Dunaꞌhuej Esteban rayiꞌî sôꞌ
7
Hiôꞌ ni̱ gataj rej huin ña̱n nï̀nꞌïn gunïn Esteban:
—Yàngàꞌ huin daranꞌ nej nuguanꞌ nânj nîꞌ.
2 Ni̱ gataj Esteban:
—Gu̱nïn nej suj di̱nï̂nj ni̱ gu̱nïn nej suj huin nej sachij i.
Dadinꞌ gàꞌ gunïn nej suj si ganikïnꞌ Ma̱ꞌan Ñaꞌanj an riñan rej nêꞌ Abraham,
nga gane sôꞌ riñan hioꞌó Mesopotamia,
nga nï̀nꞌ ga̱chin ga̱ꞌna̱ꞌ sôꞌ ga̱ne sôꞌ riñan hioꞌó Harán.
3 Ni̱ gata gunïn sôꞌ:
“Ga̱hui̱ sòꞌ riñan doꞌót ni̱ ñan màn nej duguiꞌ,
ni̱ ga̱ꞌna̱ꞌ riñan hioꞌó gi̱di̱gán sòꞌ.”
4 Hiôꞌ ni̱ gahui sôꞌ ruhuâ yiñán nej sí Kaldeos ni̱ gaꞌanj ga̱ne sôꞌ riñan hioꞌó Harán;
neꞌ rùkù ni̱ gahuiꞌ rej sôꞌ,
huê danj ni̱ gakḯn Ma̱ꞌan Ñaꞌanj an ni̱ gaꞌnaꞌ sôꞌ riñan hioꞌó ñan nne nêꞌ nda gui hia̱j.
5 Ni̱ nùnj huin si gurûn sôꞌ riñan hioꞌó nânj sani̱ nun gìrìꞌ nìꞌhiaj sôꞌ ga̱ne sôꞌ riñan hioꞌó nânj,
sani̱ gataj Ma̱ꞌan Ñaꞌanj an gu̱nïn sôꞌ si yàngàꞌ hia nï̀nꞌ ni̱ ga̱ꞌhuij hioꞌó nânj ga̱huin doꞌó nej daꞌní sôꞌ,
sani̱ nga gataj Ma̱ꞌan Ñaꞌanj an dànanj gu̱nïn sôꞌ ni̱ nitaj daꞌní sôꞌ hua mánj.
6 Ni̱ gataj Ma̱ꞌan Ñaꞌanj an gunïn sôꞌ:
Si ga̱ꞌnïn ga̱ꞌa̱nj nej daꞌní sôꞌ riñan aꞌngô hioꞌó ânèj e,
ni̱ gi̱ꞌhia si ga̱huin nej daꞌní sôꞌ musu giꞌnïnj gi̱ꞌhiaj sun chre riñan nej sí màn yumanꞌ ñan gùchìꞌ nej sôꞌ ni̱ gaꞌânj siêntu hioꞌo gi̱ranꞌ sa̱ñu̱n nej sôꞌ gi̱ꞌhiaj nej sí màn ñan gùchìꞌ nej sôꞌ.
7 Ni̱ gataj Ma̱ꞌan Ñaꞌanj an:
“Sani̱ gànàchìnj guenda,
riñan país gi̱ꞌhiaj gi̱ranꞌ sa̱ñu̱n nej sij;
ni̱ neꞌ rùkù ni̱ gu̱du̱nâj nej sij yiñán nej sí dânj ni̱ ga̱ꞌna̱ꞌ nej sij ni̱ gu̱na̱nj gi̱ꞌtsi nej sij riñânj riñan hioꞌó nânj.”
