Nne Pablo ruhuâ yumanꞌ snàꞌànj Efeso
19
Gahuin nga nï̀nꞌ nne Apolos yumanꞌ snàꞌànj Corinto,
ni̱ gahui Pablo ni̱ gaꞌanj sôꞌ chrej gachín riki kïj ï ni̱ guchi sôꞌ yumanꞌ snàꞌànj Efeso,
ni̱ ganariꞌ sôꞌ gàꞌì nej sí gaꞌnaꞌ gahuin chru̱un,
2 ni̱ gachín naꞌanj sôꞌ nej sí dânj:
—Nga guyumân ruhuâ nej suj ni̱ ganahuin ra̱ꞌa nej suj Ma̱ꞌan Espíritu Santo nîꞌ.
Nanikàj nej sí dânj ni̱ gataj nej sôꞌ:
—Nitaj àmàn gunïn nej ñûnj si hua̱ Ma̱ꞌan Espíritu Santo mánj.
3 Hiôꞌ ni̱ gataj sôꞌ:
—Dàj gataꞌ nne nej suj ràꞌaj.
Ni̱ gataj nej sí dânj:
Gataꞌ nne nej ñûnj dàj rûnꞌ duguataꞌ nne Juan na̱nj ánj.
4 Ni̱ gataj Pablo:
—Ni̱ duguataꞌ nne Juan nej guiì gàꞌ gananikàj ruhuâ rayiꞌî si-ga̱kïnꞌ,
ni̱ gataj sôꞌ gunïn nej guiì yùmànꞌan si daꞌhui ninj ni̱ gùyùmàn ruhuâ ninj niꞌin ninj Ma̱ꞌan sa ga̱ꞌna̱ꞌ neꞌ rùkù sôꞌ,
ni̱ Ma̱ꞌan sa gaꞌnaꞌ neꞌ rùkù sôꞌ,
huin Ma̱ꞌan Jesús ni̱ huej huin Cristo.
5 Nga gunïn nej sij nej nuguanꞌ nânj,
ni̱ gataꞌ nne nej sij ngà siyu̱gui Ma̱ꞌan Jesús.
6 Ni̱ nga gisîj gutaꞌ Pablo raꞌa sôꞌ ahui nej sí nânj,
ni̱ gaꞌnaꞌ Ma̱ꞌan Espíritu Santo riñan nej sij,
ni̱ gayiꞌì nej sij ni̱ gaꞌmin nej sij aꞌngô nej nuguaꞌan,
ni̱ gataj nej sij dàj gahuin nej diû ga̱ꞌna̱ꞌ neꞌ ña̱an.
7 Daranꞌ nej sí gataꞌ nne huin daꞌnga ꞌngo̱ si yùhuìj ranꞌ nej síi.
8 Ni̱ nga gatûj Pablo ruhuâ hueꞌ nuhuî nne hiuj dânj,
ni̱ nitaj si aꞌmin yuꞌhuiꞌ sôꞌ riñan nej guiì ni̱ gidigân sôꞌ daꞌnga ꞌngo̱ si huàꞌnï̀nj ahuii riñan nej guiì màn hiuj dânj,
ni̱ ganarïsnaꞌanj sôꞌ ngà nej guiì dânj ni̱ giꞌhiaj sôꞌ si guyumân ruhuâ nej guiì niꞌin ninj si-nùguànꞌ Ma̱ꞌan Ñaꞌanj an.
9 Sani̱ ganahuin tsì nimân da̱ꞌa̱j nej guiì màn hiuj dânj ni̱ naꞌhuej ruhuâ ninj gùyùmàn ruhuâ ninj,
ni̱ gayiꞌì ninj gaꞌmin aꞌnanꞌ ninj yiꞌî si-chrej Ma̱ꞌan Ñaꞌanj an ni̱ gunïn daranꞌ nej guiì rìgì màn hiuj dânj,
huê danj ni̱ guxun Pablo ma̱ꞌan sôꞌ riñan nej guiì dânj,
ni̱ giꞌhiaj ni̱nï̱n sôꞌ nej sí gaꞌnaꞌ gahuin chru̱n riñan sôꞌ,
ni̱ daꞌ gui ganarïsnaꞌanj sôꞌ ngà nej sí dânj ruhuâ hueꞌ gidigân sí gùꞌnàj Tirano.
10 Ni̱ daꞌnga ꞌngo̱ si huìj hioꞌo ginûn huin sôꞌ gidigân sôꞌ riñan nej judío ni̱ riñan nej sí gaꞌmin nânj griego,
hiôꞌ ni̱ gunïn daranꞌ nej guiì màn Asia si-nùguànꞌ Ma̱ꞌan Jesús.
