Ganataꞌ Juan Bautista si-nùguànꞌ Ma̱ꞌan Ñaꞌanj an riñan nej guiì
3
Nej gui dânj gaꞌnaꞌ Juan Bautista ni̱ ganataꞌ sôꞌ si-nùguànꞌ Ma̱ꞌan Ñaꞌanj an riñan nej guiì màn riñan hioꞌó nàkò huin Estado Judea.
2 Ni̱ gataj sôꞌ:
—Nànìkàj ruhuâ nej suj rayiꞌî si-ga̱kïnꞌ nej suj,
dadinꞌ gàꞌ gahuin nìchrùnꞌ Ma̱ꞌan sa ni̱ka̱j su̱n yàtàꞌa.
3 Huê rayiꞌî sí nânj huin sa gaꞌmin Isaias sôꞌ gataj dàj ga̱huin,
nga gataj sôꞌ:
Gu̱nïn nej suj gaꞌmin nùkuaj ꞌngo̱ sí dânj riñan hioꞌó hua̱ nàkòo:
“Na̱gi̱ꞌhiaj ni̱ka̱ nej suj ma̱ꞌan nej suj;
dàj rûnꞌ garanꞌ ruhuâ Ma̱ꞌan Señor.”
4 Ni̱ nu̱n Juan ꞌngo̱ atsîj huin duhuê yuku kameyu,
ni̱ ꞌnï̱nj nnïnj gatï̀n sôꞌ;
ni̱ yâ sôꞌ yirikí staꞌna̱j a ngà gatsiꞌ màn riki kïj ï.
5 Ni̱ ꞌna̱ꞌ nej guiì màn Jerusalén,
ni̱ ꞌna̱ꞌ daranꞌ nej guiì màn Estado Judea,
ni̱ ꞌna̱ꞌ daranꞌ nej yumanꞌ màn ganikàj rukû kïn Jordán riñan sôꞌ,
6 Ni̱ ganataꞌ nej guiì dânj si-ga̱kïnꞌ ninj,
ni̱ duguataꞌ nne sôꞌ ninj ruhuâ kïn Jordán.
7 Ni̱ nga giniꞌin Juan si ûta gàꞌì nej sí fariseo ngà nej sí saduseo gaꞌnaꞌ gàtàꞌ nne riñan sô,
ni̱ gataj sôꞌ:
—Dàj rûnꞌ giꞌhiaj nej yìꞌnï̀nꞌ yukuáa nga gunânj nej xuj riñan sañuun huê danj giꞌhiaj nej suj ni̱ ahuin si gataj si gu̱na̱nj nej suj riñan sañun ꞌna̱ꞌa ràꞌaj.
8 Gi̱di̱gân nej suj,
si hia gùrùguìꞌ hueꞌê sa sàꞌ giꞌhiaj nej suj,
si yàngàꞌ hia gàꞌ gananikàj ruhuâ nej suj rayiꞌî si-ga̱kïnꞌ nej suj,
9 ni̱ si̱ ganï̂n ruhuâ nej suj ngà ruhuâ nimân nej suj:
“Si Abraham huin rej nej suj”;
dadinꞌ ñùnj taj si Ma̱ꞌan Ñaꞌanj an ni̱ ga̱ꞌhue ga̱na̱chi nika daꞌní Abraham siganï̂nj nej hiëj nânj.
10 Ni̱ gàꞌ hua̱ yu̱gui agaꞌ aꞌneꞌ chrun nga guendâ ga̱ꞌnej hiaꞌa nej chrun;
hia̱j rûꞌhuaj ni̱ daranꞌ nej chrun nitaj si gahiu chruj sàꞌa raa̱ ni̱ gìyìꞌnej ni̱ ga̱ꞌan riñan ñaꞌaan.
11 Ñùnj ni̱ yàngàꞌ hia duguataꞌ nnêj ruhuâ nnee nej suj guendâ gàꞌ nànìkàj ruhuâ nej suj rayiꞌî nej si-ga̱kïnꞌ nej suj;
sani̱ Ma̱ꞌan sa ꞌna̱ꞌ neꞌ rùkùj,
ni̱ nàꞌàj ñânj gìrìj kanj ꞌnï̱nj dako, dadinꞌ ûta nikaj sunj gàꞌ daꞌ ñùnj; ni̱ Ma̱ꞌan du̱guataꞌ nne ngà Ma̱ꞌan Espíritu Santo ni̱ ngà ñaꞌaan nej suj.
12 Ni̱ ꞌnï̱nj ꞌngo̱ hué ña̱ꞌa̱an raꞌa,
guendâ na̱gi̱ꞌhiaj sàꞌaj si-trigûj siganï̂nj nej akòo; ni̱ nej trigû gàꞌ ganahuin sàꞌ ni̱ ga̱na̱ꞌchra sàꞌaj ruhuâ ꞌngo̱ guchrùu, ni̱ ga̱chri̱ ñaꞌan nej akòo riñan ñaꞌan nitaj àmàn gìnàꞌàj.
Gataꞌ nne Ma̱ꞌan Señor Jesús
13 Hiôꞌ ni̱ neꞌ Galilea gaꞌnaꞌ Ma̱ꞌan Jesús ni̱ guyumanj ñan ꞌna̱ꞌ kïn Jordán,
dadinꞌ hiuj dânj nun Juan duguataꞌ nne sôꞌ nej guiì, ni̱ ruhuaj si du̱guataꞌ nne sôꞌ Ma̱ꞌan.
14 Sani̱ naꞌhuej ruhuâ Juan du̱guataꞌ nne sôꞌ Ma̱ꞌan,
ni̱ gataj sôꞌ:
—Ñùnj daꞌhui gàtàꞌ nne gi̱ꞌhiaj Maꞌân rèꞌ, ni̱ ruhuâ rèꞌ si du̱guataꞌ nnêj Maꞌân rèꞌ na̱nj nîꞌ.
15 Sani̱ nanikàj Ma̱ꞌan Jesús ni̱ gata:
—Du̱guataꞌ nne sòꞌ ñùnj hia̱j, dadinꞌ huê dànanj daꞌhuiꞌ ga̱da̱gahuinꞌ daranꞌ sa ni̱ka̱a.
Hiôꞌ ni̱ garânj yina Juan ni̱ du̱guataꞌ nne sôꞌ Ma̱ꞌan Jesús.
16 Ni̱ neꞌ rùkù,
nga gisîj gataꞌ nne Ma̱ꞌan Jesús, ni̱ gahui ruhuâ nnee; ni̱ ganayiꞌnï̀nj nej yàtàꞌa, ni̱ giniꞌin gininj si-Espíritu Ma̱ꞌan Ñaꞌanj an gaꞌnaj ni̱ huaj dàj rûnꞌ hua yaꞌàan, ni̱ gaꞌnaj ni̱ gataj ahui Ma̱ꞌan Jesús.
17 Ni̱ gaꞌmin Ma̱ꞌan Ñaꞌanj an nda neꞌ yàtàꞌa,
ni̱ gata:
—Huê nânj huin daꞌnî ni̱ ûta ꞌì ruhuâj niꞌín Ma̱ꞌan,
ni̱ ûta garanꞌ ruhuâj niꞌín Ma̱ꞌan.