Gaꞌanj Pablo ruhuâ yumanꞌ snàꞌànj Corinto
18
Neꞌ rùkù nga gahuin nej nânj,
ni̱ gahui Pablo ruhuâ yumanꞌ snàꞌànj Atenas ni̱ gaꞌanj sôꞌ yumanꞌ snàꞌànj Corinto.
2 Ni̱ ganariꞌ sôꞌ ꞌngo̱ sí judío gùꞌnàj Aquila,
ni̱ yiñán sí nânj huin yumanꞌ Ponto,
ni̱ hia̱j nàkà guyumân sôꞌ neꞌ Italia ngà nika sôꞌ Priscila,
dadinꞌ gaꞌnïnꞌ Claudio suun si ga̱hui̱ daranꞌ nej judío ruhuâ yumanꞌ Roma,
ni̱ gaꞌanj Pablo ñan nne nguèj ni̱ka̱ sôꞌ,
3 ni̱ ñan gu̱ña̱n hua sun giꞌhiaj sun nej sij,
ni̱ gunâj Pablo gane sôꞌ ngà nguèj ni̱ka̱ sí nânj,
ni̱ giꞌhiaj sun nùguànꞌan nej sij,
dadinꞌ sun giri nnïnj lona ga̱huin hueꞌe giꞌnïnj nej sij.
4 Ni̱ gui ganarânj ruhuâ ni̱ ganarïsnaꞌanj Pablo ngà nej judío ruhuâ hueꞌ huin nûhui,
ni̱ ngà nej sí aꞌmin nânj griego,
ni̱ giꞌhiaj sij si guyumân ruhuâ nej sôꞌ niꞌin nej sôꞌ Ma̱ꞌan Jesús.
5 Ni̱ nga guyumân Silas ngà Timoteo neꞌ Macedonia,
ni̱ gàꞌ ꞌngo̱ ꞌnïnj yìtï̀nj Pablo ganataꞌ sôꞌ si-nùguànꞌ Ma̱ꞌan Ñaꞌanj an,
ni̱ ganataꞌ sôꞌ si Ma̱ꞌan Jesús huin Ma̱ꞌan Cristo.
6 Sani̱ naꞌhuej ruhuâ nej sí nânj gùyùmàn ruhuâ nej sôꞌ,
ni̱ ûta kï̱j gaꞌmin nej sôꞌ riñan sij,
huê danj ni̱ nagunanꞌ sij siganꞌ sij riñan nej sôꞌ,
ni̱ gataj sij gu̱nïn nej sôꞌ:
—Hia̱j ni̱ gitàj si-ga̱kïnꞌ nej suj yichrá nej ma̱ꞌan nej suj;
dadinꞌ ñùnj ni̱ nitaj gakï̱nꞌïn nikâ mánj;
ni̱ àsìj gui hia̱j ni̱ ga̱ꞌa̱nj gànàtàj si-nùguànꞌ Ma̱ꞌan Ñaꞌanj an riñan nej sí nàsìnùnj un.
7 Ni̱ gahui sij ruhuâ hueꞌ nûhui nne hiuj dânj,
ni̱ gaꞌanj sij dukuâ ꞌngo̱ sí gùꞌnàj sa ni̱ka̱a dadinꞌ dànanj gùꞌnàj sôꞌ,
ni̱ huin sôꞌ ꞌngo̱ sí nnùn ña̱ꞌanj riñan Ma̱ꞌan Ñaꞌanj an,
ni̱ nne nìchrùnꞌ dukuâ sôꞌ ngà hueꞌ huin nûhui nne hiuj dânj.
8 Ni̱ guyumân ruhuâ Crispo,
ngà daranꞌ nej duguiꞌ sôꞌ niꞌin nej sôꞌ Ma̱ꞌan Jesús,
ni̱ huin sôꞌ ꞌngo̱ sí huin ña̱n ni̱kï̱nꞌ riñan hueꞌ nûhui nne hiuj dânj;
ni̱ ûta gàꞌì nej sí màn yumanꞌ snàꞌànj Corinto gunïn si-nùguànꞌ Ma̱ꞌan Ñaꞌanj an ni̱ guyumân ruhuâ nej sôꞌ niꞌin nej sôꞌ Ma̱ꞌan Jesús,
ni̱ gataꞌ nne nej sôꞌ.
9 Ni̱ neꞌ ñànꞌ dânj ni̱ ganïkïnꞌ Ma̱ꞌan Señor riñan Pablo ni̱ gata gu̱nïn sôꞌ:
—Si̱ guyuꞌhuîꞌ mánj,
du̱guꞌnïnꞌ ga̱ꞌmi̱nꞌ riñan nej sij.