11 Ni̱ garânj sun Ma̱ꞌan Ñaꞌanj an Pablo ni̱ nda nanè chre ganahuin nej guiì aꞌnanꞌan giꞌhiaj sôꞌ,
12 ni̱ ni̱ka̱j nej guiì màn hiuj dânj mañûn ni̱ siganꞌ nej sí aꞌnanꞌan ni̱ gaganꞌ raꞌa Pablo nej atsîj dânj,
hue danj ni̱ ni̱ka̱j ninj nanꞌ ninj nej atsîj dânj ñan nngaj nej guiì aꞌnanꞌan ni̱ ganahuin nej guiì aꞌnanꞌ,
ni̱ huê danj na̱nj gahui nej nanè kï̱j nu̱n ruhuâ nimân nej guiì.
13 Sani̱ da̱ꞌa̱j nej sí judío,
aché nun ma̱ꞌan gachín nìꞌhiaj si ga̱hui̱ nej nanè kï̱j huaa ruhuâ nimân nej guiì,
ni̱ garânj sun nej sôꞌ siyu̱gui Ma̱ꞌan Jesús,
ni̱ gataj nej sôꞌ:
—Gachín ni̱ꞌhia ngà siyu̱gui Ma̱ꞌan Jesús,
sôꞌ rayiꞌì ganataꞌ Pablo ni̱ ga̱hui̱ nej suj ni̱ ga̱ꞌa̱nj nej suj raj.
14 Ni̱ hua̱ chij daꞌní ꞌngo̱ sí gùꞌnàj Esceva,
ni̱ judío huin sôꞌ,
ni̱ huin sôꞌ sí gaꞌnïnꞌ riñan nej rej,
ni̱ nej daꞌní sôꞌ huin nej sí giꞌhiaj dànanj.
15 Sani̱ nanikàj nanè kï̱j hua dânj ni̱ gata:
—Niꞌín ahuin sa huin Ma̱ꞌan Jesús,
ni̱ niꞌín ahuin sôꞌ huin Pablo;
sani̱ nej suj,
ni̱ ahuin sí huin nej suj ràꞌaj.
16 Ni̱ guêj sí rùhuà nimân nu̱n nanè kï̱j hua dânj yichrá nej sij,
ni̱ gunùkuaj sôꞌ giꞌhiaj ga̱nan sôꞌ nej sij,
ni̱ dànanj nùkuaj sôꞌ doj gàꞌ daꞌ nej sij,
huê danj ni̱ gunânj nej sij ñan nne dukuâ sí dânj ni̱ giranꞌ yiꞌì nej sij ni̱ nnïnj daj hua nej sij giꞌhiaj sôꞌ.
17 Ni̱ giniꞌin daranꞌ nej guiì màn yumanꞌ Efeso dàj gahuin,
ni̱ giniꞌin nej judío,
ni̱ huê danj na̱nj giniꞌin nej sí aꞌmin nânj griego;
ni̱ guyuꞌhui daranꞌ nej sôꞌ ni̱ gaꞌmin hueꞌê nej sôꞌ rayiꞌî Ma̱ꞌan Señor Jesús.
18 Ni̱ gaꞌnaꞌ daranꞌ nej guiì guyumân ruhuâ niꞌin Ma̱ꞌan Señor Jesús,
ni̱ ganataꞌ ninj nej sa giꞌhiaj ninj,
ni̱ ganadigân ninj nej si-ga̱kïnꞌ ninj.
19 Huê danj na̱nj gaꞌnaꞌ ûta gàꞌì nej sí giꞌhiaj sun ngà magia ni̱ ni̱ka̱j nej sôꞌ si-librû nej sôꞌ gaꞌnaꞌ nej sôꞌ,
ni̱ giniꞌin ri̱ña̱n daranꞌ nej guiì gachrîj ñaꞌan nej sôꞌ nej si-librû nej sôꞌ,
ni̱ nga nagiꞌhiaj nej sij guenda dàj nìko sanꞌanj an gahuin duꞌhue nej librû dânj,
ni̱ ganasîj nda huìj xia chi̱ꞌ mîn sanꞌanj plata gahuin duꞌhue nej ñanj dânj.
20 Huê danj na̱nj ûta nùkuaj hua si-nùguànꞌ Ma̱ꞌan Señor ni̱ ûta gahuin gàꞌì nej guiì guyumân ruhuâ niꞌin si-nùguànꞌ Ma̱ꞌan Señor.
21 Neꞌ rùkù nga gahuin nej nânj,
ni̱ ganï̂n ruhuâ nimân Pablo ga̱ꞌa̱nj sôꞌ yumanꞌ snàꞌànj Jerusalén,
neꞌ rùkù nga gisîj gaꞌanj sôꞌ yumanꞌ snàꞌànj Macedonia ngà yumanꞌ snàꞌànj Acaya:
Ni̱ gataj sôꞌ neꞌ rùkù nga gàꞌ gané doj yumanꞌ snàꞌànj Jerusalén,
ni̱ ña̱ꞌa̱n huaj si ga̱ꞌa̱nj gi̱niꞌhia yumanꞌ snàꞌànj Roma.
22 Ni̱ gaꞌnḯn Pablo gaꞌanj Timoteo ngà Erasto yumanꞌ Macedonia dadinꞌ nguèj sôꞌ huin sí guruguñuꞌunj rukû sôꞌ,
ni̱ gahuin ràn sij aꞌngô diû riñan hioꞌó Asia.
Ûta gata rùhuà nej dùguìꞌ Demetrio dinï̂nt Pablo ruhuâ yumanꞌ snàꞌànj Efeso
23 Ni̱ diû dânj ni̱ ûta gata rùhuà nej guiì niꞌin ninj nej dinï̂nt hua̱j si-chrej Ma̱ꞌan Ñaꞌanj an.
24 Dadinꞌ ꞌngo̱ sí gùꞌnàj Demetrio,
ni̱ chru̱n sôꞌ gi̱ꞌhiaj sun sôꞌ agaꞌ plata ni̱ chru̱n sôꞌ giꞌhiaj sôꞌ hueꞌ nuhuî lij ñan nne ñaꞌanj digaꞌñuꞌunj gùꞌnàj Diana,
ni̱ ûta giꞌhiaj ga̱nan nej sí giꞌhiaj sun ngà agaꞌ plata sanꞌanj an ngà sun nânj;
25 ni̱ màn chreꞌ nej sí giꞌhiaj sun ngà agaꞌ plata ngà sôꞌ,
ni̱ gataj sôꞌ gunïn nej sí dânj:
—Gàꞌ niꞌin nej suj di̱nï̂nj si sun nânj huin sa giꞌhiaj ni̱ ûta gahuin yi̱ruꞌhue nêꞌ;
26 sani̱ gàꞌ niꞌin nej suj ni̱ gàꞌ gunïn nej suj si sí gùꞌnàj Pablo,
ni̱ sê man ngà ꞌngo̱ rïn yumanꞌ Efeso nânj,
giꞌhiaj ni̱nï̱n sôꞌ ni̱ giꞌhiaj sôꞌ si guyumân ruhuâ nej guiì,
dadinꞌ daꞌ hua̱ nï̀nꞌ gàchràꞌ riñan hioꞌó Asia,
gataj sôꞌ si sê ñaꞌanj an huin nej sa giꞌhiaj ra̱ꞌa nêꞌ mánj.
27 Ni̱ sê man ꞌngo̱ rïn sun chru̱n nêꞌ gi̱ꞌhiaj nêꞌ hua̱j gi̱rë̱ꞌ nêꞌ mánj,
dadinꞌ huaj gi̱rë̱ꞌ hueꞌ nuhuî ñan nne daꞌanj nêꞌ Diana ni̱ nitaj nùnj gahuin,
dadinꞌ huê riñanj nikaj chre̱j nej guiì màn Asia,
ni̱ ni̱ka̱j chre̱j nej guiì màn nï̀nꞌ gàchràꞌ ruhuâ yumiguìi.
28 Ni̱ nga gunïn nej guiì nej nuguanꞌ nânj,
ni̱ ûta ginaꞌan ruhuâ ninj,
ni̱ gaguâj nùkuaj ninj,
ni̱ gataj ninj:
—Sa nìko huin Diana daꞌanj nej guiì màn yumanꞌ snàꞌànj Efeso.
29 Ni̱ ûta gachej ruhuâ nej guiì màn ruhuâ yumanꞌ snàꞌànj Efeso,
ni̱ gaꞌmin gu̱ña̱n ninj ni̱ gaꞌanj ninj ñan nne hueꞌ nìko ñan ganahuin chre̱ꞌ nej guiì,
ni̱ gidaꞌa ninj ni̱ gunukuaj ninj Gayo ngà Aristarco ni̱ sí ꞌnaꞌ yumanꞌ snàꞌànj Macedonia huin nguèj sôꞌ,
ni̱ nguèj sôꞌ huin sí ni̱ka̱j duguiꞌ ngà Pablo.
30 Ni̱ ganï̂n ruhuâ Pablo ga̱ꞌa̱nj sôꞌ ga̱ꞌmi̱n sôꞌ riñan nej guiì yùmànꞌan,
sani̱ nun ga̱ꞌhue̱j nej sí ꞌna̱ꞌ ga̱huin chru̱n riñan sôꞌ si gi̱di̱gân sôꞌ ma̱ꞌan sôꞌ riñan nej guiì yùmànꞌan.
31 Ni̱ da̱ꞌa̱j nej sí ni̱ka̱j duguiꞌ ngà Pablo,
ni̱ka̱j su̱n riñan hioꞌó Asia,
ni̱ gaꞌnḯn nej sôꞌ ñanj gaꞌanj riñan Pablo ni̱ nun ga̱ꞌhue̱j nej sôꞌ si ga̱tu̱ Pablo ruhuâ hueꞌ yáchìj ñan huin giꞌñanj an.
32 Da̱ꞌa̱j nej guiì màn hiuj dânj,
gaꞌmin ꞌngo̱ nuguanꞌan ni̱ aꞌngô da̱ꞌa̱j ninj gaꞌmin aꞌngô nuguanꞌan,
dadinꞌ gachej ruhuâ nej guiì naraꞌhuiꞌ hiuj dânj,
ni̱ gàꞌ nun niꞌin ninj nùnj huin saj naraꞌhuiꞌ ninj hiuj dânj.
33 Ni̱ giri nej sij siganï̂nj nej guiì rìgì màn hiuj dânj sôꞌ gùꞌnàj Alejandro,
ni̱ guruꞌman raꞌa nej sí judío sôꞌ,
ni̱ gachín nìꞌhiaj sôꞌ ngà raꞌa sôꞌ si dḯn ga̱ne duꞌhua nej guiì,
ni̱ ruhuâ sôꞌ du̱naꞌhuej sôꞌ rayiꞌî sôꞌ riñan nej guiì.
34 Sani̱ nga gananiꞌin nej sí dânj si sí judío huin sí nânj,
ni̱ gayiꞌì nej sôꞌ gaguâj nej sôꞌ daꞌnga ꞌngo̱ si huìj ora ni̱ gataj nej sôꞌ:
—Ûta nìko huin Diana daꞌanj nej sí màn yumanꞌ snàꞌànj Efeso.
35 Hiôꞌ ni̱ nga gunùkuaj siranûn dânj,
giꞌhiaj sôꞌ ganaꞌman ruhuâ nej guiì,
ni̱ gataj sôꞌ:
—Sê gàꞌ niꞌin daranꞌ nej suj màn yumanꞌ snàꞌànj Efeso.
Si daranꞌ nej guiì màn ruhuâ yumiguìi niꞌin si yumanꞌ snàꞌànj huin yiñán nêꞌ huin dugumîn si-nùhuì Diana ra̱ꞌ saj ûnꞌ,
ni̱ sê huej huin ñaꞌanj gaꞌnḯn Jupiter gaꞌnaꞌ yàtàꞌa ràꞌ saj ûnꞌ.
36 Dadinꞌ gàꞌ si ꞌngo̱ síi si gaꞌhue gataj si sê yàngàꞌ huin oꞌ mánj,
huê danj ni̱ ña̱ꞌa̱n huaj si dḯn ga̱ne duꞌhua nej suj,
ni̱ si ûta hio gi̱na̱ꞌan ruhuâ nej suj mánj.
37 Nej sí ni̱ka̱j nej suj gaꞌnaꞌ nej suj nânj,
ni̱ nun ga̱ꞌmi̱n nej sôꞌ yiꞌî daꞌanj nêꞌ ni̱ nun ga̱ta̱ rùhuà nej sôꞌ daꞌanj nêꞌ.
38 Ni̱ si Demetrio ni̱ ngà nej sí giꞌhiaj ñaꞌanj Diana mân unïnꞌ ngà aꞌngô nej síi,
ni̱ ga̱ꞌhue ga̱ra̱n ruhuâ nej sij rayiꞌî duguiꞌ nej sij riñan guesì dadinꞌ huê gue̱nda̱ dan nne sôꞌ guendâ gi̱ꞌhiaj hia sôꞌ rayiꞌî si-nùguànꞌ nej sij.
39 Ni̱ si hua̱ aꞌngô sa ràyìꞌì garanꞌ ruhuâ nej suj,
ni̱ nga ga̱na̱huin chreꞌ aꞌngô nej guesì ni̱ ga̱ꞌhue ga̱chinj riñan nej sôꞌ.
40 Dadinꞌ sa gahuin hia̱j ni̱ ha̱i̱ huaj ni̱ gaꞌhue ga̱ta̱j nej sí ni̱ka̱j suun si màn nêꞌ dugunïnꞌ nej guiì,
dadinꞌ nitaj gakï̱nꞌ ràyìꞌì huaj gìrìꞌ ga̱chru̱nꞌ guendâ ûta gahuin duꞌhua nej suj ngà nej sôꞌ mánj.
41 Ni̱ nga gisîj gataj sôꞌ nej nuguanꞌ nânj,
ni̱ ganaꞌnḯn sôꞌ nanꞌ nej guiì ganaraꞌhuiꞌ hiuj dânj dukuâ ninj.