Gaꞌanj Pablo yumanꞌ snàꞌànj Jerusalén
21
Neꞌ rùkù nga gahuin anêj nej ñûnj riñan nej sij,
ni̱ gatûj nej ñûnj ruhuâ barku ni̱ gaꞌanj nej ñûnj nda ni̱ka̱ chre ñan nngaj yumanꞌ Cos,
ni̱ aꞌngô gui dânj ni̱ guchiꞌ nej ñûnj yuman Roda,
ni̱ hiuj dânj gaꞌanj ñûnj ni̱ guchiꞌ nej ñûnj yumanꞌ gùꞌnàj Pátara.
2 Ni̱ hiuj nânj giriꞌ nej ñûnj ꞌngo̱ barkû gachin riñan yumanꞌ Fenicia,
ni̱ gatûj nej ñûnj ruhuâ barkû dânj,
ni̱ gaꞌanj nej ñûnj.
3 Ni̱ nga guruguiꞌ yumanꞌ Chipre giniꞌhiaj nej ñûnj,
ni̱ guna raꞌa neꞌ chrïn nej ñûnj,
huê danj ni̱ gachîn nej ñûnj riñan doꞌó yumanꞌ Siria,
ni̱ guchiꞌ nej ñûnj yuman Tiro,
ni̱ gahuin ràn barku nu̱n nej ñûnj huaj nej ñûnj hiuj nânj dadinꞌ naduninj nej sij nej rasu̱n màn ruhuâ barkû.
4 Ni̱ ganariꞌ nej ñûnj nej sí ꞌna̱ꞌ ga̱huin chru̱un,
ni̱ gane nej ñûnj chi̱j gui ngà nej sôꞌ hiuj dânj;
ni̱ gataj Ma̱ꞌan Espíritu Santo riñan nej sôꞌ dàj gi̱ranꞌ Pablo,
huê danj ni̱ naꞌhuej nej sôꞌ si ga̱ꞌa̱nj Pablo yumanꞌ snàꞌànj Jerusalén.
5 Nga gisîj chi̱j gui gane nej ñûnj yumanꞌ dânj,
ni̱ gahui nej ñûnj gaꞌanj nej nûnj,
ni̱ huê danj na̱nj gaꞌanj gu̱du̱nâj daranꞌ nej dinï̂nt nej ñûnj,
ni̱ hua̱j nika nej sôꞌ ni̱ hua̱j nej daꞌní nej sôꞌ ngà nej sôꞌ,
ni̱ guchiꞌ nej ñûnj nda duꞌhua nne ña̱ꞌa̱nj,
ni̱ gaꞌanj ga̱nikïnꞌ rúdàkòj daranꞌ nej ñûnj ni̱ gaꞌmin nej ñûnj ngà Ma̱ꞌan Ñaꞌanj an.
6 Ni̱ nga gisîj ganana̱n daꞌ goꞌngo̱ nej ñûnj nej duguiꞌ nej ñûnj,
huê danj ni̱ gatûj nej ñûnj ruhuâ barku,
ni̱ gananikàj nej dinï̂nt nanꞌ nej sôꞌ dukuâ nej sôꞌ.
7 Huê danj ni̱ gahui nej ñûnj ruhuâ yumanꞌ Tiro ni̱ guchiꞌ nej ñûnj yumanꞌ Tolemaida;
ni̱ gahuin ràn nej ñûnj ꞌngo̱ gui hiuj dânj ni̱ gaꞌmin nej ñûnj ngà nej dinï̂nt.
8 Aꞌngô gui dânj,
ni̱ gahui nej ñûnj ruhuâ yumanꞌ Tolemaida ni̱ gaché dàkòj nej ñûnj ni̱ gaꞌanj nej ñûnj ngà nej sôꞌ nda yumanꞌ Sesarea;
ni̱ gatûj nej ñûnj ruhuâ dukuâ Felipe sí aꞌhuiꞌ nuguanꞌ gi̱ꞌhiaj ga̱na̱ni̱n nej guiì,
ni̱ sôꞌ huin ꞌngo̱ nej chi̱j nej diácono,
ni̱ gunâj nej ñûnj dukuâ sôꞌ.
