌhiaj chreꞌ rej aꞌnïnꞌ nï̀nꞌïn nej sí ni̱ka̱j duguiꞌ ngà sôꞌ,
ni̱ huê danj na̱nj nagiꞌhiaj chre̱ꞌ sôꞌ yiꞌnïnꞌ nej sí ni̱ka̱j sun riñan yumanꞌan ngà daranꞌ nej síchìj achij huin daꞌní Israel,
ni̱ gaꞌnḯn nej sôꞌ si ga̱ꞌa̱nj gi̱ri̱ nej policia Pedro ngà Juan ruhuâ dukuâ gaꞌa.
22 Sani̱ nga guchiꞌ nej sí dugumîn nûhui ñan nne dukuâ gaꞌa,
ni̱ nitaj Pedro ngà Juan ꞌnïnj ruhuâ dukuâ gaꞌa ganariꞌ nej sôꞌ;
huê danj ni̱ nanikàj nej sôꞌ ni̱ gaꞌanj gànàtàꞌ nej sôꞌ riñan rej aꞌnïnꞌïn,
23 Ni̱ gataj nej sôꞌ:
—Yàngàꞌ,
ni̱ nda hueꞌê chre hua rán riñan dukuâ gaꞌa ganariꞌ nej ñûnj,
ni̱ huê danj nanj ni̱kï̱nꞌ nej policia dugumîn nej sôꞌ neꞌ ye̱ꞌ riñan dukuâ gaꞌa;
sani̱ nga ganaꞌnï̂nj nej ñûnj riñan dukuâ gaꞌa,
ni̱ nitaj gàꞌ si ꞌngo̱ nguèj sij ꞌnïnj neꞌ rùhuàa ganariꞌ nej ñûnj gàꞌ mánj.
24 Ni̱ nga gunïn rej aꞌnïnꞌ nï̀nꞌïn ni̱ huê danj na̱nj gunïn sí aꞌnïnꞌ riñan nej sí ni̱kï̱nꞌ dugumîn riñan nuhuî nìko,
ni̱ nej rej huin ña̱an,
ni̱ guruguiꞌ chìꞌ ruhuâ nej sôꞌ rayiꞌî nej sa gahuin.
25 Sani̱ guyumân ꞌngo̱ sí dânj,
ni̱ gataj sôꞌ:
—Nej sí gachrîj nej suj dukuâ gaꞌa nikïnꞌ gidigân ruhuâ nûhui,
riñan nej guiì yùmànꞌan na̱nj ánj.
26 Huê danj ni̱ gaꞌanj sí aꞌnïnꞌ riñan nej sí dugumîn nûhui nìko ngà nej sí dugumîn nuhuî nìko,
ni̱ ginikaj nej sô gaꞌnaꞌ nej sôꞌ Pedro ngà Juan riñan junta sani̱ nun gi̱ꞌhiaj hu̱e nej sôꞌ ngà nguèj sij,
dadinꞌ yuꞌhuiꞌ nej sôꞌ si ga̱rru̱n nej guiì yùmànꞌan hiëj nej sôꞌ.
27 Ni̱ ginikaj nej sij gaꞌnaꞌ nej sij nguèj sôꞌ,
ni̱ nagaꞌhuiꞌ nej sij nguèj sôꞌ raꞌa yiꞌnïnꞌ nej sí ni̱ka̱j su̱n riñan yumanꞌan,
ni̱ gachín naꞌanj rej aꞌnïnꞌ nï̀nꞌïn nguèj sôꞌ ni̱ gataj nej sí dânj:
28 —Sê gàꞌ ûta gaꞌnïnꞌ su̱n nej ñûnj riñan nguèj suj si si̱ garânj sun nguèj suj siyu̱gui sí dan nga ga̱ꞌmi̱n nguèj suj ûnꞌ.
Hia̱j ni̱ gàꞌ ꞌngo̱ gachra nï̀nꞌ ruhuâ yumanꞌ snàꞌànj Jerusalén gidigân nej suj nej yìꞌnï̀nꞌ nuguanꞌ dânj,
ni̱ ruhuâ nej suj si gànàtàꞌ tun sí dan yichrá nej ñûnj na̱nj nîꞌ.
29 Nanikàj Pedro ngà aꞌngô nej sôꞌ gaꞌanj gi̱di̱gân si̱nï̱n si-nùguànꞌ Ñaꞌanj an ni̱ gataj nej sôꞌ:
—Ña̱ꞌa̱n huaj si da̱gahuin si̱nï̱n nej ñûnj nuguanꞌ gataj Ma̱ꞌan Ñaꞌanj an gàꞌ daꞌ si da̱gahuin nej ñûnj nuguanꞌ ga̱ta̱j nej síi na̱nj ánj.
30 Ma̱ꞌan Ñaꞌanj guyumân ruhuâ rej nej ñûnj giꞌhiaj ganaꞌnï̂nj Ma̱ꞌan Jesús siganï̂nj nej nîman,
ni̱ huê Ma̱ꞌan huin sa dunikòꞌ nej suj riñan rugutsìi.
31 Ni̱ huê Ma̱ꞌan Jesús,
huin ganachinikaj Ma̱ꞌan Na̱ꞌanj an ni̱ gunej raꞌa neꞌ huàꞌaj ni̱ giꞌhia si gàꞌnïnj ni̱ gi̱ꞌhia si ga̱na̱ni̱n nej guiì,
ni̱ gi̱ꞌhia si gànànìkàj ruhuâ nej guiì màn Israel rayiꞌî si-ga̱kïnꞌ ninj,
ni̱ gi̱nika nimân nìko rayiꞌî si-ga̱kïnꞌ ninj na̱nj ánj.
