Nanikòꞌ Saulo rukû Ma̱ꞌan Jesús
9
Ni̱ ûta naꞌan ruhuâ Saulo ni̱ ûta huin ruhuâ sôꞌ da̱gahuiꞌ sôꞌ nej sí gaꞌnaꞌ ga̱huin chru̱n riñan Ma̱ꞌan Jesús,
ni̱ gaꞌnaꞌ sôꞌ riñan rej aꞌnïnꞌ nï̀nꞌïn,
2 ni̱ gaꞌanj gàchìnj sôꞌ ñanj karta riñan rej aꞌnïnꞌïn guendâ gìrìꞌ sôꞌ permisu ni̱ ga̱tu̱ sôꞌ ruhuâ nej hueꞌ nûhui màn ruhuâ yumanꞌ snaꞌanj Damasco,
dadinꞌ ruhuâ sôꞌ gi̱daꞌa sôꞌ nej síi ni̱ nej siyànà hua̱j si-chrej Ma̱ꞌan Señor,
ni̱ ruhuâ sôꞌ gi̱da̱ꞌa sôꞌ ni̱ gi̱nikaj sôꞌ ga̱ꞌna̱ꞌ sôꞌ nej guiì dânj guendâ ga̱chri̱ sôꞌ dukuâ gaꞌ nne Jerusalén nej guiì dânj.
3 Ni̱ aché sôꞌ huaj sôꞌ chrej hua̱j Damasco,
ni̱ nga huaj ga̱huin nichrunꞌ sôꞌ ñan nngaj yumanꞌ snàꞌànj Damasco,
ni̱ nda nanè chre ganikàj neꞌ rùkù sôꞌ giyigï̀n ñaꞌan gaꞌnaꞌ neꞌ yàtàꞌa;
4 ni̱ ganatûj sôꞌ riñan hioꞌóo,
ni̱ gunïn sôꞌ ꞌngo̱ sa gaꞌmin ni̱ gata gu̱nïn sôꞌ:
—Saulo,
Saulo,
nùnj huin saj ni̱ gata rùhuàꞌ ñùnj ràꞌaj.
5 Ni̱ nanikàj sôꞌ ni̱ gataj sôꞌ:
—Ahuin rèꞌ ràꞌaj Señor.
Ni̱ gataj sa gaꞌmin dan gu̱nïn sôꞌ:
—Ñùnj huin Ma̱ꞌan Jesús,
sa gata rùhuàꞌ na̱nj ánj.
6 Ni̱ ûta nagunanj nneè kú sôꞌ ni̱ huê danj na̱nj ûta guyuꞌhuiꞌ sôꞌ,
ni̱ gataj sôꞌ:
—Señor,
nùnj si gi̱ꞌhia ruhuâ rèꞌ ràꞌaj.
Ni̱ gataj Ma̱ꞌan Señor gunïn sôꞌ:
—Ga̱na̱chi sòꞌ ni̱ ga̱tu̱ꞌ ruhuâ yumanꞌ snàꞌànj Damasco,
ni̱ hiuj dan gàꞌnï̀nꞌ nej sij suun nùnj huin si gi̱ꞌhiáꞌ na̱nj ánj.
7 Ni̱ ganikïnꞌ nej sí huaj ngà Saulo ni̱ ûta guyuꞌhuiꞌ nej sôꞌ,
ni̱ yàngàꞌ ni̱ gunïn nej sôꞌ si-nànè sa gaꞌmin dânj,
sani̱ nitaj dànèꞌ nikïnj gi̱ni̱ꞌin nej sôꞌ.
8 Hiôꞌ ni̱ ganayumàn Saulo nanikïnꞌ ga̱hia sôꞌ,
ni̱ ganaguchraꞌ sôꞌ rune ñan sôꞌ sani̱ naꞌhue gùrùguìꞌ gi̱niꞌhiaj sôꞌ;
huê danj ni̱ garaꞌhue̱ꞌ aꞌngô nej sí hua̱j ngà sôꞌ raꞌa sôꞌ,
ni̱ ginikaj nej sôꞌ gaꞌanj nej sôꞌ sij ruhuâ yumanꞌ snàꞌànj Damasco.
