Gaꞌanj Pablo yumanꞌ snàꞌànj Macedonia ngà yumanꞌ snàꞌànj Grecia
20
Neꞌ rùkù nga gisîj gaguâj nej guiì,
ni̱ gakḯn Pablo gaꞌnaꞌ nej sí ꞌnaꞌ gahuin chru̱un,
ni̱ dunaꞌnga sôꞌ si ga̱ yìtï̀nj ruhuâ nej sij ni̱ gananiꞌña̱n sôꞌ nej sij,
ni̱ gidaꞌa sôꞌ raꞌa nej sij huê danj ni̱ gahui sôꞌ ni̱ gaꞌanj sôꞌ yumanꞌ Macedonia.
2 Ni̱ huê danj na̱nj gaꞌanj gi̱niꞌhiaj sij ñan màn daranꞌ nej dinï̂nt màn ruhuâ nej yumanꞌ màn riñan hioꞌó ñan gachîn sij huaj sij,
ni̱ ûta dunaꞌnga sij riñan nej sôꞌ si ga̱ yìtï̀nj ruhuâ nej sôꞌ ni̱ ûta gaꞌmin sij si-nùguànꞌ Ma̱ꞌan Ñaꞌanj riñan nej sôꞌ,
huê danj ni̱ guchiꞌ sij riñan hioꞌó Grecia.
3 Ni̱ gane Pablo huàꞌnï̀nj ahuii ruhuâ país nânj,
ni̱ ganï̂n ruhuâ sij ga̱ꞌa̱nj sij Siria ni̱ hia̱j giꞌhiaj sij ga̱tu̱ sij ruhuâ barku hua̱j yumanꞌ Siria,
ni̱ gunïn sij si gataj nej sí judío si da̱gahuiꞌ nej sôꞌ sij,
huê danj ni̱ gananikàj ñûn sij ni̱ gaꞌnaꞌ sij yumanꞌ Macedonia.
4 Ni̱ ginikaj duguiꞌ gàꞌì nej dinï̂nt gaꞌanj nej sôꞌ ngà sij ni̱ huaj Sópater huin daꞌní Pirro,
sôꞌ ꞌna̱ꞌ riñan hioꞌó Berea,
Aristarco,
ni̱ hua̱j sí Huìj i ni̱ nguèj sôꞌ ꞌna̱ꞌ riñan hioꞌó Tesalónica,
Gayo huin sí ꞌna̱ꞌ yumanꞌ Derbe,
ni̱ Timoteo ngà Tíkiko ni̱ Trófimo nej sôꞌ nânj ꞌna̱ꞌ riñan hioꞌó Asia.
5 Ni̱ gaꞌanj si̱nï̱n nej sôꞌ neꞌ ña̱an,
ni̱ ganaꞌhuìj nej sôꞌ nda yumanꞌ snàꞌànj Troas nej ñûnj.
6 Nga ganahuij nej gui yâ nej sij rachrún nitaj si ꞌnï̱nj chru dunuꞌmanꞌan ni̱ gahui nej ñûnj ruhuâ yumanꞌ Filipos,
ni̱ gatûj nej ñûnj gaꞌanj nej ñûnj ruhuâ barku,
ni̱ gachin ùnꞌùnꞌ gui ni̱ ganahuin chre̱ꞌ nej ñûnj ngà nej sij nda yumanꞌ Troas,
ni̱ gahuin ràn nej ñûnj chi̱j gui yumanꞌ dânj.
Ga̱ꞌa̱nj Pablo Troas
7 Ni̱ gui si̱nï̱n nga gayiꞌì semana,
ni̱ màn nùguànꞌan nej ñûnj gaꞌnaꞌ ga̱huin chru̱un guendâ gi̱daꞌa nej ñûnj sena,
ni̱ ni̱kï̱nꞌ Pablo gidigân sôꞌ riñan nej guiì;
dadinꞌ aꞌngô gui dânj ga̱hui̱ sôꞌ ga̱ꞌa̱nj sôꞌ;
ni̱ ûta yèꞌè gaꞌmin sôꞌ ni̱ gahuin ràn sôꞌ nda da̱ꞌa̱j neꞌ ña̱nꞌan gaꞌmin sôꞌ si-nùguànꞌ Ma̱ꞌan Ñaꞌanj an.