32 Ni̱ nej ñûnj huin nej sí giniꞌin dàj gahuin,
ni̱ huê danj na̱nj giniꞌin Ma̱ꞌan Espíritu Santo,
ni̱ gaꞌhuiꞌ Ma̱ꞌan Ñaꞌanj an Ma̱ꞌan Espíritu Santo riñan nej sí dagahuin hueꞌê riñanj.
33 Ni̱ nga,
gunïn nej sí nânj nej nuguanꞌ nânj,
ni̱ ûta ginaꞌan ruhuâ nej sôꞌ,
ni̱ ruhuâ nej sôꞌ da̱gahuiꞌ nej sôꞌ nej sij.
34 Hiôꞌ ni̱ ganayumàn ꞌngo̱ sí fariseo gùꞌnàj Gamaliel riñan junta dânj,
ni̱ huin sôꞌ ꞌngo̱ maestrû chru̱n ley,
ni̱ ûta nikaj chre̱j nej guiì yùmànꞌan ngà sôꞌ,
ni̱ gaꞌnïnꞌ sôꞌ suun si gi̱ri̱ nej sij ga̱ꞌa̱nj nej sôꞌ gidigân si̱nï̱n si-nùguànꞌ Ma̱ꞌan Ñaꞌanj an neꞌ ye̱ꞌe,
35 ni̱ gataj sôꞌ gu̱nïn nej sij:
—Nej suj ni̱ka̱j su̱n riñan yumanꞌ Israel,
hueꞌê ga̱nï̱n ruhuâ nej suj dàj giꞌhiaj nej suj ngà nej sí nânj.
36 Ga̱na̱nun ruhuâ nej suj dadinꞌ gachín ꞌngo̱ diû ni̱ gane ꞌngo̱ sí gùꞌnàj Teudas siganï̂nj nêꞌ,
ni̱ gataj sôꞌ si huin sôꞌ sí ña̱ꞌa̱n doj riñan nej guiì.
Ni̱ ganakaj duguiꞌ ꞌngo̱ si gaꞌânj sientu nej síi ngà sôꞌ,
sani̱ nga gahuiꞌ sôꞌ,
ni̱ gayaꞌnï̀n daranꞌ nej sí dagahuin sa gataj sôꞌ,
ni̱ nitaj sí dugunïnꞌ rayiꞌî yiꞌnïnꞌ dânj gàꞌ mánj.
37 Neꞌ rùkù nga gahuiꞌ sí dânj ni̱ ganachi nikaj aꞌngô sí gùꞌnàj Judas sí ꞌna̱ꞌ riñan hioꞌó Galilea ma̱ꞌan sôꞌ,
nej gui nga nagiꞌhiaj nej sij guenda andaj guiì mân Israel,
ni̱ ûta gàꞌì yumanꞌan ginikòꞌ rukû sôꞌ.
Sani̱ nga gahuiꞌ sôꞌ,
ni̱ huê danj na̱nj nitaj sí du̱gunïnꞌ rayiꞌî yiꞌnïnꞌ dânj gàꞌ mánj.
38 Nàrìkìj chrej e riñan nej suj:
Ni̱ si̱ garanꞌ ñuꞌunj nej suj nej sij mánj,
ni̱ gàꞌnï̀nj raꞌa nej suj nej sij;
dadinꞌ si sa giri raa̱ nej ma̱ꞌan nej sij huin sa giꞌhiaj nej sij ni̱ ga̱na̱hui;
39 sani̱ si Ñaꞌanj an huin sa gataj si huê danj gi̱di̱gân nej sij,
ni̱ si gaꞌhue gu̱du̱rëꞌ nej suj nej nuguanꞌ gaꞌmin nej sij mánj;
dadinꞌ si nuhuij ni̱ ngà Ma̱ꞌan Ñaꞌanj an nun nej suj gunïnꞌ nej suj,
ni̱ garânj yina nej sij nuguanꞌ gataj síchìj nânj.
40 Huê danj ni̱ gakḯn nej sij gaꞌnaꞌ nej sí gaꞌanj gi̱di̱gân si̱nï̱n si-nùguànꞌ Ma̱ꞌan Ñaꞌanj an,
ni̱ neꞌ rùkù nga gisîj duguañun nej sij nej sôꞌ,
ni̱ nagiꞌhiaj ha̱i̱ nej sij si si̱ gununâ nej sôꞌ siyu̱gui Ma̱ꞌan Jesús,
huê danj ni̱ ganaꞌnḯn raꞌa nej sij nej sôꞌ.
41 Ni̱ gahui nej sôꞌ gaꞌanj nej sôꞌ riñan junta hua̱ hiuj dânj,
ni̱ ûta ganahuin nìhiàꞌ ruhuâ nej sôꞌ rayiꞌî guendâ giranꞌ sa̱ñu̱n nej sôꞌ rayiꞌî siyu̱gui Ma̱ꞌan Jesús.
42 Ni̱ daranꞌ nej gui,
huaꞌanj nej sij ruhuâ nûhui,
ni̱ ruhuâ nej hueꞌe,
ni̱ nitaj àmàn gaꞌnïnꞌ ruhuâ nej sij guendâ gi̱di̱gân nej sij si-nùguànꞌ Ma̱ꞌan Jesucristo riñan nej guiì mánj.