Ganagui nej sij chi̱j diákono
6
Nej gui dânj,
ni̱ ñan ûta gahuin gàꞌì nej sí gaꞌnaꞌ gahuin chru̱un,
ni̱ gaꞌmin nej sí judío aꞌmin nânj griego rayiꞌî nej sí aꞌmin nânj hebreo,
ni̱ gataj nej sôꞌ si daranꞌ nej gui ni̱ nun gìrìꞌ hueꞌê nej siyànà minj judía aꞌmin nânj griego ya̱ ninj.
2 Hiôꞌ ni̱ nagiꞌhiaj chre̱ꞌ nej yùhuìj nej sí gaꞌnaꞌ gahuin chru̱n riñan Ma̱ꞌan Jesús daranꞌ nej sí ꞌnaꞌ ga̱huin chru̱n riñan nej sôꞌ,
ni̱ gataj nej sôꞌ gu̱nïn nej sí dânj:
—Nitaj si dùgùnàj huaj si gu̱du̱nâj nêꞌ si-nùguànꞌ Ma̱ꞌan Ñaꞌanj an,
ni̱ gàꞌhuìꞌ sa ya̱ nej guiì mánj.
3 Nànàꞌhuìꞌ nej suj chi̱j nej dinï̂nt siganï̂nj nej suj,
nej sôꞌ ràyìꞌì gaꞌmin hueꞌê nej guiì,
nej sôꞌ hua̱ nìchra ruhuâ nimân ngà Ma̱ꞌan Espíritu Santo,
ni̱ nej sôꞌ ûta hueꞌê garânj daꞌngaꞌ ruhuâ,
ni̱ raꞌa nej sôꞌ gàꞌhuìꞌ nej suj sun dânj.
4 Ni̱ nej ñûnj ginùn huin ga̱ꞌmi̱n ngà Ma̱ꞌan Ñaꞌanj an,
ni̱ ginùn huin nej ñûnj gi̱di̱gân nej ñûnj si-nùguànꞌ Ma̱ꞌan Ñaꞌanj an na̱nj ánj.
5 Ni̱ gahuin nìhiàꞌ ruhuâ ni̱ ga gu̱ña̱n ruhuâ daranꞌ nej sí gaꞌnaꞌ gahuin chru̱un nga gunïn nej sôꞌ nej nuguanꞌ nânj;
ni̱ ganagui nej sôꞌ Esteban,
ni̱ ûta nìko guyumân ruhuâ sôꞌ niꞌin sôꞌ Ma̱ꞌan Ñaꞌanj an,
ni̱ nda nìchra chre ruhuâ nimân sôꞌ nun Ma̱ꞌan Espíritu Santo,
ni̱ ganagui nej sôꞌ Felipe,
Prócoro,
Nicanor,
Timón,
Parmenas,
Nicolás sí guyumân ruhuâ ni̱ huin sôꞌ sí ꞌna̱ꞌ yumanꞌ snàꞌànj Antioquía.
6 Ni̱ka̱j nej sij gaꞌanj nej sij nej sí nânj riñan nej sôꞌ gaꞌanj gi̱di̱gân si̱nï̱n si-nùguànꞌ Ma̱ꞌan Ñaꞌanj an,
ni̱ gachín nìꞌhiaj nej sôꞌ riñan Ma̱ꞌan Ñaꞌanj an,
rayiꞌî nej sí nânj,
ni̱ gutaꞌ nej sôꞌ raꞌa nej sôꞌ ahui nej sí nânj.
7 Ni̱ gayaꞌnï̀n si-nùguànꞌ Ma̱ꞌan Señor,
ni̱ ûta giyiꞌnanj nej sí gahuin chru̱n si-nùguànꞌ Ma̱ꞌan Señor ruhuâ yumanꞌ snàꞌànj Jerusalén;
ni̱ ûta gàꞌì nej rej guyumân ruhuâ niꞌin si-nùguànꞌ Ma̱ꞌan Señor.
