Gananï̂n Pedro dàj garânj sun Ma̱ꞌan Ñaꞌanj an sôꞌ siganï̂nj nej sí nàsìnùnj riñan nej dinï̂nt màn Jerusalén
11
Ni̱ gunïn daranꞌ nej dinï̂nt màn riñan hioꞌó Judea ngà nej sôꞌ gaꞌanj gi̱digân si̱nï̱n si-nùguànꞌ Ma̱ꞌan Ñaꞌanj an,
si ganahuin ra̱ꞌa nej sí nàsìnùnj un si-nùguànꞌ Ma̱ꞌan Ñaꞌanj an.
2 Ni̱ nga gaꞌanj Pedro yumanꞌ snàꞌànj Jerusalén,
ni̱ gunïnꞌ nej yìꞌnï̀nꞌ nej sí hua̱ yìtï̀nj ruhuâ si gìyìꞌnèꞌ do̱j raa̱ nneè nàꞌàj ngà sôꞌ,
3 ni̱ gataj nej sôꞌ:
—Nùnj huin saj ni̱ gatûjꞌ ruhuâ dukuâ nej sí nitaj si giyiꞌneꞌ do̱j raa̱ nneè nàꞌàj,
ni̱ yaꞌ ngà nej sôꞌ ràꞌaj.
4 Hiô ni̱ gayiꞌì Pedro ni̱ ganataꞌ sôꞌ daꞌ nìkòꞌ duguiꞌ nej sa gahuin hiuj dânj,
ni̱ gataj sôꞌ:
5 —Si nné aꞌmînj ngà Ma̱ꞌan Ñaꞌanj an ruhuâ yumanꞌ snàꞌànj Jope,
ni̱ giniꞌín ganï̂n Ma̱ꞌan Ñaꞌanj an ꞌngo̱ rasu̱un riñânj;
ni̱ huaj dàj rûnꞌ hua ꞌngo̱ atsîj manta xi ni̱ ginin gaꞌnaj,
ni̱ ànumin nej ga̱ꞌanj sikûj atsîj manta dan ni̱ ginin gaꞌnaj yàtàꞌa ni̱ guyumanj riñânj.
6 Ni̱ nga giniꞌhiâ dàj hua sa màn ruhuâ atsîj manta xi dânj,
ni̱ giniꞌín si màn nej yuku nnùn ga̱ꞌânj raꞌa,
nej yuku aché riñan hioꞌóo,
ni̱ màn nej yuku hu̱e,
ni̱ màn nej yuku aka riki riñan hioꞌóo,
ni̱ màn nej yataj aché yàtàꞌa ruhuâ manta xi dânj.
7 Ni̱ gunḯn gaꞌmin ꞌngo̱ sa gaꞌmin ni̱ gata gunḯn:
“Nàyùmàn sòꞌ ni̱ dagahuîꞌ nej yuku dan ni̱ ya̱ꞌ raj.”
8 Ni̱ gatâ gu̱nïn:
“Si̱ gaꞌhue yàj man Señor;
dadinꞌ nitaj àmàn gatûj nneè nej yuku kï̱j hua dan ruhuâ duꞌhuá mánj.”
9 Huê danj ni̱ gaꞌmin ñûn Ma̱ꞌan sa gaꞌmin nda neꞌ yàtàꞌa ni̱ gata gunḯn:
“Nej sa gàꞌ ganahuin sàꞌ giꞌhiaj Ma̱ꞌan Ñaꞌanj an,
ni̱ si̱ gatajꞌ si hua̱ na̱nj hua̱ kï̱j man mánj.”
10 Ni̱ nda huàꞌnï̀nj ginin gaꞌnaj riñânj,
huê danj ni̱ nanikàj ñunj naꞌanj yàtàꞌa.
