Pedro ngà Cornelio
10
Ni̱ ruhuâ yumanꞌ Sesarea nne ꞌngo̱ sí gùꞌnàj Cornelio,
ni̱ huin sôꞌ stadû kapitán ni̱ ni̱ka̱j ñuꞌunj sôꞌ riñan nej stadû ꞌna̱ꞌ Italia,
2 ni̱ ꞌì ruhuâ sôꞌ ni̱ dagahuin sôꞌ riñan Ma̱ꞌan Ñaꞌanj an ni̱ huê danj na̱nj giꞌhiaj daranꞌ nej duguiꞌ sô,
ni̱ ûta guruguñuꞌunj sôꞌ daranꞌ nej guiì gànìki màn ruhuâ yumanꞌ dânj,
ni̱ daranꞌ diû aꞌmin sôꞌ ngà Ma̱ꞌan Ñaꞌanj an.
3 Ni̱ nda hueꞌê chre giniꞌin sôꞌ ganikïnꞌ ngo̱ si-ángel Ma̱ꞌan Ñaꞌanj an ñan nne sôꞌ,
daꞌngaꞌ ꞌngo̱ agaꞌ huàꞌnï̀nj neꞌ nìin,
ni̱ gata gu̱nïn sôꞌ:
—Cornelio.
4 Ni̱ ûta hueꞌê giniꞌhiaj sôꞌ ni̱ nu̱n yuꞌhuiꞌ ruhuâ sôꞌ,
ni̱ gataj sôꞌ:
—Ahuînꞌ ràꞌaj Señor.
Ni̱ gataj ángel dânj gu̱nïn sôꞌ:
—Nej nuguanꞌ gachínꞌ riñan Ma̱ꞌan Ñaꞌanj an ni̱ daranꞌ nej sa gaꞌhuiꞌ raꞌa nej guiì ga̱ni̱ki ni̱ gu̱nu̱kuij nda ñan nne Ma̱ꞌan Ñaꞌanj an ni̱ nej dânj giꞌhiaj si ga̱na̱nun ruhuâ Ma̱ꞌan Ñaꞌanj an niꞌin nej sàꞌ giꞌhiâꞌ.
5 Hia̱j ni̱ gàꞌnï̀nj sòꞌ gaꞌanj nej sí màn riñanꞌ dânj ruhuâ yumanꞌ snàꞌanj Jope,
dadinꞌ hiuj dânj nne ꞌngo̱ sí gùꞌnàj Simón ni̱ aꞌngô siyu̱gui sij huin Pedro ni̱ gàkï̀nj gaꞌnaꞌ sij.
6 Ni̱ nne sij dukuâ Simón sí nagiꞌhiaj ni̱na̱j nnïnj yuku,
ni̱ dukuâ sí nânj nne nìchrùnꞌ duꞌhua nne ña̱ꞌa̱nj;
ni̱ sí dânj ga̱ta̱j nùnj huin si gi̱ꞌhiáꞌ.
7 Ni̱ nga gaꞌanj ángel gaꞌmin ngà Cornelio,
ni̱ gakḯn sôꞌ gaꞌnaꞌ huìj si-musû sôꞌ ni̱ ꞌngo̱ stadû ûta hueꞌê dagahuin riñan sôꞌ ni̱ huê danj na̱nj ni̱ka̱j chre̱j sôꞌ riñan Ma̱ꞌan Ñaꞌanj an;
8 ni̱ nda hueꞌê chre gananï̂n sôꞌ daranꞌanj riñan nej sí nânj ni̱ neꞌ rùkù ni̱ gaꞌnḯn sôꞌ gaꞌanj nej sij yumanꞌ snàꞌànj Jope.
9 Aꞌngô gui dânj,
ni̱ nga nï̀nꞌ aché nej sí nânj huaj gùchìꞌ nej sôꞌ ñan nngaj yumanꞌ snàꞌànj Jope,
ni̱ daꞌnga ꞌngo̱ agaꞌ yùhuìj i gahui Pedro gaꞌanj sôꞌ yichrá hueꞌe guendâ ga̱ꞌmi̱n sôꞌ ngà Ma̱ꞌan Ñaꞌanj an.