Gidaꞌa nej sij Esteban guendâ ga̱chri̱ nej sij dukuâ gaꞌa
8 Ni̱ ûta gininj hueꞌê sa giꞌhiaj Esteban riñan nej guiì ni̱ ûta nùkuaj garânj sun Ma̱ꞌan Ñaꞌanj an sôꞌ,
ni̱ ûta ganahuin nej guiì giꞌhiaj sôꞌ ni̱ ûta nìko hua sa giꞌhiaj sôꞌ ruhuâ yumanꞌan.
9 Hiôꞌ ni̱ gayiꞌì ꞌngo̱ yiꞌnïnꞌ nej sí gùꞌnàj libertos,
ni̱ nej sí ꞌnaꞌ riñan hioꞌó Sirene,
nej sí ꞌnaꞌ riñan hioꞌó Alejandría,
nej sí ꞌnaꞌ riñan hioꞌó Silisia ni̱ nej sí ꞌnaꞌ riñan hioꞌó Asia,
ni̱ gaꞌmin ꞌngo̱ ni̱ gaꞌmin aꞌngô nej sí dânj riñan Esteban ni̱ gunïnꞌ nej sí dânj ngà Esteban rayiꞌî si-nùguànꞌ Ma̱ꞌan Señor.
10 Sani̱ naꞌhue gùnùkuaj nej sí dânj giꞌhiaj ga̱nan nej sôꞌ Esteban dadinꞌ ûta nìko niꞌin sôꞌ si-nùguànꞌ Ma̱ꞌan Señor ni̱ ûta ran hua nej nuguanꞌ gaꞌmin sôꞌ giꞌhiaj Ma̱ꞌan Espíritu Santo.
11 Hiôꞌ ni̱ guruꞌhue huì nej sí dânj duꞌhue huìj,
huàꞌnï̀nj ranꞌ nej síi guendâ ga̱ra̱n ruhuâ nej sôꞌ nuguanꞌ gidigañuꞌunj un ni̱ gataj nej sôꞌ si gunïn nej sôꞌ gaꞌmin kï̱j Esteban yiꞌî sachij Moisés ngà yiꞌî Ma̱ꞌan Ñaꞌanj an.
12 Ni̱ giꞌhiaj nej sij ganachej ruhuâ nej guiì yùmànꞌan niꞌin ninj Esteban,
ni̱ huê danj na̱nj ganachej ruhuâ nej síchìj achij i,
ni̱ ganachej ruhuâ nej sí chru̱n ley,
ni̱ gayiꞌì nej sôꞌ ni̱ gidaꞌa nej sôꞌ ni̱ gunùkuaj nej sôꞌ,
ni̱ ni̱ka̱j nej sôꞌ gaꞌnaꞌ nej sôꞌ riñan yiꞌnïnꞌ nej sí ni̱ka̱j su̱n riñan yumanꞌan.
13 Ni̱ ganï̂n nej sij nej sí ganataꞌ nuguanꞌ gidigañuꞌunj un ni̱ gataj nej sôꞌ:
—Nitaj si giyichinꞌ ga̱ꞌmi̱n sí nânj nuguanꞌ kï̱j huaa rayiꞌî nûhui nìko ngà rayiꞌî si-ley Ma̱ꞌan Ñaꞌanj an mánj;
14 Ni̱ gunïn nej nûnj gataj sij si sí gùꞌnàj Jesús ꞌnaꞌ yumanꞌ snàꞌànj Nazaret gu̱du̱rëꞌ nuhuî nânj,
ni̱ na̱du̱na̱ sôꞌ nej chrej gidigân sachij Moisés.
15 Hiôꞌ ni̱ nga giniꞌhiaj daranꞌ nej sí ni̱ka̱j ñuꞌunj junta,
riñan Esteban,
ni̱ giniꞌin nej sôꞌ si dàj rûnꞌ nun riñan ꞌngo̱ ángel nun riñan Esteban.