11 Ni̱ gaꞌnḯn nej sij nda yumanꞌ Sesarea gaꞌnaꞌ huàꞌnï̀nj nej sí dânj ni̱ guyumân nej sôꞌ ñan nné.
12 Ni̱ gataj Ma̱ꞌan Espíritu Santo gunḯn sisi̱ si̱ guruguiꞌ chìꞌ ruhuâj guendâ gàꞌàn nga nej sôꞌ.
Huê danj na̱nj gaꞌanj nej ga̱ꞌânj nej dinï̂nt nânj ngàj,
ni̱ gatûj nej ñûnj dukuâ ꞌngo̱ sí dânj,
13 ni̱ ganataꞌ sôꞌ gunïn nej ñûnj si giniꞌin sôꞌ guchiꞌ ꞌngo̱ ángel dukuâ sôꞌ,
ni̱ gataj ángel dânj gu̱nïn sôꞌ:
Gàꞌnï̀nj ga̱ꞌa̱nj nej sí màn riñanꞌ ruhuâ yumanꞌ snàꞌànj Jope,
ni̱ gàkï̀njꞌ gaꞌnaꞌ Simón,
sí gùꞌnàj Pedro;
14 ni̱ sí dânj gànàtàꞌ nej nuguanꞌ gi̱ꞌhiaj ga̱na̱ni̱nꞌ,
ni̱ huê danj na̱nj ga̱na̱ni̱n daranꞌ nej guiì màn ruhuâ dukuâꞌ.
15 Ni̱ nga gayiꞌìj gaꞌmînj si-nùguànꞌ Ma̱ꞌan Ñaꞌanj an riñan nej sôꞌ,
ni̱ gininj Ma̱ꞌan Espíritu Santo gaꞌnaj riñan nej sôꞌ,
dàj rûnꞌ ginin gaꞌnaj riñan nêꞌ àsìj sinï̱ïn.
16 Hiôꞌ ni̱ gananun ruhuâj dàj gataj Ma̱ꞌan Señor,
nga gaꞌmin ni̱ gata:
“Ni̱ duguataꞌ nne Juan ruhuâ nnee nej suj,
sani̱ huê danj na̱nj gàtàꞌ nne nej suj gi̱ꞌhiaj Ma̱ꞌan Espíritu Santo.”
17 Ni̱ huê danj na̱nj gaꞌhuiꞌ Ma̱ꞌan Ñaꞌanj an,
Espíritu Santo riñan nej sij dàj rûnꞌ girikij riñan nêꞌ guendâ guyumân ruhuôꞌ niꞌînꞌ Ma̱ꞌan Señor Jesús,
hiôꞌ ni̱ ahuin si huín si ga̱ranꞌ ñuꞌun si-su̱n Ma̱ꞌan Ñaꞌanj an ràꞌaj.
18 Hiôꞌ ni̱ nga gunïn nej sij nej nuguanꞌ nânj,
ni̱ dḯn gane duꞌhua nej sij,
ni̱ gaꞌmin hueꞌê nej sij riñan Ma̱ꞌan Ñaꞌanj an,
ni̱ gataj nej sij:
—Hiôꞌ ni̱ huê danj na̱nj garanꞌ ruhuâ Ma̱ꞌan Ñaꞌanj an si gànànìkàj ruhuâ nej sí nàsìnùnj un ni̱ ganahuin nìꞌnàꞌ nej sôꞌ nga na̱nj huaj reꞌ.
Nej dinï̂nt màn ruhuâ yumanꞌ snàꞌànj Antioquía
19 Neꞌ rùkù nga gahuiꞌ Esteban,
ni̱ gata rùhuà nej sí dânj daranꞌ nej sôꞌ nìkòꞌ rukû Ma̱ꞌan Jesús ni̱ gayaꞌnï̀n nej sôꞌ gaꞌanj nej sôꞌ,
ni̱ gachîn nej sôꞌ nda riñan hioꞌó Fenicia,
riñan hioꞌó Chipre,
ni̱ riñan hioꞌó Antioquía,
ni̱ nitaj riñan aꞌngô nej guiì gaꞌmin nej sôꞌ si-nùguànꞌ Ma̱ꞌan Ñaꞌanj an dadinꞌ man riñan nej sí judío gaꞌmin nej sôꞌ si-nùguànꞌ Ma̱ꞌan Ñaꞌanj an.
20 Sani̱ màn da̱ꞌa̱j nej sí ꞌna̱ꞌ riñan hioꞌó Chipre ngà riñan hioꞌó Sirene siganï̂nj nej sij,
ni̱ nej sí nânj ni̱ nga gatûj nej sôꞌ ruhuâ yumanꞌ snàꞌànj Antioquía,
ni̱ gaꞌmin nej sôꞌ ni̱ gananï̂n nej sôꞌ si-nùguànꞌ Ma̱ꞌan Señor Jesús riñan nej sí aꞌmin nânj griego.
21 Ni̱ guruguñuꞌunj Ma̱ꞌan Señor nej sôꞌ,
ni̱ guyumân ruhuâ ûta gàꞌì nej guiì ni̱ ganadunâ ninj ma̱ꞌan ninj ni̱ ginikòꞌ ninj rukû Ma̱ꞌan Señor.
22 Ni̱ gunïn nej dinï̂nt nne ruhuâ yumanꞌ snàꞌànj Jerusalén dàj gahuin yumanꞌ snàꞌànj Antioquía;
ni̱ gaꞌnḯn nej sôꞌ gaꞌanj gi̱niꞌhiaj Bernabé guendâ gi̱ni̱ꞌin sôꞌ dàj gahuin hiuj dânj.
23 Ni̱ nga guchiꞌ sôꞌ,
ni̱ giniꞌin sôꞌ dàj giꞌhiaj Ma̱ꞌan Ñaꞌanj an sunuj u ngà nej sí nânj,
ni̱ ûta ganahuin nìhiàꞌ ruhuâ sôꞌ ni̱ dunaꞌnga sôꞌ riñan nej sí nânj ni̱ gataj sôꞌ si hueꞌê da̱gahuin sí dânj riñan Ma̱ꞌan Señor.
24 Dadinꞌ Bernabé huin ꞌngo̱ sí sàꞌaj,
ni̱ nda nìchra chre nun Ma̱ꞌan Espíritu Santo ruhuâ nimân sôꞌ ni̱ ûta nìko guyumân ruhuâ sôꞌ.
Ni̱ ûta gàꞌì nej guiì nanikòꞌ rukû Ma̱ꞌan Señor nga gaꞌmin sôꞌ.
25 Ni̱ neꞌ rùkù ni̱ gaꞌanj nànàꞌhuìꞌ Bernabé nda ruhuâ yumanꞌ Tarso Saulo;
ni̱ ganariꞌ sôꞌ ni̱ ni̱ka̱j sôꞌ gaꞌnaꞌ sôꞌ yumanꞌ Antioquía.
26 Ni̱ ꞌngo̱ gè hioꞌo gane nej sij ngà nej sôꞌ nìkòꞌ rukû Maꞌan Cristo màn yumanꞌ snàꞌànj nânj guendâ gidigân nej sij si-nùguànꞌ Ma̱ꞌan Ñaꞌanj an riñan ûta gàꞌì nej guiì;
ni̱ nej sí gaꞌnaꞌ gahuin chru̱n riñan nej sij ni̱ dugûꞌnàj nej guiì màn hiuj dânj cristiano ni̱ yumanꞌ snàꞌànj nânj huin ñan gaꞌnga si̱nï̱n nuguanꞌ cristiano.
27 Nej gui dânj ni̱ gaꞌnaꞌ ꞌngo̱ nej sôꞌ gataj dàj ga̱huin ni̱ ꞌna̱ꞌ nej sôꞌ yumanꞌ snàꞌànj Jerusalén ni̱ guyumân nej sôꞌ ruhuâ yumanꞌ snàꞌànj Antioquía.
28 Ni̱ ganayumàn ꞌngo̱ sôꞌ,
gùꞌnàj Agabo,
ni̱ gaꞌmin sôꞌ giꞌhiaj Ma̱ꞌan Espíritu Santo ni̱ garânj daꞌngaꞌ ruhuâ sôꞌ si gùyùmàn ꞌngo̱ yiꞌna xi daꞌ hua̱ nï̀nꞌ gàchràꞌ riñan hioꞌó dânj,
ni̱ guyumân yiꞌna dânj nga gane Claudio gahuin sôꞌ rey.
29 Hiôꞌ ni̱ guchiꞌ nej sôꞌ ꞌna̱ꞌ ga̱huin chru̱n màn Antioquía ꞌngo̱ duꞌhua,
si gu̱ru̱gûñuꞌunj nej sôꞌ dàj nìko ma̱ꞌan huaj riñan nej sôꞌ rukû nej dinï̂nt màn riñan hioꞌó Judea;
30 ni̱ dàj rûnꞌ guchiꞌ nej sôꞌ ꞌngo̱ duꞌhua,
ni̱ huê danj ganachi nikaj nej sôꞌ ofrenda ni̱ gaꞌhuiꞌ nej sôꞌ ginikaj Bernabé ngà Saulo ni̱ gaꞌanj nàgàꞌhuìꞌ nguèj sôꞌ raꞌa nej dinï̂nt huin ña̱n riñan nuhuî nne riñan hioꞌó Judea.