9 Ni̱ hua̱ ga̱ꞌanj siyànà ña̱an huin daꞌnin yànà Felipe ni̱ huin nej siyànà dânj nej sa ganataꞌ dàj gahuin.
10 Ni̱ gahuin ràn nej ñûnj gàꞌì gui hiuj dânj,
ni̱ riñan hioꞌóo Judea gaꞌnaꞌ Agabo ni̱ huin sôꞌ sí ganataꞌ dàj gahuin,
11 ni̱ gaꞌnaꞌ gi̱ni̱ꞌhiaj sôꞌ nej ñûnj,
ni̱ gidaꞌa sôꞌ yiri̱ki ꞌnï̱nj gatï̀n Pablo,
ni̱ gumînj sôꞌ dakó Pablo ngà raꞌa sôꞌ,
ni̱ gataj sôꞌ:
—Huê dànanj gataj Ma̱ꞌan Espíritu Santo:
Huê dànanj gu̱mi̱n nej sí judío màn yuman Jerusalén sí si-yiri̱ki huin nânj,
ni̱ nàgàꞌhuìꞌ nej sôꞌ sí nânj raꞌa nej sí nàsìnùnj un.
12 Nga gunïn nej ñûnj nej nuguanꞌ nânj,
ni̱ gaꞌmin àko nej ñûnj ni̱ huê danj na̱nj gaꞌmin àko nej sôꞌ màn ruhuâ yumanꞌ nânj ngà Pablo,
ni̱ gataj nej ñûnj sisi̱ si̱ gaꞌanj sôꞌ yumanꞌ snàꞌànj Jerusalén.
13 Hiôꞌ ni̱ nanikàj Pablo ni̱ gataj sôꞌ gunïn nej ñûnj.
—Nùnj huin saj ni̱ dugueꞌe nej suj,
ni̱ giꞌhiaj nej suj si gananï̂n ruhuâ nimânj ûnj.
Dadinꞌ hua̱ ruhuâj ni̱ sê man ngà guendâ gu̱mi̱n nej sij ñùnj,
dadinꞌ hua̱ ruhuâj gàhuìj gi̱ꞌhiaj nej sij ruhuâ yumanꞌ snàꞌànj Jerusalén rayiꞌî siyu̱gui Ma̱ꞌan Señor Jesús.
14 Sani̱ ñan nun ga̱ꞌhuej sij ga̱ra̱n yina sij si-nùguànꞌ nej ñûnj,
huê danj ni̱ gataj nej ñûnj gu̱nïn sij:
—Gi̱ꞌhiaj dïnꞌïnj sa ga̱ra̱nꞌ ruhuâ Ma̱ꞌan Ñaꞌanj an na̱nj ánj.
15 Neꞌ rùkù nga gachîn nej gui dânj,
ni̱ nga gisîj hua yu̱gui daranꞌanj,
huê danj ni̱ gaꞌanj nej ñûnj yumanꞌ snàꞌànj Jerusalén.
16 Huê danj na̱nj gaꞌnaꞌ da̱ꞌa̱j nej sôꞌ ꞌna̱ꞌ ga̱huin chru̱n màn yumanꞌ Sesarea,
ni̱ ni̱ka̱j nej sôꞌ gaꞌanj nej sôꞌ nej ñûnj dukuâ ꞌngo̱ sí gùꞌnàj Mnasón,
ni̱ sí nânj ꞌnaꞌ yumanꞌ Chipre,
ni̱ gàꞌ nâ nikòꞌ sôꞌ rukû Ma̱ꞌan Jesús.
Gaꞌanj gi̱ni̱ꞌhiaj Pablo Jacobo
17 Ni̱ nga guchiꞌ nej ñûnj yumanꞌ snàꞌànj Jerusalén,
ni̱ ûta gahuin nìhiàꞌ ruhuâ nej dinï̂nt ni̱ ganahuin ra̱ꞌa nej sôꞌ nej ñûnj.
18 Ni̱ aꞌngô gui dânj ni̱ gaꞌanj gi̱ni̱ꞌhiaj Pablo ngà nej ñûnj ñan nne Jacobo,
ni̱ màn chreꞌ daranꞌ nej sí ni̱kï̱nꞌ neꞌ ña̱an;
19 ni̱ neꞌ rùkù nga gisîj gaꞌmin sij ngà nej sôꞌ,
ni̱ ganataꞌ sij riñan nej sôꞌ,
daꞌ nikòꞌ duguiꞌ nej sa giꞌhiaj Ma̱ꞌan Ñaꞌanj an ngà sij siganï̂nj nej sí nàsìnùnj ni̱ dàj guyumân ruhuâ nej sôꞌ niꞌin nej sôꞌ Ma̱ꞌan Ñaꞌanj an giꞌhiaj sij.