8 Ni̱ guchiꞌ Ma̱ꞌan Ñaꞌanj an ꞌngo̱ duꞌhua ngà sôꞌ ni̱ gata si ga̱ꞌne̱ꞌ sôꞌ nnïnj arán ga̱ni̱ka̱j raa̱ nneè nàꞌàj daꞌní sôꞌ;
huê danj ni̱ gaꞌnga Isaac daꞌní Abraham,
ni̱ nga gisîj Isaac tï̱nj gui ni̱ gaꞌneꞌ sôꞌ nnïnj arán raa̱ nneè nàꞌàj Isaac,
ni̱ gaꞌnga daꞌní Isaac huin Jacob ni̱ gaꞌneꞌ sôꞌ nnïnj arán raa̱ nneè nàꞌàj Jacob,
huê danj ni̱ gaꞌnga yùhuìj daꞌní Jacob ni̱ gaꞌneꞌ sôꞌ nnïnj arán raa̱ nneè nàꞌàj nej yùhuìj daꞌní sôꞌ.
9 ’Sani̱ guendâ huin yìkòj ruhuâ nej sôꞌ niꞌin nej sôꞌ José ni̱ guduꞌhuêj nej sôꞌ gaꞌanj José riñan hioꞌó Egipto;
sani̱ nne Ma̱ꞌan Ñaꞌanj an ngà José.
10 Ni̱ giꞌhiaj Ma̱ꞌan Ñaꞌanj an si ga̱na̱ni̱n sôꞌ riñan daranꞌ nej sañuun ga riñan sôꞌ,
ni̱ ûta hueꞌê garânj daꞌngaꞌ ruhuâ sôꞌ ni̱ gininj hueꞌê sôꞌ riñan Faraón rey ni̱ka̱j su̱n riñan hioꞌó Egipto,
rayiꞌî dânj ni̱ giꞌhiaj Faraón si ga̱huin sôꞌ gobernador riñan hioꞌó Egipto ni̱ ginikaj su̱n sôꞌ riñan nej guiì màn dukuâ Faraón.
11 ’Hiôꞌ ni̱ gaꞌnaꞌ yiꞌnaa daꞌ hua̱ nï̀nꞌ gàchràꞌ riñan hioꞌó Egipto ni̱ nï̀nꞌ gàchràꞌ riñan hioꞌó Kanaán,
ni̱ ûta giranꞌ sa̱ñu̱n nej guiì;
ni̱ nun gìrìꞌ rej nêꞌ sa ya̱ nej sôꞌ rayiꞌî yiꞌna dânj.
12 Ni̱ nga gunïn sachij Jacob si màn trigu riñan hioꞌó Egipto,
ni̱ gaꞌnḯn sôꞌ gaꞌanj si̱nï̱n rej nêꞌ riñan hioꞌó dânj.
13 Ni̱ nga gisîj huàꞌ gaꞌanj rej nêꞌ riñan hioꞌó Egipto,
ni̱ nadigân José ma̱ꞌan sôꞌ riñan nej dinḯn sôꞌ,
ni̱ ganataꞌ sôꞌ riñan Faraón si dinḯn sôꞌ huin rej nêꞌ.
14 Ni̱ gaꞌnḯn José,
gaꞌanj ga̱na̱ka̱j nej dinḯn sôꞌ rej sôꞌ sachij Jacob,
ni̱ gaꞌnaꞌ daranꞌ nej dùguìꞌ sôꞌ,
ni̱ gaꞌnaꞌ daꞌngaꞌ ꞌngo̱ si huàꞌnï̀nj xia yi̱nu̱nꞌ nej guiì.
15 Huê danj ni̱ gaꞌnaꞌ sachij Jacob riñan hioꞌó Egipto,
ni̱ hiuj dânj nne sôꞌ nga gahuiꞌ sôꞌ,
ni̱ huê hiuj dânj nne nej rej nêꞌ ni̱ gahuiꞌ nej sôꞌ.
16 Sani̱ nanꞌ nneè kú nej sôꞌ riñan hioꞌó Siquem,
hioꞌó ganarânj sachij Abraham riñan nej daꞌní Hamor,
ni̱ ruhuâ huej nânj gachinꞌ nej sij nej nimân.