8 Ni̱ nìkòꞌ ûta gàꞌì ñaꞌan gudugùun ruhuâ hueꞌ ganataꞌ yàtàꞌ ñan màn chreꞌ nej sij;
9 ni̱ nda huàꞌnï̀nj ganataꞌ hueꞌ ñan nne ꞌngo̱ sí ña̱n gùꞌnàj Eutico,
ni̱ ñan nu̱n Bentana nne sôꞌ,
ni̱ ûta atoj sôꞌ nne sôꞌ hiuj dânj,
dadinꞌ ûta yèꞌè gaꞌmin Pablo si-nùguànꞌ Ma̱ꞌan Ñaꞌanj an,
ni̱ nda ginichre chre sôꞌ gatoj sôꞌ huê danj ni̱ gininj sôꞌ nda riñan hioꞌóo,
ni̱ gàꞌ ꞌngo̱ gahuiꞌ sôꞌ nga ganachi nikaj nej sí màn hiuj dânj.
10 Hiôꞌ ni̱ gananinj Pablo ni̱ gaꞌanj sôꞌ ñan nngaj nîman,
ni̱ gaꞌanj gitàj sôꞌ yiꞌñanj nimân dânj,
ni̱ ganana̱n sôꞌ nimân dânj:
Ni̱ gataj sôꞌ gu̱nïn nej guiì màn hiuj dânj.
—Si̱ guyuꞌhuiꞌ nej suj mánj,
dadinꞌ nun gàhuìꞌ sij mánj.
11 Neꞌ rùkù nga gisîj sôꞌ gaꞌanj sôꞌ hueꞌ tàj yàtàꞌ dânj,
ni̱ gidaꞌa nej sij Sena,
ni̱ gayiꞌì ñûn sôꞌ ni̱ ûta yèꞌè gaꞌmin ñûn sôꞌ si-nùguànꞌ Ma̱ꞌan Ñaꞌanj an ni̱ nda giyigï̀n mánj ganahuij sôꞌ gaꞌmin sôꞌ;
huê danj ni̱ gahui sôꞌ ni̱ gaꞌanj sôꞌ.
12 Ni̱ ganakaj nej sij sí ña̱n gùꞌnàj Eutico ni̱ ni̱ka̱j nej sij gaꞌanj nej sij dukuâ sí nânj,
ni̱ ûta ganahuin nìhiàꞌ ruhuâ nej dinï̂nt.
Troas nne Pablo ni̱ gahui sôꞌ gaꞌanj sôꞌ Mileto
13 Gatûj nej ñûnj ruhuâ barku,
ni̱ gaꞌanj nej ñûnj neꞌ ña̱an,
ni̱ guchiꞌ nej ñûnj nda yumanꞌ Asón guendâ ga̱ꞌa̱nj ga̱na̱ka̱j nej ñûnj Pablo,
dadinꞌ huê danj gaj gataj sôꞌ,
dadinꞌ garanꞌ ruhuâ sôꞌ ga̱che̱ dàkòj sôꞌ.
14 Ni̱ nga ganariꞌ duguiꞌ nej ñûnj ngà Pablo ruhuâ yumanꞌ Asón,
huê danj ni̱ gatûj nej ñûnj ngà sôꞌ ruhuâ barku,
huê danj ni̱ gaꞌanj nej ñûnj yumanꞌ Mitilene.
15 Ni̱ gahui nej ñûnj yumanꞌ Mitilene ni̱ gaꞌanj nej ñûnj,
ni̱ aꞌngô gui dan ni̱ guchiꞌ nej ñûnj neꞌ ri̱ña̱n yumanꞌ Quio,
ni̱ aꞌngô gui dânj gahui nej ñûnj ni̱ gaꞌanj nej ñûnj ni̱ guchiꞌ nej ñûnj yumanꞌ Samos;
ni̱ aꞌngô gui dânj ni̱ guchiꞌ nej ñûnj yumanꞌ gùꞌnàj Mileto.
16 Dadinꞌ ganï̂n ruhuâ Pablo ga̱chi̱n anêj sôꞌ ñan nngaj yumanꞌ snàꞌànj Efeso,
guendâ nun ga̱ranꞌ ruhuâ sôꞌ ga̱huin ràn sôꞌ riñan hioꞌó Asia,
dadinꞌ huin ruhuâ sôꞌ gùchìꞌ sôꞌ giꞌñanj Pentecostés,
asàꞌ huaj gùnùkuaj sôꞌ gùchìꞌ sôꞌ yumanꞌ snàꞌànj Jerusalén.
Gaꞌmin Pablo si-nùguànꞌ Ma̱ꞌan Ñaꞌanj an riñan nej dinï̂nt màn Efeso
17 Ni̱ nga nne Pablo ruhuâ yumanꞌ Mileto,
ni̱ gaꞌnḯn sôꞌ nuguanꞌan gaꞌanj riñan nej dinï̂nt huin si-nùhuì Ma̱ꞌan Jesús nne yumanꞌ snàꞌànj Efeso,
si gaꞌnaꞌ nej sôꞌ yumanꞌ Mileto dadinꞌ hua̱ nuguanꞌ ña̱ꞌa̱n ga̱na̱rï̱snaꞌanj nej sôꞌ.
