Gata ra̱ꞌa Saulo nej sôꞌ huin si-nùhuì Ma̱ꞌan Jesús
8
Ni̱ garanꞌ ruhuâ Saulo guendâ dagahuiꞌ nej sij Esteban.
Ni̱ àsìj gui dânj ni̱ gayiꞌì sôꞌ ni̱ gata ra̱ꞌa sôꞌ nej sí huin si-nùhuì Ma̱ꞌan Jesús màn yumanꞌ snàꞌànj Jerusalén;
ni̱ gayaꞌnï̀nꞌ daranꞌ nej sôꞌ nìkòꞌ rukû Ma̱ꞌan Jesús ni̱ gunânj nej sôꞌ gaꞌanj nej sôꞌ nï̀nꞌ gàchràꞌ riñan hioꞌó Judea ngà riñan hioꞌó Samaria,
ni̱ man nej sôꞌ gidigân si̱nï̱n si-nùguànꞌ Ma̱ꞌan Ñaꞌanj an gunâj ruhuâ yumanꞌ snàꞌànj Jerusalén.
2 Ni̱ ganakaj nej sí ni̱ka̱j chrej riñan Ma̱ꞌan Ñaꞌanj an nneè kú Esteban ni̱ ni̱ka̱j nej sôꞌ gaꞌanj gàchìnꞌ nej sôꞌ,
ni̱ ûta dugueꞌe nej sôꞌ.
3 Ni̱ ûta ganahuij ruhuâ Saulo ni̱ gatûj sôꞌ daꞌ hueꞌe,
ni̱ gidaꞌa sôꞌ nej siyànàa ngà nej sôꞌ huin si-nùhuì Ma̱ꞌan Jesús guendâ ga̱chri̱ sôꞌ dukuâ gaꞌa nej sij.
Ganataꞌ nej sij si-nùguànꞌ Ma̱ꞌan Ñaꞌanj an riñan nej guiì màn yumanꞌ Samaria
4 Sani̱ nej sí gayaꞌnï̀n gaꞌanj ni̱ dànèꞌ gahuin ñan hua̱j nej sôꞌ ni̱ ganataꞌ nej sôꞌ si-nùguànꞌ Ma̱ꞌan Ñaꞌanj an riñan nej guiì màn ñan hua̱j nej sôꞌ.
5 Hiôꞌ ni̱ gaꞌanj Felipe ñan nngaj yumanꞌ snàꞌànj Samaria,
ni̱ ganataꞌ sôꞌ rayiꞌî Ma̱ꞌan Cristo riñan nej guiì màn yumanꞌ snàꞌànj dânj.
6 Ni̱ ganahuin chre̱ꞌ daranꞌ nej guiì,
ni̱ ûta hueꞌê gunïn ninj nej nuguanꞌ ganataꞌ Felipe,
ni̱ giniꞌin ninj nej daꞌngaꞌ giꞌhiaj sôꞌ.
7 Ûta gàꞌì nej guiì nun nanè kï̱j huaa gaꞌanj riñan Felipe,
ni̱ giri sôꞌ nej nanè kï̱j hua dânj ni̱ gaguâj nùkuaj nej nanè kï̱j hua dânj nga gahui ninj;
ni̱ ganahuin ûta gàꞌì nej guiì naꞌhue gìsìkìꞌ nneè kú,
ni̱ ganahuin gàꞌì nej guiì naꞌhue ga̱che̱.
8 Ni̱ ûta gahuin nìhiàꞌ ruhuâ nej guiì màn ruhuâ yumanꞌ snàꞌànj dânj.
9 Ni̱ ruhuâ yumanꞌ snàꞌànj Samaria nne ꞌngo̱ sí gùꞌnàj Simón,
ni̱ àsìj nâ doj ni̱ sí ginikaj magia huin sôꞌ,
ni̱ ûta gidigañuꞌunj sôꞌ nej guiì màn yumanꞌ snàꞌànj Samaria,
ni̱ giꞌhiaj sôꞌ si huin sôꞌ ꞌngo̱ sí ni̱ka̱j sun nìko xi riñan nej guiì màn yumanꞌ snàꞌànj dânj.
10 Ni̱ ûta hueꞌê gananï̂n ra̱kïj nej guiì sa gaꞌmin sôꞌ,
àsìj nej silíj hua̱ lij ni̱ nda nej síchìj achij i,
ni̱ gataj nej sôꞌ:
—Ûta nùkuaj giꞌhiaj sun Ma̱ꞌan Ñaꞌanj an ngà sij na̱nj ánj.