9 Ni̱ gane sôꞌ huàꞌnï̀nj gui hiuj dânj sani̱ nun ga̱ꞌhue gìyìgï̀n gi̱niꞌhiaj sôꞌ,
ni̱ ga gi̱ni̱ne̱j sôꞌ ni̱ nun ya̱ sôꞌ,
ni̱ nun go̱ꞌo̱ sôꞌ nnee.
10 Hiôꞌ ni̱ ruhuâ yumanꞌ snàꞌànj Damasco nne ꞌngo̱ sí gùꞌnàj Ananías ni̱ sí nìkòꞌ rukû Ma̱ꞌan Jesús huin sôꞌ,
ni̱ ganikïnꞌ Ma̱ꞌan Jesús riñan sôꞌ ni̱ gata gu̱nïn sôꞌ:
—Ananías.
Nanikàj sôꞌ ni̱ gataj sôꞌ:
Nùnj huin si gaj ràꞌaj Señor.
11 Ni̱ gataj Ma̱ꞌan Señor gunïn sôꞌ:
—Gànàyùmàn sôꞌ ni̱ ga̱ꞌa̱nj chrej gàchràꞌ gùꞌnàj sa ni̱ka̱a,
ni̱ nànàꞌhuìꞌ dukuâ sí gùꞌnàj Judas dadinꞌ hiuj dânj nne Saulo sí ꞌnaꞌ yumanꞌ Tarso;
dadinꞌ nne sij aꞌmin sij ngà Ma̱ꞌan Ñaꞌanj an,
12 ni̱ gidigán riñan sij ni̱ giniꞌin sij sôꞌ gùꞌnàj Ananías,
ni̱ gatûj sôꞌ huaj sôꞌ ñan nne sij,
ni̱ gutaꞌ sôꞌ raꞌa sôꞌ ahui sij ni̱ gànàyìgï̀n rune ñan sij.
13 Hiôꞌ ni̱ gananikàj Ananías ni̱ gataj sôꞌ:
—Señor,
gunḯn rayiꞌî sí nânj ni̱ ûta nìko sa yiꞌìi giꞌhiaj sij ngà nej daꞌní rèꞌ màn ruhuâ yumanꞌ snàꞌànj Jerusalén.
14 Ni̱ gàꞌ ganahuin ra̱ꞌa sij suun giꞌhiaj nej rej aꞌnïnꞌ nne ruhuâ yumanꞌ snàꞌànj nânj guendâ gidaꞌa sij daranꞌ nej sí ganataꞌ duꞌhua siyu̱gui Ma̱ꞌan rèꞌ.
15 Sani̱ gataj Ma̱ꞌan Señor gunïn sij:
—Ga̱ꞌa̱nj sòꞌ,
dadinꞌ ꞌngo̱ sí gàꞌ ganaguîj huin sí nânj,
dadinꞌ huê sij gàꞌnï̀n gaꞌanj gànàtàꞌ siyu̱guí riñan nej sí nàsìnùnj màn nï̀nꞌ gàchràꞌ ruhuâ yumiguìi,
ni̱ huê danj na̱nj gànàtàꞌ sij siyu̱guí riñan nej rey,
ni̱ gànàtàꞌ sij siyu̱guí riñan nej daꞌní Israel;
16 dadinꞌ gidigân nda andaj nìko daꞌhui sij gi̱ranꞌ sa̱ñu̱n sij rayiꞌî siyu̱guí.
17 Huê danj ni̱ gaꞌanj Ananías ni̱ gatûj sôꞌ ruhuâ hueꞌ nne Saulo,
ni̱ gutaꞌ sôꞌ raꞌa sôꞌ ahui Saulo ni̱ gataj sôꞌ gunïn Saulo:
—Di̱nï̂nj Saulo,
Ma̱ꞌan Señor Jesús,
Ma̱ꞌan sa ganikïnꞌ ruhuâ chrej ñan ꞌna̱ꞌ,
huê Ma̱ꞌan gaꞌnḯn gaꞌná riñanꞌ daꞌnga ni̱ gànàyìgï̀n rune ñanꞌ gi̱ꞌhia ni̱ ganahuin ra̱ꞌa Ma̱ꞌan Espíritu Santo ni̱ nda ni̱chra chre ruhuâ nimânꞌ gi̱nunj.
