22
—Gu̱nïn nej suj di̱nï̂nj,
gu̱nïn nej suj da̱ꞌnïnj,
gu̱nïn nej suj dadaj.
Si du̱naꞌhuê rayiꞌí riñan nej suj.
2 Ni̱ nga gunïn nej sí dânj gaꞌmin Pablo nânj hebreo,
ni̱ gaꞌ duꞌhua nej sôꞌ.
Huê danj ni̱ gataj Pablo:
3 —Sí judío huín,
ni̱ gaꞌngaj yumanꞌ Tarso sa ri̱ña̱n ni̱ka̱j ñuꞌunj hioꞌó Silisia,
sani̱ gachi ruhuâ yumanꞌ snàꞌànj nânj,
ni̱ gahuin chrùnj riñan Gamaliel,
ni̱ ûta hueꞌê gidigân sôꞌ ñùnj si-ley rej nêꞌ,
ni̱ ûta ga hàìj ngà si-ley Ma̱ꞌan Ñaꞌanj an,
ni̱ huê dàj rûnꞌ ꞌhia̱j nej suj dânj huê danj giꞌhia.
4 Nej gui gâchin ni̱ gata rùhuàj nej guiì hua̱j aꞌngô chrej e ni̱ ganï̂n ruhuâj da̱gahuí ninj,
gidaꞌaj nej síi ngà nej siyànàa ni̱ ganachri nej sôꞌ raꞌa nej sí ni̱ka̱j ñuꞌunj dukuâ gaꞌa guendâ gu̱ne̱ꞌ ni̱nï̱nꞌ nej sôꞌ nej sij dukuâ gaꞌa;
5 ni̱ gàꞌ niꞌin sàꞌ nej rej aꞌnïnꞌïn,
ni̱ gàꞌ niꞌin daranꞌ nej síchìj achij i dàj giꞌhia,
dadinꞌ huê nej sôꞌ huin nej sí rikî ñanj karta guendâ ga̱ꞌhue gi̱da̱ꞌaj nej dinï̂nt,
ni̱ hua̱ yumanꞌ Damasco guendâ gi̱da̱ꞌaj nej sôꞌ ginikòꞌ rukû Ma̱ꞌan Jesús ni̱ gaꞌnaꞌ nej sôꞌ ni̱ giꞌnïnj nej sôꞌ dukuâ gaꞌ nne Jerusalén,
guendâ gahuin nej sôꞌ kastîgu.
Ganataꞌ Pablo dàj giranꞌ sij ni̱ gananikàj ruhuâ sij
6 ’Sani̱ nga gahuî gaꞌân,
ni̱ nga huaj gahuin nìchrùnj ñan nngaj yumanꞌ Damasco,
ni̱ daꞌnga ꞌngo̱ ruhuâ gàꞌ yùhuìj neꞌ gu̱ni̱ꞌñanj mánj,
ni̱ nàsìnùnj chre ni̱ nda ganikàj neꞌ rùkùj giyigï̀n giꞌhiaj ꞌngo̱ ñaꞌan gaꞌna yàtàꞌa;
7 ni̱ ganatu riñan hioꞌóo,
ni̱ gunḯn gaꞌminꞌ ngo̱ sa gataj gunḯn:
“Saulo,
Saulo.
Nùnj huin saj ni̱ gata rùhuàꞌ ñùnj ràꞌaj.”
8 Hiôꞌ ni̱ gaꞌmîn ni̱ gata:
“Ahuin rèꞌ ràꞌaj Señor.”
Ni̱ gata gunḯn:
“Ñùnj huin Ma̱ꞌan Jesús ꞌna̱ꞌ yumanꞌ snàꞌànj Nazaret,
ni̱ nùnj huin sa ni̱ gata rùhuàꞌ ñùnj ràꞌaj.”
9 Ni̱ giniꞌin yàngàꞌ nej sôꞌ hua̱j ngàj ñaꞌan giyigï̀n dânj,
sani̱ nun ga̱ra̱n daꞌnga ruhuâ nej sôꞌ nej nuguanꞌ gaꞌmin sa gaꞌmin dânj mánj.
10 Ni̱ gatâ:
“Nùnj huin si gi̱ꞌhia ràꞌaj Señor.”