10 Gayiꞌij ni̱ ganachinj yiꞌnaa riki sôꞌ,
ni̱ ganï̂n ruhuâ sôꞌ ya̱ sôꞌ;
sani̱ hia̱j huin yu̱gui nihia ya̱ sôꞌ,
ni̱ orâ chre ni̱ ganï̂n Ma̱ꞌan Ñaꞌanj an ꞌngo̱ rasu̱un riñan sôꞌ;
11 ni̱ giniꞌin sôꞌ si ganayîꞌnïnj yàtàꞌa,
ni̱ dàj rûnꞌ hua ꞌngo̱ atsîj manta xi hua rasu̱n dânj ni̱ ginin gaꞌnaj riñan sôꞌ;
ni̱ ànùmin nneꞌe nej ga̱ꞌanj sikûj atsîj manta xi dânj ni̱ nìkoj yàtàꞌa;
12 ni̱ ruhuâ atsîj manta xi dânj mân gàꞌì yìꞌnï̀nꞌ nej yuku kï̱j nnùn gaꞌânj dakó màn riñan hioꞌó ni̱ màn nej yìꞌnï̀nꞌ nej yukuáa ni̱ màn nej yìꞌnï̀nꞌ nej yataj aché yàtàꞌa.
13 Ni̱ gunïn sôꞌ gaꞌmin ꞌngo̱ sa gaꞌmin nda neꞌ yàtàꞌa ni̱ gata gunïn sôꞌ:
—Ga̱na̱chi sòꞌ ni̱ dagahuîꞌ nej yuku dan ni̱ ya̱ raj Pedro.
14 Hiôꞌ ni̱ gataj Pedro:
—Si̱ gaꞌhue yàj nej sa dugu̱ꞌna hua dan man Señor;
dadinꞌ nitaj àmàn yaj nneè nej yuku kï̱j hua dan man Señor.
15 Ni̱ gunïn ñûn sôꞌ gaꞌmin sa gaꞌmin nda neꞌ yàtàꞌa ni̱ gata:
—Sa nagiꞌhiaj sàꞌ Ma̱ꞌan Ñaꞌanj an,
ni̱ si̱ gatajꞌ si sa du̱guna huaa ni̱ sa kï̱j huaa huin mánj.
16 Ni̱ huê dànanj gahuin nda huàꞌnï̀nj;
daꞌ ñùn ni̱ daꞌ ñùn ni̱ ganahui manta xi dânj gaꞌan neꞌ yàtàꞌa.
17 Nga nï̀nꞌ nadigiꞌñûn Pedro nikïnꞌ sôꞌ nùnj huin si ga̱ta̱j sa ganï̂n Ma̱ꞌan Ñaꞌanj an riñan sôꞌ,
huê danj ni̱ gàꞌ guchiꞌ nej sí gaꞌnḯn Cornelio huaj ñan nne sôꞌ,
ni̱ gachín naꞌanj nej sí dânj nej guiì dànèꞌ nne dukuâ Simón,
ni̱ guchiꞌ nej sôꞌ riñan rahueꞌ dânj.
18 Ni̱ gaꞌmin nej sôꞌ ni̱ gachín naꞌanj nej sôꞌ si hueꞌ dânj nne sí gùꞌnàj Simón ni̱ huê sí dânj gùꞌnàj Pedro.
19 Ni̱ nga nikïnꞌ Pedro nadigiꞌñûn sôꞌ nùnj huin si ga̱ta̱j sa ganï̂n Ma̱ꞌan Ñaꞌanj an riñan sôꞌ,
huê dan ni̱ gataj Ma̱ꞌan Espíritu Santo gu̱nïn sôꞌ:
—Hiuj dan nikïnꞌ huàꞌnï̀nj síi ni̱ nanaꞌhuiꞌ nej sij sòꞌ na̱nj ánj.
20 Gànàyùmàn sòꞌ ni̱ ga̱na̱ni̱nj ga̱ꞌa̱njꞌ,
ni̱ si̱ guruguiꞌ chìꞌ ruhuâꞌ ga̱ꞌa̱nj ngà nej sij mánj,
dadinꞌ ñùnj gaꞌnḯn huaj nej sij riñanꞌ na̱nj ánj.
21 Hiôꞌ ni̱ gananinj Pedro,
ni̱ gaꞌanj sôꞌ ñan ni̱kï̱nꞌ nej sí gaꞌnḯn Cornelio huaj nànàꞌhuìꞌ sôꞌ,
ni̱ gataj sôꞌ gu̱nïn nej sí dânj:
—Ñùnj huin sí nanaꞌhuiꞌ nej suj.
Nùnj huin saj ni̱ gaꞌnaꞌ nànàꞌhuìꞌ nej suj ñùnj ràꞌaj.
22 Ni̱ gataj nej sí dânj:
—Cornelio sí kapitán ni̱ka̱j ñuꞌunj riñan nej stâdu,
huin ꞌngo̱ sí giꞌhiaj sa ni̱ka̱a ni̱ dagahuin sôꞌ riñan Ma̱ꞌan Ñaꞌanj an,
ni̱ daranꞌ nej sí judío gaꞌmin hueꞌê rayiꞌî sôꞌ,
ni̱ ganahuin ra̱ꞌa sôꞌ ꞌngo̱ nuguanꞌan giꞌhiaj ꞌngo̱ ángel,
ni̱ gataj ángel dânj si gàkï̀nj sôꞌ ga̱ꞌna̱ꞌ dukuâ sôꞌ dadinꞌ hua̱ nuguanꞌ ga̱na̱nï̱nꞌ riñan sôꞌ.
23 Hiôꞌ ni̱ gakḯn sôꞌ gatûj nej sí dânj ruhuâ dukuâ sôꞌ ni̱ gunâj nej sí dânj ñanꞌ dânj ñan nne sôꞌ,
ni̱ aꞌngô gui dânj,
ni̱ ganachi nej sij,
ni̱ gaꞌanj nej sij;
ni̱ huê danj na̱nj gaꞌanj da̱ꞌa̱j nej dinï̂nt màn yumanꞌ snàꞌànj Jope ngà sij.
24 Ni̱ aꞌngô gui dânj ni̱ guchiꞌ nej sij ruhuâ yumanꞌ Sesarea.
Ni̱ nne Cornelio anaꞌhuìj sôꞌ Pedro,
ni̱ gakḯn sôꞌ gaꞌnaꞌ daranꞌ nej duguiꞌ sôꞌ,
ni̱ aꞌngôꞌ nej sí ûta hueꞌê nikaj duguiꞌ ngà sôꞌ.
25 Ni̱ nga guchiꞌ Pedro ñan nne dukuâ Cornelio,
ni̱ gahui sôꞌ guendâ ga̱na̱huin ra̱ꞌa sôꞌ Pedro,
ni̱ ganikïnꞌ rúdàkòj sôꞌ riñan Pedro ni̱ ginûn ña̱ꞌa̱nj sôꞌ Pedro.
26 Sani̱ ganachi nikaj Pedro Cornelio,
ni̱ gataj sôꞌ:
—Gànàyùmàn sòꞌ,
dadinꞌ guiì huín na̱nj ánj.
27 Ni̱ gaꞌmin sôꞌ ngà Cornelio,
ni̱ gakḯn Cornelio ni̱ gatûj sôꞌ ruhuâ dukuâ Cornelio,
ni̱ giniꞌin sôꞌ si ûta gàꞌì nej guiì naraꞌhuiꞌ hiuj dânj.
28 Ni̱ gataj Pedro:
—Gàꞌ niꞌin nej suj si ûta ha̱i̱ huaj si gi̱nikaj duguiꞌ ꞌngo̱ sí judío ni̱ ha̱i̱ huaj si ga̱ꞌa̱nj sôꞌ dukuâ ꞌngo̱ sí nàsìnùnj un,
sani̱ gidigân Ma̱ꞌan Ñaꞌanj an ñùnj si si̱ giꞌhia dànanj ni̱ si̱ gatâ si sí kï̱j huaa huin nej sí nàsìnùnj un mánj;
29 Sani̱ nga guchiꞌ nuguanꞌan si gakḯnꞌ gàꞌnàj ni̱ nun ga̱ꞌmi̱n chìꞌ nìkó mánj.
Hiôꞌ ni̱ achín snaꞌân sòꞌ:
Ni̱ ahuin ràyìꞌì huin gakḯnꞌ gaꞌná ràꞌaj.
30 Hiôꞌ ni̱ gataj Cornelio:
—Gàꞌ gachîn gaꞌânj gui nné hua gìnìnè ni̱ ꞌngo̱ agaꞌ huàꞌnï̀nj in nné ruhuâ dukuá,
ni̱ nné gaꞌmînj ngà Ma̱ꞌan Ñaꞌanj an,
ni̱ giniꞌín ganikïnꞌ ꞌngo̱ sí dânj riñânj ni̱ nda ran chre hua siganꞌ sôꞌ.
31 Ni̱ gataj sôꞌ:
“Cornelio,
gàꞌ gunïn Ma̱ꞌan Ñaꞌanj an nej nuguanꞌ gachínꞌ riñanj,
ni̱ gananun ruhuaj niꞌin nej sa gaꞌhuiꞌ riñan nej guiì ranꞌ àko.
32 Gàꞌnï̀nj sòꞌ gaꞌanj nej sí màn riñanꞌ,
ruhuâ yumanꞌ snàꞌànj Jope,
ni̱ gàkï̀nj nej sôꞌ ga̱ꞌna̱ꞌ Simón sí gùꞌnàj Pedro,
dadinꞌ nne sôꞌ dukuâ sí gùꞌnàj Simón,
sí nagiꞌhiaj ni̱na̱j nnïnj,
ni̱ nìchrùnꞌ duꞌhua nne ña̱ꞌa̱nj nne dukuâ sôꞌ.”
33 Huê danj ni̱ nda nanè chre gaꞌnïn guchiꞌ gàkï̀nj nej sij ga̱ꞌna̱ꞌ dukuá;
ni̱ dùgùnàj giꞌhiâꞌ gaꞌnaꞌ.
Hia̱j ni̱ màn chre̱ꞌ daranꞌ nej ñûnj riñan Ma̱ꞌan Ñaꞌanj an,
guendâ gu̱nïn nej ñûnj daranꞌ nej nuguanꞌ gaꞌnïnꞌ su̱n Ma̱ꞌan Ñaꞌanj an ga̱ꞌmi̱nꞌ riñan nej ñûnj.
Ganataꞌ Pedro si-nùguànꞌ Ma̱ꞌan Ñaꞌanj an riñan nej guiì màn dukuâ Cornelio
34 Hiôꞌ ni̱ gayiꞌì Pedro,
ni̱ gataj sôꞌ:
—Yàngàꞌ ni̱ garânj daꞌnga ruhuâj si Ma̱ꞌan Ñaꞌanj an ni̱ nitaj si giꞌhiaj ni̱nïnj nej guiì riñanj dadinꞌ gu̱ña̱n huin daranꞌ ninj riñanj na̱nj ánj,
35 dadinꞌ huin nìhiàꞌ ruhuâ Ma̱ꞌan Ñaꞌanj an niꞌin daranꞌ nej guiì màn daranꞌ nej yumanꞌ màn ruhuâ yumiguìi,
nej guiì dagahuin riñanj ni̱ nej guiì giꞌhiaj sa ni̱ka̱a riñan Ma̱ꞌan.
36 Gaꞌnḯn Ma̱ꞌan Ñaꞌanj an gaꞌnaꞌ si-nùguànꞌanj riñan nej daꞌní Israel,
ni̱ ganataj nuguanꞌ gi̱ꞌhiaj ga̱na̱ni̱n nej guiì ni̱ ga̱huin dïnꞌïnj ruhuâ ninj rayiꞌî Ma̱ꞌan Jesucristo;
ni̱ huej huin Ma̱ꞌan Señor ni̱ka̱j su̱n riñan daranꞌ ninj.
37 Ni̱ gàꞌ gunïn nej suj si gayaꞌnï̀n nuguanꞌ nânj daꞌ hua̱ nï̀nꞌ gàchràꞌ riñan hioꞌó Judea,
ni̱ gayi̱ꞌij àsìj Galilea,
neꞌ rùkù nga gisîj gaꞌmin Juan Bautista si hua̱ ni̱ña̱n si daꞌhui nej guiì gàtàꞌ nne ninj:
38 Gàꞌ niꞌin nej suj dàj giꞌhiaj Ma̱ꞌan Ñaꞌanj an ngà Ma̱ꞌan Jesús ꞌna̱ꞌ yumanꞌ snàꞌànj Nazaret,
dadinꞌ gaꞌhuij Ma̱ꞌan Espíritu Santo riñan Ma̱ꞌan Jesús,
ni̱ nagiꞌhiaj nùkua Ma̱ꞌan Jesús ꞌna̱ꞌ yumanꞌ snàꞌànj Nazaret,
ni̱ gaché nun Ma̱ꞌan Jesús ni̱ giꞌhia sa sàꞌa ni̱ giꞌhia si ga̱na̱huin daranꞌ nej guiì giranꞌ sa̱ñu̱n giꞌhiaj sa nàsàꞌa,
dadinꞌ nne Ma̱ꞌan Ñaꞌanj an ngà Ma̱ꞌanꞌ Jesús.
39 Ni̱ giniꞌin nej ñûnj daranꞌ sa giꞌhiaj Ma̱ꞌan Jesús nï̀nꞌ gàchràꞌ riñan hioꞌó Judea ni̱ dàj giꞌhia ruhuâ yumanꞌ snàꞌànj Jerusalén;
ni̱ huê Ma̱ꞌan huin sa dagahuiꞌ nej sij ni̱ godokoꞌ nej sij riñan rugutsìi.
40 Ni̱ gachîn huàꞌnï̀nj gui ni̱ ganachi nikaj Ma̱ꞌan Ñaꞌanj an Ma̱ꞌan Jesús siganï̂nj nej nîman,
ni̱ giniꞌin nej ñûnj Ma̱ꞌan Jesús;
41 sani̱ nun gi̱ni̱ꞌin daranꞌ nej guiì yùmànꞌan Ma̱ꞌan Jesús mánj,
man nej ñûnj ya ni̱ goꞌo nngaj huin sa ganagui Ma̱ꞌan Ñaꞌanj an ni̱ giꞌhia si gi̱ni̱ꞌin nej ñûnj si ganaꞌnï̂nj Ma̱ꞌan Jesús siganï̂nj nej nîman.
42 Ni̱ Ma̱ꞌan Jesús gaꞌnïnꞌ suun si gànàtàꞌ nej ñûnj rayiꞌij riñan daꞌ hua̱ nï̀nꞌ gàchràꞌ nej yumanꞌan,
ni̱ gànàtàꞌ nej ñûnj si riñan Ma̱ꞌan huin sa gaꞌhuiꞌ Ma̱ꞌan Ñaꞌanj an suun si ga̱huin guesì riñan nej guiì hua̱ nìꞌnàꞌa ni̱ gi̱nikaj su̱n Ma̱ꞌan riñan nej nîman.
43 Ni̱ huê rayiꞌî Ma̱ꞌan Jesús huin sa gaꞌmin daranꞌ nej sôꞌ gataj dàj ga̱huin,
ni̱ gataj nej sôꞌ si daranꞌ nej guiì guyumân ruhuâ niꞌin Ma̱ꞌan Jesús,
ni̱ ga̱ꞌhue gi̱nika nimân nìko rayiꞌî nej si-ga̱kïnꞌ ninj.
Ganahuin ra̱ꞌa nej sí nàsìnùnj un Ma̱ꞌan Espíritu Santo
44 Nga nï̀nꞌ gaꞌmin Pedro nej nuguanꞌ nânj,
ni̱ gininj Ma̱ꞌan Espíritu Santo gaꞌnaj riñan daranꞌ nej guiì màn gunïn si-nùguànꞌ Ma̱ꞌan Ñaꞌanj an.
45 Ni̱ ûta gahuin ña̱ꞌanj ruhuâ nej sí hua̱ yìtï̀nj ruhuâ guendâ ga̱ꞌne̱ꞌ nej sij nnïnj arán raa̱ nneè nàꞌàj nej sij nga giniꞌin nej sôꞌ si gininj Ma̱ꞌan Espíritu Santo riñan nej sí nàsìnùnj un.
46 Dadinꞌ gunïn nej sij si gaꞌmin nej sôꞌ aꞌngô nuguanꞌan,
ni̱ gaꞌmin hueꞌê nej sôꞌ riñan Ma̱ꞌan Ñaꞌanj an.
47 Hiôꞌ ni̱ nanikàj Pedro ni̱ gataj sôꞌ:
—Ga̱ꞌhue ga̱ta̱j ꞌngo̱ síi sisi̱ si̱ gaꞌhue gàtàꞌ nne nej sí nânj ruhuâ nnee nga gàꞌ ganahuin ra̱ꞌa nej sij Ma̱ꞌan Espíritu Santo dàj rûnꞌ gataꞌ nne nêꞌ ngà Ma̱ꞌan Espíritu Santo na̱nj nîꞌ.
48 Ni̱ gaꞌnïnꞌ su̱n Pedro si gàtàꞌ nne nej sij ngà siyu̱gui Ma̱ꞌan Jesús.
Hiôꞌ ni̱ gachín niꞌhiaj nej sij riñan Pedro si ga̱ne sôꞌ gàꞌì doj nej gui ngà nej sij hiuj dânj.