20 Ni̱ nga gunïn nej sôꞌ sa ganataꞌ sij,
ni̱ ûta hueꞌê gaꞌmin nej sôꞌ rayiꞌî Ma̱ꞌan Ñaꞌanj an,
ni̱ gataj nej sôꞌ gu̱nïn sij:
—Ni̱ dàj rûnꞌ gàꞌ niꞌînꞌ,
ni̱ ûta gàꞌì mîn nej judío guyumân ruhuâ niꞌin Ma̱ꞌan Jesús;
sani̱ daranꞌ nej sij ûta nikaj chre̱j ngà si-ley Moisés.
21 Sani̱ ganataꞌ nej sij gunïn nej ñûnj rayiꞌîꞌ,
si gidigânꞌ riñan nej judío nne siganï̂nj nej sí nàsìnùnj un ni̱ gatajꞌ si gu̱du̱nâj nej sôꞌ nej nuguanꞌ gaꞌnïnꞌ su̱n si-ley Moisés,
ni̱ gatajꞌ sisi̱ si̱ gaꞌneꞌ nej sôꞌ nnïnj arán raa̱ nneè nàꞌàj nej daꞌní nej sôꞌ,
ni̱ gataj sisi̱ si̱ ginikaj chre̱j nej sij chrej yìñànj ni̱ka̱j nêꞌ.
22 Dàj hua hi̱a rayiꞌî nej nuguanꞌ nânj ràꞌaj.
Yàngàꞌ hia ni̱ nàràꞌhuìꞌ nej guiì rigìi,
dadinꞌ gu̱nïn ninj si gàꞌ guyumânꞌ.
23 Giꞌhiá sòꞌ nej sa gataj nej ñûnj,
gu̱nïnꞌ:
Dadinꞌ nne ga̱ꞌânj nej síi siganï̂nj nej ñûnj ni̱ gàꞌ gataj nej sij si hua̱ sa gàꞌhuìꞌ nej sij riñan Ma̱ꞌan Ñaꞌanj an.
24 Ginikaj sòꞌ ga̱ꞌa̱njꞌ nej sij ngàꞌ ruhuâ nûhui,
ni̱ na̱gi̱ꞌhiaj gèꞌ ma̱ꞌânꞌ ngà nej sij riñan Ma̱ꞌan Ñaꞌanj an,
ni̱ gu̱ruꞌhueꞌ ga̱ka nej sij ahui nej sij;
ni̱ ga̱ra̱nꞌ daꞌngaꞌ ruhuâ daranꞌ nej sí judío si sê yàngàꞌ huin nej nuguanꞌ gunïn nej sôꞌ rayiꞌîꞌ,
ni̱ giniꞌin nej sij si aché ni̱ka̱ꞌ,
ni̱ da̱gahuînꞌ nej nuguanꞌ giyiꞌnïnꞌ su̱n giꞌhiaj Moisés.
25 Sani̱ rayiꞌî nej sí nàsìnùnj guyumân ruhuâ niꞌin Ma̱ꞌan Jesús ni̱ si nitaj si huin nej sôꞌ judío,
ni̱ gàꞌ gachrûn nej ñûnj ñanj ni̱ gaꞌnïnꞌ nej ñûnj suun riñan nej sôꞌ sisi̱ si̱ dagahuin nej sôꞌ nuguanꞌ giyiꞌnïnꞌ su̱n giꞌhiaj Moisés;
man sa daꞌhui nej sôꞌ dagahuin nej sôꞌ huin sisi̱ si̱ ya nej sôꞌ nneè nej yuku dagahuiꞌ nej guiì riñan nej ñaꞌanj giꞌhiaj ra̱ꞌa síi,
ni̱ si̱ ya nej sôꞌ tun nej yuku,
ni̱ si̱ ya nej sôꞌ nneè nej yuku gaꞌhiuj u,
ni̱ si̱ gane sìgìchràꞌ nej sôꞌ.