18 Ni̱ orâ dânj ni̱ gininj sa hua̱ si-dàtànj yukuaj a ruhuâ rune ñan sôꞌ,
ni̱ orâ chre ni̱ ganayigï̀n rune ñan sôꞌ;
ni̱ ganayumàn sôꞌ ni̱ gaꞌanj gàtàꞌ nne sôꞌ.
19 Ni̱ nga gisîj ya Saulo,
ni̱ ganariꞌ sôꞌ guesâ.
Ni̱ gane sôꞌ do̱j nej gui ngà nej sí nìkòꞌ rukû Ma̱ꞌan Jesús ruhuâ yumanꞌ Damasco.
Gayiꞌî Saulo ni̱ gananï̂n sôꞌ si-nùguànꞌ Ma̱ꞌan Ñaꞌanj an riñan nej guiì màn Damasco
20 Huê danj ni̱ ûta râꞌñanj gayiꞌì Saulo ni̱ ganataꞌ sôꞌ rayiꞌî Ma̱ꞌan Cristo ruhuâ hueꞌ huin nûhui nne hiuj dânj,
ni̱ ganataꞌ sôꞌ si Ma̱ꞌan Jesús huin Daꞌní Ma̱ꞌan Ñaꞌanj an.
21 Ni̱ ûta gahuin ña̱ꞌanj ruhuâ daranꞌ nej guiì gunïn daranꞌ nej nuguanꞌ gaꞌmin sôꞌ,
ni̱ gataj nej guiì dânj:
—Sê sí nânj huin sí dunahuij daranꞌ nej sôꞌ nìkòꞌ rukû Ma̱ꞌan Jesús ruhuâ yumanꞌ snàꞌànj Jerusalén,
ni̱ huê gue̱nda̱ dan gaꞌnaꞌ sij neꞌ dànanj,
dadinꞌ gaꞌnaꞌ sij guendâ gi̱daꞌa sij nej sí nìkòꞌ rukû Ma̱ꞌan Jesús guendâ ga̱chri̱ sij dukuâ gaꞌa nej sôꞌ ni̱ nàgàhuìꞌ sij nej sôꞌ raꞌa nej rej huin ña̱an ràꞌ saj ûnꞌ.
22 Sani̱ dànanj ûta duguꞌnïnꞌ sôꞌ ni̱ ganataꞌ sôꞌ rayiꞌî Ma̱ꞌan Jesús,
ni̱ duguachej sôꞌ ruhuâ nej judío nne ruhuâ yumanꞌ Damasco,
ni̱ ganataꞌ sôꞌ si yàngàꞌ hia nï̀nꞌ si Ma̱ꞌan Jesús huin Ma̱ꞌan Cristo.
Gunânj Saulo gaꞌanj sij riñan nej judío
23 Huê danj ni̱ gachîn gàꞌì gui,
ni̱ guchiꞌ nej judío ꞌngo̱ duꞌhua si da̱gahuiꞌ nej sôꞌ Saulo;
24 sani̱ gunïn Saulo si gataj nej sôꞌ si da̱gahuiꞌ nej sôꞌ sij.
Ni̱ màn nej sôꞌ dugumîn nej sôꞌ neꞌ gu̱niꞌñanj an ngà neꞌ ñànꞌan riñan rahueꞌ ñan ga̱hui̱ Saulo dadinꞌ ganï̂n ruhuâ nej sôꞌ da̱gahuiꞌ nej sôꞌ sij.
25 Hiôꞌ ni̱ neꞌ ñànꞌan ni̱ gaꞌnḯn nej sí ꞌnaꞌ ga̱huin chru̱n riñan Ma̱ꞌan Jesús ruhuâ ꞌngo̱ yugûti Saulo ni̱ guduninj nej sôꞌ raa̱ chran anikàj rukû yumanꞌ Damasco huê danj ni̱ gunânj sij gaꞌanj sij riñan nej sí dânj.
Guchiꞌ Saulo ruhuâ yumanꞌ snàꞌànj Jerusalén
26 Ni̱ nga guchiꞌ sij yumanꞌ snàꞌànj gùꞌnàj Jerusalén,
ni̱ huin ruhuâ sij ga̱na̱ka̱j duguiꞌ sij ngà nej sí gaꞌnaꞌ ga̱huin chru̱n riñan Ma̱ꞌan Jesús,
sani̱ yuꞌhuiꞌ nej sí dânj ga̱na̱ka̱j duguiꞌ nej sôꞌ ngà sij,
ni̱ nitaj si guyumân ruhuâ nej sôꞌ si huin sij sí nìkòꞌ rukû Ma̱ꞌan Jesús.