17 ’Sani̱ nga ruhuâ ga̱na̱huij diû ga̱ne nej sij riñan hioꞌó Egipto,
ni̱ dàj rûnꞌ yàngàꞌ hia gataj Ma̱ꞌan Ñaꞌanj an gu̱nïn sachij Abraham,
ni̱ gachij yumanꞌan ni̱ giyiꞌnanj nej dùguìꞌ nej sij ruhuâ yumanꞌ Egipto.
18 Ni̱ ganakaj su̱n aꞌngô rey riñan yumanꞌ Egipto sani̱ nun niꞌin sôꞌ José.
19 Ni̱ ûta kï̱j ga rey nânj ngà nej Israelita ni̱ gidigañuꞌunj un sôꞌ nej Israelita,
ni̱ giꞌhiaj sôꞌ si ûta giranꞌ sa̱ñu̱n nej yi nêꞌ,
ni̱ gataj rey dânj si da̱gahuiꞌ nej sôꞌ nej neꞌej naꞌuu,
daꞌnga ni̱ si̱ giyiꞌnanj nej dùguìꞌ nêꞌ.
20 Ni̱ huê gè diû dânj gaꞌnga sachij Moisés,
ni̱ gininj hueꞌê sôꞌ riñan Ma̱ꞌan Ñaꞌanj an;
ni̱ gane sôꞌ huàꞌnï̀nj ahuii dukuâ rej sôꞌ.
21 Sani̱ nga doj huaj gàhuìꞌ sôꞌ,
ni̱ ganakaj daꞌnin yànà Faraón sôꞌ,
ni̱ dugumîn siyànà dânj ni̱ gachij sôꞌ giꞌhia.
22 Ni̱ gahuin chru̱n Moisés daranꞌ nej sa niꞌin nej sí chru̱n màn yumanꞌ Egipto;
ni̱ ûta ran gaꞌmin sôꞌ ni̱ ûta hueꞌê hua nej sa giꞌhiaj sôꞌ.
23 ’Ni̱ nga gisîj sôꞌ huìj xia hioꞌo,
ni̱ ganï̂n ruhuâ sôꞌ ga̱ꞌa̱nj gi̱niꞌhiaj sôꞌ ñan màn nej duguiꞌ sôꞌ,
nej daꞌní Israel.
24 Ni̱ nga giniꞌin sôꞌ gaꞌhuiꞌ ꞌngo̱ sí màn yumanꞌ Egipto ꞌngo̱ sí Israelita,
ni̱ dunaꞌhuej sôꞌ rayiꞌî sí Israelita,
ni̱ guduranꞌ yiꞌì sôꞌ sí Egipto,
guendâ gàꞌhuìꞌ sôꞌ niꞌhiaj nej sí Israelita.
25 Ni̱ ganï̂n ruhuâ sôꞌ si ga̱ra̱n daꞌnga ruhuâ nej dinḯn sôꞌ si Ñaꞌanj an gu̱ru̱gûñuꞌunj rukû sôꞌ ni̱ gi̱ꞌhia si ga̱hui̱ nej sôꞌ ruhuâ yumanꞌ Egipto;
sani̱ nun ga̱ꞌhue ga̱ra̱nꞌ daꞌnga ruhuâ nej sí yiñán sôꞌ sa giꞌhiaj sôꞌ.
26 Aꞌngô gui dânj ni̱ gaꞌanj sôꞌ,
ni̱ ganariꞌ sôꞌ si huìj ranꞌ nej sí yiñán sôꞌ nun ûtaꞌ,
ni̱ gunuchraꞌ da̱ꞌa̱j sôꞌ nguèj síꞌ,
ni̱ gataj sôꞌ gunïn nguèj sí dânj:
“Nùnj huin saj ni̱ gunïnꞌ nguèj suj,
ni̱ gaꞌhuiꞌ nguèj suj niꞌhiaj ꞌngo̱ ni̱ aꞌngô dinḯn nguèj suj ràꞌaj.”
