Duguaneꞌ sichre gakï̱nꞌïn riñan Ma̱ꞌan Jesús
4
Hiôꞌ ni̱ ginikaj Ma̱ꞌan Espíritu Santo gaꞌan Ma̱ꞌan Jesús riñan hioꞌó hua̱ nàkòo, guendâ ga̱ya̱ka̱j sa nàsàꞌa daꞌngaꞌa ngà Ma̱ꞌan.
2 Ni̱ ga gi̱ni̱ne̱j Ma̱ꞌan Jesús huìj xia gui ni̱ huìj xia ñaꞌan, ni̱ neꞌ rùkù ni̱ ganachinj yiꞌnaa riki Ma̱ꞌan.
3 Ni̱ gaꞌnaꞌ sichre duguaneꞌ gakï̱nꞌïn riñan Ma̱ꞌan Jesús, ni̱ gata:
—Si huînꞌ Daꞌní Ma̱ꞌan Ñaꞌanj an, ni̱ ga̱ta̱j sòꞌ gu̱nïn nej hiëj nânj si ga̱na̱huin ninj rachrúun.
4 Nanikàj Ma̱ꞌan Jesús ni̱ gata:
—Huê danj nnunj riñan ñanj: “Ni̱ sê man ꞌngo̱ rïn rachrúun ga̱ꞌhue gi̱ꞌhiaj ga̱ nìꞌnàꞌ síi, dadinꞌ ga̱ꞌhue ga̱ nìꞌnàꞌ sij ngà daranꞌ nej nuguanꞌ ga̱hui̱ ruhuâ duꞌhua Ma̱ꞌan Ñaꞌanj an na̱nj ánj.”
5 Hiôꞌ ni̱ ginikaj sa nàsàꞌa gaꞌan Ma̱ꞌan Jesús ñan nngaj yumanꞌ snàꞌànj gèe, ni̱ ganïnj nda raa̱ sìhià hueꞌ huin nûhui Ma̱ꞌan Jesús,
6 Ni̱ gata:
—Si huînꞌ Daꞌní Ma̱ꞌan Ñaꞌanj an, hiôꞌ ni̱ gue̱j sòꞌ nìkàꞌ man; dadinꞌ huê danj nnunj riñan ñanj:
Ni̱ gàꞌnï̀nj Ma̱ꞌan Ñaꞌanj an nej ángel ga̱ꞌna̱ꞌ ninj riñanꞌ,
ni̱ ngà raꞌa ninj gàràꞌhuèꞌ ninj sòꞌ,
daꞌnga ni̱ si̱ geꞌë̂j dakót ngà nej hiëj mánj.
7 Ni̱ gataj Ma̱ꞌan Jesús:
—Huê danj nnunj riñan ñanj: “Ni̱ si̱ gaꞌhue ga̱ya̱ka̱j daꞌngaꞌa ngà Ma̱ꞌan Señor huin Daꞌanjt mánj.”
8 Ginikaj sa nàsàꞌa gaꞌan aꞌngô ñûn Ma̱ꞌan Jesús raa̱ ꞌngo̱ kïj ûta yàkàan, ni̱ gidiganj daranꞌ nej yumanꞌ màn ruhuâ yumiguìi ni̱ dàj nìko hua nej yumanꞌ dânj.
9 Ni̱ gata:
—Daranꞌ nej nânj rìkìj raꞌâꞌ, si ga̱nikïnꞌ rúdàkòjꞌ ni̱ ginùn ña̱ꞌa̱njꞌ ñùnj.
10 Hiôꞌ ni̱ gataj Ma̱ꞌan Jesús:
—Gui̱j, sichre sòꞌ, dadinꞌ huê danj nnunj riñan ñanj: “Ni̱ riñan Ma̱ꞌan Señor huin Daꞌanjt ginùn ña̱ꞌa̱njꞌ, ni̱ ꞌngo̱ rïn riñan Ma̱ꞌan gu̱na̱nj gi̱tsîꞌ.”
11 Hiôꞌ ni̱ guxun sa nàsàꞌa ma̱ꞌan riñan Ma̱ꞌan Jesús, ni̱ gaꞌnaꞌ nej ángel ni̱ gunânj gi̱tsi ninj riñan Ma̱ꞌan Jesús.
Gayiꞌì Ma̱ꞌan Jesús ganataj si-nùguànꞌ Ma̱ꞌan Ñaꞌanj an
12 Ni̱ nga gunïn Ma̱ꞌan Jesús gatûj Juan dukuâ gaꞌa, ni̱ nanikàj Ma̱ꞌan gaꞌnaj riñan hioꞌó Galilea;
13 Ni̱ guduna yumanꞌ Nazaret, ni̱ gaꞌnaj ni̱ gane Kapernaúm, yumanꞌ snàꞌànj nngaj duꞌhua nne ña̱ꞌa̱nj, huin doꞌó Zabulón ngà Neftalí,
14 ni̱ gisîj nuguanꞌ gataj Isaias sôꞌ gataj dàj gahuin nga gaꞌmin sôꞌ:
15 Doꞌó Zabulón ngà doꞌó Neftalí,
chrej hua̱j duꞌhua nne ña̱ꞌa̱nj, neꞌ ané kïn Jordán,
Galilea ñan màn nej sí nàsìnùnj un;
16 Yumanꞌ giꞌhiaj gakï̱nꞌïn ni̱ gi̱ni̱ꞌin sa ûta nìko giꞌhiaj yigï̀n;
ni̱ nej guiì nne riñan gakï̱nꞌïn ni̱ gàꞌ gahuiꞌ ninj rayiꞌî si-ga̱kïnꞌ ninj,
sani̱ gìyìgï̀n riñan ninj gi̱ꞌhiaj sa yigï̀ïn.