27 Hiôꞌ ni̱ ginikaj Bernabé,
gaꞌanj sôꞌ Saulo,
riñan nej sij,
ni̱ ganataꞌ sôꞌ dàj giranꞌ Saulo nga huaj sôꞌ ruhuâ chrej e nga giniꞌin sôꞌ Ma̱ꞌan Señor,
dadinꞌ gaꞌmin Ma̱ꞌan ngà sôꞌ,
dadinꞌ nga gane sôꞌ ruhuâ yumanꞌ Damasco ni̱ nitaj si yuꞌhuiꞌ sôꞌ ga̱na̱nï̱n sôꞌ siyu̱gui Ma̱ꞌan Jesús riñan nej guiì.
28 Ni̱ nne sij ngà nej sôꞌ ganataꞌ si̱nï̱n si-nùguànꞌ Ma̱ꞌan Ñaꞌanj an ruhuâ yumanꞌ snàꞌànj Jerusalén ni̱ nitaj sí gata rùhuà sij ni̱ gahui ganatûj sij siganï̂nj nej sôꞌ ganataꞌ si̱nï̱n si-nùguànꞌ Ma̱ꞌan Ñaꞌanj an.
29 Ni̱ ganarïsnaꞌanj sij ni̱ gananï̂n sij si-nùguànꞌ Ma̱ꞌan Ñaꞌanj an riñan nej sí aꞌmin nânj griego;
sani̱ ñan naꞌhue gùnùkuaj nej sôꞌ gi̱ꞌhiaj ga̱nan nej sôꞌ sij ni̱ ûta huin ruhuâ nej sôꞌ da̱gahuiꞌ nej sôꞌ sij.
30 Ni̱ nga gunïn nej dinï̂nt si dànanj huaj rayiꞌî sij ni̱ ni̱ka̱j nej sôꞌ gaꞌanj nej sôꞌ nda yumanꞌ Sesarea sij,
ni̱ hiuj dânj nne sij ni̱ gaꞌnḯn nej sôꞌ gaꞌanj sij yumanꞌ Tarso.
31 Huê danj ni̱ hua̱ dïnꞌïnj riñan daranꞌ nej dinï̂nt màn Judea,
nga Galilea,
ni̱ Samaria;
ni̱ gahuin nùkuaj nej dinï̂nt ngà si-nùguànꞌ Ma̱ꞌan Ñaꞌanj an,
ni̱ daranꞌ nej gui hua gu̱dadû nej sôꞌ ma̱ꞌan nej sôꞌ guendâ si̱ giꞌhiaj nej sôꞌ gakï̱nꞌïn,
ni̱ gahuin gàꞌì ranꞌ nej sôꞌ ni̱ gahuin nùkuaj nej sôꞌ giꞌhiaj Ma̱ꞌan Espíritu Santo.
Ganahuin Eneas
32 Huê danj ni̱ gaché gi̱niꞌhiaj Pedro,
ñan màn daranꞌ nej dinï̂nt,
ni̱ gaꞌnaꞌ gi̱niꞌhiaj sôꞌ nej dinï̂nt nne ruhuâ yumanꞌ Lida.
33 Ni̱ nne ꞌngo̱ sí gùꞌnàj Eneas ruhuâ yumanꞌ dânj ganariꞌ sôꞌ,
ni̱ gàꞌ gisîj hioꞌ tï̱nj ïn nngaj sí dânj riñan nna dadinꞌ naꞌhue gìsìkìꞌ nneè kú sôꞌ.
34 Ni̱ gataj Pedro gunïn sí dânj:
—Eneas,
Jesucristo gi̱ꞌhiaj ga̱na̱huînꞌ raj;
ga̱na̱chi sòꞌ,
ni̱ na̱gi̱ꞌhiaj hueꞌêꞌ riñan si-nât.
Ni̱ orâ chre ni̱ ganachi sí dânj,
35 ni̱ giniꞌin daranꞌ nej guiì nne ruhuâ yumanꞌ Lida ni̱ huê danj na̱nj giniꞌin nej guiì nne yumanꞌ Sarón,
ni̱ guyumân ruhuâ nej guiì dânj niꞌin ninj Ma̱ꞌan Señor.