Ni̱ gataj Ma̱ꞌan Señor gunḯn:
“Ga̱na̱chi sòꞌ,
ni̱ ga̱ꞌa̱nj Damasco,
ni̱ hiuj dan ga̱ta̱j na̱ꞌa̱nj nej sij daranꞌ nej sa gi̱ꞌhia râj.”
11 Sani̱ ñan nun ga̱ꞌhue gi̱niꞌhiâ rayiꞌî sa yigï̀n dânj,
ni̱ gidaꞌa nej sôꞌ hua̱j ngàj raꞌá ni̱ ginikaj nej sôꞌ gaꞌanj nej sôꞌ ñùnj,
ni̱ guchiꞌ nej ñûnj Damasco.
12 ’Hiôꞌ ni̱ hiuj dânj nne ꞌngo̱ sí gùꞌnàj Ananías,
ni̱ ûta sàꞌ dagahuin sôꞌ si-ley Moisés,
ni̱ aꞌmin hueꞌê daranꞌ nej sí judío màn yumanꞌ dânj rayiꞌî sôꞌ,
13 ni̱ gaꞌnaꞌ sôꞌ ñan nné,
ni̱ gahuin nìchrùnꞌ sôꞌ riñânj,
ni̱ gataj sôꞌ gunḯn:
“Di̱nï̂nj Saulo,
ganayigï̀n rune ñan sòꞌ na̱nj ánj.”
Ni̱ orâ chre ni̱ ganayigï̀n rune ñânj ni̱ guruguiꞌ giniꞌhia riñan sôꞌ.
14 Ni̱ gataj sôꞌ gunḯn:
“Daꞌanj rej nêꞌ ganagui sòꞌ guendâ gi̱ni̱ꞌînꞌ ahuin sa garanꞌ ruhuâj gi̱ꞌhiât,
ni̱ gi̱ni̱ꞌînꞌ Ma̱ꞌan sa gi̱ꞌhiaj sa ni̱ka̱a,
ni̱ gu̱nï̂nꞌ dàj ga̱ꞌmi̱n.
15 Dadinꞌ ga̱huînꞌ ꞌngo̱ sí gànàtàꞌ si-nùguànꞌ Ma̱ꞌan,
riñan daranꞌ nej guiì.
16 Hia̱j ni̱ nùnj huin saj ni̱ gahuin rànꞌ ûnj.
Nàyùmàn sòꞌ ni̱ gàtàꞌ nneꞌ,
ni̱ ga̱ꞌmi̱n àkôꞌ riñan Ma̱ꞌan Ñaꞌanj an si gi̱nika nimân nìko rayiꞌî nej si-ga̱kï̂nt na̱nj ánj.”
Ganataꞌ Pablo si Ma̱ꞌan Ñaꞌanj an gaꞌnḯn gaꞌanj sij riñan nej sí nàsìnùnj un
17 ’Ni̱ gahuin nga nanikàj ñún gaꞌná Jerusalén,
ni̱ nné gachín ni̱ꞌhia ruhuâ nûhui nìko ni̱ giniꞌín ganikïnꞌ Ma̱ꞌan Señor riñânj.
18 Ni̱ gata gunḯn:
“Ûta hio ga̱hui̱ꞌ ni̱ ga̱ꞌa̱njꞌ ruhuâ yumanꞌ snàꞌànj Jerusalén;
dadinꞌ si̱ ganahuin ra̱ꞌa nej sij si-nùguànꞌ rayiꞌí mánj.”
19 Hiôꞌ ni̱ gatâ:
“Señor,
ni̱ gàꞌ niꞌin nej sij si gatû ruhuâ hueꞌ huin nûhui ni̱ gachrí dukuâ gaꞌa ni̱ duguañûnj nej sí guyumân ruhuâ niꞌin Ma̱ꞌan rèꞌ;
20 ni̱ nga dagahuiꞌ nej sij Esteban sôꞌ gananï̂n rayiꞌî Ma̱ꞌân rèꞌ,
ni̱ nìkï̀nj giniꞌín nga gahuin dânj,
ni̱ ga gu̱ña̱n ruhuâj si da̱gahuiꞌ nej sij sôꞌ,
ni̱ dugumînj atsîj ni̱ke̱ nej sí dagahuiꞌ Esteban.