27 Sani̱ nun ga̱na̱daꞌa sí gaꞌhuiꞌ niꞌhiaj dinḯn dânj si-nùguànꞌ sôꞌ,
ni̱ gataj sí dânj gunïn sôꞌ:
“Ahuin si rikî si gi̱nikaj su̱nꞌ,
ni̱ ga̱huînꞌ guesì riñan nej ñûnj ràꞌaj.
28 Ruhuâꞌ da̱gahuîꞌ ñùnj,
dàj rûnꞌ dagahuîꞌ gukï sí Egipto na̱nj nîꞌ.”
29 Ni̱ nga gunïn Moisés nej nuguanꞌ nânj,
ni̱ gunânj sôꞌ gaꞌanj sôꞌ,
ni̱ gaꞌanj ga̱ne nun akuanꞌ sôꞌ riñan hioꞌó Madián,
ni̱ hiuj dânj nne sôꞌ nga gayakaj sôꞌ nika sôꞌ ni̱ gaꞌnga huìj daꞌnin naꞌu sôꞌ.
30 ’Ni̱ gachin huìj xia hioꞌo,
ni̱ ganikïnꞌ ꞌngo̱ si-ángel Ma̱ꞌan Ñaꞌanj an riñan Moisés nga nikïnꞌ sôꞌ riñan hioꞌó nàkò nngaj ñan ni̱kï̱nꞌ kïj gùꞌnàj Sinaí,
ni̱ nda nariꞌñanj chre ganûn ñaꞌaan chrun nìkàꞌ lij zarza giniꞌin sôꞌ.
31 Hiôꞌ ni̱,
giniꞌhiaj Moisés,
ni̱ gahuin ña̱ꞌanj ruhuâ sôꞌ rayiꞌî sa giniꞌin sôꞌ;
ni̱ gaꞌnaꞌ nichì sôꞌ guendâ gi̱niꞌhiaj hueꞌê sôꞌ doj,
huê danj ni̱ gunïn sôꞌ gaꞌmin Ma̱ꞌan Señor ni̱ gata gunïn sôꞌ:
32 “Ñùnj huin Ma̱ꞌan Ñaꞌanj nìkòꞌ nej yît,
ni̱ huê huin Danꞌanj Abraham,
Danꞌanj Isaac,
ni̱ Danꞌanj Jacob.”
Ni̱ nda nagunanj nneè kû Moisés nga gunïn sôꞌ,
ni̱ naꞌhuej ruhuâ sôꞌ gi̱niꞌhiaj sôꞌ ñan ganûn ñaꞌan dânj.
33 Ni̱ gataj Ma̱ꞌan Señor gu̱nïn sôꞌ:
Gi̱ri̱ sòꞌ kanj ꞌnï̱nj dakôt dânj,
dadinꞌ hioꞌó gèe huin ñan ni̱kï̱nꞌ dânj na̱nj ánj.
34 Giniꞌín si ûta giranꞌ sa̱ñu̱n nej daꞌnî nne riñan hioꞌó Egipto,
ni̱ gunḯn si ûta àko huin duꞌhua nej sij,
ni̱ rayiꞌî dan ginîn gaꞌná guendâ du̱naninj nej sij.
Hia̱j ni̱ ga̱ꞌna̱ꞌ dadinꞌ gàꞌnï̀n ga̱ꞌa̱njꞌ nda Egipto.”