Ganaꞌnînj Dorcas
36 Ni̱ ruhuâ yumanꞌ snàꞌànj Jope nne ꞌngo̱ siyànà nìkòꞌ rukû Ma̱ꞌan Jesucristo ni̱ gu̱ꞌna Tabita,
ni̱ nânj griego ruhuaj ga̱ta,
Dorcas.
Ni̱ ûta giꞌhiaj siyànà nânj sa sàꞌa,
ni̱ guruguñuꞌun nej guiì ranꞌ àko.
37 Ni̱ nej gui dânj gaꞌnanꞌ siyànà nânj ni̱ gahuij.
Neꞌ rùkù nga gisîj duguane nej guiì nneè kú siyànà dânj,
ni̱ guchruj ninj nga ruhuâ ꞌngo̱ hueꞌ hua̱ niꞌnï̱nj ïn.
38 Dadinꞌ nìchrùnꞌ dânj nngaj yumanꞌ Lida ngà yumanꞌ snàꞌànj Jope,
ni̱ gunïn nej sôꞌ gaꞌnaꞌ ga̱huin chru̱un si nne Pedro ruhuâ yumanꞌ snàꞌànj Jope,
ni̱ gaꞌnḯn nej sôꞌ gaꞌanj ga̱ꞌmi̱n àko huìj síi riñan Pedro:
—Ni̱ gataj nej sôꞌ si̱ gahuin rànꞌ ga̱ꞌna̱ꞌ ñan nne nej ñûnj mánj.
39 Ganayumàn Pedro,
ni̱ gaꞌanj sôꞌ ngà nej sí ni̱ka̱j nuguanꞌan huaj;
ni̱ nga guchiꞌ sôꞌ ñan nne hueꞌ nngaj siyànà gàꞌ gahuiꞌ dânj,
ni̱ gaꞌanj gi̱digân nej sôꞌ ruhuâ hueꞌ ñan nngaj siyànà gàꞌ gahuiꞌ dânj riñan Pedro,
ni̱ nda ganikàj chre rukû sij mân nej siyànà minj in,
ni̱ dugueꞌe ninj mân ninj,
ni̱ gidigân ninj nej retoo ngà nej nekû ganânj Dorcas nga gane nìꞌnaj ngà ni̱nj.
40 Hiôꞌ ni̱ giri Pedro,
daranꞌ nej guiì màn ruhuâ hueꞌ dânj,
ni̱ gaꞌanj ga̱nikïnꞌ rúdàkòj sôꞌ ni̱ gayiꞌì sôꞌ ni̱ gaꞌmin sôꞌ ngà Ma̱ꞌan Ñaꞌanj an;
ni̱ giniꞌhiaj sôꞌ ñan nngaj nneè kú siyànà dânj,
ni̱ gataj sôꞌ:
—Tabita,
ga̱na̱chi sòꞌ ánj.
Ni̱ orâ chre ni̱ naguchraꞌ siyànà dânj rune ñanj,
ni̱ nga giniꞌin nikïnꞌ Pedro hiuj dânj,
ni̱ naga̱ne ga̱hia.
41 Ni̱ gidaꞌa sôꞌ raꞌa siyànà nânj,
ni̱ ganachi nikaj sôꞌ;
hiôꞌ ni̱ gakḯn sôꞌ gaꞌnaꞌ nichì nej sí hueꞌê dagahuin riñan Maꞌan Ñaꞌanj an,
ni̱ huê danj na̱nj gaꞌnaꞌ nej siyànà minj in,
ni̱ gàꞌ hua nìꞌnàꞌ siyànà dânj nga ganadigân sôꞌ riñan nej guiì màn hiuj dânj.
42 Ni̱ giniꞌin daranꞌ nej guiì màn yumanꞌ snàꞌànj Jope sa gahuin,
ni̱ guyumân ruhuâ ûta gàꞌì ninj niꞌin ninj Ma̱ꞌan Señor.
43 Ni̱ gane Pedro ûta gàꞌì gui ruhuâ yumanꞌ snàꞌànj Jope dukuâ sí gùꞌnàj Simón,
sí nagiꞌhiaj ni̱na̱j nnïnj yuku.