11 Ni̱ ûta hueꞌê gananï̂n ra̱kïj nej guiì sa giꞌhiaj sôꞌ,
dadinꞌ ngà magia ni̱ka̱j sôꞌ gidigaꞌñunj sôꞌ nej guiì.
12 Sani̱ nga guchiꞌ Felipe yumanꞌ dânj ni̱ ganataꞌ sôꞌ si-nùguànꞌ Ma̱ꞌan Ñaꞌanj an riñan nej guiì màn hiuj dânj,
ni̱ gananï̂n sôꞌ rayiꞌî Ma̱ꞌan Jesús,
ni̱ gataꞌ nne nej síi ngà nej siyànàa giꞌhiaj sôꞌ.
13 Huê danj na̱nj guyumân ruhuâ Simón niꞌin sôꞌ Ma̱ꞌan Jesucristo,
ni̱ gataꞌ nne sôꞌ;
ni̱ daranꞌ diû gaché sôꞌ ngà Felipe,
ni̱ nga giniꞌin sôꞌ dàj nìko hua nej daꞌngaꞌ giꞌhiaj Felipe,
ni̱ ûta gahuin ña̱ꞌanj ruhuâ sôꞌ.
14 Ni̱ nga gunïn nej sôꞌ gaꞌnaꞌ ga̱huin chru̱n riñan Ma̱ꞌan Jesús,
si ganahuin ra̱ꞌa nej guiì màn yumanꞌ Samaria si-nùguànꞌ Ma̱ꞌan Ñaꞌanj an,
ni̱ gaꞌnḯn nej sôꞌ gaꞌanj gi̱niꞌhiaj Pedro ngà Juan.
15 Ni̱ nga guchi nguèj sôꞌ ñan màn nej sij,
ni̱ gachín nìꞌhiaj nguèj sôꞌ riñan Ma̱ꞌan Ñaꞌanj an rayiꞌî nej sij,
huê danj ni̱ ganahuin ra̱ꞌa nej sij Ma̱ꞌan Espíritu Santo;
16 dadinꞌ hua̱ nun gùyùmàn Ma̱ꞌan Espíritu Santo riñan gàꞌ si ꞌngo̱ nej sij,
dadin man ngà siyu̱gui Ma̱ꞌan Jesús gataꞌ nne sij.
17 Hiôꞌ ni̱ gutaꞌ Pedro ngà Juan raꞌa nguèj sôꞌ ahui nej guiì màn hiuj dânj,
ni̱ gataꞌ nne ninj ngà Ma̱ꞌan Espíritu Santo.
18 Ni̱ nga giniꞌin Simón si gutaꞌ nej sôꞌ gaꞌanj gi̱di̱gân si̱nï̱n si-nùguànꞌ Ma̱ꞌan Ñaꞌanj an raꞌa nej sôꞌ ahui nej guiì ni̱ ganahuin ra̱ꞌa ninj Ma̱ꞌan Espíritu Santo,
ni̱ gataj sôꞌ si gu̱ruꞌhue sôꞌ sanꞌanj an daꞌnga ni̱ ganahuin ra̱ꞌa sôꞌ Ma̱ꞌan Espíritu Santo,
19 ni̱ gataj sôꞌ:
—Ri̱ki̱ sòꞌ sun dânj gi̱nikaj su̱nj ni̱ ahuin na̱nj si ahui gùtàj raꞌá ni̱ ga̱na̱huin ra̱ꞌa ninj Ma̱ꞌan Espíritu Santo giꞌhiâ na̱nj ánj.
20 Hiôꞌ ni̱ gataj Pedro gunïn sôꞌ:
—Ga̱na̱huíꞌ ni̱ ga̱na̱huij si-sa̱nꞌa̱njt ngàꞌ raj,
dadinꞌ ganï̂n ruhuâꞌ si ga̱ꞌhue gi̱ranꞌ ngà sanꞌanj an si-su̱n Ma̱ꞌan Ñaꞌanj an.
21 Si̱ gaꞌhue gi̱ꞌhiaj sunꞌ si-su̱n Ma̱ꞌan Ñaꞌanj an ngà nej ñûnj,
dadinꞌ nitaj si hua ni̱ka̱ nimânt ngà Ma̱ꞌan Ñaꞌanj an mánj.