35 ’Moisés nânj,
huin sôꞌ nun ga̱ꞌhue̱j nej sij,
ga̱na̱huin ra̱ꞌa nej sij,
ni̱ gataj nej sij gunïn sôꞌ:
“Ahuin si gataj si gi̱nikaj sunꞌ riñan nej ñûnj,
ni̱ ga̱huînꞌ guesì riñan nej ñûnj ràꞌaj”,
huê sôꞌ gaꞌnḯn Ma̱ꞌan Ñaꞌanj an gaꞌanj gi̱nikaj su̱n ni̱ giꞌhiaj sôꞌ si ga̱hui̱ nej sij ruhuâ yumanꞌ Egipto dadinꞌ hua̱j ángel gaꞌmin riñan tanj zarza ngà sij.
36 Ni̱ ûta nìko hua nej daꞌngaꞌ giꞌhiaj sôꞌ riñan hioꞌó Egipto,
huê danj ni̱ giri sôꞌ nej sij neꞌ ye̱ꞌ hioꞌó dânj,
ni̱ duguachîn sôꞌ nej sij ruhuâ nne ña̱ꞌa̱nj ma̱re,
ni̱ gane nej sij ngà sôꞌ riñan hioꞌó nàkòo huìj xia hioꞌo.
37 Ni̱ huê Moisés nânj huin sôꞌ gataj gu̱nïn nej daꞌní Israel:
“Ni̱ ga̱na̱chi nikaj Ma̱ꞌan Ñaꞌanj an ꞌngo̱ sôꞌ ga̱ta̱j dàj ga̱huin siganï̂nj nej suj,
dàj rûnꞌ giꞌhia ngàj;
ni̱ gu̱nïn nej suj sa ga̱ꞌmi̱n sôꞌ.”
38 Huê Moisés nânj huin si ginikaj su̱n riñan yumanꞌ Israel nga gimân nej sij riñan hioꞌó nàkòo ni̱ huê danj na̱nj gane ángel gaꞌmin ngà sij raa̱ kïj Sinaí ngà nej sij,
ni̱ gane ngà nej sachij yi nêꞌ,
ni̱ ganahuin ra̱ꞌa Moisés nuguanꞌ gi̱ꞌhiaj ga̱na̱huin nìꞌnàꞌ nêꞌ ni̱ narikî sôꞌ riñan nêꞌ.
39 ’Sani̱ nun ga̱ꞌhue̱j yi nêꞌ da̱gahuin nej sôꞌ nej nuguanꞌ gunïn nej sôꞌ,
ni̱ gudunâj nej sôꞌ nej nuguanꞌ dânj,
ni̱ ganï̂n ruhuâ nimân nej sôꞌ si gànànìkàj ñûn nej sôꞌ na̱nꞌ nej sôꞌ yumanꞌ Egipto,
40 ni̱ gataj nej sôꞌ gu̱nïn Aarón:
“Gi̱ꞌhiâ sòꞌ ñaꞌanj an ni̱ ga̱ꞌan neꞌ ña̱an riñan nêꞌ dadinꞌ Moisés sôꞌ giri nêꞌ riñan hioꞌó Egipto,
ni̱ nun niꞌînꞌ nùnj huin si giranꞌ sôꞌ gàꞌ mánj.”
41 Hiôꞌ ni̱ giꞌhiaj ra̱ꞌa nej sij ꞌngo̱ rô gahuin daꞌanj nej sij,
ni̱ dagahuiꞌ nej sij yuku riñan rô gahuin daꞌanj nej sij,
ni̱ giꞌhiaj nej sij giꞌñanj an ni̱ ganahuin nìhiàꞌ ruhuâ nej sij ngà ñaꞌanj giꞌhiaj ra̱ꞌa nej síi.
42 Ni̱ guxun Ñaꞌanj an Ma̱ꞌan riñan nej sij,
ni̱ guduna si ginùn ña̱ꞌa̱nj nej sij riñan nej atïꞌ màn neꞌ yàtàꞌa;
dàj rûnꞌ taj riñan ñanj gachrûn nej sôꞌ gataj dàj ga̱huin àsìj diû ri̱ki:
Nej suj huin dukuâ Israel,
riki nej suj ni̱ dagahuiꞌ nej suj yuku riñânj,
nga gane nej suj huìj xia hioꞌo riñan hioꞌó nàkòo na̱nj nîꞌ.