21 Sani̱ gataj Ma̱ꞌan Señor gunḯn:
Râꞌñanj ga̱ꞌa̱njꞌ,
dadinꞌ gàꞌnï̀n ga̱ꞌa̱njꞌ nda gànꞌ ñan màn nej sí nàsìnùnj un na̱nj ánj.”
Gane Pablo riñan stadû aꞌnïnꞌïn
22 Ni̱ nda nuguanꞌ nânj gunïn nej sí dânj;
hiôꞌ ni̱ gayiꞌì nej sôꞌ ni̱ gaguâj nùkuaj nej sôꞌ,
ni̱ gataj nej sôꞌ:
—Da̱gahuiꞌ rèꞌ sí dânj,
dadinꞌ nitaj si dùgùnàj huaj si ga̱ne nìꞌnàꞌ sij riñan hioꞌóo mánj.
23 Ni̱ ñan ûta gaguâj nej sí dânj,
ni̱ nagunanꞌ nej sôꞌ atsîj ni̱ke̱ nej sôꞌ ni̱ dagamanꞌ nej sôꞌ hia̱j riñan nanèe,
24 Gaꞌnïnꞌ su̱n stadû general si ga̱na̱chri̱ nej sij neꞌ rùhuà hueꞌ hiëj yìngà xi dânj Pablo,
ni̱ gaꞌnïnꞌ sôꞌ suun si du̱guañun nej sij Pablo,
guendâ ruhuâ sôꞌ na̱di̱giꞌñûn sôꞌ ahuin rayiꞌì garânj ruhuâ nej sí dânj rayiꞌî Pablo.
25 Sani̱ nga gumînj nej sij Pablo ngà nnïnj korea,
ni̱ gataj Pablo gu̱nïn stadû kapitán ni̱kï̱nꞌ hiuj dânj:
—Dùgùnàj huaj ga̱ñu̱n ꞌngo̱ sí romano nga nï̀nꞌ ga̱chin gaꞌanj sij guendâ gìyìꞌnï̀nꞌ si-ga̱kïn sij na̱nj nîꞌ.
26 Ni̱ nga gunïn síchìj Kapitán gataj Pablo nej nuguanꞌ nânj,
ni̱ gaꞌanj gànàtàꞌ sôꞌ riñan stadû general ni̱ gataj sôꞌ:
—Nùnj huin si gi̱ꞌhiâꞌ ràꞌaj.
Dadinꞌ sí nan ni̱ sí romano huin sôꞌ na̱nj ánj.
27 Ni̱ gaꞌnaꞌ síchìj stadû general ni̱ gataj sôꞌ:
—Yàngàꞌ huînꞌ sí romano nîꞌ.
Ni̱ gataj Pablo:
—Huê danj huín ruꞌmínj.
28 Nanikàj síchìj general ni̱ gataj sôꞌ:
—Ñùnj ni̱ ûta nìko sanꞌanj an gutḯn rayiꞌî dan gaꞌhue gahuín sí romano.
Hiô ni̱ gataj Pablo:
Sani̱ ñùnj ni̱ àsìj gaꞌngaj ni̱ gàꞌ huín sí romano na̱nj ánj.
29 Huê danj ni̱,
orâ chre ni̱ guxun nej sí hua̱j du̱guañun Pablo ma̱ꞌan nej sôꞌ riñan Pablo;
ni̱ ngà giniꞌin síchìj general,
si sí romano huin Pablo ni̱ guyuꞌhuiꞌ sôꞌ.
Ni̱kï̱nꞌ Pablo riñan Junta nìko
30 Aꞌngô gui dânj,
ni̱ ruhuâ síchìj general gi̱ni̱ꞌin yàngàꞌ sôꞌ ahuin ràyìꞌì garânj ruhuâ nej sí judío yiꞌî Pablo,
ni̱ ganachi sôꞌ agaꞌ kadena a̱nu̱min Pablo,
ni̱ gakḯn sôꞌ gaꞌnaꞌ nej rej huin ña̱an ngà yiꞌnïnꞌ nej sí ni̱ka̱j su̱n riñan yumanꞌan,
ni̱ giri sôꞌ Pablo neꞌ ye̱ꞌ hueꞌ hiëj yìngà xi dânj,
ni̱ ganï̂n sôꞌ ganikïnꞌ Pablo riñan nej sí dânj.