22 Gànànìkàj ruhuâꞌ ngà rayiꞌî si-ga̱kï̂nt,
dadinꞌ ganï̂n aꞌnanꞌ ruhuâꞌ ni̱ gàchìnj nìꞌhiaꞌ si ga̱ꞌhuej Ma̱ꞌan Ñaꞌanj an ni̱ gi̱nika nimân nìko rayiꞌî sa aꞌnanꞌ ganï̂n ruhuâ nimânt na̱nj ánj;
23 dadinꞌ ganahuin hàìꞌ nï̀nꞌ ruhuâ nimânt ni̱ nitaj si hua̱ nìhiàꞌ ruhuâꞌ ni̱ niꞌhia ni̱ si̱ ꞌnïnj nìnï̀nꞌ riñan sa kï̱j huaa na̱nj ánj.
24 Hiôꞌ ni̱ nanikàj Simón,
ni̱ gataj sôꞌ:
—Ga̱ꞌmi̱n àko nej suj rayiꞌí riñan Ma̱ꞌan Señor,
daꞌnga ni̱ si̱ guyumân gàꞌ si ꞌngo̱ nej sa aꞌnanꞌ gataj nej suj riñânj na̱nj ánj.
25 Ni̱ nga gisîj ganataꞌ nej sij si-nùguànꞌ Ma̱ꞌan Ñaꞌanj an,
ni̱ nanikàj nej sij nanꞌ nej sij yumanꞌ snàꞌànj Jerusalén,
ni̱ ganataꞌ nej sij riñan gàꞌì nej yumanꞌ màn riñan hioꞌó Samaria nuguanꞌ gi̱ꞌhiaj ga̱na̱ni̱n nej guiì.
Felipe ngà síchìj etíope
26 Ni̱ gaꞌmin ꞌngo̱ si-ángel Ma̱ꞌan Señor riñan Felipe,
ni̱ gata gu̱nïn sôꞌ:
—Gànàyùmàn sòꞌ ni̱ gaꞌanj chrej ahui yumanꞌ snàꞌànj Jerusalén,
ni̱ gaꞌan neꞌ ri̱ki ni̱ gachinj riñan hioꞌó nàkòo ni̱ guchij nda Gaza.
27 Hiôꞌ ni̱ ganayumàn sôꞌ ni̱ gaꞌanj sôꞌ.
Ni̱ ganariꞌ duguiꞌ sôꞌ ngà ꞌngo̱ sí ꞌnaꞌ riñan hioꞌó Etiopia,
ni̱ huin sí dânj ꞌngo̱ sí nitaj si huaj ga̱ daꞌní,
ni̱ ni̱ka̱j su̱n sôꞌ riñan daranꞌ nej sa huin si-ꞌhiaj yugûnꞌ reyna gùꞌnàj Kandace ni̱ yugûnꞌ nânj nikaj su̱n riñan hioꞌó Etiopia,
ni̱ hua̱j nanꞌ sôꞌ dadinꞌ gaꞌanj ginùn ña̱ꞌa̱nj sôꞌ riñan Ma̱ꞌan Ñaꞌanj an ruhuâ yumanꞌ snàꞌànj Jerusalén.
28 Ni̱ nanikàj sôꞌ huaj nanꞌ sôꞌ ni̱ nne sôꞌ ruhuâ karreta,
ni̱ ahia sôꞌ librû gachrûn Isaias sôꞌ gataj dàj ga̱huin.
29 Ni̱ gataj Ma̱ꞌan Espíritu Santo gunïn Felipe:
—Ga̱ꞌa̱nj nichì sòꞌ nìchrùnꞌ yiꞌnḯn karru dan na̱nj ánj.
30 Huê danj ni̱ gunânj Felipe ni̱ gaꞌanj nichì sôꞌ nìchrùnꞌ yiꞌnḯn karru dânj,
ni̱ gunïn sôꞌ si gahia sí nânj librû gachrûn Isaías sôꞌ gataj dàj ga̱huin,
ni̱ gataj Felipe gunïn sí dânj:
—Garânj daꞌngaꞌ ruhuâꞌ nuguanꞌ ahiaꞌ dan nînj.
31 Nanikàj sí dânj ni̱ gataj sôꞌ:
—Dàj gi̱ꞌhia ga̱ꞌhue ga̱ra̱n daꞌngaꞌ ruhuâj,
si nitaj gàꞌ si ꞌngo̱ sí gi̱di̱gân ñùnj ràꞌaj.