18 Nga guyumân nej sôꞌ,
ni̱ gataj Pablo gunïn nej sôꞌ:
—Gàꞌ niꞌin nej suj dàj giꞌhiâ nga gané daranꞌ diû siganï̂nj nej suj,
àsìj gui si̱nï̱n nga ganï̂nj dakô riñan hioꞌó Asia,
19 ni̱ daranꞌ diû nga gunânj gi̱tsí riñan Ma̱ꞌan Señor siganï̂nj nej suj ni̱ nun gi̱ꞌhia si ga̱huin ꞌngo̱ sí xi riñan nej suj mánj,
ni̱ ûta dugueꞌé rayiꞌî nej sañun guyumân riñânj,
giꞌhiaj nej sí judío dadinꞌ gayakaj nej sôꞌ daꞌngaꞌa ngàj ni̱ ganï̂n ruhuâ nej sôꞌ da̱gahuiꞌ nej sôꞌ ñùnj;
20 sani̱ gàꞌ danj ni nitaj àmàn guduna si gànàtàj si-nùguànꞌ Ma̱ꞌan Ñaꞌanj an riñan nej suj mánj,
ni̱ gidigân ñan hua ràngàꞌa riñan nej guiì ni̱ gidigán ruhuâ nej hueꞌe,
21 ganatá riñan nej judío ni̱ ganatá riñan nej sí nàsìnùnj un si daꞌhui nej sij ni̱ nànìkàj ruhuâ nej sij ngà rayiꞌî si-ga̱kïnꞌ nej sij riñan Ma̱ꞌan Ñaꞌanj an,
ni̱ gùyùmàn ruhuâ nej sij niꞌin nej sij Ma̱ꞌan Jesús.
22 Hia̱j ni̱ ga̱ꞌa̱n dadinꞌ giꞌhiaj guesâ Ma̱ꞌan Espíritu Santo si ga̱ꞌa̱n yumanꞌ snàꞌànj Jerusalén,
sani̱ nun niꞌín dàj gi̱ranꞌán nga gùchìj hiuj dân mánj;
23 ꞌngo̱ rïn sa niꞌín huin dadinꞌ gàꞌ gataj Ma̱ꞌan Espíritu Santo gunḯn nga huâ daranꞌ nej yumanꞌ snàꞌànj an,
ni̱ gata si nga gùchìj hiuj dânj ni̱ gané dukuâ gaꞌa ni̱ ûta gi̱ranꞌ sàñùnj.
24 Sani̱ nitaj si giriñun ruhuâj rayiꞌî guendâ gàhuìj,
hua̱ nìhiàꞌ ruhuâj guendâ gànàtàj si-nùguànꞌ Ma̱ꞌan Ñaꞌanj an ni̱ hua̱ ruhuâj gi̱ꞌhiaj sûnj si-su̱n Ma̱ꞌan Ñaꞌaj an nda gui gàhuìj,
dadinꞌ huê sun dânj riki Ma̱ꞌan Jesús raꞌá,
si gànàtàj rayiꞌî nuguanꞌ gi̱ꞌhiaj su̱nu̱j ni̱ giꞌhiaj ga̱na̱ni̱n nej guiì.
25 ’Hia̱j ni̱,
niꞌín si gàꞌ si ꞌngo̱ nej suj ri̱ña̱n ganatá si-nùguànꞌ Ma̱ꞌan Ña̱ꞌanj an ni̱ si̱ giniꞌin nej suj riñânj gàꞌ mánj.
26 Huê danj ni̱,
niꞌnï̱nj gaꞌmînj riñan nej suj gui hia̱j,
ni̱ nitaj gakï̱nꞌïn tá yichrâ rayiꞌî nej suj dadinꞌ gàꞌ ganatá si-nùguànꞌ Ma̱ꞌan Ñaꞌanj an riñan daranꞌ nej suj;
27 dadinꞌ nitaj àmàn giyichinꞌ ruhuâj si ga̱ꞌmi̱n daranꞌ nej nuguanꞌ sàꞌ garanꞌ ruhuâ Ma̱ꞌan Ñaꞌanj an dagahuin nej suj mánj.
28 Huê danj,
ni̱ du̱gumîn nej suj ma̱ꞌan nej suj,
ni̱ dugumîn nej suj daranꞌ nej sôꞌ huin si-nùhuì Ma̱ꞌan Jesús,
dadinꞌ Ma̱ꞌan Espíritu Santo ganï̂n si ga̱nikï̱nꞌ nej suj du̱gumîn nej suj si-nùhuì Ma̱ꞌan Señor,
dadinꞌ gàꞌ giꞌhiaj ga̱nanj nga tun daranꞌ nej guiì nìkòꞌ rukuj na̱nj ánj.
29 Dadinꞌ gàꞌ niꞌín si nga neꞌ rùkù nga ga̱ꞌa̱n ni̱ ga̱tu̱ nej sí gidigañuꞌunj siganï̂nj nej suj ni̱ gahuin nej sôꞌ dàj rûnꞌ huin nej yuku stuj u siganï̂nj nej suj,
ni̱ si̱ ginikaj nej sôꞌ nimân nìko rayiꞌî nej sôꞌ nìkòꞌ rukû Ma̱ꞌan Señor mánj.
30 Ni̱ huê siganï̂nj nej suj ga̱hui̱ nej sí ga̱ꞌmi̱n nuguanꞌ digañuꞌunj un guendâ giꞌhiaj nej sôꞌ si nanikòꞌ nej sí gàꞌ gaꞌnaꞌ ga̱huin chru̱un rukû nej sôꞌ.
31 Huê danj ni̱,
hueꞌê du̱gumîn nej suj ma̱ꞌan nej suj,
ni̱ ga̱na̱nun ruhuâ nej suj dadinꞌ huàꞌnï̀nj hioꞌo,
neꞌ ñànꞌan ngà neꞌ gui,
nitaj àmàn giyichinꞌ ruhuâj ni̱ dunaꞌngaj ni̱ ûta gahiu nne riñanj ngà daꞌ goꞌngo̱ nej suj.
32 ’Hia̱j di̱nï̂nj,
ni̱ gununâj rayiꞌî nej suj riñan Ma̱ꞌan Ñaꞌanj an,
ni̱ duguta sùnj nuguanꞌan riñan Ma̱ꞌan Ñaꞌanj an si gi̱ꞌhia sunuj u ngà nej suj,
dadinꞌ ûta nùkuaj Ma̱ꞌan Ñaꞌanj an ni̱ ga̱ꞌhue gi̱ꞌhia si ga̱chi̱j nej suj doj ngà si-nùguànꞌ Ma̱ꞌan Ñaꞌanj an ni̱ ga̱ꞌhue gi̱ꞌhia si gùchìꞌ nej suj ga̱ne nej suj ngà nej sôꞌ gàꞌ nagiꞌhiaj gè Ma̱ꞌan Ñaꞌanj an.
33 Ni̱ gàꞌ nun gàꞌnï̀nj ñânj si-sa̱nꞌa̱nj nej suj,
sa huin plata ngà oro,
ni̱ gàꞌ nun gàꞌnï̀nj ñânj siganꞌ nej suj mánj.
34 Ni̱ gàꞌ niꞌin sàꞌ nej suj si daranꞌ nej sa ga̱chin riñânj ni̱ nej sa gachin riñan nej sôꞌ ni̱ka̱j duguiꞌ ngàj,
ni̱ raꞌá nânj huin sa giꞌhiaj sun ni̱ giriꞌí daranꞌ nej sa ga̱chin riñan nej ñûnj na̱nj ánj.
35 Ni̱ gidigán si hua̱ ni̱ña̱n si giꞌhiaj sunꞌ,
daꞌnga ni̱ gi̱ri̱ꞌ gu̱ru̱gûñuꞌunꞌ riñan nej guiì ranꞌ àko,
ni̱ ga̱na̱nun ruhuâ nej suj nej nuguanꞌ gidigân Ma̱ꞌan Señor Jesús nga gata:
“Dànanj ûta dùgùnàj huaj si gàꞌhuìꞌ siꞌhiôꞌ raꞌa aꞌngô nej guiì gàꞌ daꞌ si ga̱na̱huin ro̱ꞌoꞌ.”
36 Ni̱ nga gisîj gaꞌmin Pablo nej nuguanꞌ nânj,
ni̱ ganïkïn rúdàkòj sôꞌ,
ni̱ gaꞌmin daranꞌ nej sij ngà Ma̱ꞌan Ñaꞌanj an.”
37 Hiôꞌ ni̱ ûta dugueꞌe daranꞌ nej sij;
ni̱ ganana̱n nej sij Pablo ni̱ gaꞌhuiꞌ nej sij ruꞌu yiꞌnḯn riñan sôꞌ,
38 ni̱ ûta gananï̂n ruhuâ nej sij rayiꞌî nej nuguanꞌ gataj sôꞌ gu̱nïn nej sij,
si nitaj àmàn huaj gi̱ni̱ꞌin nej sij riñan sôꞌ gàꞌ.
Ni̱ gaꞌanj nej sij ngà Pablo nda ñan ni̱kï̱nꞌ barku.