43 Sê dànanj ginikaj nej suj daꞌanj nej suj gùꞌnàj Moloc,
ni̱ gane ruhuâ nuhuî atsîj giꞌhiaj nej suj,
ni̱ huê ruhuâ nuhuî dânj gane atïꞌ gùꞌnàj Renfán ni̱ gahuin ñaꞌanj an riñan nej suj,
nânj huin ñaꞌanj giꞌhiaj ra̱ꞌa nej suj guendâ ginùn ña̱ꞌa̱nj nej suj ràꞌ saj ûnꞌ.
Rayiꞌî dan ni̱ gi̱nika ga̱ꞌa̱n nej suj nda neꞌ ña̱n doj riñan hioꞌó Babilonia na̱nj ánj.
44 ’Ni̱ ni̱ka̱j yi nêꞌ nuhuî atsìj i huaj nej sij riñan hioꞌó nàkòo dàj rûnꞌ giyiꞌnïnꞌ suun ni̱ dàj rûnꞌ gidigân Ma̱ꞌan Ñaꞌanj an ni̱ dàj rûnꞌ garanꞌ ruhuaj ga̱ si-nùhuìj giꞌhiaj Moisés.
45 Ni̱ ganahuin ra̱ꞌa yi nêꞌ nuhuî atsîj dânj,
ni̱ ni̱ka̱j nej sôꞌ huaj nej sôꞌ ngà Josué,
nga ganakaj nej sôꞌ hioꞌó gaꞌnêj Ma̱ꞌan Ñaꞌanj an riñan nej sí nàsìnùnj un,
ni̱ dugumîn nej sôꞌ nuhuî atsîj dânj nda gui gane sachij David.
46 Ni̱ ñan ûta garanꞌ ruhuâ Ma̱ꞌan Ñaꞌanj an niꞌin David,
ni̱ gachín nìꞌhiaj sôꞌ si ga̱ra̱n yina Ma̱ꞌan Ñaꞌanj an ni̱ gi̱ꞌhiaj sôꞌ ꞌngo̱ nuhuî yìtï̀nj ïn ga̱ne Daꞌanj sachij Jacob.
47 Sani̱ garânj yina Ma̱ꞌan Ñaꞌanj an si daꞌní sôꞌ Salomón huin sí ga̱ꞌhue gi̱ꞌhiaj ꞌngo̱ hueꞌ yìtï̀nj ïn ñan gane Ma̱ꞌan Ñaꞌanj an;
48 sani̱ gàꞌ nitaj si nne Ma̱ꞌan Ñaꞌanj an ruhuâ nuhuî giꞌhiaj ra̱ꞌa nej síi,
dàj rûnꞌ gaꞌmin nga garânj sunj duꞌhua sôꞌ gataj dàj ga̱huin:
49 Yàtàꞌa huin chrun yilâ nné,
ni̱ riñan hioꞌóo huin ñan tàj dakô.
Ni̱ gataj Ma̱ꞌan Señor:
Dàj ga̱ hueꞌ gi̱ꞌhiaj nej suj ga̱né ràꞌaj.
ni̱ dànèꞌ hua ga̱na̱ra̱n ruhuâj ràꞌaj.
50 Sê ñùnj giꞌhiaj gahuin daranꞌ nej nânj ràꞌ saj ûnꞌ.
51 ’Ûta tsì hua ruhuâ nimân nej suj,
—ni̱ ûta kï̱j hua nej suj dadinꞌ naꞌhue ga̱ra̱n daꞌngaꞌ ruhuâ nej suj —ni̱ daranꞌ diû naꞌhuej nej suj gùyùmàn ruhuâ nej suj sa taj Ma̱ꞌan Espíritu Santo;
ni̱ dàj rûnꞌ giꞌhiaj nej yi nej suj,
ni̱ huê gè danj giꞌhiaj nej suj na̱nj án.