Ni̱ gataj sôꞌ si ga̱hui̱ Felipe ruhuâ si-karrû sôꞌ,
huê danj ni̱ gaꞌanj ga̱ne Felipe yiꞌnḯn sôꞌ.
32 Ni̱ ahia sôꞌ librû gachrûn Isaias huaj sôꞌ,
ni̱ taj riñan librû gahia sôꞌ:
Ni̱ka̱j nej sij gaꞌanj nej sij Ma̱ꞌan,
ni̱ dàj rûnꞌ giꞌhiaj matsïj hua̱j gàhuìꞌi huê danj giꞌhia;
ni̱ dàj rûnꞌ giꞌhiaj matsïj ꞌnij in nga gaka nej síi to yôꞌ ni̱ nitaj si dugueꞌe yôꞌ,
huê danj giꞌhia ni̱ dḯn ga duꞌhua na̱nj ánj.
33 Ni̱ nda ganari ninj chre aꞌngô nej síi Ma̱ꞌan sani̱ nitaj gàꞌ si ꞌngo̱ sí du̱naꞌhuej rayiꞌij;
ni̱ ahuin sí gànàtàꞌ dàj ga̱huin ràꞌaj.
Dadinꞌ dagahuiꞌ nej síi Ma̱ꞌan.
34 Nanikàj sí ni̱ka̱j su̱n riñan yugûnꞌ reina,
ni̱ gataj sôꞌ gu̱nïn Felipe:
—Gachín niꞌhia si ga̱ta̱j sòꞌ:
Ahuin si ràyìꞌì gaꞌmin sôꞌ gataj dàj ga̱huin ràꞌaj;
aꞌmin sij rayiꞌî ma̱ꞌan sij nîꞌ si gaꞌmin si rayiꞌî aꞌngô síi sàꞌ.
35 Àsìj nuguanꞌ nânj gayiꞌì Felipe,
ni̱ gaꞌmin sôꞌ,
ni̱ gidigân sôꞌ nùnj huin si ga̱ta̱j nuguanꞌ nânj ruhuaj,
ni̱ gananï̂n sôꞌ rayiꞌî Ma̱ꞌan Jesucristo.
36 Huê danj ni̱ hua̱j nej sij chrej dânj,
ni̱ guchiꞌ nej sij ñan nu̱n nnee,
ni̱ gataj sí ni̱ka̱j su̱n riñan yugûnꞌ reina dânj:
—Hiuj nânj nun nnee ni̱ ahuin si garanꞌ ñuꞌunj si gàtàꞌ nnêj ràꞌaj.
37 Ni̱ gataj Felipe:
—Huê si guyumân yìtï̀nj ruhuâꞌ ngà daranꞌ nimânꞌ,
hiôꞌ ni̱ ga̱ꞌhue gàtàꞌ nnêꞌ na̱nj ánj.
Nanikàj sí dânj ni̱ gataj sôꞌ:
—Guyumân ruhuâj si Ma̱ꞌan Jesucristo huin Daꞌní Ma̱ꞌan Ñaꞌanj an na̱nj ánj.
38 Ni̱ gaꞌnïnꞌ sij suun si ga̱nikïnꞌ karru nu̱n nguèj sij huaj nguèj sij;
huê danj ni̱ gananinj nguèj sij ni̱ gatûj nguèj sij ruhuâ nnee,
huê danj ni̱ duguataꞌ nne Felipe sí dânj.
39 Sani̱ nga gahui nguèj sij ruhuâ nnee,
ni̱ ganachi nikaj Ma̱ꞌan Espíritu Santo Felipe ni̱ gaꞌanj sôꞌ,
aꞌngô yumanꞌan huê danj ni̱ nun gi̱ni̱ꞌin sí dânj dànèꞌ gaꞌanj Felipe,
sani̱ ûta nìhiàꞌ hua ruhuâ sôꞌ huaj nanꞌ sôꞌ yiñán sôꞌ.
40 Sani̱ nga giniꞌin Felipe ni̱ nda yumanꞌ Azoto nikïnꞌ sôꞌ,
ni̱ gachin sôꞌ gaꞌanj sôꞌ ni̱ ganataꞌ sôꞌ si-nùguànꞌ Ma̱ꞌan Ñaꞌanj an riñan daranꞌ nej yumanꞌ snàꞌànj ñan gachin sôꞌ huaj sôꞌ,
ni̱ huê danj na̱nj gaꞌmin sôꞌ si-nùguànꞌ Maꞌan Ñaꞌanj an nda guchiꞌ sôꞌ yumanꞌ Sesarea.