17 Hiôꞌ ni̱ àsìj nej gui dânj ni̱ gayiꞌì Ma̱ꞌan Jesús ni̱ ganataj si-nùguànꞌ Ma̱ꞌan Ñaꞌanj an, ni̱ gata:
—Gànànìkàj ruhuâ nej suj rayiꞌî si-ga̱kïnꞌ nej suj, dadinꞌ gàꞌ gahuin nichrunꞌ Ma̱ꞌan sa ni̱ka̱j su̱n neꞌ yàtàꞌa.
Gakḯn Ma̱ꞌan Jesús gi̱nikòꞌ nej ga̱ꞌânj sí ꞌnï̱nj sun giri yukuaj a rukuj
18 Gaché nun Ma̱ꞌan Jesús nìchrùnꞌ duꞌhua nne ña̱ꞌa̱nj gùꞌnàj Galilea, ni̱ giniꞌin nguèj dìnï̀nj sí dânj, ꞌngo̱ sôꞌ huin Simón, ni̱ huê sôꞌ huin sí gùꞌnàj Pedro, ni̱ aꞌngô sôꞌ huin Andrés, ni̱ nu̱n nguèj dìnï̀nj sôꞌ gaꞌnḯn nguèj sôꞌ nnanj giri yukuaj a ruhuâ nne ña̱ꞌa̱nj; dadinꞌ sun giri yukuaj a giꞌnïnj nguèj dìnï̀nj sôꞌ.
19 Ni̱ gataj Ma̱ꞌan Jesús gu̱nïn nguèj sôꞌ:
—Ga̱ꞌna̱ꞌ nguèj suj ni̱ gi̱nikòꞌ nguèj suj rukû Maꞌán, ni̱ gi̱ꞌhia si ga̱huin nguèj suj sí gìrìꞌ nej síi gi̱nikòꞌ rukû Maꞌán.
20 Hiôꞌ ni̱ nda nanè chre ni̱ gudunâj nguèj sôꞌ nnanj giri yukuaj a, ni̱ gi̱nikòꞌ nguèj sôꞌ gaꞌanj nguèj sôꞌ rukû Ma̱ꞌan Jesús.
21 Ni̱ gachinj hiuj dânj, ni̱ giniꞌin ahuîj dìnï̀nj sí dânj, ni̱ ꞌngo̱ sôꞌ huin Jacobo, ni̱ aꞌngô sôꞌ huin Juan, ni̱ nne nguèj sôꞌ ngà Zebedeo rej nguèj sôꞌ ruhuâ barku, dadinꞌ si̱ ganachrâj nej sôꞌ nnanj mân nej sôꞌ, ni̱ gakḯn Ma̱ꞌan Jesús gaꞌnaꞌ nguèj sôꞌ.
22 Ni̱ nda nanè chre gudunâj nguèj sôꞌ, barku ngà rej nguèj sôꞌ, ni̱ gi̱nikòꞌ nguèj sôꞌ gaꞌanj nguèj sôꞌ rukû Ma̱ꞌan Jesús.
Gidigân Ma̱ꞌan Jesús ûta gàꞌì nej guiì
23 Ni̱ gaché Ma̱ꞌan Jesús gaꞌan nï̀nꞌ gàchràꞌ riñan hioꞌó Galilea, ni̱ gidiganj si-nùguànꞌ Ma̱ꞌan Ñaꞌanj an ruhuâ hueꞌ si-nùhuì nej sij, ni̱ gaꞌmin nuguanꞌ gi̱ꞌhiaj ga̱na̱ni̱n nej sij riñan gakï̱nꞌïn, ni̱ giꞌhia si ga̱na̱huin daranꞌ nej guiì aꞌngaj ngà nneè kú ruhuâ yumanꞌ dânj.
24 Ni̱ gayaꞌnï̀n sa sàꞌ giꞌhiaj Ma̱ꞌan Jesús nï̀nꞌ gàchràꞌ riñan hioꞌó Siria, ni̱ ginikaj nej sij daranꞌ nej guiì aꞌngaj nneè kú, ngà nej guiì giranꞌ sa̱ñu̱n giꞌhiaj gàꞌì nej yiꞌìi ni̱ nej guiì giranꞌ sa̱ñu̱n giꞌhiaj nanè kï̱j hua, ni̱ nej guiì nne nanè kï̱j huaa ruhuâ nimân, ni̱ nej guiì dagahuiꞌ ꞌhuij ni̱ nej guiì naꞌhue gìsìkìꞌ nneè kú; ni̱ giꞌhia si ga̱na̱huin daranꞌ nej guiì dânj.
25 Ni̱ ginikòꞌ ûta gàꞌì nej guiì màn Galilea gaꞌnaꞌ ninj rukû Ma̱ꞌan Jesús, ni̱ huê danj na̱nj gaꞌna nej guiì màn Decápolis, nej guiì màn Jerusalén ni̱ nej guiì màn Judea ni̱ nej guiì màn ané duꞌhua kïn Jordán.