Gidaꞌa nej sij Pablo nga ni̱kï̱nꞌ sôꞌ ruhuâ nûhui guendâ ga̱chri̱ nej sij dukuâ gaꞌa sôꞌ
26 Hiôꞌ ni̱ ginikaj Pablo gaꞌanj sôꞌ nej ga̱ꞌânj nej sí nânj,
ni̱ aꞌngô gui dânj,
ni̱ nga gisîj nagiꞌhiaj sàꞌ nej sôꞌ ma̱ꞌan nej sôꞌ,
ni̱ gatûj sôꞌ ruhuâ nûhui nìko,
guendâ gànàtàꞌ naꞌanj nej sôꞌ gu̱nïn nej sí màn hiuj dânj àmàn ga̱na̱huij nej gui na̱gi̱ꞌhiaj sàꞌ nej sôꞌ ma̱ꞌan sôꞌ,
ni̱ gui dânj gi̱nikaj daꞌ goꞌngo̱ nej sôꞌ yuku ga̱ꞌa̱nj nej sôꞌ guendâ gàꞌhuìꞌ nej sôꞌ rayiꞌî daꞌ goꞌngo̱ nej sôꞌ riñan Ma̱ꞌan Ñaꞌanj an.
27 Sani̱ nga nï̀nꞌ hia̱j huaj gìsìj nej chi̱j gui nagiꞌhiaj sàꞌ nej sij ma̱ꞌan nej sij,
ni̱ nga giniꞌin da̱ꞌa̱j nej síchìj judío ꞌna̱ꞌ riñan hioꞌó Asia,
nikïnꞌ Pablo ruhuâ nûhui nìko,
ni̱ ûta gaguâj nej sôꞌ ni̱ duguachej nej sôꞌ ruhuâ nej guiì rigìi huê danj ni̱ gidaꞌa nej sôꞌ Pablo,
28 ni̱ gaꞌmin nùkuaj nej sôꞌ ni̱ gataj nej sôꞌ:
—Daranꞌ nej suj huin nej sí Israelita,
ni̱ gu̱ru̱gûñuꞌunj nej suj nej ñûnj.
Dadinꞌ sí nânj huin sí gidigân nda ganahuij nï̀nꞌ gàchràꞌ riñan nej guiì ni̱ gata rùhuà sôꞌ niꞌin sôꞌ yumanꞌ huin yiñán nêꞌ,
ni̱ gata rùhuà sôꞌ niꞌin sôꞌ si-ley Moisés,
ni̱ gata rùhuà sôꞌ niꞌin sôꞌ nuhuî nìko nne hiuj nânj;
ni̱ hua aꞌngô sa giꞌhiaj sôꞌ gàꞌ daꞌ nej nânj,
ni̱ ni̱ka̱j sôꞌ nej sí ꞌna̱ꞌ yumanꞌ Grecia ni̱ duguatûj sôꞌ nej sí dânj ruhuâ nuhuî nânj,
ni̱ ganahuin kï̱j ruhuâ nuhuî gè nânj giꞌhiaj sôꞌ.
29 Dadinꞌ àsìj nâ doj ni̱ giniꞌin nej sij ginikaj duguiꞌ Pablo ni̱ gaché nun sôꞌ ruhuâ yumanꞌ snàꞌànj nânj ngà Trófimo,
sí ꞌna̱ꞌ yumanꞌ snàꞌànj Efeso,
dadinꞌ ganï̂n ruhuâ nej sij si duguatûj Pablo sí nânj ruhuâ nûhui nìko.
30 Ni̱ nga gunïn daranꞌ nej sí màn yumanꞌ snàꞌànj nânj nej nuguanꞌ nânj ni̱ ganachej ruhuâ nej sôꞌ,
huê danj ni̱ nda nanè chre ni̱ naruꞌhuiꞌ nej sôꞌ,
ni̱ gidaꞌa nej sôꞌ Pablo,
ni̱ gunùkuaj nej sôꞌ ni̱ giri nej sôꞌ ruhuâ nûhui dânj,
ni̱ orâ ni̱ ganarán nej sôꞌ riñan nûhui nìko.
31 Do̱j sînj huaj ni̱ da̱gahuiꞌ nej sí dânj Pablo,
ni̱ gaꞌanj nuguanꞌan riñan síchìj stadû kapitán ni̱ka̱j ñuꞌunj riñan nej stâdu màn ruhuâ yumanꞌ snàꞌànj dânj,
si ûta gaguâj daranꞌ nej guiì mân ninj ruhuâ yumanꞌ snàꞌànj Jerusalén.
32 Ni̱ orâ chre ni̱ ginikaj síchìj kapitán dânj stadû ni̱ka̱j ñuꞌunj riñan nej stadû,
ni̱ gunânj daranꞌ nej sôꞌ ni̱ gaꞌanj nej sôꞌ ñan màn nej sí nânj.
Ni̱ ngà giniꞌin nej sí nânj síchìj kapitán ngà nej stâdu,
ni̱ gaꞌnïnꞌ ruhuâ nej sôꞌ ni̱ nun gàꞌhuìꞌ nej sôꞌ niꞌhiaj Pablo.