52 Ahuin goꞌngo̱ nej sôꞌ gataj dàj ga̱huin nun ga̱ta̱ rùhuà yi nej suj ràꞌaj.
Ni̱ sê dagahuiꞌ nej sij nej sí ganataꞌ si hua̱ ni̱ña̱n si ga̱ꞌna̱ꞌ sôꞌ gi̱ꞌhiaj sa ni̱ka̱a,
ni̱ huê sôꞌ huin sí nagaꞌhuiꞌ nej suj ni̱ dagahuiꞌ nej suj ràꞌ saj ûnꞌ;
53 ángel girikî si-ley Ma̱ꞌan Ñaꞌanj an ganahuin ra̱ꞌa nej suj,
sani̱ nun da̱gahuin nej suj mánj.
Dagahuiꞌ nej sij Esteban
54 Ni̱ nga gunïn nej sí nne riñan gunta nej nuguanꞌ nânj,
ni̱ ûta gaꞌman ruhuâ nej sôꞌ ngà nda ruhuâ nimân nej sôꞌ,
ni̱ nda yâ ru̱j ñanꞌ nej sôꞌ niꞌin nej sôꞌ Esteban.
55 Sani̱ nda nìchra chre nun Ma̱ꞌan Espíritu Santo ruhuâ nimân Esteban,
ni̱ giniꞌhiaj sôꞌ yàtàꞌa,
ni̱ giniꞌin sôꞌ si ûta nìko nikaj su̱n Ma̱ꞌan Ñaꞌanj an,
ni̱ giniꞌin sôꞌ si ni̱kï̱nꞌ Ma̱ꞌan Jesús raꞌa neꞌ huàꞌ Ma̱ꞌan Ñaꞌanj an,
56 hiôꞌ ni̱ gataj Esteban:
—Giniꞌín si hua̱ niꞌnï̀nj yàtàꞌa,
ni̱ giniꞌín ni̱kï̱nꞌ Ma̱ꞌan Jesús raꞌa neꞌ huàꞌ Ma̱ꞌan Ñaꞌanj an.
57 Hiôꞌ ni̱ gayiꞌì nej sij ni̱ gaguâj nùkuaj staꞌu nej sij,
ni̱ ganarán nej sij rakïj nej sij,
huê danj ni̱ gayiꞌì daranꞌ nej sij ni̱ gu̱ña̱n chre gaꞌmin nej sij ni̱ gaꞌhuiꞌ nej sij nìꞌhiaj Esteban.
58 Huê danj ni̱ giri nej sij neꞌ ye̱ꞌ yumanꞌ snàꞌànj dânj Esteban,
ni̱ garrûn nej sij hiëj sôꞌ;
ni̱ guchruj nej sí giniꞌin dàj giranꞌ Esteban siganꞌ Esteban,
yiꞌî ꞌngo̱ sí hua lij gùꞌnàj Saulo.
59 Ni̱ garrûn nej sij hiëj Esteban,
ni̱ ni̱kï̱nꞌ rúdàkòj sôꞌ ni̱ gaꞌmin sôꞌ ngà Ma̱ꞌan Ñaꞌanj an ni̱ gataj sôꞌ:
—Señor Jesús,
ga̱na̱huin ra̱ꞌa Ma̱ꞌan rèꞌ nanè nimânj.
60 Ni̱ ni̱kï̱nꞌ rúdàkòj sôꞌ,
ni̱ ûta nùkuaj gaꞌmin sôꞌ ni̱ gataj sôꞌ:
—Señor,
si̱ gayakaj guendâ rèꞌ gakï̱nꞌ giꞌhiaj nej sij mánj.
Ni̱ nga gisîj gaꞌmin sôꞌ nej nuguanꞌ nânj ni̱ gahuiꞌ sôꞌ.