Ni̱ si̱ gaꞌnïnꞌ ruhuâ si ga̱ꞌmi̱nꞌ mánj;
10 Dadinꞌ nné ngàꞌ,
ni̱ si ganûn raꞌa gàꞌ si ꞌngo̱ nej sij sòꞌ ni̱ si gaꞌhue gi̱ꞌhiaj nej sij sa yiꞌìi ngàꞌ,
dadinꞌ ûta gàꞌì nej guiì nne ruhuâ yumanꞌ snàꞌànj nânj hua yu̱gui guendâ ga̱na̱huin ra̱ꞌa ninj si-nùguànꞌànj.
11 Ni̱ gahuin ràn sij ꞌngo̱ hioꞌo tá ané ruhuâ yumanꞌ snàꞌànj nânj,
guendâ gidigân sij si-nùguànꞌ Ma̱ꞌan Ñaꞌanj an.
12 Neꞌ rùkù doj diû nga gahuin Galión gobernador riñan hioꞌó Acaya,
ni̱ gaꞌmin gu̱ña̱n nej sí judío ni̱ garânj ruhuâ nej sôꞌ yiꞌî Pablo riñan nej sí nânj,
ni̱ ni̱ka̱j nej sôꞌ Pablo gaꞌanj nej sôꞌ riñan guesì,
13 ni̱ gataj nej sij gu̱nïn gobernador:
—Giꞌhiaj guesâ sí nânj si gùyùmàn ruhuâ nej guiì ni̱ ginùn ña̱ꞌa̱nj ninj riñan Ñaꞌanj an,
sani̱ nitaj si gaꞌnï̂nj si-ley nej ñûnj si gi̱ꞌhiaj sij dànanj mánj.
14 Sani̱ nga hia̱j giꞌhiaj Pablo ga̱ꞌmi̱n sôꞌ,
ni̱ gataj Galión gunïn nej sí judío naraꞌhuiꞌ hiuj dânj:
—Nitaj si gi̱ꞌhia gànàrïsnaꞌan rayiꞌî nuguanꞌ nan ngà nej suj mánj,
dadinꞌ sê nîman dagahuiꞌ sí nânj mánj.
15 Ni̱ si man rayiꞌî nuguaꞌan,
ngà rayiꞌî siyu̱gui Jesús,
ni̱ rayiꞌî si-ley nej suj huin ruꞌhuaj,
ni̱ gi̱ꞌhiaj hia nej ma̱ꞌan nej suj;
dadinꞌ ñùnj ni̱ nun ga̱ranꞌ ruhuâj ga̱huín guesì rayiꞌî nej nuguanꞌ nânj mánj.
16 Huê danj ni̱ giri Galión daranꞌ nej sij ruhuâ dukuâ si-su̱n sôꞌ.
17 Huê danj ni̱ gidaꞌa nej judío,
sí gùꞌnàj Sóstenes,
ni̱ huin sôꞌ sí ni̱ka̱j su̱n riñan hueꞌ huin nûhui nne hiuj dânj,
ni̱ gaꞌhuiꞌ nej sôꞌ niꞌhiaj sí nânj riñan dukuâ si-su̱n guesì;
sani̱ nun ga̱ya̱ka̱j guendâ Galión sa gahuin neꞌ ye̱ꞌ dukuâ si-su̱n sôꞌ.
Gunumân Pablo Antioquía ni̱ gayiꞌî sôꞌ gaꞌanj sôꞌ dukuán huàꞌnï̀nj nej país gaꞌanj si̱nï̱n sôꞌ
18 Sani̱ gahuin ràn Pablo aꞌngô diû ruhuâ yumanꞌ snàꞌànj Corinto,
neꞌ rùkù ni̱ giꞌhiaj yu̱gui sôꞌ ga̱ꞌa̱nj sôꞌ ni̱ gidaꞌa sôꞌ raꞌa nej dinï̂nt ni̱ gatûj sôꞌ ruhuâ barku ni̱ gaꞌanj sôꞌ riñan hioꞌó Siria,
ni̱ gaꞌanj Priscila ngà Aquila ngà sôꞌ,
ni̱ nga gatûj nej sij ruhuâ yumanꞌ Sencrea,
ni̱ gaka sij huê màn ahui sij,
dadinꞌ gataj sij si hua̱ ꞌngo̱ sa ga̱ꞌhui̱ sij riñan Ma̱ꞌan Ñaꞌanj an.
19 Huê danj ni̱ nga guchiꞌ nej sij yumanꞌ snàꞌànj Efeso,
ni̱ gudunâj sij ñan màn nej barku Priscila ngà Aquila;
ni̱ gatûj sij ruhuâ hueꞌ nuhuî nne hiuj dânj,
ni̱ ganarïsnaꞌanj sij ngà nej judío,
20 ni̱ gachín niꞌhiaj nej judío màn hiuj dânj riñan sij si gùnàj sij ga̱ne sij aꞌngô diû ngà nej sôꞌ ruhuâ yumanꞌ snàꞌànj nânj;
sani̱ nun ga̱ꞌhue̱j sij gùnàj sij mánj.