33 Hiôꞌ ni̱ nga guchiꞌ síchìj kapitán,
ni̱ gidaꞌa sôꞌ Pablo ni̱ gaꞌnïnꞌ sôꞌ suun riñan nej si-stadû sôꞌ si gu̱mi̱n nej sôꞌ huìj agaꞌ kadena,
ni̱ gachín naꞌanj sôꞌ ahuin sí huin Pablo,
ni̱ ahuin gakï̱nꞌ giꞌhiaj sôꞌ.
34 Sani̱ ûta gachej gaguâj nej sí màn siganï̂nj nej guiì rigì dânj,
ni̱ da̱ꞌa̱j nej sôꞌ taj ꞌngo̱ nuguaꞌan,
ni̱ aꞌngô da̱ꞌa̱j nej sôꞌ taj aꞌngô nùguànꞌan;
sani̱ ñan naꞌhue ga̱ra̱n daꞌngaꞌ hueꞌê ruhuâ síchìj kapitán ahuin rayìꞌì ûta gaguâj nej guiì,
ni̱ gaꞌnïnꞌ sôꞌ suun si gi̱nikaj nej stâdu ga̱ꞌa̱nj nej sôꞌ ñan nne hueꞌ hiëj yìngà xi ñan màn nej stâdu.
35 Ni̱ nga guchiꞌ nej sij ñan gayiꞌì skalera,
ni̱ gata yàtàꞌ nej stâdu Pablo ni̱ gisîj nej sôꞌ gaꞌanj nej sôꞌ dadinꞌ ûta giꞌhiaj hu̱e nej sí rigìi huaj nej sôꞌ;
36 dadinꞌ ꞌna̱ꞌ nej guiì rigì màn yumanꞌ snàꞌànj dânj neꞌ rùkù nej sij,
ni̱ aguâj nej sôꞌ ni̱ gataj nej sôꞌ:
—Ruhuâ nej ñûnj si gàhuìꞌ sí dan.
Dunaꞌhuej Pablo rayiꞌî sôꞌ nga ni̱kï̱nꞌ sôꞌ riñan junta nìko
37 Ni̱ nga duguatûj nej sôꞌ Pablo ruhuâ hueꞌ hiëj yìngà xi dânj,
ni̱ gataj Pablo gunïn síchìj Kapitán:
—Ga̱ꞌhue gàtà ꞌngo̱ nuguanꞌan gu̱nïn rèꞌ nîꞌ.
Ni̱ gataj síchìj stadû kapitán:
—Nun niꞌín si chru̱nꞌ ga̱ꞌmi̱nꞌ nânj griego mánj.
38 Àsìj nâ doj,
ni̱ ganachi nikaj ngo̱ sí ꞌna̱ꞌ yumanꞌ Egipto ꞌngo̱ yiꞌnïnꞌ nìko xi nej síi ni̱ gunïnꞌ sôꞌ ngà síchìj ni̱ka̱j su̱n riñan yumanꞌ snàꞌànj Roma,
ni̱ ganaraꞌhuiꞌ gaꞌânj mîn nej síi ginikòꞌ rukû sôꞌ ni̱ gaꞌanj sôꞌ riñan hioꞌó nàkòo,
ni̱ ganï̂n ruhuâj si sí dan huînꞌ na̱nj ánj.
39 Hiôꞌ ni̱ gataj Pablo:
—Yàngàꞌ ni̱ sí Israelita ꞌna̱ꞌ yumanꞌ snàꞌànj Tarso huín,
ni̱ yumanꞌ snàꞌànj nânj huin ꞌngo̱ sa ña̱ꞌa̱n doj nìkòꞌ rukû yumanꞌ snàꞌànj Silisia;
sani̱ gachín ni̱ꞌhia si ri̱ki̱ꞌ permisu ga̱ꞌmi̱n riñan nej sí yùmànꞌan.
40 Ni̱ gaꞌhuiꞌ síchìj kapitán permisu gaꞌmin Pablo,
ni̱ ni̱kï̱nꞌ sôꞌ riñan skalera,
ni̱ dugunûn raꞌa sôꞌ riñan nej guiì yùmànꞌan si dḯn ga̱ne duꞌhua ninj.
Ni̱ dḯn chre gahuin duꞌhua daranꞌ nej guiì yùmànꞌan,
ni̱ gaꞌmin sôꞌ nânj hebreo,
ni̱ gataj sôꞌ: