Gahuiꞌ Jacobo, ni̱ Pedro gatûj dukuâ gaꞌa
12
Ni̱ huê gè diû dânj gidaꞌa rey Herodes da̱ꞌa̱j nej sôꞌ huin si-nùhuì Ma̱ꞌan Jesús guendâ du̱guaꞌì sôꞌ nej sí dânj.
2 Ni̱ dagahuiꞌ rey Herodes Jacobo huin dinḯn Juan ngà yîti.
3 Ni̱ giniꞌin sôꞌ si gahuin nìhiàꞌ ruhuâ nej judío guendâ dagahuiꞌ sôꞌ Jacobo,
huê danj ni̱ gidaꞌa sôꞌ Pedro.
Ni̱ nej gui yâ nej sij rachrún nitaj si ꞌnï̱nj chru dunuꞌmanꞌan huin nej gui dânj.
4 Ni̱ gidaꞌa sôꞌ Pedro,
ni̱ gachrîj sôꞌ dukuâ gaꞌa,
ni̱ ganachrîj sôꞌ Pedro raꞌa ga̱ꞌânj yiꞌnïnꞌ nej stâdu guendâ dugumîn nej sôꞌ Pedro,
ni̱ ga̱ꞌânj síi huin daꞌ yiꞌnïnꞌ dânj;
ni̱ ganï̂n ruhuâ sôꞌ gi̱ri̱ sôꞌ dukuâ gaꞌa Pedro nga gachîn giꞌñanj pascua.
5 Ni̱ màn nej stâdu dugumîn nej sôꞌ Pedro nga nne sôꞌ dukuâ gaꞌa;
ni̱ nitaj àmàn giyichinꞌ ruhuâ nej sôꞌ huin si-nùhuì Ma̱ꞌan Jesús guendâ gàchìnj niꞌhiaj nej sôꞌ riñan Ma̱ꞌan Ñaꞌanj an rayiꞌî Pedro.
Gahui Pedro ruhuâ dukuâ gaꞌa
6 Ni̱ nga huaj gi̱ri̱ Herodes Pedro ruhuâ dukuâ gaꞌa,
ni̱ si̱ atoj Pedro nngaj sôꞌ ñanꞌ dânj da̱nï̱n huìj stâdu,
ni̱ ànumin huìj agaꞌ kadena sôꞌ nngaj sôꞌ,
ni̱ màn nej stâdu neꞌ ye̱ꞌ dukuâ gaꞌa dugumîn nej sôꞌ.
7 Ni̱ ganikïnꞌ ꞌngo̱ si-ángel Ma̱ꞌan Señor riñan sôꞌ,
ni̱ nda giràn chre ruhuâ dukuâ gaꞌ dânj giꞌhiaj ángel;
ni̱ dusikiꞌ ángel dânj yiru̱kua̱ sôꞌ,
ni̱ ganaꞌnï̂nj ñanj sôꞌ ni̱ gata gu̱nïn sôꞌ:
—Ûta hio ga̱na̱chi sòꞌ ánj.
—Gu̱nu̱mi̱n ranꞌ gatï̀nꞌ ni̱ ga̱na̱chri̱ꞌ dakánt.
Ni̱ huê danj giꞌhiaj sôꞌ.
Ni̱ gataj ángel dânj gu̱nïn sôꞌ:
—Du̱riꞌñanjꞌ retoo yichráꞌ ni̱ gi̱nikôꞌ rukú.
9 Ni̱ gahui ángel dânj neꞌ ye̱ꞌe,
ni̱ nìkòꞌ sij rukû ángel dânj huaj sij;
sani̱ nun ga̱nï̱n ruhuâ sij si sa yàngàꞌa huin sa giꞌhiaj ángel dânj ngà sij,
dadinꞌ ganï̂n ruhuâ sij si man si ganïnj riñan sij.
10 Ni̱ gachîn nguèj sij ñan màn ꞌngo̱ yiꞌnïnꞌ nej stâdu ni̱ gachîn ꞌnguèj sij ñan màn huìj yiꞌnïnꞌ nej stâdu,
ni̱ guchiꞌ nguèj sij ñan nu̱n rahueꞌ a̱gaꞌ ñan gatûj nej guiì ruhuâ yumanꞌ snàꞌànj dânj,
ni̱ ganayîꞌnï̱nj ma̱ꞌan riñan rahueꞌ dânj;
ni̱ gahui nguèj sij ruhuâ yumanꞌ snàꞌànj dânj ni̱ gachîn nguèj sij ané chrej gàchràꞌa,
huê danj ni̱ guxunj ángel ma̱ꞌan riñan sij.
11 Huê danj ni̱,
ganahuin sìkàꞌ ruhuâ Pedro,
ni̱ gataj sôꞌ gu̱nïn ma̱ꞌan sôꞌ:
—Hia̱j ni̱ garânj daꞌngaꞌ ruhuâj si yàngàꞌ hia ni̱ Ma̱ꞌan Señor gaꞌnḯn si-ángel gaꞌnaꞌ riñânj,
ni̱ giꞌhia si gananinj riñan Herodes,
ni̱ huê danj na̱nj gananînj riñan daranꞌ nej sí judío dadinꞌ ànàꞌhuìj nej sij gi̱daꞌa nej sij ñùnj.
12 Ni̱ nga garânj daꞌnga ruhuâ sij dàj giranꞌ sij,
huê danj ni̱ gaꞌanj sij dukuâ María siyànà huin nni Juan,
sí dugûꞌnàj nej sij Marcos,
ni̱ ûta gàꞌì nej dinï̂nt mân chre̱ꞌ hiuj dânj ni̱ màn nej sôꞌ gachín nìꞌhiaj nej sôꞌ riñan Ma̱ꞌan Ñaꞌanj an.
13 Ni̱ nga guchiꞌ Pedro ñan nne dukuâ María ni̱ gita raꞌa sij riñan rahueꞌ nu̱n si̱nï̱n neꞌ ye̱ꞌe,
ni̱ gahui ꞌngo̱ siyànà gùꞌnàj Rode dadinꞌ nne ñan màn nej dinï̂nt gachín nìꞌhiaj nej sôꞌ riñan Ma̱ꞌan Ñaꞌanj an,
ni̱ gaꞌanj gu̱nïn ahuin sí gita raꞌa riñan hueꞌe.
14 Ni̱ nga gananiꞌin,
si Pedro huin sa gaꞌmin,
ni̱ guendâ ûta ganahuin nìhiàꞌ ruhuâj ni̱ nun ga̱na̱ꞌnïn riñan rahueꞌ dânj,
ni̱ gunan gaꞌan ni̱ gatu ruhuâ hueꞌ ñan màn nej dinï̂nt,
ni̱ ganataj gu̱nïn nej sôꞌ si ni̱kï̱nꞌ Pedro neꞌ ye̱ꞌ hueꞌ dânj.
15 Sani̱ gataj daranꞌ nej sôꞌ:
—Si sinúnꞌ na̱nj ánj.
Sani̱ gataj siyànà dânj si yàngàꞌ hia huin sa gunïn.
Hiôꞌ ni̱ gataj nej sôꞌ:
—Si-ángel sij huin.
16 Sani̱ dànanj ûta duguꞌnïnꞌ Pedro gita raꞌa sôꞌ riñan rahueꞌe;
ni̱ nga ganaꞌnï̂nj nej sij riñan rahueꞌ dânj ni̱ ganaꞌin nej sij si yàngàꞌ hia ni̱ huê Pedro huin,
ni̱ ûta gahuin ña̱ꞌanj ruhuâ nej sij.
17 Sani̱ giꞌhiaj Pedro si dḯn ga̱ne duꞌhua nej sij,
ni̱ gayiꞌì sôꞌ ni̱ ganataꞌ sôꞌ dàj giꞌhiaj Ma̱ꞌan Señor nga girij ruhuâ dukuâ gaꞌa sôꞌ.
Ni̱ gaꞌnïnꞌ su̱n sôꞌ:
—Ga̱ꞌa̱nj nej suj ni̱ gànàtàꞌ nej suj gunïn Jacobo dàj giꞌhiaj Ma̱ꞌan Ñaꞌanj an ngàj ni̱ huê danj na̱nj gànàtàꞌ nej suj gunïn aꞌngô nej dinï̂nt.
Ni̱ gahui sôꞌ ni̱ gaꞌanj sôꞌ aꞌngô lugâ.
18 Ni̱ nga gahuin neꞌ gu̱niꞌñanj an,
ni̱ ûta gaguâj nej stâdu ni̱ ûta gaꞌmin nej sôꞌ dadinꞌ nun gi̱ni̱ꞌin nej sôꞌ dànèꞌ gaꞌanj Pedro ni̱ gataj nej sôꞌ:
Nùnj huin si gahuin rayiꞌî Pedro gàꞌ únj.
19 Ni̱ gaꞌnïnꞌ su̱n Herodes si ûta nànàꞌhuìꞌ nej stâdu Pedro,
sani̱ nun gànàrìꞌ nej sôꞌ.
Huê danj ni̱ gutaꞌ sôꞌ gakï̱nꞌïn yichrá nej stâdu.
Ni̱ giyiꞌnïnꞌ suun huê danj ni̱ dagahuiꞌ nej sij nej stadû ganikïnꞌ dugumîn riñan dukuâ gaꞌa.
Neꞌ rùkù ni̱ gahui Herodes riñan hioꞌó judea ni̱ gaꞌanj ga̱ne sôꞌ riñan hioꞌó Sesarea.
Gahuiꞌ Herodes
20 Ni̱ ûta naꞌan ruhuâ Herodes niꞌin sôꞌ nej guiì màn yumanꞌ Tiro ngà yumanꞌ Sidón;
sani̱ gaꞌmin gu̱ña̱n nej sí ni̱kï̱nꞌ riñan nguèj yumanꞌ dânj ni̱ gaꞌna nej sôꞌ riñan Blasto sí ni̱kï̱nꞌ riñan Herodes ni̱ gininj hueꞌê si-nùguànꞌ nej sôꞌ riñan sí nânj,
ni̱ gachín nìꞌhiaj nej sij riñan sí nânj si ga̱ꞌmi̱n sôꞌ ngà rey dadinꞌ hua̱ ruhuâ nej sij ga̱na̱ꞌmi̱n nej sij ngà rey ni̱ si̱ gimân gu̱nï̱nꞌ nej sij gàꞌ,
dadinꞌ riñan doꞌó rey dânj gahui nej sa yâ nej guiì màn nguèj yumanꞌ dânj.
21 Ni̱ guyumân ꞌngo̱ gui ganï̂n rey Herodes si gànàrìꞌ duguiꞌ nej sij,
ni̱ gananun rey dânj ꞌngo̱ atsîj nu̱n nej rey,
ni̱ gaꞌanj ga̱ne sôꞌ riñan chrun yilâ ni̱kï̱nꞌ ñan giꞌhiaj hia sôꞌ nej nuguaꞌan ni̱ gayiꞌì sôꞌ ni̱ gaꞌmin sôꞌ riñan nej guiì naraꞌhuiꞌ hiuj dânj.
22 Ni̱ gayiꞌì nej guiì màn hiuj dânj ni̱ gaꞌmin nùkuaj ninj ni̱ gataj ninj:
—Dàj rûnꞌ hua̱ si-nànè ñaꞌanj an hua nuguanꞌ gaꞌminꞌ ni̱ nitaj si gaꞌminꞌ dàj rûnꞌ gaꞌmin nej síi mánj.
23 Sani̱ garânj yina sij si ñaꞌanj an huin sij huê danj ni̱ orâ chre ni̱ guduranꞌ yiꞌì ꞌngo̱ si-ángel Ma̱ꞌan Señor sij;
ni̱ gayi̱ꞌij ni̱ gaꞌnanꞌ sij ni̱ gachra yilúu sij huê danj ni̱ gahuiꞌ sij.
24 Sani̱ dànanj duguꞌnïnꞌ nej sôꞌ nìkòꞌ rukû Ma̱ꞌan Jesús gananï̂n nej sôꞌ si-nùguànꞌ Ma̱ꞌan Señor ni̱ gahuin gàꞌì nej guiì ginikòꞌ rukû Ma̱ꞌan Señor.
25 Ni̱ nga gisîj gananï̂n Bernabé ngà Saulo si-nùguànꞌ Ma̱ꞌan Ñaꞌanj an,
ni̱ gananikàj nguèj sôꞌ gaꞌnaꞌ nguèj sôꞌ Jerusalén,
ni̱ ꞌna̱ꞌ Juan ngà nguèj sôꞌ,
sí dugûꞌnàj nej sij Marcos.