21 Ni̱ gidaꞌa sij raꞌa nej sôꞌ,
ni̱ gataj sij gu̱nïn nej sô:
—Ña̱ꞌa̱n huaj gàꞌàn yumanꞌ snàꞌànj Jerusalén nga gùyùmàn giꞌñanj gi̱nun hiuj dânj;
Sani̱ si Ma̱ꞌan Ñaꞌanj an garanꞌ ruhuâ ni̱ nànìkàj ñûn gàꞌnàj ñan màn nej suj.
Huê danj ni̱ gatûj sij ruhuâ barku ni̱ gudunâj sij yumanꞌ Efeso ni̱ gaꞌanj sij riñan hioꞌó Siria.
22 Ni̱ guchiꞌ sij yumanꞌ snàꞌànj Sesarea,
ni̱ gaꞌanj ga̱ꞌmi̱n sij ngà nej dinï̂nt huin si-nùhuì Ma̱ꞌan Jesús nne hiuj dânj,
ni̱ neꞌ rùkù ni̱ gaꞌanj sij yumanꞌ snàꞌànj Antioquía.
23 Ni̱ gahuin ràn sij ꞌngo̱ diû hiuj nânj,
huê danj ni̱ gahui sij,
ni̱ gaꞌanj gi̱niꞌhiaj sij daꞌ nìkòꞌ duguiꞌ nej yumanꞌ ni̱ka̱j ñuꞌunj hioꞌó Galacia ngà hioꞌó Frigia,
ni̱ nagiꞌhiaj nùkuaj sij ruhuâ nej dinï̂nt nìkòꞌ rukû Ma̱ꞌan Jesús.
Ganataꞌ Apolos si-nùguànꞌ Ma̱ꞌan Ñaꞌanj an riñan nej guiì màn Efeso
24 Hiôꞌ ni̱ guchiꞌ ꞌngo̱ sí judío gùꞌnàj Apolos ruhuâ yumanꞌ snàꞌànj Efeso,
ni̱ yiñán sôꞌ huin yumanꞌ Alejandría,
ni̱ ûta hueꞌê gananï̂n sôꞌ si-nùguànꞌ Ma̱ꞌan Ñaꞌanj an riñan nej guiì ni̱ ûta chru̱n sôꞌ si-nùguànꞌ Ma̱ꞌan Ñaꞌanj an.
25 Ni̱ ûta hueꞌê gidigân sôꞌ nej dinï̂nt rayiꞌî Ma̱ꞌan Jesús;
ni̱ ûta nìhiàꞌ hua ruhuâ sôꞌ,
ni̱ ûta hueꞌê ganataꞌ sôꞌ rayiꞌî Ma̱ꞌan Señor riñan nej guiì,
sani̱ man ꞌngo̱ rïn sa niꞌin sôꞌ huin rayiꞌî guendâ duguataꞌ nne Juan nej guiì.
26 Gayiꞌì sôꞌ ni̱ gaꞌmin sôꞌ riñan nej guiì ruhuâ hueꞌ nuhuî nne hiuj dânj ni̱ nitaj si yuꞌhuiꞌ sôꞌ gànàtàꞌ sôꞌ si-nùguànꞌ Ma̱ꞌan Ñaꞌanj an riñan nej guiì;
sani̱ nga gunïn Priscila ngà Aquila sa gaꞌmin sôꞌ,
ni̱ gakḯn anêj nguèj ni̱ka̱ sôꞌ sij ni̱ gidigân hueꞌê nguèj ni̱ka̱ sôꞌ si-chrej Ma̱ꞌan Ñaꞌanj an riñan sij.
27 Ni̱ ganï̂n ruhuâ sôꞌ ga̱chi̱n sôꞌ ga̱ꞌa̱nj sôꞌ yumanꞌ Acaya,
ni̱ duguꞌnïnꞌ nej dinï̂nt rukû sôꞌ,
ni̱ gachrûn nej sôꞌ ꞌngo̱ ñanj karta nikaj sôꞌ huaj sôꞌ riñan nej dinï̂nt màn yumanꞌ dânj;
ni̱ nga guchiꞌ sôꞌ yumanꞌ dânj,
ni̱ ûta nagaꞌhuiꞌ sôꞌ chrej nùkuaj ruhuâ riñan nej dinï̂nt gàꞌ guyumân ruhuâ;
28 ni̱ ri̱ña̱n gaꞌmin sôꞌ ngà nej judío nun gùyùmàn ruhuâ niꞌin Ma̱ꞌan Jesús,
ni̱ nadigân sôꞌ riñan ñanj si-nùguànꞌ Ma̱ꞌan Ñaꞌanj an si Ma̱ꞌan Jesús huin Cristo.